[1] Kinsa kaq p'unchaypitaqmi, Galilea probinsiapi kashaq Kaná llaqtapi, kasarakuy karqan. Hinan chaypi, Jesuspa mamitanpas kasharqan.
[2] Hinallataqmi Jesuspas, yachachisqankunapiwan chay kasarakuyman waqyachisqa karqan.
[3] Bino pisiqtintaq, Jesuspa mamitanqa payta nirqan: —Manan binonku kanñachu, nispa.
[4] Jesustaq payta nirqan: —Warmi, ¿iman ñoqawan qan ruwanayki? Manan oray chayamunraqchu, nispa.
[5] Mamitantaq serbiqkunata nirqan: —Llapan paypa nisqasunkichista ruwaychis, nispa.
[6] Chaypin unupaq, rumimanta soqta rakikuna kasharqan. Chaykunaqa, judío runakuna ch'uyanchakunankupaqmi karqan. Sapankamanmi, iskay otaq kinsa p'uyñu1 unu haykuq karqan.
[7] Jesustaq paykunata nirqan: —Rakikunaman unuta hunt'achimuychis, nispa. Hinan serbiqkunaqa, rakikunaman hunt'atapuni hunt'achirqanku.
[8] Chaymantataqmi paykunata nillarqantaq: —Kunanqa wisiychis, hinaspa dispenseroman apaychis, nispa. Hinan paykunaqa aparqanku.
[9] Dispenserotaqmi, binoman tukuchisqa unuta mallirqan. Manataqmi maymantachus rikhurisqantaqa yacharqanchu. Unu wisiq sirbiqkunataqmi ichaqa yacharqanku. Hinaqtinmi dispenseroqa, nobiota waqyarqan.
[10] Hinan nobiota nirqan: —Llapa runapas, ñawpaqtaqa allin kaq binotan horqomun. Sinchitaña ukyaqtinkutaq, mana allin kaq binotaqa horqomun. Qantaq ichaqa, allin kaq binota kunankama waqaychasqanki, nispa.
[11] Kay señalkunaq qallariynintan, Jesusqa Galilea probinsiapi kashaq Kaná llaqtapi ruwarqan. Hinallataqmi hatun atiyninta rikuchirqan. Yachachisqankunataqmi paypi iñirqanku.
[12] Chay qhepamantaq, Jesusqa mamitanpiwan, wawqenkunapiwan, hinallataq yachachisqankunapiwan Kapernaum llaqtaman uraykurqan. Hinan chaypi pisi p'unchaykunalla qhepakurqanku.
[13] Judío runakunaq Paskua fiestankun qayllaykamusharqanña. Hinan Jesusqa Jerusalén llaqtaman wicharqan.
[14] Dios yupaychana wasipitaqmi, torokuna, obehakuna, hinallataq paloma bendeqkunata tarirqan. Qolqe kambiaqkunapas chayllapitaqmi tiyasharqanku.
[15] Waskhakunamanta hasut'ita ruwaspataq, Dios yupaychana wasimanta llapan runakunatapas, obehakunatapas, torokunatapas hawaman qarqorqan. Hinallataq qolqe kambiaqkunaq qolqenkutapas wishñispa, mesakunatapas wikaparqan.
[16] Paloma bendeqkunatataq nirqan: —¡Kay imaymanakunata kaymanta horqoychis. Amañataq Yayaypa wasinta qhatuna wasimanqa tukuchiychisñachu¡ nispa.
[17] Hinaqtinmi yachachisqankunaqa Qelqaq nisqanta yuyarirurqanku. Qelqaqa ninmi: ‘Wasiykiraykun wañukuniraq,’ nispa. (Sal. 69:9)
[18] Chayllamanmi, judío runakunaqa, Jesusman kutichispa nirqanku: —Chay imaymanakunatataq ruwanki chayqa, ¿ima señaltataq rikuchiwankikuri? nispanku.
[19] Jesustaq kutichispa, paykunata nirqan: —Kay t'aqasqa cheqas wasita thuniychis, hinaspataq ñoqa kinsa p'unchaypi hatarirachisaq, nispa.
[20] Chay hina kaqtinmi, judío runakunaqa nirqanku: —Tawa chunka soqtayoq watapin kay t'aqasqa cheqas wasiqa ruwasqa karqan. ¿Qantaqchu kinsa p'unchayllapi hatarirachiwaq? nispanku.
[21] Jesustaqmi ichaqa, t'aqasqa cheqas wasi kuerpon kasqanmanta rimasharqan.
[22] Chaymi, maypachachus Jesusqa wañusqakunamanta kawsarimpuqtinña, yachachisqankunaqa chay nisqankunata yuyarirurqanku. Hinan Qelqakunatapas, Jesuspa nisqan simikunatapas kreerqanku.
[23] Jerusalén llaqta Paskua fiestapi kashanankamataq, señalkuna ruwasqanta rikuspanku, askha runakuna Jesuspa sutinpi iñirqanku.
[24] Ichaqa, llapankutan Jesusqa reqsirqan. Chaymi pay kikinqa, mana paykunaq makinkuman churaykukurqanchu.
[25] Paytaqmi, runapi imachus kasqantaqa yacharqan. Chayraykun, runakunamanta piqpa sut'inchanantapas manapuni nesesitarqanchu.