[1] عِیسَى کَوْ جَیْتُࢽّٜرُو لٜىٰࢽُو؞
[2] سُوَ لْࢻْ کُورُو وَلْدٜ ࢻَدُو اللَّهیٜرُو لٜىٰࢽُو؞ أَمْ سَمَّ ࢽَࢽْجُرُو إِسَیْ دُوُوࢽْ، ࢽَࢻْثٜ تَیِیَ أَلَمْدُ بَدِیٜࢽُو؞
[3] دَجِ مَلْمْبَ أَتَّوْرَیٜیَ ࢻَرِسَوَا کَمُ لَا کْࢽْجْࢽَ دِیُو ثْدِ ثَدَࢽَا ثَوُدٜ دَوُࢽْجَࢽْ تِیَ ثَسَکّٜ دَیٜࢽُو؞
[4] تَیِیٜ عِیسَرُو: «سَیِࢽَّ، کَمُ أَدْ کْࢽْجْࢽَ دِیُو ثْدِ دُوُوࢽْ، تِیَ کٜدَ؞
[5] أَتَّوْرَلَࢽْ ࢽَوِ مُوسَیٜ أَࢽْدِرُو وَدَ سَدٜ جِرِ أَࢽِرُو کَوْ غْغْࢻْکْیْیُو تَیِیَ رُورُو یٜجِیُو ثْࢽَّ؞ تُو، ࢽِ ࢽدَ، أَوِ وُلّْمْ؟» ثَࢽٜ تِیَ کٜوُورُو؞
[6] أَدَ وُلْدُࢽْجَدْ، عِیسَىٰ رِجَࢻْتُرُو أَوُو لَا تِیَ بُرْوُدُیٜ ثَوَࢽْدُورُو؞ أَمَّ عِیسَى ࢽغُجٜ ࢽغُلُوࢽْدُوࢽْ ثِدِ کُرْدَ بَدِیٜࢽُو؞
[7] تِرُو دَمَ بَوُورُو کُورُو ثَدِّ دُوُوࢽْ، ثِجٜ تَیِرُو: «کَمْ ثُرُوࢽْدُوࢽْ بِوُ بَوُومَدْ کَمُدْرُو بُرْوُوࢽْ کَوْ غْࢻْثُوُو!» یٜࢽُو؞
[8] کُورُو وَلْدٜ ࢽغُجٜ ثِدِ کُرْدَ بَدِیٜࢽُو؞
[9] أَدَ ࢻَࢽْغٜرَࢽِّیَ، کُرَࢽْ تَمِیَ غَࢽَرُو کُدٜرُو ࢻَلْ ࢻَلّٜࢽْ سَࢻْتَࢽٜ، حَرْ عِیسَى رُࢽْجُ کَمُ ࢻُوُࢽْجُࢽْ دَادَدَ کُولْیٜرَ؞
[10] عِیسَى ثِجٜ دَیٜࢽِّیَ، کَمُدْرُو: «ࢽدَرَࢽْ تَیِ؟ وُࢽْدُمَ ࢽِرُو وُواْمْ غْࢽَࢽْجْغْࢽِّ وَ؟» ثْࢽٜ تِیَ کِوُورُو؞
[11] تِیٜ: «کْمَ، وُࢽْدُمَ وُواْمْسْࢽِّ،» یٜࢽُو؞ دَجِ عِیسَیٜ تِرُو: «وُ یٜ ࢽِرُو وُواْمْ غْࢽَࢽْجْغْکِّوَوُو؞ لٜࢽٜ، أَمَّ أَدْࢽْ ࢻُوُࢽْ بَرٜ غَدٜرُو بِوُ دِمِّ!» یٜࢽُو؞]
[12] کُورُو عِیسَى وَلْدٜ جَمَدْرُو مَࢽَ ثْدّٜ: «وُ ࢽُرْ دُࢽِیَیٜ؞ وُࢽْدُ دُوُوࢽْ وُوَ سْغَࢽَمَدْ تْمَّرُو ثُرُو دُوُیٜࢽْ لٜجِوَوُو، ࢽُرْ رُویٜ ثُوَࢽْدِ،» یٜࢽُو؞
[13] ࢻَرِسَوَیٜ تِرُو: «ࢽِ کْلَࢽْمْلَࢽْ کْلَࢽْمْ شٜدَࢽْمِ ࢽَࢽْغَرُو، شٜدَࢽْمْدْ جِرٜ غْࢽِ،» یٜرَ؞
[14] عِیسَیٜ تَیِرُو: «شٜدَ کْلَࢽِیٜ دِکِّ یَیٜ، شٜدَࢽِدْ جِرٜ، دَلِلْࢽْجُدْ ࢽَ إِسْکّْࢽَا ࢽَ لٜکِّیَدَ ࢽُوکّْࢽَ ࢽَࢽْغَرُو؞ أَمَّ ࢽَیِدْ ࢽَ إِسْکّْࢽَا ࢽَ لٜکِّیَدَ ࢽُوࢽُوِّ؞
[15] ࢽَیِدْ أَمْبُو شَرَ کُرُو کَمْبٜࢽْ یِدُّوِ، أَمَّ وُ کَمْ ࢻِمَرُو شَرَ یِدّْکِّوَوُو؞
[16] أَمَّ شَرَ دِکِّ یَیٜ، شَرَࢽِدْ جِرٜ، دَلِلْࢽْجُدْ وُ رُࢽِ غْࢽِ، بَوَ وُوَ سُࢽُودْࢽَدَ رُوکُّو شَرَࢽِیٜ ࢽَࢽْغَرُو؞
[17] وَدَࢽْدُومَࢽْ رُوُوَدَ شٜدَ کَمْ یِࢽْدِیٜدْ جِرٜ؞
[18] وُمَ شٜدَ کْلَࢽِیٜ دِکِّ، کُورُو بَوَ وُوَ سُࢽُودْࢽَدْ یٜ کْلَࢽِࢽْ شٜدَ ثْدِ،» یٜࢽُو؞
[19] دَجِ تِرُو: «بَوَࢽْمْدْ ࢽدَرَࢽْ؟» یٜرَࢽِّیَ، عِیسَیٜ: «وُوَ ࢽُوسُوِّ، بَوَࢽِ یٜیَ ࢽُوࢽُوِّ؞ ثَ وُوَ ࢽُوسُوَّا، بَوَࢽِ یٜیَ ࢽُوࢽُوَّ،» یٜࢽُو؞
[20] عِیسَى ࢻَدُو اللَّهیٜࢽْ أَلَمْدُ ثْدِ دُوُوࢽْ، ࢽَ سَدَا ࢻِدَرَمْبٜࢽْ مَࢽَ أَࢽِیَ وُلْیٜࢽُو؞ أَمَّ وُࢽْدُمَ تِیَ ثْدَࢽِّ، سَࢽْجُ کُورُومَ ثْدْࢽِّ ࢽَࢽْغَرُو؞
[21] کُورُو عِیسَى وَلْدٜ تَیِرُو: «وُ لٜکِّ، کُورُو وُوَ مَسُوِ، کُورُو ثُرُو بِوُࢽْدُویٜࢽْ ࢽُوِ؞ ࢽَ لٜکِّدْرُو ࢽَیِدْ رَࢽْغُوٜ لٜࢽُوَّوُو،» یٜࢽُو؞
[22] کْلَ أَدْیٜࢽْ یَوْدِیَدْیٜ: «کْلَࢽْجُ ثٜجِ وَ؟ أَدْمَرُو وَ: ‹ࢽَ لٜکِّدْرُو ࢽَیِدْ رَࢽْغُوٜ لٜࢽُوَّوُو،› ثْࢽِدْ؟» یٜرَ؞
[23] عِیسَیٜ تَیِرُو: «ࢽَیِ ثِدِیٜ، أَمَّ وُ سَمٜىٰ؞ ࢽَیِ دُࢽِیَ أَدْیٜ، أَمَّ وُ دُࢽِیَ أَدْیٜ غْࢽِ؞
[24] أَدْمَ ࢽَࢽْغَرُو ࢽَیِرُو ثُرُو بِوُوَࢽْدُویٜࢽْ ࢽُوِ وُلْࢽْغٜىٰرَکُّو؞ وُمَ تِ وُورُو کَسَدُّوِّیَ، ثُرُو بِوُوَࢽْدُویٜࢽْ ࢽُوِ،» یٜࢽُو؞
[25] تِرُو: «ࢽِ وُࢽْدُ؟» ثَࢽٜ کٜوُورْࢽِّیَ، عِیسَیٜ تَیِرُو: «أَوُو تْࢽْ بَدِدُرَمْࢽِࢽْ وُلْࢽْجَغَکّْࢽَدْمَ؞
[26] أَوُو ࢽغْوُ کْلَࢽْدُوࢽْ وُلْدُیٜیَ شَرَدُیٜیَ تَکّْࢽَ، أَمَّ تِ وُوَ سُࢽُودْࢽَدْ جِرٜمَ، کُورُو أَوُو تِیٜࢽْ ࢻَکّْࢽَدْمَا دُࢽِیَرُو وُلْغْکِّ،» یٜࢽُو؞
[27] أَمَّ کْلَ بَوَدْیٜࢽْ تَیِرُو مَࢽَجِیدْرُو أَسُجَࢽِّ؞
[28] دَجِ عِیسَیٜ تَیِرُو: «تَدَ کَمْبٜدَ کْسْکَرُو رُوغْوِیَ، وُمَ تِ وُورُو ࢽُوࢽُوِ، کُورُو أَوِمَ کْلَࢽِرُو دِکِّوَوُو، أَمَّ بَوَ وُوَ أَلَمْسْࢽَدْ غَیْ، أَوُو أَࢽِیَ وُلّْکِّرُو ࢽُوࢽُوِ؞
[29] تِ وُوَ سُࢽُودْࢽَدْ وُوَ رُوکُّو؞ وُوَ رُࢽِ کُولْسْࢽِّ، دَلِلْࢽْجُدْ سَوِسُویٜ أَوُووَ ثْرَاࢽَدَ دِکِّ ࢽَࢽْغَرُو،» یٜࢽُو؞
[30] سَ عِیسَى أَدَ وُلْجِدْࢽْ، أَمْ کَدَ تِیَ کَسَتْکٜرَ؞
[31] دَجِ عِیسَیٜ یَوْدِیَ تِیَ کَسَثَّࢽَمَدْرُو: «مَࢽَࢽِ غَوِیَ، ࢽَیِ جِرٜمَرُو ࢻُوُرَوَࢽِ؞
[32] جِرٜدَ ࢽُوࢽُوِ، جِرٜدْ یٜ ࢽَیِرُو ࢽَࢽْکَمْ کْلَیٜ ࢽجَدِ،» یٜࢽُو؞
[33] تِرُو: «أَࢽْدِ کَدُوُ ࢽَوِ إِبْرَاهِیمْبٜ، کُورُو کَرٜیَ وُࢽْدُیٜمَرُو ࢽغَلْتٜمَ وَلِّیٜࢽْدٜ! ࢽدَیِࢽْ ࢽَࢽْکَمْ کْلَیٜ ࢻَࢽْدِیٜ ࢽْمِ؟» یٜرَ؞
[34] عِیسَیٜ: «جِرٜمَرُو ࢽَیِرُو وُلْࢽْجَغَکِّ، وُࢽْدُ دُوُوࢽْ بِوُ ثْدِمَدْ کَرٜیَ بِوُیٜ؞
[35] کَرٜیَدْ سَوِسُورُو غْࢽِ ࢻَدُوࢽْ دْغَیْ، أَمَّ تَدَدْ سَوِسُورُو دْغَیْ؞
[36] أَدْ ࢽَࢽْغَرُو تَدَدْ ࢽَࢽْکَمْ کْلَیٜ ࢽجَدِیَ، ࢽَࢽْکَمْ کْلَیٜدَ ࢻَࢽْدُوِ، دِیٜ!
[37] ࢽَیِ کَدُوُ ࢽَوِ إِبْرَاهِیمْبٜرُو ࢽُوکّْࢽَ، أَمَّ وُوَ ࢽجٜجُورُو مَࢽُوِ، دَلِلْࢽْجُدْ کَرْوُࢽْدُورُو مَࢽَࢽِ ࢽغَیِوَوُو ࢽَࢽْغَرُو؞
[38] وُ أَوُو ࢽَ بَوَࢽِیٜࢽْ رُکّْࢽَدَ وُلّْکِّ، أَمَّ ࢽَیِ أَوُو بَوَࢽْدُویٜࢽْ ࢻَࢽُّوَّدَ دِوِ،» یٜࢽُو؞
[39] تِرُو: «بَوَࢽْدٜدْ تِمَ ࢽَوِ إِبْرَاهِیمْدْ وُو!» یٜرَ؞ عِیسَیٜ تَیِرُو: «ثَ ࢽَیِ کَدُوُ ࢽَوِ إِبْرَاهِیمْبٜیَ، کْࢽْدُو ࢽَوِ إِبْرَاهِیمْ ثْدْࢽَدَ دِوِ؞
[40] کْرْمَ وُ ࢽَیِرُو جِرٜ اللَّهیٜࢽْ ࢻَکّٜ وُلْࢽْجَغَکّْࢽَ دُوُوࢽْ، وُوَ ࢽجٜجُورُو مَࢽُوِ؞ ࢽَوِ إِبْرَاهِیمْ ࢽغَلْتٜمَ أَدَ ثْدْࢽِّ!
[41] ࢽَیِ کْࢽْدُو بَوَࢽْدُویٜدَ دِوِ،» یٜࢽِّیَ، تِرُو: «أَࢽْدِیَ ࢽغْرِوُ غْࢽِ سٜسَمْبُو، بَوَࢽْدٜ تِلُو اللَّه کْلَࢽْجُدْمَ!» یٜرَ؞
[42] عِیسَیٜ تَیِرُو: «ثَ اللَّه بَوَࢽْدُووَ، وُوَ سْرَاوِ، دَلِلْࢽْجُدْ أَکُّوࢽِ ࢽَ اللَّهیٜࢽْ کَدِکُّو؞ کْلَࢽِ ࢽَࢽْغَرُو غْࢽِ کَدِکُّو، تِمَ وُوَ سُࢽُودُو؞
[43] أَوِرُو أَوُو ࢽَیِرُو وُلْࢽْجَغَکِّدَ أَسُࢽُوَّوُودْ؟ دَلِلْࢽْجُدْ مَࢽَࢽِدَ رَࢽْغُوٜ ࢻَࢽُّوَّوُو ࢽَࢽْغَرُو؞
[44] بَوَࢽْدُو تِمَ إِوُلِیسْ وُو، أَوُو بَوَࢽْدُو ثْرَاࢽَدَ دِوِیَ، رَاوَّ؞ تْࢽْ بَدِدُرَمْࢽِࢽْ تِ کَمْثٜجِ، کُورُو کْلَ جِرٜىٰࢽْ دَجْࢽِّ، تِلَࢽْ جِرٜ بَوُو ࢽَࢽْغَرُو؞ کَتُّوُ کَمْجِیَ، حَلْࢽْجُ ࢻْلٜجِ، دَلِلْࢽْجُدْ تِ کَتُّوُمَ، کُورُو بَوَ کَتُّوُیٜ ࢽَࢽْغَرُو؞
[45] أَمَّ وُدْ جِرٜ وُلّْکِّدْرُو، وُوَ کَسَࢽْسُوَّوُو؞
[46] وُࢽْدُࢽْدُو بِوُ دِکّْࢽَرُو شٜدَجِ؟ جِرٜ وُلّْکِّیَ، أَوِرُو وُوَ کَسَࢽْسُوَّوُو؟
[47] کَمْ اللَّهیٜدْ مَࢽَ اللَّهیٜدَ ࢻَࢽْجِ؞ دَلِلْ ࢽَیِ ࢻَࢽُّوَّوُویٜدْ، ࢽَیِ اللَّهیٜ غْࢽِ ࢽَࢽْغَرُو،» یٜࢽُو؞
[48] دَجِ یَوْدِیَدْیٜ تِرُو: «ࢽِ کَمْ سَمَرِیَیٜ کَرُوَمَ ࢽِیٜࢽَدْ، جِرٜࢽْدٜ، غْࢽَ؟» یٜرَ؞
[49] عِیسَیٜ تَیِرُو: «أَعَ، وُلَࢽْ سٜدَࢽْ بَوُو؞ بَوَࢽِرُو دَرَجَ یِکِّ، أَمَّ ࢽَیِ وُرُو دَرَجَ ࢽجُو وَࢽُوَّ؞
[50] کْلَࢽِرُو دَرَجَدَ مَغْکِّوَوُو، أَمَّ ࢻَلْ لَا تِیَ مَجِ مبٜجِ، تِمَ شَرَمَدْ وُو؞
[51] جِرٜمَرُو ࢽَیِرُو وُلْࢽْجَغَکِّ، کَمْ دُوُوࢽْ مَࢽَࢽِدَ ࢽغُوجْࢽَمَدْ تْمَّرُو ࢽُیْوَوُو،» یٜࢽُو؞
[52] یَوْدِیَدْیٜ تِرُو: «کْرْمَ ࢽِلَࢽْ سٜدَࢽَّرُو ࢽُوࢽِیٜࢽَ! ࢽَوِ إِبْرَاهِیمْ ࢽُࢽَ، ࢽَوِیَ غَدٜ یٜ سَࢽُࢽَ، أَمَّ ࢽِیٜ: ‹کَمْ مَࢽَࢽِدَ ࢽغُوجْࢽَمَدْ تْمَّرُو ࢽُیْوَوُو!› ࢽْمِ؞
[53] ࢽِ بَوَࢽْدٜ ࢽَوِ إِبْرَاهِیمْدَ کُوࢽْمَّ وَ؟ تِ ࢽُࢽَ، ࢽَوِیَ غَدٜ یٜ سَࢽُࢽَ؞ ࢽِ وُࢽْدُرُو کْلَࢽْمْ ࢽغُویٜمْ؟» یٜرَࢽِّیَ،
[54] عِیسَیٜ: «کْلَࢽِرُو دَرَجَ یِکِّیَ، دَرَجَࢽِ ࢻَیْدَࢽْجُ بَوُو؞ بَوَࢽِ دَرَجَ وُرُو سِ، تِ دُوُوࢽْ تِرُو اللَّهࢽْدُو ࢽُوِدْ؞
[55] تِیَ ࢽغَلْتٜمَ ࢽُوࢽُوِّ، أَمَّ وُ تِیَ ࢽُوکّْࢽَ؞ ‹تِیَ ࢽُوکّْࢽِ،› وُلّْکِّیَ، کَتُّوُمَ ࢽَیِ غَیْرُو وَلّْکِّ؞ أَمَّ تِیَ ࢽُوکّْࢽَ، کُورُو مَࢽَࢽْجُ ࢽغُوکِّ؞
[56] بَوَࢽْدُو ࢽَوِ إِبْرَاهِیمْ کَرْوُ جَوْرُو کْجِیَرُو جَمَࢽِّ کُرُورُو ثْرَاࢽَ؞ تِیَ ثُرٜ کَرْوُࢽْجُ کْجِجْࢽَ،» یٜࢽُو؞
[57] دَجِ یَوْدِیَدْیٜ تِرُو: «کْرْوُ ࢻِوُمَ تَمِّ دُوُوࢽْ، ࢽَوِ إِبْرَاهِیمْبَ رُمَّ؟»
[58] عِیسَیٜ: «جِرٜمَرُو ࢽَیِرُو وُلْࢽْجَغَکِّ، کَوُ ࢽَوِ إِبْرَاهِیمْ تَمْبِمَرُو، وُ مبٜجِ!» یٜࢽُو؞
[59] أَدْ ࢽَࢽْغَرُو دُوࢽْغُرْ کَوْیٜ تِرُو غْࢻْتُوُرُو ࢽغُویٜرَ، أَمَّ عِیسَى غْرَدٜ ࢻَدُو اللَّهیٜࢽْ کِلُوُو؞