[1] Chaymantataq Jesusqa, Galilea qochaq chimpanman rirqan. Chayqa, Tiberias nisqa qochan karqan.
[2] Hinan ancha askha runakuna Jesusta qatikurqanku. Paykunaqa, onqosqakunapi Jesuspa señalkuna ruwasqantan rikusqaku karqan. Chaymi payta qatikurqanku.
[3] Hinaqtinmi Jesusqa, huk orqoman wicharqan. Hinan chaypi yachachisqankunawan tiyaykurqan.
[4] Judío runakunaq Paskua fiestankutaqmi qayllaykamusharqanña.
[5] Jesusqa allinta qhawarispanmi, ancha askha runakunaq paypa kasqanman hamusqankuta rikurqan. Hinan, Felipeta nirqan: —¿Kay runakuna mikhunankupaqri, maymantataq t'antata rantimusunchis? nispa.
[6] Jesusqa, imachus ruwanantaqa yacharqanmi. Ichaqa Felipeta probanallanpaqmi chaytaqa nirqan.
[7] Felipetaq payman kutichirqan: —Iskay pachak denario qolqepi t'antapas manan pisinkallatapas sapanka chaskinankupaqqa aypanmanchu, nispa.
[8] Huknin yachachisqan, Simón Pedroq wawqen Andresmi, Jesuswan rimarqan.
[9] Nirqantaq: —Kaypin huk waynacha kashan. Paypan phisqa sebada t'antankuna, hinallataq iskay challwachankuna kashan. Ichaqa, kay askha runapaqqa manan chaychallaqa ayparinmanchu, nispa.
[10] Hinaqtinmi Jesusqa payta nirqan: —Runakunata tiyaykachimuychis, nispa. Chaypiqa, askha qoran kasharqan. Hinan yaqa phisqa waranqa hina, qharikuna tiyaykurqanku.
[11] Hinaqtinmi Jesusqa, chay t'antakunata hap'iykurqan. Grasiasta qospantaq, yachachisqankunaman rakirqan. Hinan yachachisqankunaqa, tiyaykuqkunaman rakimurqanku. Chay hinallatataqmi, challwachakunatapas runakunaq munasqankuman hina rakimurqanku.
[12] Ña saksaña kaqtinkutaqmi, Jesusqa yachachisqankunata nirqan: —Ama imapas usunanpaq, puchuq p'akikunata pallanpuychis, nispa.
[13] Hinaqtinmi pallanpurqanku. Chay phisqa sebada t'antakuna mikhusqankuq puchun p'akikunata, chunka iskayniyoq kanastakunaman hunt'achirqanku.
[14] Hinan, runakunaqa, Jesuspa chay señal ruwasqanta rikurqanku. Chaymi nirqanku: —¡Cheqaqtapuni, kay pachaman hamunan karqan Diospa rantinpi rimaq chayqa, paymi! nispanku.
[15] Hap'iq hamuspankun, reyta ruwananku karqan. Chaytataqmi Jesusqa yacharurqan. Chaymi payqa, wakmanta orqoman sapallan wicharipurqan.
[16] Tutayaykushaqtinñataq, yachachisqankunaqa qochaman uraykurqanku.
[17] Barkaman haykuspankutaq, Kapernaum llaqta ladoman qochanta chimpasharqanku. Yaqa illarimuyñan kasharqan. Jesustaqmi ichaqa, paykunaq kasqankuman manaraq risqachu karqan.
[18] Wayraqa sinchitan wayrasharqan. Chaymi qochapiqa, unu phuqchiy hatarirqan.
[19] Hinaqtinmi, yaqa iskay chunka phisqayoq otaq kinsa chunka estadiokunata hinaña barkata suchuchisharqanku. Hinan qochaq unu patanta purishaqta Jesusta rikurqanku. Barkaman qayllaykamushaqtintaq, mancharikurqanku.
[20] Jesustaqmi ichaqa, paykunata nirqan: —¡Ñoqan kani! ¡Ama mancharikuychischu! nispa.
[21] Hinaqtinmi paykunaqa, Jesusta barkapi chaskiykuyta munarqanku. Hinan kasqan ratupacha, maymanchus risharqanku, chay hallp'aman barkapi chayarqanku.
[22] Qhepantin p'unchaytaqmi, askha runakuna qocha chimpapi kasharqanku. Paykunaqa, ch'ulla barkalla chaypi kasqanta kuentata qokusharqankun. Yachachisqankunaq haykusqanku chay barkallan, chaypi kashasqa karqan. Hinallataqmi Jesusqa, yachachisqankunawan chay barkaman mana haykusqachu karqan, aswanpas yachachisqankunalla risqaku karqan. Chaytapas kuentata qokullarqankutaqmi.
[23] Ichaqa, Tiberias llaqtamantan wak barkakuna chayasqaku karqan. Hinan maypichus Señorqa grasiasta qosqa, hinaspa t'antata mikhusqaku karqan, chay cheqaspa qayllanman chayasqaku karqan.
[24] Hinaqtinmi chay askha runakunaqa, Jesuspas nitaq yachachisqankunapas mana chaypichu kashasqankuta rikurqanku. Chay hina kaqtinmi, paykunaqa barkakunaman haykuspa, Jesusta maskhaspanku Kapernaum llaqtaman rirqanku.
[25] Jesusta qocha chimpapi tarispankutaqmi, payta tapurqanku: —Rabí, ¿hayk'aqtaq kaymanri chayamurqanki? nispanku.
[26] Jesustaq paykunaman kutichirqan: —Cheqaqta, cheqaqtan niykichis: ‘Qankunaqa, manan señalkunata rikusqaykichisraykuchu maskhashawankichis. Aswanpas t'antakunata mikhusqaykichisrayku, hinallataq saksaykusqaykichisraykun maskhashawankichis,’ nispay.
[27] Ama, tukukuq mikhunaraykullachu llank'aychis. Aswanpas wiñay kawsaypaq takyaq mikhunarayku llank'aychisqa. Chay mikhunataqa, Runaq Churinmi qosunkichis. Paytan, Dios Yayaqa sellonwan sellorqan,’ nispa.
[28] Hinaqtinmi payta nirqanku: —¿Diospa ruwanankunata ruwanaykupaqri imatataq ruwasaqku? nispanku.
[29] Jesustaq kutichispan, paykunata nirqan: —Diospa ruwananqa, paypa kachamusqanpi iñinaykichismi, nispa.
[30] Hinaqtinmi payta nirqanku: —¿Rikuspa qanta kreenaykupaqri, ima señaltataq qan ruwanki? ¿Ima ruwaytan ruwanki?
[31] Ñawpa taytaykuqa ch'inniqpin manata mikhurqanku. Qelqasqan kashan: ‘Hanaq pachamanta t'antatan mikhuchirqan,’ nispa, nispanku. (Éxo. 16:4; Sal. 78:24)
[32] Hinan Jesusqa paykunata nirqan: —Cheqaqta, cheqaqtan niykichis: ‘Moisesqa, manan hanaq pachamanta t'antatachu qorqasunkichis. Aswanpas hanaq pachamanta cheqaq t'antataqa Yayaymi qosunkichis,’ nispay.
[33] Diospa t'antanqa, pichus hanaq pachamanta uraykamuspa, kay pacha runakunaman kawsayta qoqmi, nispa.
[34] Hinan payta nirqanku: —Señor, chay t'antataqa qowaykupuni, nispanku.
[35] Jesustaq paykunata nirqan: —Ñoqan kawsay t'antaqa kani. Pipas ñoqaman hamuqqa, manan hayk'aqpas yarqachikunqañachu. Hinallataq, pipas ñoqapi iñiqqa, manapunin hayk'aqpas ch'akichikunqañachu.
[36] Ichaqa nirqaykichismi: ‘Qankunaqa, rikushawaspaykichispas manapunin kreewankichischu’ nispay.
[37] Yayaq llapan ñoqaman qowasqanqa, ñoqamanmi hamunqa. Pipas ñoqaman hamuqtaqa, manallataqmi hayk'aqpas hawaman qarqosaqchu.
[38] Ñoqaqa, manan munayniyta ruwanaypaqchu hanaq pachamanta uraykamurqani. Aswanpas kachamuwaqniypa munayninta ruwanaypaqmi uraykamurqani.
[39] Kachamuwaqniy Yayaq munayninqa kaymi. Llapallan paypa qowasqanmanta ama pitapas chinkachinaymi. Aswanpas p'uchukay p'unchaypi paykunata kawsarichinaymi.
[40] Kachamuwaqniypa munayninqa kaymi. Llapallan pipas Churita allinta qhawaqqa, hinallataq paypi iñiqpas wiñay kawsayniyoq kananmi. Hinan ñoqa, p'uchukay p'unchaypi payta kawsarichisaq, nispa.
[41] Jesusmi nisqa karqan: ‘Ñoqan hanaq pachamanta uraykamuq t'antaqa kani,’ nispan. Chaymi judío runakunaqa, Jesusmanta chhuchupakurqanku.
[42] Hinan ninakurqanku: —¿Manachu, kay Jesusqa, Josepa churin kashan? ¿Manachu taytantapas, mamantapas reqsinchis? ¿Imaynataq kunanri nin: ‘Hanaq pachamantan uraykamurqani,’ nispanri? nispanku.
[43] Kutichispantaq, Jesusqa paykunata nirqan: —Ama qankunapurapi chhuchupakuychischu.
[44] Manachus kachamuwaqniy Yaya pusamunman chayqa, manan pipas ñoqaman hamuytaqa atinmanchu. Ñoqataqmi p'uchukay p'unchaypi kawsarichimpusaq.
[45] Diospa rantinpi rimaqkunaq Qelqankupiqa qelqasqan kashan: ‘Llapallankun Diospa yachachisqan kanqaku,’ nispa. (Isa. 54:13) Chay hinaqa, llapallan pikunachus Yayamanta uyarikuq, hinallataq yachaqakuqqa, ñoqamanmi hamun.
[46] Manapunin pipas Yayataqa rikurqanchu. Aswanpas pichus Diosmanta hamuqllan Yayataqa rikurqan.
[47] Cheqaqta, cheqaqtan niykichis: ‘Pipas ñoqapi iñiqqa, wiñay kawsayniyoqmi kapun,’ nispay.
[48] Ñoqan, kawsay t'antaqa kani.
[49] Ñawpa taytaykichiskunaqa, ch'inniqpin manata mikhurqanku. Chaywanpas wañukapurqankupunin.
[50] Hanaq pachamanta uraykamuq t'antaqa kaymi. Pipas paymanta mikhuqqa, manan wañunqachu.
[51] Hanaq pachamanta uraykamuq kawsashaq t'antaqa, ñoqan kani. Sichus pipas kay t'antamanta mikhunqa chayqa, wiñaypaqmi kawsanqa. Qosqay t'antaqa, kay aycha kuerpoymi. Hinan kay pachapi runaq kawsayninrayku, chay t'antataqa qosaq, nispa.
[52] Hinaqtinmi judío runakunaqa, paykunapurapi churanakurqanku: —¿Imaynatataq kay runari aycha kuerponta mikhunanchispaq qoyta atiwasunman? nispanku.
[53] Jesustaq paykunata nirqan: —Cheqaqta, cheqaqtan niykichis: ‘Runaq Churinpa aycha kuerponta manachus mikhunkichis, hinallataq yawarnintapas ukyankichis chayqa, manan kikiykichispi kawsayniyoqchu kankichis,’ nispay.
[54] Pipas aycha kuerpoyta mikhuqqa, hinallataq yawarniyta ukyaqpas, wiñay kawsayniyoqmi. Ñoqataqmi p'uchukay p'unchaypi payta kawsarichimpusaq.
[55] Aycha kuerpoyqa, cheqaq mikhunan. Hinallataq yawarniypas, cheqaq ukyanan.
[56] Pipas aycha kuerpoyta mikhuqqa, hinallataq yawarniyta ukyaqqa, ñoqapin takyan. Ñoqataqmi paypi takyani.
[57] Kawsashaq Yayan kachamuwarqan, ñoqataq paypaq kawsani. Chay hinallatataqmi, mikhuwaqniypas ñoqapaq kawsanqa.
[58] Hanaq pachamanta uraykamuq t'antaqa kaymi. Pipas kay t'antata mikhuqqa wiñaypaqmi kawsanqa. Ñawpa taytaykichiskunaqa manatan mikhurqanku, ichaqa wañukapurqankupunin. Chay manaqa, manan hanaq pachamanta uraykamuq t'anta hinachu karqan, nispa.
[59] Kapernaum llaqtapi kashaq, judío runakunaq huñukunanku wasipi yachachishaspanmi, chaykunataqa nirqan.
[60] Askha yachachisqankunataqmi, uyarispa nirqanku: —Chay simiqa, sinchi sasan. ¿Pitaq chaskiytari atinman? nispanku.
[61] Jesusqa chaymanta yachachisqankunaq chhuchupakusqankuta kikinpi yachaspanmi, paykunata nirqan: —¿Kaychu misk'achisunkichis?
[62] ¿Sichus Runaq Churinta maypichus ñawpaqta kasharqan, chayman wichashaqta rikuwaqchis chayri, imatataq ruwawaqchis?
[63] Kawsay qoqqa Espíritun. Aycha kuerpoqa manan imapaqpas balinchu. Ñoqaq rimaykusqay simikunaqa espíritun, hinallataq kawsaymi.
[64] Qankuna ukhupin ichaqa, wakin mana iñiqkuna kashanku, nispa. Jesusqa qallariymantapachan, pikunachus mana iñiqkuna karqanku, hinallataq pichus hap'ichinan karqan, chaykunata yacharqan. Chaymi chaytaqa nirqan.
[65] Hinan Jesusqa nillarqantaq: —Chaymi nirqaykichis: ‘Manachus Yayay munanman chayqa, manan pipas ñoqaman hamuytaqa atinmanchu,’ nispay, nispa.
[66] Chaymantapachan, askha yachachisqankuna qhepaman kutipurqanku. Hinan Jesuswanqa, manaña purirqankuñachu.
[67] Hinaqtinmi Jesusqa, chunka iskayniyoqnintinman nirqan: —¿Qankunapas ripuytachu munashallankichistaq? nispa.
[68] Simón Pedrotaq, payman kutichirqan: —Señor, ¿pimantaq risaqkuri? Qanmi wiñay kawsay simikunayoqqa kanki.
[69] Ñoqaykutaqmi, qanqa kawsaq Diospa Churin Cristo kasqaykita kreerqayku, hinallataq yacharqayku, nispa.
[70] Jesustaq paykunaman kutichirqan: —¿Manachu ñoqaqa, qankunata chunka iskayniyoqta akllakurqaykichis? Qankunamanta hukniykichistaqmi ichaqa, saqra kashan, nispa.
[71] Chunka iskayniyoqnintinmanta hukninpunin hap'ichinan karqan. Chaymi, Simonpa churin Judas Iskariotemanta chaytaqa rimasharqan.