[1] دَجِ بِلَتُسْ ثَکّٜ عِیسَىٰ کِرْوُولَࢽْ جَجَرْیٜرَ؞
[2] سُوجِیَدْ أَرِیَوُ کَرِییٜ کْلٜجَࢽٜ کْلَࢽْجُرُو غْࢽَجَغَࢽٜ کَلْوُ کِمٜ تِرُو لُیٜىٰرَ؞
[3] دَجِ ࢽَࢽْجُرُو إِسَࢽٜ تِرُو: «اللَّه ࢽغْوُرُو، مَیْ یَوْدِیَیٜ!» ثَࢽٜ مَرِࢽْ بَبَکّٜرَ؞
[4] کُورُو بِلَتُسْ وَلْدٜ ࢽَ یَوْدِیَدْیٜرُو ثُلُوٜ تَیِرُو: «أَکُّو تِیَ ࢽَࢽْدُورُو تُلُوُکِّ، أَیَوْ ࢻِمَ تِلَࢽْ ࢻَࢽْدْکّْࢽِرُو ࢽُوࢽُواْ!» یٜࢽُو؞
[5] دَجِ عِیسَى أَرِیَوُ کَرِییٜدَ کَلْوُ کِمٜدَ لُوَدَا کِلُوُࢽِّیَ، بِلَتُسّٜ تَیِرُو: «أَکُّو کَمْدْ!» یٜࢽُو؞
[6] وُرَوَ رِمَࢽَّیٜیَ غُرٜدُوُدَ تِیَ کٜرُࢽِّیَ، کُواْ سَࢻْثَࢽٜ: «کْسْکَرُو تِیَ جَغْࢽٜ! کْسْکَرُو تِیَ جَغْࢽٜ ࢽُو!» یٜرَ؞ بِلَتُسّٜ تَیِرُو: «ࢽَیِ کْلَࢽْدُو تِیَ ࢽغُوࢽُواْ، کْسْکَرُو جَغْࢽُواْ! وُدْ أَیَوْ تِلَࢽْ ࢻَࢽْدْکّْࢽِ،» یٜࢽُو؞
[7] یَوْدِیَدْیٜ تِرُو: «وَدَࢽْدٜ مبٜجِ، کْلَ وَدَدْیٜࢽْ کَرْمُو تِرُو وَجِࢻْثْغْࢽَ، تِ کْلَࢽْجُوَ تَدَ اللَّهیٜرُو ࢽغُوجْࢽَ ࢽَࢽْغَرُو،» یٜرَ؞
[8] بِلَتُسْ مَࢽَ أَدَ ࢻَࢽْغٜࢽِّیَ، ثَیٜیَ کُوجْࢽَرُو رِیٜࢽُو؞
[9] کُورُو غُومْࢽَرِرُو وَلْدٜ ࢽغَیٜ عِیسَرُو: «ࢽدَرَࢽْ کَدِمْ؟» ثْࢽٜ کِوُورُو؞ أَمَّ عِیسَى أَوِمَ تِرُو کَلَکْثْغْࢽِّ؞
[10] دَجِ بِلَتُسّٜ تِرُو: «وُرُو مَࢽَسْغْمْبَوُو وَ؟ ࢽَࢽِلَࢽْ کْࢽْدُوُو ࢽِیَ کُولْدُیٜیَ کْࢽْدُوُو ࢽِیَ کْسْکَرُو جَدُوُیٜیَ مبٜجِرُو ࢽُوࢽْمِّ وَ؟» ثْࢽٜ کِوُورُو؞
[11] عِیسَیٜ تِرُو: «سَمٜىٰࢽْ ࢽجَدْࢽِّیَ، کْࢽْدُوُوࢽْمْ کْلَࢽِࢽْ بَوُو؞ أَدْمَرُو کَمْ ࢽِرُو سْرْࢽْسْغْࢽَدْیٜ بِوُࢽْجُ کَاࢽْمْدَ کُوجْࢽَ،» یٜࢽُو؞
[12] سَ أَدْࢽْ ࢻُوُࢽْ بِلَتُسْ عِیسَىٰ سَلَمْدُ مَیٜࢽُو، أَمَّ یَوْدِیَدْ کُواْ سَࢻْثَࢽٜ: «کَمْ أَدَ سَلَمّْمِیَ، ࢽِ سَوَ کَیْسَرّٜ غْࢽِ! وُࢽْدُ دُوُوࢽْ کْلَࢽْجُوَ مَیْرُو ࢽغُوجْࢽَمَدْ کَیْسَرَّ وَجْࢽَ،» یٜرَ؞
[13] مَࢽَ أَدَ ࢻَࢽْغٜࢽِّیَ، بِلَتُسْ دٜیَرُو عِیسَىٰ ثُتُّلُوٜ کْلَ کُرِسْࢽْجُ شَرَیٜࢽْ ࢽَ ࢻَرْسَمْ کَوْلَࢽْ تْدْࢽَ تْلَمْ یَوْدِیَوْدِࢽْ تِرُو غَبَّتَ ثَࢽِدْࢽْ ࢽَࢻْکٜࢽُو؞
[14] یِمْدْ یِمْ دَبَّرْدُ سَلَ لَیَ ࢽجْکَّیِرَمْبٜ، کَوْسُ کْلَ دَوُ غَیْ؞ بِلَتُسّٜ یَوْدِیَدْرُو: «أَکُّو مَیْࢽْدُو!» یٜࢽُو؞
[15] أَمَّ کُواْ سَࢻْثَࢽٜ: «رُوࢽْجُ تُلُوٜ! رُوࢽْجُ تُلُوٜ! کْسْکَرُو تِیَ جَغْࢽٜ!» یٜرَ؞ بِلَتُسّٜ تَیِرُو: «أَ! مَیْࢽْدُووَ کْسْکَرُو جَغْکِّ؟» یٜࢽِّیَ، وُرَوَ رِمَࢽَّیٜ تِرُو: «کَیْسَرْ غْࢽِیَ، مَیْࢽْدٜ غَدٜ بَوُو!» یٜرَ؞
[16] دَجِ بِلَتُسْ عِیسَىٰ کْسْکَرُو جَجَارُو مُکُّوࢽْجَرُو کٜکُّو؞ دَجِ عِیسَىٰ ثَدَࢽٜ کٜسَدُو؞
[17] عِیسَى کْلَࢽْجُمَ کْسْکَࢽْجُ کَرْمُویٜ ࢽغُوجٜ ࢽَ تِیَ بُوُو کْلَیٜلَࢽْ بُواْجَیْ تْلَمْ یَوْدِیَوْدِࢽْ تِرُو غُولْغُوتَ ثَࢽِدْرُو لٜىٰࢽُو؞
[18] ࢽَدْࢽْ تِیَ أَمْ غَدٜ یِࢽْدِیَ رُوکُّو کْسْکَرُو جَیٜىٰرَ، سْغْرِ ࢻِ یَیٜࢽْ کَمْ ࢻَلْ ࢻَلْ، تِ عِیسَدْ دَوُࢽْجَࢽْ؞
[19] بِلَتُسْ کْلَ أَلُّویٜࢽْ رُوُجٜ کْسْکَدْرُو رُویٜىٰࢽُو؞ أَکُّو أَوُو رُوُوَدَدْ: عِیسَى کَمْ ࢽَجَرَتّٜ، مَیْ یَوْدِیَیٜ؞
[20] یَوْدِیَ کَدَ أَوُو أَلُّو أَدْࢽْ رُوُوَدَدَ کْرَیٜرَ، ࢽَ عِیسَىٰ کْسْکَرُو جَجَاࢽَدْ کَرْࢽْ بْرْࢽِدْیٜࢽْ، کُورُو أَوُو أَدَ تْلَمْ یَوْدِیَیٜیَ رُومْبٜیَ غْرٜسّٜیَلَࢽْ رُوُجَࢽَ ࢽَࢽْغَرُو؞
[21] دَجِ وُرَوَ رِمَࢽَّ یَوْدِیَیٜ بِلَتُسُّو: «بَرٜ ‹مَیْ یَوْدِیَیٜ› رُوُࢽْمِّ، ‹کَمْ أَدْیٜ وُ مَیْ یَوْدِیَیٜ ثْࢽَّ› رُوُࢽٜ،» یٜرَ؞
[22] بِلَتُسّٜ تَیِرُو: «أَوُو رُوُࢽْکّْࢽَدَ رُوُࢽْکّْࢽَ،» یٜࢽُو؞
[23] سُوجِیَدْ عِیسَىٰ کْسْکَرُو جَیٜىٰرَࢽِّیَ، کَجْمُࢽْجُ ࢽغُوجَࢽٜ ثِ دٜوُرُو یَکْثَࢽٜ سُوجِ ࢻِ یَیٜ ࢽُوَࢽْجُ ࢽغُویٜࢽُو؞ کَلْوُࢽْجُ کُرُوُ تُدُدْࢽِّ سَمٜࢽْ تَیْ ثِدِیَرُو یَدٜرُو ثَآدَدْ یٜیَ ࢽغُویٜرَ؞
[24] سُوجِیَدْیٜ کَتّٜࢽْجَࢽْ: «بَرٜ کَرْࢽِیٜࢽْدٜ، وَلَوَلَ دِیُو، کَمْ ثُوَࢽْدِدَ رُیْیُو!» یٜرَ؞ أَدْغَیْمَ أَوُو کِتَوُلَࢽْ رُوُوَدَدْ وَکَّیٜࢽُو؞ تِیٜ: «کَجْمُࢽِ کَتّٜࢽْجَࢽْ یَکّٜرَ، کُورُو کَلْوُࢽِرُو وَلَوَلَ کٜدُو،» ثْࢽَّ؞ أَکُّو أَوُو سُوجِیَدْ ثَدْࢽَدْ؞
[25] کَرْࢽْ کْسْکَ عِیسَیٜدْࢽْ یَࢽْجُوَ یَاࢽَ یَࢽْجُیٜیَ مَرْیَمْ کَمُ کْلُوࢻَسّٜیَ مَرْیَمْ مَغْدَلَا دَادَ مبٜجِ؞
[26] عِیسَى یَࢽْجُوَ ࢻُوُرَ جَوْرُو ثْرَاࢽَدَ ࢽَدْࢽْ دَادَ کِرُࢽِّیَ، یَࢽْجُدْرُو: «یَࢽِ، أَکُّو تَدَࢽْمْ!» یٜࢽُو؞
[27] دَجِ ࢻُوُرَدْرُو: «أَکُّو یَࢽْمْ!» یٜࢽُو؞ تْࢽْ سَ أَدْࢽْ ࢻُوُرَدْ تِیَ ࢻَࢽّجُرُو کِوُدُو؞
[28] ࢽغَوُو أَدْیٜࢽْ أَوُو سَمَّ کْرْمَ ثٜرْࢽَرُو أَسُیٜࢽِّیَ، أَوُو کِتَوُلَࢽْ رُوُوَدَ وَکَّجُورُو، عِیسَیٜ: «ࢽغُدُ ࢻَکِّ،» یٜࢽُو؞
[29] ࢽَدْࢽْ کَلْوُو ثُرُوࢽْجُࢽْ دِبٜࢽْ ثُومْثُومْ مبٜجِ؞ دَجِ سُوجِیَدْ سُوسُو ࢽغُوجَࢽٜ دِبٜࢽْدْرُو لْࢻْثَغَࢽٜ ثَتُّلُوٜ کَرُو لَسَّغَࢽٜ ثِࢽْجُرُو سَیٜىٰرَ؞
[30] عِیسَى ثُجُمْغٜࢽِّیَ، تِیٜ: «ثْدْࢽَ!» یٜࢽُو؞ دَجِ کْلَ ثِدِیَرُو ثَکّٜ رُو کِرْمْبُو؞
[31] یِمْ أَدْ یِمْ دَبَّرْدُیٜ، کُورُو وَجْࢽَࢽْجُوَ یِمْ تُسْتُیٜ کُرَ؞ بَرٜ کَمِࢽَّ کْلَ کْسْکَیٜࢽْ یِمْ تُسْتُیٜیَ دَسَاࢽِّرُو، یَوْدِیَدْ سِیٜلْࢽْجَدَ ࢽَࢽَمْجَ کَمِࢽَّدَ ثَادُورُو بِلَتُسَّ کٜوُورُو؞
[32] دَجِ سُوجِیَدْ إِسَࢽٜ کَمْ بُرْوُویٜ تِیَ رُوکُّو کْسْکَرُو جَجَاࢽَدْیٜ سِیٜلْࢽْجُ ࢽَمْغٜرَ، یِࢽْدِیٜدْیٜ یٜ ࢽغَیْ؞
[33] ࢽَ عِیسَیٜرُو کَدِرَࢽِّیَ، سِیٜلْࢽْجُ ࢽَمْجَࢽِّ، تِ بَوُو بَوُوجْࢽَرُو ثَرُࢽَ ࢽَࢽْغَرُو؞
[34] أَمَّ سُوجِیَدْیٜ ࢻَلْࢽْجَ سِسِࢽْجُوَ کَجَالَࢽْ سُکّٜࢽُو؞ سَدْمَࢽْ بُوَ إِࢽْغِیَ کٜلُوُو؞
[35] کَمْ أَوُو أَدَ ثُرُࢽَدْ ࢽَیِ یٜ کَسَدُّواْرُو شٜدَ ثْدْࢽَ؞ شٜدَࢽْجُ جِرٜ، کُورُو أَوُو وُلْجْࢽَدَ جِرٜرُو ࢽُوجْࢽَ؞
[36] أَدْغَیْمَ أَوُو أَࢽِ وَکَّجَࢽَ، کِتَوُلَࢽْ رُوُوَدَدْ غَیْ: «سِلَّࢽْجُ ࢻَلْمَ ࢽَمْجَیْوَوُو،»
[37] کُورُو ࢽَ غَدٜ یٜࢽْ کِتَوُلَࢽْ رُوُوَدَ: «تِ سُکْثَࢽَدَ ثَرُیْ،» ثْࢽَّ؞
[38] ࢽغَوُو أَدْیٜࢽْ یُوسُࢻُ کَمْ أَرِمَتِیَیٜ لٜجٜ کَمِࢽْ عِیسَیٜدَ ࢽغُوجُورُو غُومْࢽَ بِلَتُسَّ کِوُورُو؞ تِ یٜ ࢻُوُرَ عِیسَیٜ، أَمَّ أَسْرْلَࢽْ، یَوْدِیَدَ رِجْࢽَ ࢽَࢽْغَرُو؞ دَجِ بِلَتُسْ أَمَرِ تِرُو کٜࢽِّیَ، إِسٜ کَمِࢽْدَ ࢽغُویٜࢽُو؞
[39] ࢽِکُودِمُسْ کَمْ ثَلَࢽْ ࢽَ عِیسَیٜرُو بُࢽٜ إِسْࢽَدْ یٜ إِسٜ کَوُدِ لَا مِرَّ أَلُسَّ کْلَّادَ کِلُو ࢻِیَکُّ غَیْ کِوُدُو؞
[40] دَجِ کَمِࢽْ عِیسَیٜدَ ࢽغُوجَࢽٜ کْلَ أَدَࢽْجَ سِتّْرَ یَوْدِیَیٜدْࢽْ کَوُدِدَ رُوکُّو بَتَّ لِࢽّٜࢽْ کْلٜىٰرَ؞
[41] ࢽَ عِیسَىٰ کْسْکَرُو جَجَاࢽَدْیٜࢽْ جْرْوُ لَا مبٜجِ، کُورُو ثُرُو جْرْوُدْیٜࢽْ کَوْرِ بْرِࢽْ لَا ثُرُوࢽْجُرُو وُࢽْدُمَا ثَسَکّْࢽِّ مبٜجِ؞
[42] یِمْدْ یِمْ دَبَّرْدُیٜ، کُورُو کَوْرِدْ کَرْࢽِّࢽْ دْغَࢽَ ࢽَࢽْغَرُو، ثُرُوࢽْجُرُو عِیسَىٰ کٜسَکُّو؞