[1] Hinaqtinmi Pilatoqa, Jesusta hap'ispa hasut'ichirqan.
[2] Hinan soldadokunaqa, kiskakunamanta pilluta simp'aspanku, Jesuspa umanman churarqanku. Sani-puka p'achawantaq p'achachirqanku.
[3] Hinan payta nirqanku: —¡Judío runakunaq Reyninku kawsachun! nispanku. Hinan ch'aqlarqanku.
[4] Hinaqtinmi Pilatoqa, wakmanta lloqsimuspan, judío runakunata nirqan: —Qhawariychis, paypiqa manapuni ima mana allin ruwasqantapas tarisqayta yachanaykichispaqmi, hawaman apamushaykichis, nispa.
[5] Hinan Jesusqa kiskamanta pilluwan, hinallataq sani-puka p'achawan churaykusqa lloqsimurqan. Pilatotaq judío runakunata nirqan: —¡Kayqá chay runa! nispa.
[6] Umalliq saserdotekuna, guardiakuna, iman payta rikuruspanku hina qaparirqanku. Nirqankutaq: —¡Chakatay! ¡Chakatay! nispanku. Pilatotaq paykunata nirqan: —Ñoqaqa manapunin ima mana allin ruwasqantapas paypiqa tarinichu. Chayrayku qankuna apaspaykichis, chakatamuychis, nispa.
[7] Judío runakunataq payman kutichirqanku: —Ñoqaykuq kamachikuyniykuqa kapuwankun. Hinaqa, pay kikinmi nirqan: ‘Diospa Churinmi kani,’ nispa. Chaymi, kamachikuyniykuq nisqanman hinaqa, wañunanpuni, nispanku.
[8] Chay simikunata uyarispantaqmi, Pilatoqa aswantaraq mancharikurqan.
[9] Wakmanta pretorioman haykuspantaq, Jesusta tapurqan: —¿Maymantataq qanri kanki? nispa. Jesustaq ichaqa, mana imatapas payman kutichirqanchu.
[10] Hinan Pilatoqa Jesusta nirqan: —¿Manachu imaniwankipas? ¿Ñoqaqa chakatachinaypaqpas, otaq kacharichinaypaqpas kamachikuyniyoq kasqayta, manachu yachanki? nispa.
[11] Jesustaq kutichispa nirqan: —Manachus hanaqmanta qosqa kasunkiman karqan chayqa, manan ñoqa kontra ima kamachikuyniyoqpaschu kawaq karqan. Chayraykun, qanman hap'ichiwaqniyqa aswan huchayoq kashan, nispa.
[12] Chay ratumantapachan, Pilatoqa Jesusta kacharipuyta munasharqan. Judío runakunataqmi ichaqa, qaparirqanku. Nirqankutaq: —Sichus payta kacharinki chayqa, manan rey Cesarpa amigonchu kanki. Pikunachus ‘reymi kani,’ nispa niqkunaqa, Cesarpa kontranpin kashanku. nispanku.
[13] Chay simikunata uyarispantaqmi, Pilatoqa, Jesusta hawaman pusarqan. Hinan chaninchanan tiyananpi tiyaykurqan. Chay cheqasqa ‘Rumiwan mast'asqa’, nispa sutichasqan karqan. Hebreo simipitaq ‘Gabata’ nispa sutichasqa karqan.
[14] Paskua p'unchaypaq wakichikuy p'unchaymi karqan. Hinallataq yaqa soqta orasmi karqan. Hinaqtinmi Pilatoqa, judío runakunata nirqan: —Reyniykichista qhawariychis, nispa.
[15] Paykunataqmi ichaqa qaparirqanku: —¡Lloqsichun! ¡Lloqsichun! ¡Chakatay! nispanku. Pilatotaq paykunata nirqan: —¿Reyniykichistachu chakatasaq? nispa. Umalliq saserdotekunataq kutichirqanku: —¡Cesarmanta wak reyniykuqa, manan kapuwankuchu! nispanku.
[16] Chay hina kaqtinmi, Pilatoqa chakatanankupaq soldadokunaman hap'ichirqan. Hinan Jesusta hap'ispa aparqanku.
[17] Jesustaqmi krusninta q'epiyukuspa, ‘Uman tullu’ nispa sutichasqa cheqasman lloqsirqan. Hebreo simipitaq, ‘Gólgota’ nispa sutichasqa karqan.
[18] Chaypin Jesustaqa chakatarqanku. Hinan paywan kuskata iskay runatawan, hukta paña ladonpi, huktataq lloq'e ladonpi chakatarqanku. Jesustaq paykunaq chawpinkupi kasharqan.
[19] Pilaton huk qelqata qelqarqan, hinaspa krus pataman churachirqan. Chaypitaqmi qelqasqa karqan: NAZARETMANTA JESÚS, JUDÍO RUNAKUNAQ REYNIN, nispa.
[20] Maypichus Jesusta chakatarqanku, chay cheqasqa llaqta qayllapin kasharqan. Hinallataq, chay qelqataqa hebreo rimaypi, griego rimaypi, latín rimaypi iman qelqarqanku. Chaykunaraykun chay qelqataqa askha judío runakuna ñawincharqanku.
[21] Judío runakunaq umalliq saserdotenkunataqmi, Pilatota nirqanku: —Ama qelqaychu: ‘Judío runakunaq Reynin,’ nispaqa. Aswanpas: ‘Payqa nirqanmi: “Judío runakunaq Reyninmi kani,” nispan,’ chayta qelqayqa, nispanku.
[22] Pilatotaq kutichirqan: —Qelqasqaytaqa, qelqaniñan, nispa.
[23] Soldadokunataqmi, Jesusta chakataspankuña, paypa p'achankunata hap'ispa, sapankapaq tawaman t'aqarqanku. Ukhu p'achantapas hap'irqankun. Chay ukhu p'achantaqmi ichaqa, mana sirayniyoq karqan. Chay p'achantaqa wichaymanta uraymanmi hunt'asqata awasqaku karqan.
[24] Chaymi hukkunahukkunawan ninakurqanku: —Ama llik'isunchu. Aswanpas mayqenninchispaqpas chay p'acha kananpaq sortiasunchis, nispa. Chayqa, Qelqaq hunt'akunanpaqmi karqan. Qelqaqa ninmi: ‘Paykunapurapin p'achaykunata rakinakurqanku, hinallataqmi p'achaykunapaqpas sortiarqanku,’ nispa. (Sal. 22:18) Chay hinatataqmi, soldadokunaqa ruwarqanku.
[25] Jesuspa krusnin qayllapitaqmi, mamitanpas, mamitanpa ñañanpas, Kleofaspa esposan Mariapas, Magdala llaqtayoq Mariapas sayasharqanku.
[26] Hinan Jesusqa, mamitanta, hinallataq munakusqan yachachisqantapas chaypi sayashaqta rikurqan. Hinaqtinmi mamitanta nirqan: —Warmi, wawaykita qhawarinki, nispa.
[27] Chaymantataq yachachisqanta nirqan: —Mamitaykita qhawarinki, nispa. Chay oramantapachan, yachachisqaqa wasinpi payta chaskirqan.
[28] Chay qhepatataqmi Jesusqa, tukuypas tukusqaña kasqanta yachaspa, Qelqaq hunt'akunanpaq nirqan: —Ch'akishawanmi, nispa.
[29] Chaypin huk tumincha hunt'a binagreyoq kasharqan. Hinaqtinmi soldadokunaqa, huk esponhata chay binagreman challpurqanku. Chaytataqmi, huk isopoman wataspa, siminman asuykachirqanku.
[30] Jesustaq binagreta chaskispan nirqan: —¡Ñan tukusqaña! nispa. Umanta k'umuykuspataq espiritunta hap'ichirqan.
[31] Hatun sábado p'unchaypaq wakichikuy p'unchaymi karqan. Chayraykun judío runakunaqa, sábado p'unchaypi ayakuna kruspi qhepanankuta mana munarqankuchu. Chaymi, moqonkuta p'akinankupaq, hinaspataq ayankuta apaqapunankupaq Pilatota balikurqanku.
[32] Chaymantataqmi soldadokunaqa rispanku, ñawpaq kaqpatapas, huk kaqpatapas paywan chakatasqa kaqkunaq moqonkunata p'akimurqanku.
[33] Jesusman chayaspankutaqmi ichaqa, wañusqaña kasqanta rikuspanku, manaña moqonkunata p'akirqankuñachu.
[34] Soldadokunamanta huknintaqmi ichaqa, lansanwan Jesuspa waqtanninta t'urpurqan. Hinan kasqan ratupacha, yawarpiwan, unupiwan lloqsimurqan.
[35] Pichus rikuqmi, willakurqan. Chay willakuynintaqmi cheqaqpuni. Qankunapas kreenaykichispaqmi payqa cheqaq nisqanta yachan.
[36] Qelqaq hunt'akunanpaqmi, chay imaymanakunaqa chay hina karqan. Qelqaqa ninmi: ‘Manan mayqen tullunkunapas p'akisqachu kanqa, nispa. (Éxo. 12:46; Num. 9:12; Sal. 34:20)
[37] Huk kaq Qelqapas nillantaqmi: ‘T'urpusqanku runatan qhawanqaku,’ nispa. (Zak. 12:10)
[38] Chaykuna qhepatataqmi, Arimatea llaqtamanta Joseqa, Jesuspa kuerponta apaqanpunanpaq Pilatota balikurqan. Pilatotaqmi uyakullarqan. Hinan rispan, Jesuspa kuerponta apakapurqan. Joseqa, judío runakunata manchakusqanraykun, pakallapi Jesuspa yachachisqan karqan.
[39] Ñawpaqta Jesusman tutalla riq Nikodemopas, pachak librata hina mirratawan, aloetawan chhaqrusqata aparikuspan rillarqantaq.
[40] Jesuspa kuerponta hap'ispankutaq, q'apashaq hawinakunawan hawispanku, linomanta telakunawan k'uyurqanku. Chaytaqa, judío runakunaq p'ampanakuyninkuman hinan ruwarqanku.
[41] Chakatasqanku cheqaspin, huk werta kasharqan. Chay wertapin huk mosoq aya p'ampana t'oqo kasharqan. Chaypiqa, manan pitapas churasqakuraqchu karqan.
[42] Judío runakunaq Paskua p'unchaypaq wakichikunanku p'unchay kasqanrayku, hinallataq chay aya p'ampana t'oqoqa qayllallapi kasqanraykupiwanmi, chayman Jesustaqa churarqanku.