[1] Ama misk'akunaykichispaqmi chaykunataqa nirqaykichis.
[2] Judío runakunaq huñukunanku wasikunamantan qarqosunkichis. Pipas qankunata wañuchispasunkichis, Diosta serbinanpaq yuyaykunanku oraqa hamushanmi.
[3] Yayaytapas, ñoqatapas mana reqsiwasqankuraykun, chaytaqa ruwanqaku.
[4] Ichaqa, chay ora chayamuqtin, qankunaman ña nisqaykunamanta yuyarinaykichispaqmi chaykunataqa nirqaykichis. Ñoqaqa, qankunawanmi kasharqani. Chaymi chaytaqa mana qallariymantapachachu nirqaykichis, nispa.
[5] Nillarqantaqmi: —Kunanmi ichaqa, kachamuwaqniyman ripusaq, manataqmi qankunamanta mayqenniykichispas tapuwankichischu: ‘¿Mayman- mi rishanki?’ nispaykichisqa.
[6] Aswanmi, qankunaman chay nisqayrayku, sonqoykichis sinchi llakisqa kashan.
[7] Ñoqan ichaqa, cheqaqta niykichis: ‘Manachus ripusaq chayqa, manan Kallpachaq qankunaman hamunmanchu. Sitaqchus ñoqa ripusaq chayqa, paytan qankunaman kachamusaq. Chayraykun, ripunayqa allinniykichispaqpuni kanqa.
[8] Hamuspantaqmi, Kallpachaqqa kay pachapi runakunata huchamanta, chanin kaqmanta, hinallataq chaninchaymanta reparachinqa.
[9] Ñoqapi mana iñisqankuraykun, huchamantaqa reparachinqa.
[10] Yayaymanmi ripusaq, hinan mana aswantaqa rikuwankichisñachu. Chaymi chanin kaqmantaqa reparachinqa.
[11] Kay pachapi kamachikuqqa ñan huchachasqaña kashan. Chaymi Kallpachaqqa chaninchaymanta reparachinqa.
[12] Askha imaymanakunaraqmi qankunaman ninaypaq kashan. Kunantaq ichaqa, mana chaskiyta atiwaqchisraqchu.
[13] Cheqaq Espíritu hamuspantaqmi, tukuy cheqaq kaqman payqa pusasunkichis. Manan pay kikinmantachu rimanqa. Aswanpas tukuy uyarisqantan rimanqa. Hinan imaymana hamunanmanta willasunkichis.
[14] Ñoqaqmanta chaskisqantan payqa willasunkichis. Chaymi payqa ñoqata hatunchawanqa.
[15] Yayaypa tukuy kaqninqa ñoqaqmi. Chayraykun nirqaykichis: ‘Ñoqaqmanta chaskisqantan willasunkichis,’ nispa.
[16] Yayaymanmi rishani. Chaymi pisi tiempollamanta manaña rikuwankichisñachu. Chaymantañan, wakmanta pisi tiempollamanta rikullawankichistaq, nispa.
[17] Hinaqtinmi wakin yachachisqankunaqa paykunapurapi ninakurqanku: —Payqa niwarqanchismi: ‘Yayaymanmi rishani. Chaymi pisi tiempollamanta, manaña rikuwankichisñachu. Chaymantañan wakmanta pisi tiempollamanta rikullawankichistaq,’ nispan. ¿Chayta niwaspanchisri, imaninantataq nin? nispanku.
[18] Nillarqankutaqmi: —Payqa nillawarqanchistaqmi: ‘Pisi tiempollatan,’ nispa. ¿Chayta nispanri imaninantataq nin? Chay nisqantaqa manamá entiendinchischu, nispanku.
[19] Paykunaqa tapukuytan munasharqanku. Chayta repararuspantaqmi, Jesusqa paykunata nirqan: —Nirqaykichismi: ‘Pisi tiempollamantan, manaña rikuwankichisñachu. Chaymantañan wakmanta pisi tiempollamanta rikullawankichistaq,’ nispay. ¿Chayta nisqaymantachu qankunapurapi tapunakushankichis?
[20] Cheqaqta, cheqaqtan niykichis: ‘Qankunaqa waqankichis, hinallataq waqapakunkichismi,’ nispay. Kay pachapi runan ichaqa, kusikunqa. Qankunaqa llakikunkichismi, ichaqa chay llakikuyniykichisqa ancha kusikuymanmi tukupunqa.
[21] Onqoq warmiqa, onqokunan ora chayamusqanraykun, ñak'arin. Wawata onqorukusqan qhepamanmi ichaqa, kay pachapi huk wawaq nasesqanmanta kusikusqanrayku, ñak'arisqantapas manaña yuyarinñachu.
[22] Qankunapas, cheqapaqmi kunanqa llakikuypi kashankichis. Ichaqa wakmantan qankunata rikusaykichis. Hinan sonqoykichisqa, anchata kusikunqa. Manataqmi pipas chay kusikuyniykichistaqa qechusunkichischu.
[23] Haqay p'unchaypiqa, manan imatapas tapukuwankichisñachu. Cheqaqta, cheqaqtan niykichis: ‘Sutiypi Yayaymanta llapan mañakusqaykichistan, payqa qosunkichis,’ nispay.
[24] Kunankaman, mana imatapas sutiypi mañakunkichisraqchu. Kusikuyniykichis hunt'asqa kananpaq mañakuychis, hinaqa chaskinkichismi.
[25] Kay imaymanakunataqa rikch'anachiykunapin rimaykurqaykichis. Ichaqa manaña rikch'anachiykunapiñachu, aswanpas Yayaymanta qankunaman sut'ita willanay orasmi hamushanña.
[26] Haqay p'unchaypin sutiypi mañakunkichis. Manañataqmi nisqaykichischu: ‘Ñoqan Yayamanta qankunapaq mañapusaykichis,’ nispay.
[27] Qankunaqa munakuwarqankichismi, hinallataq Diospa qayllanmanta lloqsimusqaytapas kreerqankichismi. Chayraykun, kikin Yayaypas qankunataqa munakusunkichis.
[28] Ñoqaqa Yayaypa qayllanmantan lloqsimurqani, hinan kay pachaman hamurqani. Ichaqa wakmantan kay pachata saqepusaq hinaspa Yayayman ripusaq, nispa.
[29] Yachachisqankunan Jesusta nirqanku: —Qhawariy, kunanqa sut'itapunin rimanki. Manañataqmi ima rikch'anachiypipaschu rimanki.
[30] Kunanqa tukuy imaymanakuna yachasqaykita, hinallataq mana piqpa tapunanta nesesitasqaykitapas allintan entiendiyku. Chaymi Diospa qayllanmanta lloqsimusqaykita kreeyku, nispanku.
[31] Jesustaqmi paykunaman kutichirqan: —¿Kunanri kreenkichischu?
[32] Qhawariychis, oraqa hamushanmi, ñataqmi chayamunña. Chay orapin, qankunaqa sapanka hukniykichis maypichus kasqaykichisman ch'eqerichisqa kankichis. Hinaspataqmi sapallayta saqerpariwankichis. Ichaqa, Yayaymi ñoqawan kashan. Chaymi mana sapallaychu kashani.
[33] Ñoqapi thak kayniykichis kananpaqmi, chay imaymana kunataqa rimaykurqaykichis. Kay pachapi, sinchi sasachakuyniykichisqa kanqan. Ichaqa ¡kallpachakuychis! ¡Ñoqaqa kay pachata atipanin! nispa.