[1] Hinan fariseokunaq huknin runa Nikodemo sutiyoq karqan. Payqa, judío runakunaq umalliqninkumanta hukninmi karqan.
[2] Paymi, tutalla Jesusman rispa, payta nirqan: —Rabí, manan pipas, manachus Diosqa paywan kashanman chayqa, kay señalkuna ruwasqaykitaqa, ruwayta atinmanchu. Chaymi yachachikuq hina Diosmanta hamusqaykita yachayku, nispa.
[3] Jesustaqmi kutichispa, payta nirqan: —Cheqaqta, cheqaqtan niyki: ‘Pipas manachus wakmanta nasenqa chayqa, manan Diospa qhapaq suyuntaqa rikuyta atinmanchu, nispay,’ nispa.
[4] Nikodemotaq payta nirqan: —¿Imaynatataq huk runaqa, machuña kashaspanri, naseyta atinman? ¿Mamitanpa wiksanman wakmanta haykuspachu nasenman? nispa.
[5] Jesustaq kutichirqan: —Cheqaqta, cheqaqtan niyki: ‘Pipas manachus unumantawan, Espiritumantawan nasenqa chayqa, manan Diospa qhapaq suyunmanqa haykuyta atinmanchu,’ nispay.
[6] Aycha kuerpomanta naseqqa, aychallan. Hinallataq, Espiritumanta naseqpas espíritun.
[7] Nirqaykin: ‘Wakmanta nasenaykichisqa nesesariopunin,’ nispay. Ama chay nisqayrayku yuyayniykipi mana kabesqachu kay.
[8] Wayraqa may munasqanmantan wayramun. Wayraq wayrasqantataq uyarinki. Manataqmi ichaqa maymantachus hamusqanta, nitaq maymanchus risqantapas yachankichu. Chay hinallataqmi Espiritumanta llapa naseqkunaqa kanku, nispa.
[9] Nikodemotaq kutichispa, Jesusta nirqan: —¿Imaynataq chay hinari kanman? nispa.
[10] Jesustaq kutichispan payta nirqan: —¿Qanqa Israel llaqtapi yachachiq kashaspaykichu, mana kaykunatari yachanki?
[11] Cheqaqta, cheqaqtan niyki: ‘Yachasqaykutan rimayku, hinallataq rikusqaykutan willayku. Willasqaykutataqmi ichaqa, mana chaskinkichischu,’ nispay.
[12] Kay pachapi kaqkunallatan rimaykurqaykichis, manataqmi kreenkichischu. Chay hinaqa, ¿sichus hanaq pachapi kaqkunamanta rimaykuykichisman chayri, imaynatataq kreewaqchis?
[13] Manapunin pipas hanaq pachamanqa wicharqanchu. Aswanpas hanaq pachamanta uraykamuq Runaq Churillanmi wicharqan. Hinallataq hanaq pachapipas kashan.
[14] Imaynan Moisespas mach'aqwayta ch'inniqpi hoqarirqan, chay hinallataqmi, Runaq Churinpas hoqarisqapuni kanan.
[15] Lliw paypi iñiqqa mana chinkananpaq, aswanpas wiñay kawsayniyoq kanankupaqmi payqa hoqarisqapuni kanan.
[16] May hinatapunin Diosqa kay pachapi runakunata munakurqan. Chaymi sapallan Churintaqa qomurqan. Lliw paypi iñiqqa mana chinkananpaq, aswanpas wiñay kawsayniyoq kananpaqmi qomurqan.
[17] Diosqa, manan Churintaqa kay pachapi runakunata huchachananpaqchu kay pachaman kachamurqan. Aswanpas kay pachapi runakuna, paypa chawpinta qespisqa kanankupaqmi payta kachamurqan.
[18] Pipas paypi iñiqqa, manan huchachasqañachu. Pipas paypi mana iñiqtaqmi ichaqa, sapallan Churinpa sutinpi mana iñisqanrayku, ña huchachasqaña kapun.
[19] Huchachayqa kaymi: K'anchaymi kay pachaman hamurqan. Runakunataqmi ichaqa, ruwayninku millay kasqanrayku, k'anchaymanta aswantaqa laqha-tutayaqta munakurqanku.
[20] Lliw mana allinkunata ruwashallaqpuniqa, k'anchaytan cheqnikun. Ruwayninkunamanta mana phiñarisqa kanankupaqmi, k'anchaymanqa mana hamunkuchu.
[21] Cheqaq kaqta ruwashallaqpunin ichaqa, ruwayninkuna Diospi ruwasqa kasqanta sut'i rikusqa kananpaq k'anchayman hamun, nispa.
[22] Chaymantataqmi Jesusqa, yachachisqankunapiwan Judea probinsiaman rirqan. Hinan chaypi paykunawan qhepakurqan, hinallataq bautisasharqan.
[23] Salimpa qayllan Enonpin askha unu karqan. Chaymi Juanpas chaypiqa bautisasharqan. Hinan runakuna chayman rirqanku, hinaspataq bautisasqa karqanku.
[24] Manaraqmi Juanqa, karselpi wisq'asqaraqchu karqan.
[25] Hinaqtinmi Juanpa yachachisqankunawan, judío runakunawan ch'uyanchakuymanta churanakuy hatarirqan.
[26] Hinan Juanman rispanku, payta nirqanku: —Rabí qhawariy, pimantachus willakurqanki chay runan, Jordán mayuq wak ladonpi qanwan kuska kasharqan, paymi bautisashan. Llapa runataqmi payman rishanku, nispanku.
[27] Juantaqmi kutichispa nirqan: —Manachus imatapas hanaq pachamanta qosqa kanman chayqa, manan pi runapas imatapas chaskiytaqa atinmanchu.
[28] Nirqaykichismi: ‘Manan ñoqaqa Cristochu kani, aswanpas paypa ñawpaqenta kachamusqallan kani,’ nispay. Chay nisqaymanta testigoykunaqa qankuna kikiykichismi kankichis.
[29] Kasarakuq qhariqa, nobiayoqmi. Kasarakuq qhariq amigontaqmi ichaqa, ladonpi sayaykuspa uyarin. Paymi kasarakuq qhariq kunkanta uyarispan anchata kusikun. Chay hinapitaqmi, kay kusikuyniyqa hunt'akun.
[30] Payqa aswan-aswan reqsisqapunin kanan. Ñoqataqmi ichaqa, pisi reqsisqallaña kanay.
[31] Hanaqmanta hamuqqa llapanmantapas aswan hatunmi. Hallp'a pachamanta kaqtaq ichaqa, hallp'a pachallamanta, hinallataq hallp'a pacha kaqkunallamanta rimanpas. Hanaq pachamanta hamuqqa llapanmantapas aswan allin kaqpunin.
[32] Payqa, imachus rikusqanmanta, hinallataq imachus uyarisqanmantan willakushan. Manataqmi pipas willakusqantaqa chaskinchu.
[33] Pipas willakuyninta chaskiqqa, Diosqa cheqaqpuni kasqantan sut'inchan.
[34] Diosqa manan Espiritutaqa tupuspachu qon. Chaymi, Diospa kachamusqanqa, Diospa siminkunata riman.
[35] Yayaqa Churintan munakun. Llapan imaymanakunatataqmi paypa makinman hap'ichirqan.
[36] Pipas Churipi iñiqqa wiñay kawsayniyoqmi. Churipi iñiyta mana munaqtaqmi ichaqa, mana wiñay kawsayniyoqchu kanqa. Aswanpas Diospa k'arak phiñakuyninmi paypi takyasqa kashan, nispa.