[1] عِیسَى أَوُو أَࢽِیَ وُلْیٜࢽِّیَ، کْلَ سَمٜرُو سَࢻْثٜ: «بَوَ، سَدْ ثْدْࢽَ؞ تَدَࢽْمْ دَرَجَ ࢽِرُو ࢽجُورُو تِرُو دَرَجَ یٜ،
[2] أَوُووَ أَمْ تِرُو یِمَّ سَمَّرُو رُو سَوِسُویٜ ثُورُو، تِرُو کْࢽْدُوُو کْلَ أَدَمْغْࢽَ ࢻِیٜ یَیٜࢽْ کٜمْ؞
[3] رُو سَوِسُویٜدْ، تِمَ ࢽِ اللَّه جِرٜىٰ تُوکْ تِلُودَ ࢽُودُ، کُورُو عِیسَى أَلْمَسِیوُ تِ ࢽُودْمَّدْ یٜیَ ࢽُودُ؞
[4] کِدَ دِیُورُو سِمَّدَ تُمُوغْکِّلَࢽْ دُࢽِیَلَࢽْ دَرَجَ ࢽجِکّْࢽَ؞
[5] تُو، بَوَ، دَرَجَ دُوُوࢽْ ࢽِیَ رُوکُّو کَوُ دُࢽِیَ أَلَکْتْࢽَمَࢽْ تَکّْࢽَدَ وُرُو سٜ!
[6] «أَمْ دُࢽِیَ أَدْࢽْ وُرُو سِمَّدْرُو ثُࢽْمْ إِسَࢽُوغْکّْࢽَ؞ تَیِ کَاࢽْمْ، تَیِیَ وُرُو سِمٜ مَࢽَࢽْمْ جَاࢽَ؞
[7] کْرْمَ أَوُو وُرُو سِمَّ سَمَّ ࢽَࢽْمْࢽِࢽْ کَدِیُورُو ࢽُوجَࢽَ؞
[8] مَࢽَ وُلْسْغْمَّدَ تَیِرُو وُلْغْکّْࢽَ؞ مَࢽَدَ ثَمُویٜ وُ ࢽَࢽْمْࢽِࢽْ کَدِکُّورُو جِرٜمَرُو ࢽُوجَࢽَ، کُورُو ࢽِمَ وُوَ سُࢽُودْمْبُو کَسَثَّࢽَ؞
[9] تَیِرُو مُودُوَ یِدّْکِّ؞ دُࢽِیَدْرُو غْࢽِ، تَیِ دُوُوࢽْ وُرُو سِمَّدْرُو مُودُوَ یِدّْکِّ، تَیِ کَاࢽْمْ ࢽَࢽْغَرُو؞
[10] أَوُو کَکّٜ سَمَّ کَاࢽْمْ، أَوُو کَاࢽْمْ سَمَّ یٜ کَکّٜ؞ کُورُو تَیِلَࢽْ دَرَجَ ࢻَࢽْدْکّْࢽَ؞
[11] وُدْ دُࢽِیَلَࢽْ غَدٜرُو دْغَکِّوَوُو، أَمَّ تَیِدْ کُورُو یَیٜ دُࢽِیَلَࢽْ دَسَیِ، کُورُو وُ یٜ ࢽَࢽْمْبُو إِسْکِّ؞ بَوَ تَیِرْ، ثُࢽْمْلَࢽْ تَیِیَ رُوࢽٜ، ثُ دُوُوࢽْ وُرُو سِمَّدْ! تَیِ تِلُورُو وَلْجَ، جِرِ أَࢽْدِ تِلُودْ غَیْ؞
[12] سَ وُ تَیِیَ رُوکُّودْ، ثُࢽْمْ دُوُوࢽْ وُرُو سِمَّلَࢽْ تَیِیَ رُویٜکُّو؞ تَیِیَ رُوکّْࢽَ، کُورُو أَوُو کِتَوُلَࢽْ رُوُوَدَدْ وَکَّجُورُو تِ ࢻَثّْغْࢽَمَدْرُو کَجِیَ، ࢻَلْࢽْجَمَ ࢻَثّْغْࢽِّ؞
[13] أَمَّ کْرْمَ ࢽَࢽْمْبُو إِسْکِّ، کُورُو کَرْوُکْجِࢽِ جَوْرُو تَیِلَࢽْ دْغَرُو أَوُو أَࢽِیَ ثُرُو دُࢽِیَیٜࢽْ وُلّْکِّ؞
[14] تَیِرُو مَࢽَࢽْمْ یِکّْࢽَ؞ دُࢽِیَدْ تَیِیَ وَیٜࢽُو، تَیِ دُࢽِیَیٜ غْࢽِ ࢽَࢽْغَرُو، جِرِ وُ یٜ دُࢽِیَیٜ غْࢽِدْ غَیْ؞
[15] تَیِیَ دُࢽِیَلَࢽْ تُلُوٜرُو غْࢽِ ࢽجُوُورْکِّ، أَمَّ تَیِیَ تِ کْلَدُولَࢽْ کَࢽٜرُو ࢽجُوُورْکِّ؞
[16] تَیِ دُࢽِیَیٜ غْࢽِ، جِرِ وُ یٜ دُࢽِیَیٜ غْࢽِدْ غَیْ؞
[17] جِرٜلَࢽْ تَیِیَ تَیِرُّو کَلَࢽْغٜ؞ مَࢽَࢽْمْدْ تِمَ جِرٜدْ وُو؞
[18] جِرِ وُوَ دُࢽِیَرُو سُࢽُودْمَّدْ غَیْ، وُ یٜ تَیِیَ دُࢽِیَرُو کِࢽُودْکُّو؞
[19] تَیِ ࢽَࢽْغَرُو کْلَࢽِیَ ࢽِرُو ࢽجِکّْࢽَ، تَیِ یٜ جِرٜلَࢽْ تَیِرُّو وَلْجَرُو!
[20] «تَیِ رُࢽْجَرُو غْࢽِ، کُورُو تَیِ دُوُوࢽْ مَࢽَࢽْجَلَࢽْ وُوَ کَسَࢽْسَیْدْ یٜرُو مُودُوَ یِدّْکِّ؞
[21] بَوَ، تَیِ سَمَّ تِلُورُو وَلْجَ، جِرِ ࢽِ وُلَࢽْ، وُ یٜ ࢽِلَࢽْدْ غَیْ؞ تَیِ یٜ أَࢽْدِلَࢽْ تِلُورُو وَلْجَ، دُࢽِیَدْ ࢽِمَ وُوَ سُࢽُودْمْبُو کَسَثُّورُو؞
[22] کُورُو دَرَجَ وُرُو سِمَّدَ تَیِرُو یِکّْࢽَ، تَیِ تِلُورُو وَلْجَ، جِرِ أَࢽْدِ تِلُودْ غَیْ؞
[23] وُ تَیِلَࢽْ، ࢽِ یٜ وُلَࢽْ؞ أَدْغَیْࢽِࢽْ تِلُورُو وَلْجَ، دُࢽِیَدْ ࢽِمَ وُوَ سُࢽُودْمْ یٜ، کُورُو جِرِ وُوَ سْرَامَّدْ غَیْ تَیِیَ رَامَّ یٜرُو ࢽُوجُورُو؞
[24] بَوَ، تَیِ وُرُو سِمَّدْ یٜیَ وُوَ رُوکُّو ࢽَ دْغَکّْࢽَدْࢽْ ࢽَࢻْثَیْیَ، رَاکُّو؞ أَدْغَیْمَ دَرَجَࢽِ ثَرُیْ، دَرَجَ دُوُوࢽْ وُرُو سِمَّ، کَوُ دُࢽِیَ أَلَکْتِمَࢽْ وُوَ سْرَامَّ ࢽَࢽْغَرُو؞
[25] بَوَ جِرٜمَ، دُࢽِیَدْ ࢽِیَ ࢽُوࢽْجْࢽِّ؞ أَمَّ وُ ࢽِیَ ࢽُوࢽْجْکّْࢽَ، کُورُو تَیِ أَࢽِ ࢽِمَ وُوَ سُࢽُودْمْبُو ࢽُوجَࢽَ؞
[26] ثُࢽْمْ تَیِرُو إِسَࢽُوغْکّْࢽَ، کُورُو ࢻُوُࢽْ إِسَࢽُوغْکِّ، کْرَوُو تِلَࢽْ سْرَامَّدْ ثُرُوࢽْجَࢽْ دْغَرُو، وُ یٜ تَیِلَࢽْ دْغَکُّورُو،» یٜࢽُو عِیسَیٜ؞