[1] عِیسَى یَحْیـَىٰ کُوجْࢽَرُو ࢻُوُرَوَ ثُوَࢽْدٜ تَیِرُو کَسَلَ ثْدِّدَ ࢻَرِسَوَ ࢻَࢽْجَࢽَرُو عِیسَى أَسُیٜࢽُو؞
[2] أَدْ یَیٜ عِیسَى تِ کْلَࢽْجُ غْࢽِ، ࢻُوُرَوَࢽْجُ أَمْبُو کَسَلَ ثَدِّ؞
[3] دَجِ ثِدِ یَحُدِیَیٜیَ کُولْجٜ ثِدِ غَلِلٜىٰرُو وَلَّدَ؞
[4] أَمَّ سَیْ ثِدِ سَمَرِیَیٜࢽْ رٜجٜ کُوجِیَ دُوُوࢽْ؞
[5] أَدْغَیْمَ عِیسَى بْلَ لَا ثِدِ سَمَرِیَیٜ تِرُو سَکَرْ ثَࢽِ کَرْࢽْ کُلُو ࢽَوِ یَعْࢼُوبَ تَدَࢽْجُ ࢽَوِ یُوسُࢻُرُو ثِࢽَدْرُو کَدِیُو؞
[6] ࢽَدْࢽْ بَرَمْ یَعْࢼُوبَیٜ مبٜجِ، کُورُو کَوْسُ کْلَ دَوُ، عِیسَى یٜ بْلَوُرُورُو ثْمْبَرْࢽَ، إِسٜ ثِ بَرَمْدْیٜࢽْ ࢽَࢻْکٜࢽُو؞
[7] کَمُ سَمَرِیَیٜ لَا إِࢽْغِ غُدُورُو کَدِیُو؞ عِیسَیٜ تِرُو: «إِࢽْغِ سٜ یَکّٜ!» یٜࢽُو؞
[8] سَ أَدْࢽْ ࢻُوُرَوَࢽْجُ أَوُو کْمْبُویٜ ࢽجُوُورُو بْلَرُو لٜجَࢽَ؞
[9] أَمَّ کَمُ سَمَرِیَیٜدْیٜ تِرُو: «ࢽِ یَوْدِ، وُ یٜ کَمُ سَمَرِیَیٜ، أَوِیَوِࢽْ وُوَ إِࢽْغِ کْࢽْجَیٜرُو سُوُورْمِ؟» أَوُووَ ثَمَࢽْ یَوْدِیَا سَمَرِیَوُوَ تَوَکْتَیْوَوُو؞
[10] عِیسَیٜ تِرُو: «ثَ کْࢽْجُو اللَّهیٜیَا وُࢽْدُ إِࢽْغِ کْࢽْجَیٜرُو ࢽجُوُورْࢽَآ ࢽُوࢽْمَّا، ࢽِمَ تِیَ کُورْمٜ إِࢽْغِ رُویٜ ࢽِرُو ࢽجِ،» یٜࢽُو؞
[11] کَمُدْیٜ تِرُو: «کْمَ، کَرْوِ یٜ تَمِّ، بَرَمْ یٜ کُرُوُ؞ ࢽدَرَࢽْ إِࢽْغِ رُویٜ أَدَ ࢻَࢽْدْمِ؟
[12] رَ، ࢽِدْ کَارِࢽْدٜ ࢽَوِ یَعْࢼُوبَ تِ دُوُوࢽْ أَࢽْدِرُو بَرَمْ أَدَ سَدٜ إِࢽْغِ تِ کْلَࢽْجُ ثَࢽٜ تَدَوَࢽْجُوَ لْمَࢽَّࢽْجُوَ یٜ ثَسَࢽَدْمَرُو وَ کُرَ وُو؟»
[13] عِیسَیٜ تِرُو: «وُࢽْدُ دُوُوࢽْ إِࢽْغِ أَدَ ثَࢽَدْ ࢽَࢽْغَدٜمْبُو ࢽغُدُ ࢻَࢽْجِ،
[14] أَمَّ وُࢽْدُ دُوُوࢽْ إِࢽْغِ تِرُو یِکِّدَ ثَࢽَدْ تْمَّرُو ࢽغُدُ ࢻَࢽْجِوَوُو؞ إِࢽْغِ تِرُو یِکِّدْ ثُرُوࢽْجُࢽْ سِمْ إِࢽْغِ رُویٜرُو وَلْجٜ حَرْ رُو سَوِسُویٜرُو بْلْبْلْدِ؞»
[15] کَمُدْیٜ تِرُو: «کْمَ، إِࢽْغِ أَدَ وُرُو سٜ، کُوَ أَدْࢽْ ࢻُوُࢽْ بَرٜ ࢽغُدُ ࢻَکّٜ إِࢽْغِ غُدُورُو ࢽَ أَدْرُو وَلْدْکّٜ إِسْکّْࢽِرُو،» یٜࢽُو؞
[16] عِیسَیٜ تِرُو: «لٜࢽٜ کوَࢽْمْ بُواْࢽٜ، ࢽَ أَدْرُو أَرُواْ!» یٜࢽُو؞
[17] کَمُدْیٜ: «کوَ تَکّْࢽِ،» یٜࢽِّیَ، عِیسَیٜ تِرُو: «‹کوَ تَکّْࢽِ،› ࢽْمَّدْ، جِرٜࢽْمْ؞
[18] أَمَّ کوَ أُوُ دِمْ، کُورُو تِ کْرْمَ رُوکُّو دْغَوَّدْ کوَࢽْمْ غْࢽِ؞ أَوُو وُلّْمَّدْ جِرٜ،» یٜࢽُو؞
[19] دَجِ کَمُدْیٜ تِرُو: «کْمَ، ࢽِ ࢽَوِرُو أَسُࢽْکّْࢽَ؞
[20] کَارِیَࢽْدٜسُو کْلَ کَوْ کُرُوُ أَدْیٜࢽْ اللَّهرُو أَمْبْتْکٜىٰرَ، أَمَّ ࢽَیِدْ ࢽَ اللَّهرُو أَمْبْتُّوُیٜدْ سَیْ جٜرُجَلٜمْࢽِࢽْ ࢽُوِ؞»
[21] عِیسَیٜ کَمُدْرُو: «وُوَ سَسَرَیْ، سَ لَا إِسٜ بَوَدْرُو کْلَ کَوْ کُرُوُ أَدْیٜࢽْ غْࢽِ بِ جٜرُجَلٜمْلَࢽْ غْࢽِ أَمْبْتْکْوِ؞
[22] ࢽَیِدْ أَوُو ࢽُوࢽُوِّرُو أَمْبْتْکْوِ؞ أَࢽْدِدْ أَوُو ࢽُوࢽِیٜࢽَرُو أَمْبْتْکْیْیٜ، أَوُووَ ࢽجْکَّوُودْ یَوْدِیَیٜࢽْ إِسِ؞
[23] أَمَّ سَدْ إِسِ حَرْ إِسْࢽَمَ، أَمْبْتُّوُوُ جِرٜىٰدْ بَوَدْرُو ثُرُو رُحُوَ جِرٜیَیٜࢽْ أَمْبْثَّغَیْ، دَلِلْࢽْجُدْ بَوَدْ أَمْ جِرِ أَࢽِمَ تِرُو أَمْبْثَّارُو مَجِ ࢽَࢽْغَرُو؞
[24] اللَّهدْ رُحُ، أَمْ تِرُو أَمْبْثَّغَیْدْ سَیْ ثُرُو رُحُوَ جِرٜیَیٜࢽْ أَمْبْثَّا!»
[25] کَمُدْیٜ تِرُو: «أَلْمَسِیوُ کَمْ تِرُو کْرِسْتِ ثَࢽِدْ إِسِرُو ࢽُوکّْࢽَ؞ إِسِیَ، أَࢽْدِرُو أَوُو سَمَّا إِسَࢽُوسَغَیْ،» یٜࢽُو؞
[26] دَجِ عِیسَیٜ تِرُو: «وُ ࢽِرُو مَࢽَࢽْجْغْکِّدْ، وُمَ تِ وُو!» یٜࢽُو؞
[27] سَ أَدْࢽْ ࢻُوُرَوَࢽْجُ إِسَࢽٜ عِیسَى کَمُرُو مَࢽَ ثْدِّدَ أَجَࢻْکٜرَ، أَمَّ وُࢽْدُࢽْجَمَ کَمُدْرُو: «أَوِ رَامْ؟» بِ عِیسَرُو: «أَوِرُو تِرُو مَࢽَغْمِ؟» وُلْجْࢽِّ؞
[28] دَجِ کَمُدْ بُلٜࢽْجُ کُولْجٜ بْلَرُو وَلْدٜ أَمْبُو:
[29] «أَرُواْ، کَمْ أَوُو دِکّْࢽَ سَمَّا وُلْسْغْࢽَا رُیْوُو! وَࢽٜىٰ تِمَ أَلْمَسِیوُدْ وُو؟» یٜࢽُو؞
[30] جَمَدْ ࢽَ عِیسَیٜرُو لٜدُرُو بْلَدْࢽْ کٜلُوُو؞
[31] سَ أَدْࢽْ ࢻُوُرَوَدْ تِیَ لُواْجَࢽٜ: «سَیِࢽَّ، مَسْࢽَ دٜ!» ثَࢽِ؞
[32] أَمَّ تَیِرُو: «کْمْبُوࢽِ ࢽُوࢽُوِّ مبٜجِ،» یٜࢽِّیَ،
[33] ࢻُوُرَوَدْ کَتّٜࢽْجَࢽْ: «کَمْ لَا تِرُو کْمْبُو ثُکُّدْࢽَ وَ؟» ثَࢽِ؞
[34] عِیسَیٜ تَیِرُو: «کْمْبُوࢽِدْ تِمَ أَوُو تِ وُوَ سُࢽُودْࢽَمَدْ ثْرَاࢽَدَ دِیُووَ کِدَࢽْجُ تُمُودُوُوَدْ وُو؞
[35] ࢽَیِیٜ: ‹کَلَدْرُو کْࢽْدَوُ دٜوُ غَࢻْثُو،› ࢽُوِ، غْࢽَ؟ وُ ࢽَیِرُو وُلْࢽْجَغَکِّ، کْلَ سَمُّواْ کُلُووَدْ کَلَدْرُو بَسَوُࢽَرُو رُیْوُو!
[36] کَمْ کَلَجِمَدْ أَلْوَسِ ثُوَࢽْدٜ ࢽٜمَ رُو سَوِسُویٜرُو ثَࢻْثِیے؞ أَدْغَیْمَ کَمْ ثْࢽَدِمَدَ کَمْ کَلَجِمَدَ رُوکُّو کَرْوُࢽْجَ کْجِجِ؞
[37] کْلَ أَدْیٜࢽْ أَوُو وُلْدْࢽَدْ جِرٜ: ‹کَمْ لَا ثْࢽَدِ، کَمْ لَا یٜ کَلَجِ؞›
[38] ࢽَیِیَ أَوُو کِدَࢽُوِّ کَلَدُرُو ࢽغٜࢽُودْکُّو؞ أَمْ غَدٜ کِدَدَ ثَدُو، ࢽَیِ یٜ بَرْغَ کِدَࢽْجَیٜ کِوَࢽْدُوْ؞»
[39] سَمَرِیَوُ بْلَ أَدْࢽْ دَسَاࢽَ کَدَ عِیسَىٰ کَسَتْکٜرَ، کَمُدْیٜ شٜدَجٜ: «أَوُو دِکّْࢽَ سَمَّا وُلْسْغْࢽَ!» ثْࢽَّ ࢽَࢽْغَرُو؞
[40] ࢽَࢽْجُرُو کَدِرَࢽِّیَ، ࢽَࢽْجَࢽْ ࢽَࢻْثُورُو تِیَ لُواْجَࢽٜ عِیسَى کَوُ یِࢽْدِرُو ࢽَࢻْکٜࢽُو؞
[41] مَࢽَࢽْجُ ࢽَࢽْغَرُو أَمْ کَدَ یٜ ثَیٜمَا کُوجْࢽَرُو تِیَ کَسَتْکٜرَ؞
[42] دَجِ کَمُدْرُو: «کْرْمَ أَوُو وُلّْمَّدْ غْࢽِ ࢽَࢽْغَرُو تِیَ کَسَتْکٜیْیٜ؞ أَࢽْدِ کْلَࢽْدٜمَ یٜ تِیَ ࢻَࢽِّیٜࢽَ، کُورُو جِرٜمَرُو تِمَ ࢽجْکَّیِمَ دُࢽِیَیٜدْ وُورُو ࢽُوࢽِیٜࢽَ!» یٜرَ؞
[43] ࢽغَوُو کَوُ یِࢽْدِیٜࢽْ عِیسَى بْلَدَ کُولْجٜ ثِدِ غَلِلٜىٰرُو لٜىٰࢽُو؞
[44] ثَمَࢽْ عِیسَى کْلَࢽْجُمَ ࢽَوِ بْلَࢽْجَࢽْ دَرَجَ ثْدَࢽِّ ثْࢽَّ؞
[45] ثِدِ غَلِلٜىٰرُو کَدِࢽِّیَ، أَمْ ثِدِدْیٜ تِیَ ࢽغْلَرُو سُوسَیٜرَ؞ تَیِدْ أَوُو عِیسَى جٜرُجَلٜمْࢽِࢽْ سَ سَلَیٜࢽْ ثْدْࢽَ سَمَّا ثَرُࢽَ، دَلِلْࢽْجُدْ تَیِ یٜ سَلَدْرُو لٜجَࢽَ ࢽَࢽْغَرُو؞
[46] دَجِ عِیسَى وَلْدٜ بْلَ کَࢽَ ثِدِ غَلِلٜىٰ ࢽَ إِࢽْغِیَ دِبٜࢽُّو کَلَکْثْࢽَدْرُو کَدِیُو؞ بْرْࢽِ کَࢻَرْࢽَامبٜلَࢽْ کُواْࢽَ لَا مبٜجِ، تَدَࢽْجُ دُوࢽْدِ؞
[47] کُواْࢽَدْ عِیسَى ثِدِ یَحُدِیَیٜیَ کُولْجٜ غَلِلٜرُو إِسْࢽَرُو ࢻَࢽْغٜࢽِّیَ، ࢽَࢽْجُرُو لٜجٜ تِیَ لُواْجٜ إِسُو تَدَࢽْجُ ࢽُو ثْدِدَ إِسَࢽْغَجُوُو یٜࢽُو؞
[48] عِیسَیٜ تِرُو: «أَلَمَ سُو، أَوُو أَجَبَّ سُو کِرُوْ غْࢽِیَ، تْمَّرُو یَسَرَوَّوُو!» یٜࢽُو؞
[49] کُواْࢽَدْیٜ تِرُو: «کْمَ، کَوُ تَدَࢽِ ࢽُیْرُو أَرٜ!» یٜࢽُو؞
[50] عِیسَیٜ تِرُو: «لٜࢽٜ، تَدَࢽْمْ رُوࢽْجُوَ!» یٜࢽِّیَ، کَمْدْ مَࢽَ عِیسَى تِرُو وُلْجْغْࢽَدَ کَسَثّٜ لٜىٰࢽُو؞
[51] لٜدُ ثْدِ دُوُوࢽْ، وُولُودِیَࢽْجُ تِیَ کَࢻْثَغَࢽٜ تِرُو: «تَدَࢽْمْ رُوࢽْجُوَ،» یٜرَ؞
[52] سَ تَدَࢽْجُ ࢽغَجْࢽَدَ کِوُورْࢽِّیَ، تِرُو: «بِکَّ سَ ࢻَلْ کَوْسُیٜࢽْ کَࢽْغٜدْ تِیَ کُولْیٜࢽُو،» یٜرَ؞
[53] بَوَدْ سَ أَدْمَࢽْ عِیسَیٜ تِرُو: «تَدَࢽْمْ رُوࢽْجُوَ!» ثْࢽَّدْرُو أَسُیٜࢽُو؞ دَجِ تِیَ أَمْ ࢻَࢽّجُیٜ سَمَّا عِیسَىٰ کَسَتْکٜرَ؞
[54] أَدْمَ أَلَمَ أَجَبَّ یِࢽْدِیٜ عِیسَى ࢽغَوُو ثِدِ یَحُدِیَیٜیَ کُولْجٜ ثِدِ غَلِلٜىٰرُو إِسْࢽَیٜࢽْ ثْدْࢽَدْ وُو؞