[1] Chay imaymanakunata nispantaqmi, Jesusqa, yachachisqankunapiwan Kedrón ch'aki mayuq wak ladonman lloqsirqan. Hinan payqa, yachachisqankunapiwan, chaypi kashaq wertaman haykurqan.
[2] Askha kutitan Jesusqa, yachachisqankunawan chay huñukunanku cheqaspi huñukullaqpuni. Chaymi, pichus hap'ichiqnin Judasqa, chay cheqasta rikurqan.
[3] Hinaqtinmi Judasqa, tropantin soldadokunawan, umalliq saserdotekunaq, hinallataq fariseokunaq guardiankunawan ima rirqan. Paykunaqa, k'anchanakunata, lamparakunatawan, maqanakunatawan ima aparikuspankun rirqanku.
[4] Jesustaqmi ichaqa, tukuy chay imaymanakuna payta pasananta yacharqanña. Chaymi, ñawpaqman lloqsimuspa, paykunata nirqan: —¿Pitan maskhashankichis? nispa.
[5] Paykunataq Jesusman kutichirqanku: —Nazaretmanta Jesustan maskhashayku, nispanku. Hinan Jesusqa paykunata nirqan: —Ñoqan kani, nispa. Pichus hap'ichiq Judaspas, paykunawanmi kasharqan.
[6] Paykunata Jesusqa: ‘Ñoqan kani,’ nispa niqtintaqmi, qhepanpanmanta kutispanku, pampaman wikapakurqanku.
[7] Wakmantan paykunata tapullarqantaq: —¿Pitan maskhashankichis? nispa. Paykunataq nirqanku: —Nazaretmanta Jesustan maskhashayku, nispanku.
[8] Hinan Jesusqa paykunaman kutichirqan: —Nirqaykichisñan: ‘Ñoqan kani,’ nispay. Ñoqatachus maskhashawankichis chayqa, paykunaqa hinalla ripuchunku, nispa.
[9] Payqa nirqanmi: ‘Qowasqaykikunamantaqa, manan mayqenninkutapas chinkachinichu,’ nispa. Chay nisqan simikuna hunt'akunanpaqmi, chaytaqa nirqan.
[10] Simón Pedroqa, espadayoqmi kasharqan. Hinaqtinmi payqa, espadanta horqospan, hatun umalliq saserdoteq kamachinta k'irirqan. Hinan paña ninrinta qhorururqan. Chay kamachitaq Malko sutiyoq karqan.
[11] Hinaqtinmi Jesusqa, Pedrota nirqan: —Espadaykita waqaychananman winapuy. ¿Ñoqaqa manachu Yayaypa kopa qowasqantaqa, ukyanaypuni kashan? nispa.
[12] Hinaqtinmi tropantin soldadokuna, tribunopiwan, judío runakunaq guardiankunapiwan, Jesusta hap'ispa t'eqerqanku.
[13] Chay watapiqa, Kaifasmi hatun umalliq saserdoteqa kasharqan. Anasqa, Kaifaspa suegronmi karqan. Chaymi payman Jesustaqa ñawpaqta aparqanku.
[14] Kaifasmi, judío runakunata yuyaychaspa nisqa karqan: —Llaqtarayku, huk runallaq wañuyninqa allinmi, nispan.
[15] Simón Pedro, hinallataq huknin yachachisqamasinpiwanmi Jesusta qatikurqanku. Chay yachachisqaqa, hatun umalliq saserdoteq reqsisqanmi karqan. Hinan chay yachachisqaqa, hatun umalliq saserdoteq pationman Jesuswan haykurqan.
[16] Pedrotaqmi ichaqa, punku hawallapi qhepakurqan. Hinan chay hatun umalliq saserdoteq reqsisqan yachachisqaqa lloqsirqan. Lloqsispantaq, punku kichaq sipasta balikuspan, Pedrota ukhuman pusaykurqan.
[17] Hinaqtinmi chay punku kichaq kamachi sipasqa Pedrota nirqan: —¿Manachu qanpas chay runaq yachachisqan kashanki? nispa. Pedrotaq nirqan: —Manan ñoqaqa yachachisqanchu kani, nispa.
[18] Kamachikunaqa, hinallataq guardiakunapas chaypin sayasharqanku. Chirishasqanraykutaqmi, ninata hap'ichispa q'oñikusharqanku. Hinan Pedropas paykunawan chaypi sayaspa q'oñikushallarqantaq.
[19] Hinan hatun umalliq saserdoteqa, yachachisqankunamanta, hinallataq yachachikuyninmantawan Jesusta tapurqan.
[20] Jesustaq payman kutichirqan: —Ñoqaqa tukuy kay pacha runaman sut'itapunin rimarqani. Judío runakunaq huñukunanku wasipipas, hinallataq Dios yupaychana wasipipas yachachillarqanipunin. Maypichus llapa judío runakuna huñukullaqkupuni, chaypin yachachirqani. Manataqmi imatapas pakallapiqa rimarqanichu.
[21] ¿Imanaqtintaq ñoqatari tapuwanki? Pikunachus rimaykusqayta uyarirqanku, paykunatayá tapumuy. Qhawariy, ñoqaq nisqayta paykunaqa yachankun, nispa.
[22] Chayta Jesús niqtintaqmi, chaypi kashaq guardiakunaq hukninqa payta ch'aqlarqan. Nirqantaq: —¿Chay hinatachu hatun umalliq saserdoteman kutichinki? nispa.
[23] Jesustaq payman kutichirqan: —Sichus mana allinta rimarqani chayqa, chay mana allin rimasqayta sut'inchay. Ichaqa sichus allinta rimarqani chayri, ¿imanaqtintaq maqawanki? nispa.
[24] Hinaqtinmi Anasqa, Jesusta t'eqesqata hatun umalliq saserdote Kaifasman apachirqan.
[25] Pedroqa, chaypi sayaykuspanmi q'oñikusharqan. Hinan payta nirqanku: —¿Manachu qanqa yachachisqankunamanta huknin kashanki? nispanku. Paytaqmi mananchaspan nirqan: —Ñoqaqa manan yachachisqanchu kani, nispa.
[26] Hatun umalliq saserdoteq kamachinkunamanta hukninmi, Pedrota nirqan: —¿Manachu ñoqaqa wertapi paywan kuskata rikusharqayki? nispa. Chay kamachiqa, pitachus ninrinta Pedro qhorururqan, paypa familianmi karqan.
[27] Pedrotaqmi wakmanta manancharqan. Hinan chayllaman galloqa waqamurqan.
[28] Chay hinaqa, Jesustan Kaifaspa wasinmanta pretorioman aparqanku. Pacha illarimuymi karqan. Ichaqa mana qhellichasqa kanankupaqtaqmi paykunaqa pretorioman mana haykurqankuchu. Chay hinapin paykunaqa, Paskua mikhunata mikhuyta atirqanku.
[29] Hinaqtinmi Pilatoqa, paykunaman lloqsimuspa, nirqan: —¿Kay runaq kontranpiri, ima huchachaytataq apamushankichis? nispa.
[30] Kutichispankutaqmi, payta nirqanku: —Sichus kay runa allin ruwaq kanman karqan chayqa, manachá qanmanchu hap'ichiykikuman karqan, nispanku.
[31] Hinaqtinmi Pilatoqa paykunata nirqan: —Qankuna hap'iychis, hinaspa kamachikuyniykichisman hina chaninchaychis, nispa. Judío runakunataq payta nirqanku: —Ñoqaykuqa, manan pitapas wañuchiyta atiykumanchu, nispanku.
[32] Jesuspa nisqan simikuna hunt'akunanpaqmi, chay hinaqa karqan. Imayna wañuypichus wañunan karqan, chayta sut'inchananpaqtaqmi chaytaqa nisqa karqan.
[33] Hinaqtinmi Pilatoqa, wakmanta pretorioman haykurqan. Jesusta waqyaspantaqmi, payta nirqan: —¿Qanchu judío runakunaq Reynin kanki? nispa.
[34] Jesustaqmi payman kutichirqan: —¿Qanri kikillaykimantachu chayta tapushawanki, ichari hukkunachu ñoqamanta chayta nirqasunkiku? nispa.
[35] Pilatotaq Jesusman kutichirqan: —¿Ñoqari judío runachu kani? Kikin suyuyki, hinallataq umalliq saserdotekunapunin ñoqamanqa qanta hap'ichiwarqanku. ¿Imatapunitaq ruwarqankiri? nispa.
[36] Jesustaq kutichirqan: —Qhapaq suyuyqa manan kay pachamantachu. Sichus qhapaq suyuy kay pachamanta kanman chayqa, judío runakunaman mana hap'ichisqa kanaypaqmi, kamachiykuna maqanakunkuman karqan. Kunantaqmi ichaqa, qhapaq suyuyqa mana kaymantachu, nispa.
[37] Hinaqtinmi Pilatoqa Jesusta nirqan: —Chay hinaqa, ¿reychu kanki? nispa. Jesustaq kutichispan nirqan: —Rey kasqayta nispaykiqa, cheqaqtan ninki. Chaypaqmi ñoqaqa naserqani, hinallataq chaypaqmi kay pachamanpas hamurqani. Cheqaq kaqta sut'inchanaypaqmi hamurqani. Pikunachus cheqaq kaqmanta kaqkunaqa, kunkaytan uyarinku, nispa.
[38] Pilatotaqmi Jesusta nirqan: —¿Imataq cheqaq kaqri? nispa. Chayta nispantaq Pilatoqa, wakmanta judío runakunaman lloqsispan, paykunata nirqan: —Manan ñoqaqa ima mana allin ruwasqantapas paypiqa tarinichu.
[39] Qankunan ichaqa, huk presota kacharipunaypaq sapa Paskua fiestapi mañakuwaytapuni yachankichis. Chay hinaqa, ¿judío runakunaq Reynintachu kacharipunayta munankichis? nispa.
[40] Hinaqtinmi wakmanta llapanku qaparirqanku. Nirqankutaq: —¡Amapuni paytaqa, aswanpas Barrabasta kacharipuwayku! nispanku. Barrabastaqmi q'aru suwa karqan.