[1] ثُرُو بْلَ بَیْتَࢽِیٜࢽْ ࢽَ مَرْیَمْبَ یَࢽْجُغْࢽَ مَرْتَا دَسَاࢽَدْࢽْ کَمْ لَا دُوࢽْدِ مبٜجِ، ثُࢽْجُ لَجَرُسْ؞
[2] تِ لَجَرُسْدْ یَࢽْجُغْࢽَ مَرْیَمْ کَمُ دُوُوࢽْ کَوُدِ سِ کْمَیٜدْرُو ࢻِجِیٜ کَࢽْدُرِ کْلَࢽْجُیٜࢽْ ثِࢽْجْࢽَدْیٜ؞
[3] یَاࢽَ یِࢽْدِدْ کَمْ لَا ࢽَ عِیسَیٜرُو ثَࢽُودٜ: «کْمَ، کَمْ رَامَّدْ دُوࢽْدِ،» یٜࢽُو؞
[4] أَدَ ࢻَࢽْغٜࢽِّیَ، عِیسَیٜ: «کْࢽْدُوࢽْدِ أَدْیٜ ࢽجٜرُورَمْࢽْجُ کَرْمُو غْࢽِ، اللَّهرُو دَرَجَ ثِ، کُورُو تَدَ اللَّهیٜ یٜ تِیٜࢽْ دَرَجَ ثُوَࢽْدُورُو!» یٜࢽُو؞
[5] عِیسَى مَرْتَا یَࢽْجُغْࢽَا لَجَرُسَّا ثْرَاࢽَ؞
[6] دَجِ لَجَرُسْ دُوࢽْدِرُو ࢻَࢽْغٜࢽِّیَ، ࢽَ دْغَࢽَدْࢽْ کُورُو کَوُ یِࢽْدِرُو ࢽَࢻْکٜࢽُو؞
[7] ࢽغَوُو أَدْیٜࢽْ عِیسَیٜ ࢻُوُرَوَࢽْجُرُو: «ثِࢽِیُو، ثِدِ یَحُدِیَیٜرُو وَلْدِیُو!» یٜࢽُو؞
[8] ࢻُوُرَوَࢽْجُیٜ تِرُو: «سَیِࢽَّ، تُسّْࢽِّ یَوْدِیَدْ ࢽِیَ دُوࢽْغُرْ کَوْیٜࢽْ ࢽجٜجُورُو مَࢽْغٜرَ، کُورُو ࢽَدْرُو وَلْدْمِ؟» یٜرَ؞
[9] عِیسَیٜ تَیِرُو: «دَبْدُلَࢽْ سَ مٜوُࢽْ یِࢽْدِࢽْ دْغَ، مَرٜ؟ کَمْ کَوْسُ لٜجِیَ، تَلْجِوَوُو، ࢽُرْ دُࢽِیَ أَدْیٜدَ ثُرُیْ ࢽَࢽْغَرُو؞
[10] أَمَّ کَمْ بُࢽٜ لٜجِیَ، تَلْجِ، تِلَࢽْ ࢽُرْ بَوُو ࢽَࢽْغَرُو،» یٜࢽُو؞
[11] أَدَ وُلْیٜࢽِّیَ، عِیسَیٜ تَیِرُو: «سَوَࢽْدٜ لَجَرُسْ کْࢽْمْ ثْدِ، لٜکّٜ تِیَ سَࢽْغْکِّ،» یٜࢽُو؞
[12] ࢻُوُرَوَدْیٜ تِرُو: «کْمَ، کْࢽْمْ ثْدِیَ، ࢽغَجِ،» یٜرَ؞
[13] عِیسَى کْلَ کَرْمُو لَجَرُسّٜࢽْ مَࢽَجْࢽَ، أَمَّ تَیِدْ کْلَ کْࢽْمْبٜࢽْ مَࢽَجِرُو تْمَیٜرَ؞
[14] دَجِ عِیسَیٜ ࢻٜدٜرُو تَیِرُو: «لَجَرُسْ ࢽُࢽَ؞
[15] ࢽَیِ ࢽَࢽْغَرُو وُ ࢽَدْࢽْ بَوُودْرُو کْجِ ࢻَکِّ، وُوَ کَسَࢽْسُواْرُو؞ ثِࢽُواْ ࢽَࢽْجُرُو لٜࢽِیُو!»
[16] دَجِ تُومَ کَمْ تِرُو کَوُ ثَࢽِدْ ࢻُوُرَوَ غَدٜدْرُو: «أَࢽْدِ یٜ لٜࢽِیُو عِیسَىٰ رُوکُّو ࢽُیْیُو!» یٜࢽُو؞
[17] عِیسَى کَدِࢽِّیَ، أَسٜ لَجَرُسْ کَوُࢽْجُ دٜوُ رَیْ ثُرُو کَوْرِیٜࢽْ؞
[18] بْلَ بَیْتَࢽِیٜدْ کَرْࢽْ جٜرُجَلٜمْبٜࢽْ، کَتّٜࢽْجَ أَلَمَ کِلُومٜتْرْ یَکُّ غَیْ،
[19] کُورُو یَوْدِیَ کَدَ ࢽَ مَرْتَا مَرْیَمْبَیٜرُو کْلَ کَرْمُو یَࢽْجَغْࢽَیٜࢽْ تَیِیَ تَجِدُرُو إِسَࢽَ؞
[20] مَرْتَ عِیسَى کْࢽْدٜ ثْدِرُو ࢻَࢽْغٜࢽِّیَ، ثِجٜ تِیَ کَࢻْکٜىٰࢽُو، أَمَّ مَرْیَمْ ࢻَدُوࢽْ ࢽَࢻْکٜࢽُو؞
[21] مَرْتَیٜ عِیسَرُو: «کْمَ، ثَ ࢽِ ࢽَ أَدْࢽَّ، یَࢽِغْࢽَ بَوُوجْࢽِّ؞
[22] أَمَّ کْرْمَمَرُو أَوِ یَیٜ اللَّهَ کُورْمِیَ، اللَّه ࢽجِرُو ࢽُوکّْࢽَ،» یٜࢽُو؞
[23] عِیسَیٜ تِرُو: «یَࢽْمْغْࢽَ کَرْمُولَࢽْ وَلْجٜ ثِجِ،» یٜࢽُو؞
[24] مَرْتَیٜ: «یِمْ دَرْیٜىٰ یِمْ ثِࢽُواْ دُࢽِیَیٜیَ کَرْمُولَࢽْ وَلْجٜ ثِجِرُو ࢽُوکّْࢽَ،» یٜࢽُو؞
[25] عِیسَیٜ تِرُو: «وُمَ ثِࢽُواْ دُࢽِیَیٜیَ رُووَدْ وُو! کَمْ وُوَ کَسَࢽْسْࢽَمَدْ، بَوُوجِ یَیٜ، رُووَ دْغَیْ؞
[26] کُورُو وُࢽْدُ دُوُوࢽْ رُووَ دْغَࢽٜ وُوَ کَسَࢽْسْࢽَمَدْ تْمَّرُو ࢽُیْوَوُو؞ أَدَ یَسَرَمَّ وَ؟» یٜࢽِّیَ،
[27] تِرُو: «آه، کْمَ، ࢽِمَ أَلْمَسِیوُ تَدَ اللَّهیٜ دُࢽِیَرُو إِسْࢽَدْ وُورُو کَسَدّْکّْࢽَ،» یٜࢽُو؞
[28] أَدَ وُلْیٜࢽِّیَ، مَرْتَ لٜجٜ یَࢽْجُغْࢽَ مَرْیَمْبَ بُواْجٜ أَسْرْلَࢽْ تِرُو: «سَیِࢽَّ إِسْࢽَ، ࢽِیَ بُواْࢽْجِ،» یٜࢽُو؞
[29] مَرْیَمْ أَدَ ࢻَࢽْغٜࢽِّیَ، ࢽَغَتُّو ثِجٜ ࢽَࢽْجُرُو لٜىٰࢽُو؞
[30] عِیسَدْ بْلَرُو ࢽغَاࢽِّ، کُوَمِسُوࢽْ ࢽَ مَرْتَ تِیَ کَࢻْثْغْࢽَدْࢽْ کْرْغَ؞
[31] یَوْدِیَ دُوُوࢽْ ثُرُو ࢻَدُویٜࢽْ تِیَ تَجِجَࢽَدْ مَرْیَمْ ࢽَغَتُّو ثِجٜ ثُلُوُࢽَرُو کٜرُࢽِّیَ، تِیَ غٜیَ؞ کَوْرِرُو سُو دِیُورُو لٜجِرُو تْمَیٜرَ؞
[32] دَجِ مَرْیَمْ ࢽَ عِیسَى دْغَࢽَدْرُو إِسٜ تِیَ کِرُࢽِّیَ، ࢻُوُࢽْجُࢽْ تُࢽْغُرُمْجٜ تِرُو: «کْمَ، ثَ ࢽِ ࢽَ أَدْࢽَّ، یَࢽِغْࢽَ بَوُوجْࢽِّ،» یٜࢽُو؞
[33] عِیسَى مَرْیَمْبَ یَوْدِیَ تِیَ رُوکُّو إِسَࢽَدَ ثٜسِرِرُو کِرُࢽِّیَ، کَرْوُࢽْجُ کُتَّجٜ حَࢽْغَلْࢽْجُ ثَا ثِیٜࢽُو؞
[34] تَیِرُو: «ࢽدَرَرُو تِیَ کٜکُّوْ؟» ثْࢽٜ کِوُورْࢽِّیَ، تَیِیٜ تِرُو: «کْمَ، أَرٜ رُیْ!» یٜرَ؞
[35] دَجِ عِیسَى سُو ࢽغُویٜࢽُو؞
[36] یَوْدِیَیٜ: «جِرِ تِیَ ثْرَاࢽَدَ رُیْوُو!» یٜرَ؞
[37] أَمَّ لَاࢽجَیٜ: «تِ کَمْبُیٜ سِمْ کَجْࢽَدْ رَکْثٜ لَجَرُسَّ کَرْمُورُو ثْکَّیِوَوُو وَ؟» یٜرَ؞
[38] کُورُو عِیسَى کَرْوُࢽْجُ جَوْرُو بَࢽَّدْࢽَ دُوُوࢽْ، کَوْرِدْرُو لٜىٰࢽُو؞ کَوْرِدْ کُلْ کَوْیٜ، کُورُو ثِࢽْجُ کَوْ کُرَلَࢽْ جَکَّدَ؞
[39] عِیسَیٜ: «کَوْدَ تُلُوُواْ!» یٜࢽُو؞ مَرْتَ یَاࢽَ کَمْ بَوُوجْࢽَدْیٜ تِرُو: «کْمَ، جَوْرُو کِࢽَجِ؞ بَوُوجْࢽَدْ، کَوُࢽْجُ دٜوُ رَیْ، دِیٜ!» یٜࢽُو؞
[40] عِیسَیٜ تِرُو: «وُلْࢽْجْغْکّْࢽِ وَ؟ یَسَرَمَّا، دَرَجَ اللَّهیٜ رُمِ،» یٜࢽُو؞
[41] دَجِ کَوْدَ کٜتُّلُوُو؞ عِیسَى کْلَ سَمٜرُو سَࢻْثٜ: «بَوَ، وُوَ کْرْࢽْسْمَّدْرُو وُسٜࢽْجْکّْࢽَ؞
[42] سَوِسُو وُوَ کْرْࢽْسْمِرُو ࢽُوکّْࢽَ، أَمَّ جَمَ ࢽَ أَدْࢽْ دَجَࢽَدْ ࢽَࢽْغَرُو أَدَ وُلْیٜکُّو، ࢽِمَ وُوَ سُࢽُودْمْبُو کَسَثَّرُو،» یٜࢽُو؞
[43] أَدَ وُلْیٜࢽِّیَ، کُواْ دُࢽُووَرُو سَࢻْثٜ: «لَجَرُسْ، لُوٜ!» یٜࢽُو؞
[44] دَجِ کَمْ بَوُوجْࢽَدْ کِلُوُو، سِیَ مُکُّووَ بَتَّ لِࢽّٜࢽْ تِکّٜرْࢽَ، ࢻْکَّ یٜ بَتَّ لِࢽّٜࢽْ جَکَّدَ؞ عِیسَیٜ تَیِرُو: «تِیَ وُیْࢽُواْ، لٜجُو!» یٜࢽُو؞
[45] أَدْ ࢽَࢽْغَرُو یَوْدِیَ کَدَ ࢽَ مَرْیَمْبٜرُو إِسَࢽَ دُوُوࢽْ أَوُو عِیسَى ثْدْࢽَا ثَرُࢽَدْ تِیَ کَسَتْکٜرَ؞
[46] أَمَّ ثُرُوࢽْجَࢽْ لَا ࢽَ ࢻَرِسَوَیٜرُو لٜجَࢽٜ أَوُو عِیسَى ثْدْࢽَدَ تَیِرُو وُلْیٜىٰرَ؞
[47] دَجِ وُرَوَ رِمَࢽَّیٜیَ ࢻَرِسَوَا مَجِلِسْدَ ثَࢻْثَࢽٜ تَیِرُو: «کَمْ أَدْ أَلَمَ أَجَبَّ أَجَبَّ کَدَ ثْدِدْ، أَوِ غْلٜ دِیٜ؟
[48] تِیَ کُولِّیٜ أَدْغَیْ ثْدِیَ، وُࢽْدُ یَیٜ تِیَ کَسَثِّ؞ دَجِ رُومَࢽْوُدْ إِسَࢽٜ ࢽَࢽْدٜیَ جَمَࢽْدٜیَ سَمَّا ثَمُویِ،» یٜرَ؞
[49] دَجِ ࢻَلْࢽْجَ ثُࢽْجُ کَیْࢻَسْ، تِمَ سَا أَدْࢽْ رِمَࢽْ کُرَ وُو، تَیِرُو: «أَوِمَ ࢽُوࢽُوِّ؞
[50] جَمَدْ سَمَّ سَࢽُیْرُو کَمْ ࢻَلْ ࢽُࢽَمَ ࢽَیِرُو ࢽغَلْوُورُو أَسُࢽُوِّ وَ؟» یٜࢽُو؞
[51] مَࢽَ أَدَ ࢽغُمْࢽْجُࢽْ غْࢽِ وُلْیٜࢽُو، أَمَّ سَا أَدْࢽْ تِ رِمَࢽْ کُرَدْ، ࢽَوِࢽَوِ ثْدٜ عِیسَى ࢻُوُࢽْ جَمَدْ ࢽَࢽْغَرُو ࢽُیْ یٜࢽُو،
[52] کُورُو جَمَدْ رُࢽْجُ غْࢽِ ࢽَࢽْغَرُو، تَدَوَ اللَّهیٜ تَتَرْدَࢽَدَ ثَࢻْثٜ ࢻَلُّو وَلْجَرُو؞
[53] دَجِ تْࢽْ یِمْ أَدْࢽْ ࢽِیَ عِیسَىٰ رُورُو ࢽجٜجُویٜ ࢽغُویٜرَ؞
[54] أَدْمَ ࢽَࢽْغَرُو عِیسَى ࢻٜدٜرُو ࢻُوُ یَوْدِیَیٜࢽْ ثُلُوِوَوُو، أَمَّ ثِدِ کَرْࢽْ کَرَایٜدْرُو لٜجٜ بْلَ لَا إِࢻْرَیِمْ ثَࢽِدْࢽْ ࢻُوُرَوَࢽْجُوَ رُوکُّو ࢽَࢻْکٜࢽُو؞
[55] ࢽغْمْرِ یَوْدِیَیٜ سَلَ لَیَ ࢽجْکَّیِرَمْبٜدْ کَرْࢽْغٜࢽِّیَ، أَمْ کَدَ بْلَدٜیَلَࢽْ ثِجَࢽٜ جٜرُجَلٜمْبُو کْلَࢽْجَ تَیِرُّو کَلَکْثَرُو لٜىٰرَ؞
[56] ࢻَدُو اللَّهیٜࢽْ دَجَࢽَ عِیسَىٰ مَجَیْ دُوُوࢽْ، کَتّٜࢽْجَࢽْ: «أَوِ تْمَࢽُوْ؟ ࢽغْمْرِدْرُو إِسِوَوُو وَ؟» ثَࢽِ؞
[57] ثَمَࢽْ وُرَوَ رِمَࢽَّیٜیَ ࢻَرِسَوَا وَدَ ثَدٜ کَمْ لَا ࢽَ عِیسَى دْغَࢽَدَ ࢽُوجْࢽَا، إِسُو تَیِرُو وُلْجُوُو تِیَ ثَدَ ثَࢽَّ؞