[1] «بَرٜ کَرْوُࢽْدُو کُتَّجْࢽِّ؞ اللَّهَ کَسَدُّواْ، وُ یٜیَ کَسَࢽْسْࢽُواْ!
[2] ࢻَدُو بَوَࢽِیٜࢽْ ࢽَ ࢽَࢻْتُیٜ کَدَ مبٜجِ؞ أَدْ غْࢽِیَ، وُلْࢽْجَغَکِّوَوُو؞ لٜکّٜ ࢽَیِرُو ࢽَ دَبَّرْࢽْجَغَکِّ؞
[3] لٜکّٜ ࢽَ دَبَّرْࢽْجَغَکِّیَ، وَلْدْکّٜ إِسْکّٜ ࢽَࢽِرُو ࢽجَسَدْکِّ، ࢽَ وُ دْغَکِّدْࢽْ ࢽَیِ یٜ دْغَیْوُورُو؞
[4] کُورُو جَوَلْ ࢽَ لٜکِّیٜدَ ࢽُوࢽُوَّ،» یٜࢽُو؞
[5] تُومَیٜ تِرُو: «کْمَ، ࢽَ لٜࢽْمِدَ ࢽُوࢽِیٜࢽْدٜ؞ ࢽدَیِلَࢽْ رَࢽْغِیٜ جَوَلْدَ ࢽُوࢽِیٜ؟» یٜࢽُو؞
[6] عِیسَیٜ تِرُو: «وُمَ جَوَلْدْ وُو، وُمَ جِرٜدْ وُو، وُمَ رُودْ وُو؞ وُیٜࢽْ غْࢽِیَ، وُࢽْدُمَ ࢽَ بَوَدْیٜرُو إِسِوَوُو؞
[7] وُوَ ࢽُوسُوَّا، بَوَࢽِ یٜیَ ࢽُوࢽُوِ؞ ࢽَ أَدْࢽْ ࢻُوُࢽْ تِیَ ࢽُوࢽُوَّ یٜ، رُوَّ یٜ،» یٜࢽُو؞
[8] ࢻِلِبُسّٜ تِرُو: «کْمَ، بَوَدَ ࢻْلٜسَغَࢽٜ، أَدْ مْرَدُࢽْدٜ غَلْجِ،» یٜࢽِّیَ،
[9] عِیسَیٜ تِرُو: «ࢻِلِبُسْ، وُ تُسّْࢽَ ࢽَیِیَ رُوکُّو دُوُوࢽْ، کُورُومَ وُوَ ࢽُوسْمِّ؟ کَمْ وُوَ سُرُࢽَدْ بَوَدَ ثُرُࢽَ؞ تُو، ࢽدَیِࢽْ غْلٜ بَوَدَ ࢻْلٜسَغَࢽٜ ࢽْمِ؟
[10] وُ بَوَدْلَࢽْ کْرْغَکُّو، بَوَدْ یٜ وُلَࢽْ کْرْغَرُو کَسَدّْمِّ وَ؟ مَࢽَ وُ وُلْࢽْجَغَکِّدَ ࢽغُمِّࢽْ غْࢽِ وُلّْکِّ، أَمَّ بَوَ وُلَࢽْ دْغَࢽَدْ کْࢽْدُوࢽْجُ ثْدِ؞
[11] وُ بَوَدْلَࢽْ کْرْغَکُّو، بَوَدْ یٜ وُلَࢽْ کْرْغَرُو کَسَدُّواْ، بِ کْࢽْدُودْ ࢽَࢽْغَرُو کَسَدُّواْ!
[12] «جِرٜمَرُو ࢽَیِرُو وُلْࢽْجَغَکِّ، کَمْ وُوَ کَسَࢽْسْࢽَمَدْ یٜ کْࢽْدُو دِکِّدَ ثْدِ؞ کُورُو کْࢽْدُو أَࢽِمَا کُوجْࢽَ ثْدِ، ࢽَ بَوَدْیٜرُو لٜکِّ ࢽَࢽْغَرُو؞
[13] أَوِ یَیٜ ثُࢽِلَࢽْ کُورُوِیَ، دِکِّ، بَوَدْ تَدَدْࢽْ دَرَجَ ثُوَࢽْدُورُو؞
[14] أَوُو لَارُو ثُࢽِلَࢽْ وُوَ سُوُورُوِیَ، دِکِّ؞
[15] «وُوَ سْرَاوَّا، وَدَوَࢽِ غَوِ؞
[16] دَجِ بَوَدَ کُورْکّٜ ࢽَیِرُو بَࢽَمَ غَدٜ ࢽَیِیَ رُوکُّو سَوِسُورُو دْغَرُو ࢽجَدِ؞
[17] تِمَ رُحُ جِرٜىٰدْ وُو؞ دُࢽِیَدْ رَکْثٜ تِیَ ثْمُویِوَوُو، تِیَ ثَرُࢽِّ بِ ࢽُوجَࢽِّ ࢽَࢽْغَرُو؞ أَمَّ ࢽَیِدْ تِیَ ࢽُوࢽُوَّ، دَلِلْࢽْجُدْ ࢽَیِیَ رُوکُّو کْرْغَ، کُورُو کَرْوُࢽْدُوࢽْ دْغَیْ؞
[18] «ࢽَیِیَ ࢽغْࢽِ کُولْࢽْجَکِّوَوُو، وَلْدْکّٜ ࢽَࢽْدُورُو إِسْکِّ؞
[19] سَ غَࢽَ ثْدِیَ، دُࢽِیَدْ غَدٜرُو سُرُیْوَوُو، أَمَّ ࢽَیِ وُوَ سُرُوِ؞ وُ رُووَ دْغَکِّ ࢽَࢽْغَرُو، ࢽَیِ یٜ رُووَ دْغَوِ؞
[20] یِمْ أَدْࢽْ وُ بَوَدْلَࢽْ کْرْغَکُّورُو ࢽُوࢽُوِ، ࢽَیِ یٜ وُلَࢽْ کْرْغَوْ، وُ یٜ ࢽَیِࢽْ کْرْغَکُّورُو ࢽُوࢽُوِ؞
[21] کَمْ وَدَوَࢽِ ࢽغُوجٜ جْغَیْمَدْ، تِمَ کَمْ وُوَ سْرَاࢽَدْ وُو؞ کُورُو کَمْ وُوَ سْرَاࢽَدَ بَوَࢽِ ثْرَیِ، وُ یٜ تِیَ رَاکّٜ تِرُو ࢻْلٜدْغْکِّ،» یٜࢽُو؞
[22] یَحُسَ تَدَ إِسْکَرِیُوتّٜ غْࢽِدْ تِرُو: «کْمَ، ࢽدَیِلَࢽْ دُࢽِیَدْرُو غْࢽِ، أَࢽْدِرُو ࢻْلٜدْغْمِ؟» ثْࢽٜ کِوُورُو؞
[23] عِیسَیٜ تِرُو: «کَمْ لَا وُوَ سْرَاࢽَا، مَࢽَࢽِ جْغَیْ؞ بَوَࢽِ تِیَ ثْرَیِ، ࢽَࢽْجُرُو إِسِیٜ تِیَ رُوکُّو ࢽَمِّیٜ؞
[24] کَمْ وُوَ سْرَاࢽِّمَدْ مَࢽَࢽِ جْغَیْوَوُو؞ کُورُو مَࢽَ ࢻَࢽُّوِدْ کَکّٜ غْࢽِ، بَوَ وُوَ سُࢽُودْࢽَدْیٜ؞
[25] «أَوُو أَࢽِیَ وُ ثُرُوࢽْدُوࢽْ دْغَکّْࢽَ دُوُوࢽْ ࢽَیِرُو وُلْࢽْغٜىٰرَکُّو؞
[26] بَࢽَمَدْ، رُحُ اللَّهیٜ تِ دُوُوࢽْ بَوَ ثُࢽِلَࢽْ ثُࢽُودِدْ، ࢽَیِرُو أَوِسُووَ أَلَمْࢽْجَغَیْ، کُورُو أَوُو وُلْࢽْجَغَکّْࢽَ سَمَّا إِسَتَࢽّجَغَیْ؞
[27] ࢽَࢽْلٜوَ کُولْࢽْجَغَکِّ، ࢽَࢽْلٜوَࢽِ ࢽَیِرُو ࢽجَدْکِّ؞ جِرِ دُࢽِیَ ثِدْ غَیْࢽِࢽْ غْࢽِ ࢽَیِرُو ࢽجَدْکِّ؞ بَرٜ حَࢽْغَلْࢽْدُو ثِجْࢽِّ بِ رِࢽُوِّ!
[28] ࢽَیِرُو: ‹وُ لٜکِّ، کُورُو وَلْدْکّٜ ࢽَࢽْدُورُو إِسْکِّ،› وُلْࢽْجَغَکّْࢽَدَ ࢻَࢽُّوَّ؞ وُوَ سْرَاوَّا، ࢽَ بَوَدْیٜرُو لٜکِّرُو کْجِ ࢻَࢽُّوِ، بَوَدْ وُوَ کُوسْࢽَ ࢽَࢽْغَرُو؞
[29] کْرْمَ کَوُ وَکَّجِرُو ࢽَیِرُو وُلْࢽْجَغَکّْࢽَ، سَ وَکَّجْࢽَدْࢽْ، کَسَدُّواْرُو؞
[30] ࢽغْوُرُو ࢽَیِرُو مَࢽَࢽْجَغَکِّوَوُو، مَیْ دُࢽِیَ أَدْیٜدْ کْࢽْدٜ ثْدِ ࢽَࢽْغَرُو؞ کْلَࢽِࢽْ کْࢽْدُوُو ثْدَࢽِّ؞
[31] أَمَّ دُࢽِیَدْ بَوَدَ رَاکّْࢽَرُو ࢽُوجُورُو أَوُو بَوَدْ وُوَ سَکّْࢽَدَ دِکِّ؞ ثِࢽُواْ، لٜࢽِیُو!» یٜࢽُو؞