[1] عِیسَى أَوُو أَࢽِیَ وُلْیٜࢽِّیَ، ࢻُوُرَوَࢽْجُوَ رُوکُّو ثِجَࢽٜ ࢽغَوُو ࢽغُورْ تِرُو کِدْرُوࢽْ ثَࢽِیٜࢽْ ࢽَ دُوُوࢽْ جْرْوُ لَا مبٜجِدْرُو لٜجَࢽٜ کَسَرْغَوُو؞
[2] یَحُسَ سْرْتُّوُمَࢽْجُدْ یٜ ࢽَدَ ࢽُوجْࢽَ، عِیسَىٰ ࢻُوُرَوَࢽْجُوَ ࢽَدْࢽْ ࢽغْوُرُو ثَࢻْتَࢽَ ࢽَࢽْغَرُو؞
[3] دَجِ یَحُسَ کْوُ لَا سُوجِیَیٜیَ غُرٜدُوُ وُرَوَ رِمَࢽَّیٜیَ ࢻَرِسَوَیٜیَا ࢽغُوجٜ جْرْوُدْرُو ࢻَتْلَ سُو، کَ ثَمْبِ سُو، بَرِمِ سُو مُکُّوࢽَّ کَدِرَ؞
[4] دَجِ عِیسَى أَوُو تِرُو وَکَّجِیے ࢽغَا ࢽُوجْࢽَدْ کَرْࢽْجٜ تَیِرُو: «وُࢽْدُوَ مَࢽُوِ؟» یٜࢽُو؞
[5] تِرُو: «عِیسَى کَمْ ࢽَجَرَتّٜیَ،» یٜرَࢽِّیَ، تَیِرُو: «وُمَ،» یٜࢽُو؞ یَحُسَ تِیَ سْرْثّْغْࢽَمَدْ یٜ تَیِیَ رُوکُّو دَادَ؞
[6] عِیسَیٜ تَیِرُو: «وُمَ،» یٜࢽِّیَ، ࢽغَوُوسْسْمْ ثَدٜ ثِدِرُو کٜسُرُو؞
[7] کُورُو عِیسَى وَلْدٜ تَیِرُو: «وُࢽْدُوَ مَࢽُوِ؟» ثْࢽٜ کِوُورْࢽِّیَ، تِرُو: «عِیسَى کَمْ ࢽَجَرَتّٜیَ،» یٜرَ؞
[8] عِیسَیٜ تَیِرُو: «وُمَ تِ وُورُو وُلْࢽْجَغَکّْࢽَ؞ وُمَا مَسُوِیَ، أَمْ أَࢽِیَ کُولُّواْ لٜجَ!» یٜࢽُو؞
[9] أَدْغَیْمَ مَࢽَ وُلْجْࢽَدْ وَکَّیٜࢽُو؞ تِیٜ: «ثُرُو أَمْ وُرُو سِمَّدْیٜࢽْ ࢻَلْمَ یُوَتْکْکّْࢽِ،» ثْࢽَّ؞
[10] دَجِ سِمَࢽْ بِتُرُسْ مُکُّوࢽْ کَشَغَرَّ ࢻِثّٜ وُولُودِ رِمَࢽْ کُرَدْیٜیَ بَکْثٜ سْمُوࢽْجُ کْمْبُورَمْدَ تْࢽْ کَمْغٜࢽُو؞ وُولُودِدْیٜ ثُࢽْجُ مَلْکُسْ؞
[11] أَمَّ عِیسَیٜ بِتُرُسُّو: «کَشَغَرْࢽْمْبَ ࢻَࢽّجُرُو کَلَࢽْغٜ! کْࢽْجَرَمْ بَوَدْ وُرُو سِࢽَدْࢽْ یَکِّوَوُو وَ؟» یٜࢽُو؞
[12] دَجِ کْوُ سُوجِیَیٜدَ کَجَلَّࢽْجَا غُرٜدُوُ یَوْدِیَیٜدَ عِیسَىٰ ثَدَࢽٜ کٜکّٜرُو؞
[13] بُرْوُوࢽْ تِیَ ࢽَ أَࢽَّسْ بَ کْسَیْ کَیْࢻَسّٜرُو کٜسَدُو؞ سَا أَدْࢽْ کَیْࢻَسْدْ رِمَࢽْ کُرَ،
[14] کُورُو تِمَ یَوْدِیَدْرُو غَلَ ثٜ کَمْ ࢻَلْ جَمَدْرُو ࢽُࢽَمَ تَیِرُو ࢽغَلْوُو ثْࢽَّدْ وُو؞
[15] دَجِ سِمَࢽْ بِتُرُسَّ ࢻُوُرَ غَدٜیَ عِیسَىٰ غٜیَ؞ رِمَࢽْ کُرَدْ ࢻُوُرَ أَدَ ࢽُوجْࢽَ ࢽَࢽْغَرُو، تِ یٜ عِیسَىٰ رُوکُّو بَلْبَلَّ ࢻَدُو رِمَࢽْ کُرَدْیٜرُو کَسَرْغَوُو،
[16] أَمَّ بِتُرُسْ دٜیَࢽْ ثِࢽَّ ࢻَدُویٜدْࢽْ دَیٜࢽُو؞ دَجِ ࢻُوُرَ دُوُوࢽْ رِمَࢽْ کُرَ تِیَ ࢽُوجْࢽَدْ وَلْدٜ کِرْ ثِࢽَّ غُرٜدُمَدْرُو مَࢽَجِیٜ بِتُرُسَّ ࢻَدُودْرُو کٜکُّو؞
[17] کِرْ ثِࢽَّ غُرٜدُمَدْیٜ بِتُرُسُّو: «ࢽِ یٜ ࢻُوُرَوَ کَمْ أَدْیٜ ࢻَلْࢽْجَ غْࢽِ؟» یٜࢽِّیَ، تِیٜ: «أَعَ، وُ غْࢽِ!» یٜࢽُو؞
[18] دُࢽِیَ کَکُوَ ࢽَࢽْغَرُو، وُولُودِیَا غُرٜدُوُوَ کَࢽُّ ࢻُجَࢽٜ ࢽَدْࢽْ دَادَ جَغَتِّ؞ بِتُرُسْ یٜ تَیِیَ رُوکُّو دَادَ کَࢽُّ جْغْتِّ؞
[19] دَجِ رِمَࢽْ کُرَدْ عِیسَرُو کْلَ ࢻُوُرَوَࢽْجُوَ أَلَمْدُࢽْجُوَیٜࢽْ کُورُو ࢽجْدُّو بَدِیٜࢽُو؞
[20] عِیسَیٜ تِرُو: «ࢻٜدٜرُو دُࢽِیَدْرُو وُلْغْکّْࢽَ؞ کُلُّمْ دَࢽْدَلَّا ࢻَدُو اللَّهیٜیَلَࢽْ ࢽَ یَوْدِیَ سَمَّ ثَࢻْتَیْدْࢽْ أَلَمّْکّْࢽَ؞ أَوِمَ أَسْرْلَࢽْ وُلّْکّْࢽِ؞
[21] أَوِرُو کُورُو سْدّْمِ؟ أَمْ کْرْࢽْسَࢽَرُو کْلَ أَوُو تَیِرُو وُلْغْکّْࢽَیٜࢽْ کُورُو یِدّٜ! أَیْ، أَوُو وُلّْکّْࢽَدَ ࢽُوجَࢽَ،» یٜࢽُو؞
[22] أَوُو أَࢽِیَ وُلْیٜࢽِّیَ، غُرٜدُمَ لَا ࢽَدْࢽْ دَادَ عِیسَىٰ مَرِࢽْ بَکْثٜ تِرُو: «أَدْغَیْࢽِࢽْ رِمَࢽْ کُرَدْرُو جَاوُ کَلَکّْمِ؟» یٜࢽُو؞
[23] عِیسَیٜ تِرُو: «أَوُو وُلّْکّْࢽَدْ دِوِیَ، کْلَ دِوِدْیٜࢽْ شٜدَࢽٜ؞ أَمَّ جِرٜیَ، أَوِرُو وُوَ بَࢽْسْمِ؟» یٜࢽُو؞
[24] دَجِ أَࢽَّسْ عِیسَىٰ تِکّٜرْࢽَ ࢽَ کَیْࢻَسْ رِمَࢽْ کُرَدْیٜرُو جُوَیٜىٰࢽُو؞
[25] سِمَࢽْ بِتُرُسْ ࢽَدْࢽْ دَادَ کَࢽُّ جْغْتِّ دُوُوࢽْ، تِرُو: «ࢽِ یٜ ࢻُوُرَوَࢽْجُیٜ ࢻَلْࢽْجَ غْࢽِ؟» یٜرَ؞ بِتُرُسّٜ أَࢽْغْرْجٜ: «وُ غْࢽِ!» یٜࢽُو؞
[26] وُولُودِیَ رِمَࢽْ کُرَیٜ ࢻَلْࢽْجَ کْرَمِ کَمْ دُوُوࢽْ بِتُرُسْ سْمُو کَمْجْࢽَدْیٜ تِرُو: «ثُرُو جْرْوُدْیٜࢽْ تِیَ رُوکُّو ࢽجَرُکّْࢽِ وَ؟» یٜࢽِّیَ،
[27] کُورُو بِتُرُسْ وَلْدٜ أَࢽْغْرْیٜࢽُو؞ سَدْمَࢽْ غُدُواْمْ کُوکُّورٜ کٜکُّو؞
[28] دَجِ سُوَ لْࢻْ عِیسَىٰ ࢻَدُو کَیْࢻَسّٜࢽْ ثَتُّلُوٜ غُومْࢽَرِرُو کٜسَدُو؞ تَیِ کْلَࢽْجَ غُومْࢽَرِدْرُو ࢽغَسَاࢽِّ، بَرٜ تَیِرْ غْࢽِرُو وَلْجَࢽٜ مَسْࢽَ سَلَیٜدَ تَیِرُو بُو تِیٜرْࢽِّرُو؞
[29] أَدْمَ ࢽَࢽْغَرُو غُومْࢽَ بِلَتُسْ ثُلُوٜ ࢽَࢽْجَرُو إِسٜ تَیِرُو: «أَوِ بُرْوُࢽْدُو کْلَ کَمْ أَدْیٜࢽْ؟» یٜࢽُو؞
[30] تِرُو: «کَمْ أَدْ دِوِ دِیُومَ غْࢽِیَ، تِیَ ࢽِرُو سْرْࢽّجِیٜوَوُو!» یٜرَ؞
[31] دَجِ بِلَتُسّٜ تَیِرُو: «ࢽَیِ کْلَࢽْدُومَ تِیَ تَیْوُو، وَدَࢽْدُولَࢽْ تِرُو شَرَ یِدُّواْ!» یٜࢽُو؞ یَوْدِیَدْیٜ تِرُو: «أَࢽْدِرُو کَمْ رُورُو ࢽجٜجُورُو أَمَرْدْغْࢽِّ،» یٜرَ؞
[32] أَدْغَیْمَ مَࢽَ عِیسَى کْلَ جِرِ ࢽُیْیٜࢽْ وُلْجْࢽَدْ جِرٜرُو وَلْیٜࢽُو؞
[33] کُورُو بِلَتُسْ وَلْدٜ غُومْࢽَرِرُو ࢽغَیٜ عِیسَىٰ بُواْجٜ تِرُو: «ࢽِمَ وَ مَیْ یَوْدِیَیٜدْ وُو؟» یٜࢽُو؞
[34] عِیسَیٜ تِرُو: «ࢽِ کْلَࢽْمْ أَدَ وُلّْمْ رَ أَمْ لَا کْلَࢽِࢽْ أَدَ وُلْࢽْغٜىٰرَ؟» یٜࢽُو؞
[35] بِلَتُسّٜ: «وُ یَوْدِ وَ؟ أَمْ لَرْدُࢽْمْبٜیَ وُرَوَ رِمَࢽَّیٜیَ ࢽِیَ مُکُّوࢽِرُو ࢽغٜسَکُّو؞ تُو، أَوِ غْلٜ دِمْ؟» یٜࢽُو؞
[36] عِیسَیٜ: «ࢽُودُوࢽِ بَرْغَادْ دُࢽِیَ أَدْیٜ غْࢽِ؞ ثَ ࢽُودُوࢽِ دُࢽِیَ أَدْیٜیَ، وُولُودِیَࢽِ ثِجَࢽٜ بَرٜ وُوَ مُکُّو یَوْدِیَیٜرُو سَسَکّْࢽِّرُو لَوَلَ ثَدْࢽَ؞ أَمَّ ࢽُودُوࢽِ دُࢽِیَ أَدْیٜ غْࢽِ،» یٜࢽُو؞
[37] دَجِ بِلَتُسّٜ تِرُو: «أَدْغَیْمَا، ࢽِ مَیْ؟» یٜࢽِّیَ، عِیسَیٜ تِرُو: «ࢽِمَ وُلّْمْ، وُ مَیْ؞ دَلِلْ تَمْبُوࢽِیَ دُࢽِیَرُو کْࢽْدٜࢽِیَدْ جِرٜدَ سَتُّوُرُو؞ وُࢽْدُ دُوُوࢽْ جِرٜدْیٜدْ کُواْࢽِ ࢻَࢽْجِ،» یٜࢽُو؞
[38] بِلَتُسّٜ تِرُو: «أَوِ جِرٜدْ وُو؟» یٜࢽُو؞ بِلَتُسْ أَدَ وُلْیٜࢽِّیَ، کُورُو وَلْدٜ ࢽَ یَوْدِیَدْیٜرُو ثُلُوٜ تَیِرُو: «أَیَوْ ࢻِمَ کَمْ أَدْࢽْ ࢻَࢽْدْکّْࢽِ؞
[39] أَمَّ کْلَ أَدَࢽْدُویٜࢽْ کُوسُومَ ࢻَلْ سَلَ لَیَ ࢽجْکَّیِرَمْبٜدْࢽْ ࢽَیِرُو سَلَمْࢽْجَغَکِّ؞ مَیْ یَوْدِیَیٜدَ وَ ࢽَیِرُو سَلَمْࢽْجَغَکِّیَ، رَوُوْ؟» ثْࢽٜ تَیِیَ کِوُورُو؞
[40] کُورُو وَلْدَࢽٜ یِلْجَࢽٜ: «أَعَ، تِ غْࢽِ، بَرَبَّسْ!» یٜرَ؞ تِ بَرَبَّسْدْ جَوَلْکُورْجِمَ؞