[1] Nillarqantaqmi: —Ñoqan cheqaq ubas yuraqa kani. Yayaytaqmi llank'aq.
[2] Tukuy k'allma ñoqapi mana ruruqtaqa, wit'upunmi. Rurushaq tukuy k'allmatataqmi, aswanta rurunanpaq llimphuyapun.
[3] Qankunaqa, rimaykusqay simiwan ñan llimphuyasqaña kankichis.
[4] Ñoqapi takyaychis, ñoqataq qankunapi takyasaq. Manachus k'allmaqa ubas yurapi takyan chayqa, manan kikillanmanta ruruyta atinmanchu. Chay hinallataqmi, qankunapas manachus ñoqapi takyankichis chayqa, manan ruruyta atiwaqchischu.
[5] Ñoqan ubas yura kani, qankunataqmi k'allmakuna kankichis. Pipas ñoqapi takyanqa ñoqataq paypi takyasaq chaymi, payqa askha ruruta rurun. Ichaqa sichus ñoqamanta t'aqakunkichis chayqa, manan ima ruwaytapas atinkichischu.
[6] Sichus pipas mana ñoqapi takyanqachu chayqa, k'allma hinan hawaman wikch'usqa kanqa, hinaspataq ch'akipunqa. Hinan pallasqa kaspanku, ninaman wikch'uykapusqa kanqaku. Chaypitaqmi kanasqa kapunqaku.
[7] Ñoqapi takyaychis, hinallataq simiykunapas qankunapi takyachun. Sichus chay hina kanqa chayqa, munasqaykichista mañakuychis. Hinan qosqa kasunkichis.
[8] Askha ruruta ruruqtiykichismi, Yayayqa hatunchasqa kashan. Chay hinapitaqmi, yachachisqaykuna kankichis.
[9] Imaynan Yayaypas munakuwarqan, chay hinallatataqmi ñoqapas qankunata munakurqaykichis. Munakuyniypipuni takyaychis.
[10] Sichus kamachikuyniykunata kasukunkichis chayqa, munakuyniypin takyankichis. Chay hinan ñoqapas Yayaypa kamachikuyninkunata kasukurqani. Chay hinapitaqmi, munakuyninpiqa takyani.
[11] Kusikuyniy qankunapipuni kashananpaq, hinallataq kusikuyniykichis hunt'asqa kananpaqmi, chay imaymanakunataqa qankunaman rimaykurqaykichis.
[12] Kamachikuyniyqa kaymi: Imaynatachus ñoqa munakurqaykichis, chay hinatapuni hukkuna-hukkunawan munanakuychis.
[13] Amigonkunarayku kawsayninta churaqqa hatun munakuyniyoqmi. Paymanta aswan munakuyniyoqqa manan kanchu.
[14] Sichus qankunaman kamachisqayta ruwashallankichispuni chayqa, amigoykunan kankichis.
[15] Huk kamachiqa, patronninpa ruwasqanta manan yachanchu. Chaymi manaña aswantaqa kamachikuna nispañachu sutiyaykichis. Ichaqa Yayaymanta tukuy imaymanakuna uyarisqaytan reqsichirqaykichis. Chaymi amigoykuna nispa sutiyarqaykichis.
[16] Ñoqataqa, manan qankunachu akllakuwarqankichis. Aswanpas, ñoqan qankunataqa akllakurqaykichis. Hinan rinaykichispaq, ruruta rurunaykichispaq, hinallataq ruruykichispas takyananpaq churarqaykichis. Chay hinapin Yayayqa, sutiypi tukuy mañakusqaykichista qosunkichis.
[17] Kaytan kamachiykichis: ‘Hukkuna-hukkunawan munanakuychis,’ nispay, nispa.
[18] Nillarqantaqmi: —Sichus kay pachapi runakuna cheqnipakusunkichis chayqa, qankunamanta ñawpaqtaqa ñoqatan cheqnipakuwarqanku. Chayta yachaychis.
[19] Sichus kay pachamanta kawaqchis chayqa, kay pachapi runakunaqa paykunaq kaqkunata munakunmanmi. Ichaqa, manan kay pachamantachu kankichis, aswanmi kay pachamanta ñoqa akllakurqaykichis. Chayraykun kay pachapi runakunaqa cheqnipakusunkichis.
[20] Ñoqaqa nirqaykichismi: ‘Kamachiqa, manan patronninmanta aswan allinpaq qhawarisqaqa kanmanchu,’ nispay. Chay nisqay simita yuyariychis. Sichus ñoqata qatiykachawarqanku chayqa, qankunatapas qatiykachasunkichismi. Sichus simiykunata kasukurqanku chayqa, qankunaqtapas kasukunqakun.
[21] Ichaqa kachamuwaqniytan mana reqsinkuchu. Chaymi tukuy chaykunataqa sutiyrayku ruwasunkichis.
[22] Sichus ñoqa mana hamuymanchu karqan, nitaq paykunaman rimaykuymanchu karqan chayqa, manan huchayoqchu kankuman. Kunanmi ichaqa, huchankumanta mana imapas ninankupaq kanñachu.
[23] Pipas cheqnikuwaqniyqa, Yayaytapas cheqnikullantaqmi.
[24] Sichus ñoqa paykuna ukhupi mana piqpa ruwasqan ruwaykunata mana ruwaymanchu karqan chayqa, manan huchayoqchu kankuman karqan. Kunantaq ichaqa, ñoqatapas, Yayaytapas rikuwarqanku, hinaspataq cheqnikuwarqanku.
[25] Ichaqa paykunaq Kamachikuy Siminkupi qelqasqa qelqaq hunt'akunanpaqmi chayqa karqan. Chay qelqataqmi nin: ‘Yanqanmantan cheqnipakuwarqanku,’ nispa. (Sal. 35:19; 69:4)
[26] Ñoqan Kallpachaq, cheqaq Espirituta Yayaq partinmanta kachamusaykichis. Payqa Yayamantan hamun. Paymi hamuspan, ñoqamanta willakunqa.
[27] Qallariymantapacha ñoqawanpuni kashasqaykichisraykun qankunapas ñoqamanta willankichis.