[1] Bongo namoni Nyama moko, ebimi na ebale; ezalaki na maseke zomi pe mitú sambo. Na liseke moko moko elati ekoti ya bokonzi; pe na likolo ya mitú na yango bakòmá bakombo ya kotsiola Nzambe.
[2] Nyama oyo nazalaki komona ekokani na nkoi; makolo na yango ezali lokola ya nkosi: pe monoko lokola ya tambo. Elima epesi yango bokonzi pe makasi nyonso, pe efandisi yango na kiti oyo yango moko ezalaki kofanda.
[3] Motú moko ya Nyama wana ezalaki na pota ya somo oyo elingaki koboma yango; kasi Nyama ebikaki kaka, boye bato nyonso ya mokili bakamwe penza pe balandi Nyama.
[4] Bango nyonso babandi kofukamela Elima, po epesaki bokonzi na Nyama. Bafukameli pe Nyama, balobi: “Nani akokani na Nyama? Nani akoki kobundisa yango?”
[5] Nyama ezwi nzela ya koloba makambo ya lofundu pe ya kotsiola Nzambe; ezwi bokonzi ya kosala mosala na yango mbula misato na ndambo;
[6] ebandi kotsiola Nzambe pe bokonzi na ye, ná Ndako ye afandaka, pe baoyo bazalaka epai na ye na Likolo.
[7] Bapesi yango nzela ya kobundisa bato ya bosantu pe ya kolonga bango; boye ezwi bokonzi ya bamboka nyonso, bikolo nyonso, mabota nyonso pe minoko nyonso.
[8] Na mokili mobimba bato ebele babandi kofukamela yango, pamba té uta na ebandeli ya mokili bakombo na bango ekòmamá té na buku ya bomoi ya Mwana-Meme oyo babomaki.
[9] Moto oyo azali na matoi, áyoka!
[10] Oyo atangamá kokangama, bakokanga ye; oyo atangamá kokufa na mbeli, akokufa na mbeli. Yango wana esengeli bato ya bosantu bákanga mitema pe bázala na bondimi.
[11] Bongo namoni nyama ya mibale ebimi na mokili; ezalaki na maseke mibale ekokani ná oyo ya Mwana-Meme, pe ezalaki koloba lokola Elima.
[12] Ezalaki na makasi nyonso ya Nyama ya liboso; pe ebandi kosala ndenge moko, na miso na yango. Ezalaki kosala 'tè bato nyonso ya mokili báfukamela Nyama ya liboso, oyo ebikaki na pota wana ya somo.
[13] Ezalaki kosala makamwisi minene; esali kutu 'tè móto élongwa na Likolo pe éya kokweya na mokili, na miso ya bato nyonso.
[14] Lokola bapesi yango nguya ya kosala makamwisi nyonso wana na miso ya Nyama ya liboso, ezwi nzela ya kokosa bato ya mokili; etindi bango kutu básala ekeko po na kokumisa Nyama ya liboso, oyo bazokisaki na mbeli kasi ekufaki té.
[15] Na sima ezwi nzela ya kopesa bomoi na ekeko wana, bongo yango ebandi koloba pe kobomisa baoyo nyonso baboyi kofukamela yango.
[16] Boye nyama oyo etindi bato nyonso na makasi 'tè bázwa elembo na liboko ya mobali to na elongi; ézala bato minene to bato pamba, bato ya bomengo to baoyo bakelelá, baumbu to bansomi.
[17] Ata moto moko té akokaki kosomba to kotekisa eloko, soki azangi elembo yango, to kombo ya Nyama to pe talo oyo ekokani na kombo na yango.
[18] Makambo oyo ezali kosenga mayele. Moto nyonso oyo azali na mayele akoki koyeba tina ya talo ya Nyama. Pamba té talo yango elakisi moto. Talo na ye ezali 666.