[1] ࢽغَوُو أَدْیٜࢽْ عِیسَى ثِدِ غَلِلٜىٰࢽْ دِدِرِیٜࢽُو؞ ثِدِ یَحُدِیَیٜࢽْ دِدِرِدُ ثْرَاࢽِّ، یَوْدِیَدْ تِیَ رُورُو ࢽجٜجُورُو مَجَیْ ࢽَࢽْغَرُو؞
[2] ࢽغْمْرِ لٜیْمَیٜ سَࢽْجُ کَرْࢽْغٜࢽِّیَ،
[3] یَاࢽَوَ عِیسَیٜ تِرُو: «ࢽَ أَدْࢽْ ثِࢽٜ ثِدِ یَحُدِیَیٜرُو لٜࢽٜ، ࢻُوُرَوَࢽْمْسُودْ یٜ کِدَ دِمِدَ ثَرُورُو؞
[4] کَمْ ࢽُووَدَرُو وَلْدُ ثْرَاࢽَمَدْ أَوُو ثْدِدَ غْرَجِوَوُو؞ أَوُو أَࢽِیَ دِمِیَ، دُࢽِیَرُو ࢻْلٜدْغْࢽٜ!» یٜرَ؞
[5] أَسٜ، یَاࢽَࢽْجُدْمَ تِیَ کَسَثَّࢽِّ؞
[6] دَجِ عِیسَیٜ تَیِرُو: «سَࢽِ کُورُومَ ثْدْࢽِّ، أَمَّ سَࢽْدُودْ سَوِسُو دَبَّرْغَدَ؞
[7] دُࢽِیَدْ رَکْثٜ ࢽَیِیَ وَࢽْجَیْوَوُو، أَمَّ وُوَ وَسْࢽَ، دَلِلْࢽْجُدْ کْࢽْدُوࢽْجُ دِوِ وُلّْکِّ ࢽَࢽْغَرُو؞
[8] ࢽَیِدْ ࢽَ ࢽغْمْرِدْیٜرُو لٜࢽُواْ، وُدْ ࢽغْمْرِ أَدْرُو لٜکِّوَوُو، سَࢽِ کُورُومَ ثْدْࢽِّ ࢽَࢽْغَرُو،» یٜࢽُو؞
[9] أَوُو أَࢽِیَ تَیِرُو وُلْیٜىٰࢽِّیَ، ثِدِ غَلِلٜىٰࢽْ ࢽَࢻْکٜࢽُو؞
[10] أَمَّ یَاࢽَوَࢽْجُدْ ࢽَ ࢽغْمْرِدْیٜرُو لٜىٰرَࢽِّیَ، عِیسَى یٜ ࢻٜدٜرُو غْࢽِ، أَسْرْلَࢽْ ثِجٜ لٜىٰࢽُو؞
[11] یَوْدِیَدْ ࢽَ ࢽغْمْرِدْیٜࢽْ تِیَ مَجَࢽٜ: «تِ ࢽدَرَࢽْ؟» ثَࢽِ؞
[12] کُورُو ثُرُو جَمَدْیٜࢽْ أَمْ کَدَ کْلَࢽْجُࢽْ کَمْبِوُ کٜدُو؞ لَایٜ: «تِ کَمْ ࢽغْلَ،» ثَࢽِ، لَا یٜ: «أَعَ، أَمْبَ ثُوَتْکِ،» ثَࢽِ؞
[13] أَمَّ وُࢽْدُمَ کْلَ عِیسَیٜࢽْ ࢻٜدٜرُو مَࢽَ ثْدِوَوُو، یَوْدِیَدَ رِجَࢽَ ࢽَࢽْغَرُو؞
[14] دَجِ ࢽغْمْرِدْ دَوُࢽْجُࢽْ دُوُوࢽْ، عِیسَى ࢻَدُو اللَّهیٜرُو ࢽغَیٜ جَمَا أَلَمْدُ بَدِیٜࢽُو؞
[15] یَوْدِیَدْ أَجَࢻْثَࢽٜ: «کَمْ أَدْ ࢽغَلْتٜمَ کْرَجْࢽِّدْ، ࢽدَیِࢽْ کِتَوُدَ ࢽُویٜࢽُو؟» ثَࢽِ؞
[16] عِیسَیٜ تَیِرُو: «أَلَمْدُࢽِدْ وُیٜ غْࢽِ، تِ وُوَ سُࢽُودْࢽَدْیٜ؞
[17] کَمْ أَوُو اللَّه ثْرَاࢽَدَ دِیُو ثْرَاࢽَا، أَلَمْدُدْ وُیٜ غْࢽِ، اللَّهیٜرُو ࢽُوجِ؞
[18] کَمْ ࢽغُمْࢽْجُࢽْ مَࢽَ ثْدِمَدْ دَرَجَ کْلَࢽْجُیٜ مَجِ، أَمَّ کَمْ تِیَ ثُࢽُودْࢽَدْیٜ دَرَجَ مَجِدْ، تِدْ جِرٜمَ، کُورُو تِلَࢽْ جِرٜࢽَمْبُ بَوُو؞
[19] ࢽَوِ مُوسَى ࢽَیِرُو أَتَّوْرَدَ ࢽجَدْࢽَ، غْࢽَ؟ أَمَّ وُࢽْدُࢽْدُومَ وَدَوَࢽْجُدَ جْغَیْوَوُو؞ أَوِرُو وُوَ رُورُو ࢽجٜجُورُو مَࢽُوِ؟» یٜࢽُو؞
[20] جَمَدْ تِرُو: «ࢽِ کَرُوَمَ! وُࢽْدُ ࢽِیَ ࢽجٜجُورُو مَجِ؟» یٜرَ؞
[21] عِیسَیٜ تَیِرُو: «أَوُو أَجَبَّ ࢻَلْ کِدْکّْࢽِیَ، ࢽَیِ سَمَّ أَجَࢻْکٜوْ!
[22] ࢽَوِ مُوسَى وَدَ کَجَدُیٜ ࢽجَدْࢽَ، أَدْ یَیٜ کَجَدْ تِیٜࢽْ غْࢽِ، کَارِیَدْیٜࢽْ کَدِیُو، کُورُو یِمْ تُسْتُیٜیَ کَمْ کَجَࢽُوِ؞
[23] بَرٜ وَدَ ࢽَوِ مُوسَیٜ غَࢽَمْبُ تْدْࢽِّرُو یِمْ تُسْتُیٜیَ کَمْ کَجَࢽُوِیَ، أَوِرُو غْلٜ کْلَ یِمْ تُسْتُیٜیَ کَمْ سْرَمْبَ إِسَࢽْغَغْکّْࢽَیٜࢽْ وُرُو غْرْغَسْغْوِ؟
[24] بَرٜ کُرُو سِمْبٜࢽْ شَرَ دِوِّ، أَمَّ کْلَ جِرٜىٰࢽْ شَرَ دٜوُو!» یٜࢽُو؞
[25] دَجِ أَمْ جٜرُجَلٜمْبٜ لَایٜ: «تِمَ غْࢽَ کَمْ دُوُوࢽْ تِیَ رُورُو ࢽجٜجُورُو مَجَیْدْ؟
[26] أَکُّوࢽْجُ ࢻٜدٜرُو مَࢽَ ثْدِ دُوُوࢽْ، أَوِمَ تِرُو وُلْجَغَࢽِّ؞ رَ، جِرٜمَرُو وُرَوَࢽْدٜدْ تِیَ أَلْمَسِیوُرُو أَسُجَࢽَ وَ؟
[27] ࢽَ کَمْ أَدْ إِسْࢽَدَ ࢽُوࢽِیٜࢽَ؞ أَمَّ أَلْمَسِیوُدْ إِسِیَ، وُࢽْدُمَ ࢽَ إِسْࢽَدَ ࢽُوجِوَوُو،» یٜرَ؞
[28] دَجِ عِیسَى ࢻَدُو اللَّهیٜࢽْ جَمَدَ أَلَمْدُ ثْدِ دُوُوࢽْ، کُواْ سَࢻْثٜ: «وُوَ ࢽُوسُوَّ، کُورُو ࢽَ إِسْکّْࢽَدْ یٜیَ ࢽُوࢽُوَّ؞ ࢽغُمْࢽِࢽْ غْࢽِ کَدِکُّو، أَمَّ تِ وُوَ سُࢽُودْࢽَمَدْ جِرٜمَ؞ تِیَ ࢽُوࢽُوِّ؞
[29] وُ تِیَ ࢽُوکّْࢽَ، دَلِلْࢽْجُدْ ࢽَࢽْجُࢽْ کَدِکُّو، کُورُو تِمَ وُوَ سُࢽُودُو،» یٜࢽُو؞
[30] أَدْ ࢽَࢽْغَرُو عِیسَىٰ تَرُو مَیٜرَ، أَمَّ وُࢽْدُمَ تِرُو مُکُّو غْࢽَجْغْࢽِّ، سَࢽْجُ کُورُومَ ثْدْࢽِّ ࢽَࢽْغَرُو؞
[31] ثُرُو جَمَدْیٜࢽْ ࢽغْوُࢽْجَ تِیَ کَسَثَّࢽٜ: «أَلْمَسِیوُ إِسِیَ، أَلَمَسُو کَمْ أَدْ ثْدْࢽَدَ کُوجْࢽَ ثْدِ وَ؟» ثَࢽِ؞
[32] ࢻَرِسَوَ جَمَدْ أَوُو أَࢽِیَ کْلَ عِیسَیٜࢽْ وُلْجَیْ ࢻَࢽْغٜرَࢽِّیَ، وُرَوَ رِمَࢽَّیٜیَ ࢻَرِسَوَا عِیسَىٰ تَرُو غُرٜدُوُ ࢻَدُو اللَّهیٜیَ جُوَیٜرَ؞
[33] عِیسَیٜ تَیِرُو: «کَوُ غَࢽَرُو ࢽَیِیَ رُوکُّو دْغَکِّ، ࢽغَوُو أَدْیٜࢽْ ࢽَ تِ وُوَ سُࢽُودْࢽَدْیٜرُو وَلْدْکِّ؞
[34] وُوَ مَسُوِ، أَمَّ سُوَࢽْدُوَّوُو؞ ࢽَ دْغَکِّرُو رَࢽْغُوٜ إِسُوَّوُو؞»
[35] دَجِ یَوْدِیَدْ کَتّٜࢽْجَࢽْ: «ࢽدَرَ لٜجِ ࢽَ دُوُوࢽْ رَࢽْغِیٜ تِیَ ࢻَࢽْدِیٜوَوُودْ؟ رَ، یَوْدِیَ ثُرُو أَمْ لَرْدُ غْرٜسّٜرُو تَتَرْدَاࢽَدْیٜرُو وَ لٜجٜ أَمْ غْرٜسّٜدَ أَلَمْجِ؟
[36] أَوِ مَاࢽَ أَوُو وُلْجْࢽَدْیٜ؟ ‹وُوَ مَسُوِ، أَمَّ سُوَࢽْدُوَّوُو؞ ࢽَ دْغَکِّرُو رَࢽْغُوٜ إِسُوَّوُو؞›»
[37] یِمْ دَرْیٜىٰ یِمْ کُرَ ࢽغْمْرِدْیٜیَ عِیسَى ثِجٜ دَجٜ کُواْ سَࢻْثٜ: «کَمْ دُوُوࢽْ ࢽغُدُࢽْجُوَمَدْ، ࢽَࢽِرُو إِسُو ثَ!
[38] کَمْ وُوَ کَسَࢽْسْࢽَمَدْ، کِتَوُلَࢽْ رُوُوَدَدْ غَیْ: ‹إِࢽْغِ رُو ࢻَࢽْدُویٜ بْرْمْ غَیْ کَرْوُࢽْجُࢽْ ثُلُوٜ ࢻَلَلَجِ!›»
[39] أَدَ وُلْدُࢽْجُدْ، کْلَ رُحُ اللَّهیٜ أَمْ تِیَ کَسَثَّࢽَمَدْ ࢻُوُࢽْ ثَوَࢽْدِیٜࢽْ وُلْیٜࢽُو؞ أَمَّ سَ أَدْࢽْ رُحُدْ کُورُومَ تِࢽِّ، دَلِلْࢽْجُدْ عِیسَى کُورُومَ دَرَجَࢽْجُرُو ࢽغَاࢽِّ ࢽَࢽْغَرُو؞
[40] جَمَدْ مَࢽَ أَࢽِیَ ࢻَࢽْغٜرَࢽِّیَ، لَاࢽجَیٜ: «کَمْ أَدْ تِمَ جِرٜمَرُو ࢽَوِدْ وُو!» ثَࢽِ؞
[41] لَایٜ: «کَمْ أَدْ تِمَ أَلْمَسِیوُدْ وُو!» ثَࢽِ؞ أَمَّ لَایٜ کُورُو: «أَلْمَسِیوُدْ ثِدِ غَلِلٜىٰࢽْ وَ إِسِ؟
[42] رَ، کِتَوُلَࢽْ أَلْمَسِیوُدْ تِ کَدُوُ مَیْ دَاوُدَیٜ، کُورُو بْلَ بَیْتَلَمِ ࢽَ مَیْ دَاوُدَ دْغَࢽَدْࢽْ إِسِ ثْࢽَّ، غْࢽَ؟»
[43] أَدْغَیْمَ کْلَ عِیسَیٜࢽْ جَمَدْ کْوُ یِࢽْدِرُو یَکَّدَرَ؞
[44] ثُرُوࢽْجَࢽْ لَاࢽجَ تِیَ تَرُو مَیٜرَ، أَمَّ وُࢽْدُمَ تِرُو مُکُّو غْࢽَجْغْࢽِّ؞
[45] غُرٜدُوُ ࢻَدُو اللَّهیٜ وَلَّدَرَࢽِّیَ، وُرَوَ رِمَࢽَّیٜیَ ࢻَرِسَوَا تَیِرُو: «أَوِرُو عِیسَىٰ کُدُوِّدْ؟» ثَࢽٜ کٜوُورُو؞
[46] غُرٜدُوُیٜ: «ࢽغَلْتٜ وُࢽْدُمَ کَمْ أَدْ غَیْرُو مَࢽَ ثْدْࢽِّ!» یٜرَ؞
[47] دَجِ ࢻَرِسَوَیٜ تَیِرُو: «ࢽَیِ یٜیَ جَمْبَࢽْجَࢽَ وَ؟
[48] وُرَوَ أَدِࢽْوُیٜ بِ ࢻَرِسَوَیٜ کَمْ لَا تِیَ کَسَثّْࢽَ مبٜجِ وَ؟
[49] أَمَّ جَمَ أَتَّوْرَ ࢽَوِ مُوسَیٜ ࢽُوجَࢽِّ أَدْ بَسْکُوَدَ!» یٜرَ؞
[50] دَجِ ࢽِکُودِمُسْ، تِ دُوُوࢽْ ࢻَرِسَوَیٜ ࢻَلْࢽْجَ ࢽَ عِیسَیٜرُو ثَلَࢽْ لٜجْࢽَدْ، تَیِرُو:
[51] «کْلَ وَدَࢽْدٜىٰࢽْ کَمْبٜ ثِࢽْجُࢽْ ࢻَࢽِّیٜ أَوُو ثْدِدَ ࢽُوࢽِیٜࢽْدٜلَࢽْ تِرُو شَرَ یِدِّیٜوَوُو، غْࢽَ؟» ثْࢽٜ کِوُورُو؞
[52] أَمَّ تِرُو: «ࢽِ یٜ کَمْ غَلِلٜىٰ وَ؟ کِتَوُدَ کْرَࢽٜ رُیْ، ࢽَوِ ࢻِمَ ثِدِ غَلِلٜىٰࢽْ ثُلُوُࢽِّ!»
[53] [دَجِ وُࢽْدُ یَیٜ ࢻَࢽّجُرُو وَلَّدَࢽْ؞