[1] مَوُیٜ یِمْ بُرْوُویٜیَ ࢻَجَرْ مَرْیَمْ مَغْدَلَ کَوْرِدْرُو لٜجٜ کَوْ کُرَدْ ثِ کَوْرِدْیٜࢽْ تْمْبَلَّدَ کِرُو؞
[2] دَجِ ثْغَسٜ ࢽَ سِمَࢽْ بِتُرُسَّ ࢻُوُرَ غَدٜ عِیسَى جَوْرُو ثْرَاࢽَدَیٜرُو لٜجٜ تَیِرُو: «کْمَدَ کَوْرِدْࢽْ ࢽغُوجَࢽَ، کُورُو ࢽَ ثَسَکّْࢽَدَ ࢽُوࢽِیٜࢽْدٜ!» یٜࢽُو؞
[3] دَجِ بِتُرُسَّ ࢻُوُرَ غَدٜدَ کْلَ کَوْرِدْࢽَّ لٜىٰرَ؞
[4] تَیِ یِࢽْدِ سَمَّ ثَغَسِ لٜجَیْ ࢽغَیْ، أَمَّ ࢻُوُرَ ࢻَلْدْ بِتُرُسَّ ࢽغْرْمْࢽِࢽْ کُوجٜ بُرْوُوجٜ کَوْرِدْرُو کَدِیُو؞
[5] ࢽغُجٜ لُوتْکٜىٰࢽِّیَ، بَتَّ لِࢽّٜدَ ࢽَدْࢽْ غْࢽَادَ کِرُو، أَمَّ ثُرُودْرُو ࢽغَاࢽِّ؞
[6] دَجِ سِمَࢽْ بِتُرُسْ تِیَ جْغَیْدْ یٜ إِسٜ کَوْرِدْرُو کْرْغَوُو؞ بَتَّ لِࢽّٜدَ ࢽَدْࢽْ غْࢽَادَ کِرُو،
[7] کُورُو بَتَّ دُوُوࢽْ کْلَ عِیسَیٜرُو ثَسَکّْࢽَدْ بَتَّ غَدٜیَ رُوکُّو غْࢽِ، ࢽَ غَدٜࢽْ کْرِیَدَ؞
[8] دَجِ ࢻُوُرَ دُوُوࢽْ بُرْوُوࢽْ إِسْࢽَدْ یٜ کَوْرِدْرُو ࢽغَیٜ ثُرٜ کَسَتْکٜࢽُو؞
[9] أَمَّ اللَّه کَدَرْجْࢽَ عِیسَى کَرْمُولَࢽْ ثِجِدَ کِتَوُلَࢽْ رُوُوَدَدْ غَیْرُو کُورُومَ أَسُجَࢽِّ؞
[10] دَجِ ࢻُوُرَوَدْ ࢻَࢽّجَرُو وَلَّدَرَ؞
[11] مَرْیَمْ دٜیَࢽْ ثِ کَوْرِدْیٜࢽْ دَادَ سُو بَدِیٜࢽُو؞ ثِرِ ࢽغَیْ دُوُوࢽْ، ࢽغُجٜ کَوْرِدَ لُوتْکٜىٰࢽِّیَ،
[12] مَلَیْیَ یِࢽْدِ کَجْمُ بُلَّ ࢽَ ثَلَࢽْ کَمِࢽْ عِیسَیٜ غْࢽَجَࢽَدْࢽْ ࢽَࢻْکَدَ کِرُو، ࢻَلْدْ کْلَکَجِࢽْجُلَࢽْ، ࢻَلْدْ یٜ سِࢽْجُلَࢽْ؞
[13] تَیِیٜ: «کَمُ، أَوِرُو یِرْمِ؟» ثَࢽٜ تِیَ کٜوُورُو؞ تِیٜ: «کْمَࢽِیَ ࢽغُوجَࢽَ، کُورُو ࢽَ تِیَ ثَسَکّْࢽَدَ ࢽُوکّْࢽِ ࢽَࢽْغَرُو،» یٜࢽُو؞
[14] أَدَ وُلْیٜࢽِّیَ، سُوُورْدٜ عِیسَىٰ ࢽَدْࢽْ دَادَ کِرُو، أَمَّ تِرُو أَسُجْࢽِّ؞
[15] عِیسَیٜ تِرُو: «کَمُ، أَوِرُو یِرْمِ؟ وُࢽْدُوَ مَࢽْمِ؟» ثْࢽٜ کِوُورُو؞ أَمَّ تِ جْرْوُمَدْرُو تْمَجٜ تِرُو: «مَلْمْ، ࢽِمَ تِیَ ࢽغُوࢽْمْبُو وَلْیٜࢽُووَ، ࢽَ تِیَ یَکّْمَّدَ وُلْسْغْࢽٜ، وُ یٜ تِیَ ࢽغُوکِّ،» یٜࢽُو؞
[16] عِیسَیٜ تِرُو: «مَرْیَمْ!» یٜࢽِّیَ، کَࢽْجِ عِیسَیٜرُو سُوُورْدٜ تْلَمْ یَوْدِیَوْدِࢽْ: «رَبُّࢽِ!» یٜࢽُو، مَاࢽَࢽْجُدْ سَیِࢽَّ؞
[17] عِیسَیٜ تِرُو: «بَرٜ رُوسْمِّ، کُورُومَ ࢽَ بَوَدْیٜرُو وَلْدْکّْࢽِ ࢽَࢽْغَرُو؞ أَمَّ لٜࢽٜ کْرَمِیَࢽِرُو: ‹ࢽَ بَوَࢽِیَ بَوَࢽْدُووَیٜرُو، اللَّهࢽِیَ اللَّهࢽْدُووَیٜرُو وَلْدْکِّ،› وُلْغْࢽٜ!» یٜࢽُو؞
[18] دَجِ مَرْیَمْ مَغْدَلَ ࢽَ ࢻُوُرَوَدْیٜرُو لٜجٜ تَیِرُو: «کْمَدَ رُکّْࢽَ!» ثْࢽٜ أَوُو تِرُو وُلْجْغْࢽَدَ تَیِرُو وُلْیٜىٰࢽُو؞
[19] یِمْ أَدْ یِمْ بُرْوُویٜ مَوُیٜ دُࢽِیَ کَجِرِیٜࢽِّیَ، ثِࢽَّ ࢽَ ࢻُوُرَوَ دَسَاࢽَیٜدْ یَوْدِیَدَ رِدُرُو ثُوُرَمْࢽِࢽْ جَکَّدَ دُوُوࢽْ، عِیسَى إِسٜ دَوُࢽْجَࢽْ دَجٜ تَیِرُو: «سَلَمْ أَلٜیْکُمْ!» یٜࢽُو؞
[20] أَدَ وُلْیٜࢽِّیَ، تَیِرُو مُکُّوࢽْجُوَ سِسِࢽْجُوَ ࢻْلٜیٜىٰࢽُو؞ ࢻُوُرَوَدْ کْلَ کْمَدَ ثَرُࢽَدْیٜࢽْ کَرْوُࢽْجَ جَوْرُو کْجِیٜࢽُو؞
[21] کُورُو عِیسَى وَلْدٜ تَیِرُو: «سَلَمْ أَلٜیْکُمْ! بَوَدْ وُوَ سُࢽُودْࢽَدْ غَیْ، وُ یٜ ࢽَیِیَ ࢽجَࢽُودْکِّ،» یٜࢽُو؞
[22] أَدَ وُلْیٜࢽِّیَ، تَیِرُو کَسَمْ ࢻُجِیٜ: «رُحُ اللَّهیٜدَ مُووُواْ!
[23] أَمْ تَیِرُو بِوُࢽْجَ غَوُرْࢽُوِیَ، بِوُࢽْجَ غَوُرْدْࢽَ؞ أَمْ تَیِرُو بِوُࢽْجَ غَوُرْدُ وَࢽُوِیَ، بِوُࢽْجَ غَوُرْدْࢽِّ،» یٜࢽُو؞
[24] ࢻُوُرَوَ مٜوُࢽْ یِࢽْدِࢽْدْیٜ ࢻَلْࢽْجَ ثُࢽْجُ تُومَ کَمْ تِرُو کَوُ ثَࢽِدْ سَ عِیسَى إِسْࢽَدْࢽْ تِ ࢽَࢽْجَࢽْ بَوُو؞
[25] دَجِ ࢻُوُرَوَ غَدٜدْیٜ تِرُو: «کْمَدَ رُیْیٜࢽَ!» یٜرَ؞ أَمَّ تُومَیٜ تَیِرُو: «بَلُو کُسَیٜ مُکُّوࢽْجُࢽْ رُکّٜ ࢽغُلُوࢽْدُوࢽِ ثُرُو بَلُو کُسَیٜدْرُو یَکّْکّٜ مُکُّوࢽِ یٜ سِسِࢽْجُرُو یَکّْکّْࢽِیَ، تْمَّرُو کَسَدّْکِّوَوُو،» یٜࢽُو؞
[26] ࢽغَوُو کَوُ وُسْکُیٜࢽْ ࢻُوُرَوَ عِیسَیٜ ثَیٜ غَیْ ثُرُو ࢻَدُودْیٜࢽْ دُوُوࢽْ، تُومَ یٜ تَیِیَ رُوکُّو مبٜجِ؞ ثِࢽَّ ࢻَدُویٜدْ ثُوُرَمْࢽِࢽْ جَکَّدَ یَیٜ، عِیسَى إِسٜ دَوُࢽْجَࢽْ دَجٜ تَیِرُو: «سَلَمْ أَلٜیْکُمْ!» یٜࢽُو؞
[27] دَجِ تُومَرُو: «ࢽغُلُوࢽْدُوࢽْمْ ࢽَ أَدْرُو یَکّٜ، مُکُّوࢽِ رُیْ، مُکُّوࢽْمْ سَࢽٜ سِسِࢽِرُو یَکّٜ! بَرٜ شٜکُّ دِمِّ، کَسَدّٜ!» یٜࢽُو؞
[28] تُومَیٜ تِرُو: «کْمَࢽِ یٜ، اللَّهࢽِ یٜ!» یٜࢽُو؞
[29] عِیسَیٜ تِرُو: «وُوَ سُرُمَّ ࢽَࢽْغَرُو، کَسَتْکٜمْ؟ بَرْغَࢽْجَ أَمْ ثَرُࢽِّ کَسَثَّࢽَمَدْ!» یٜࢽُو؞
[30] عِیسَى ࢻُوُ ࢻُوُرَوَࢽْجُیٜࢽْ أَلَمَ کَدَ کِتَوُ أَدْࢽْ رُوُدْࢽِّ کِدُو؞
[31] أَمَّ دَلِلْ أَوُو أَࢽِ رُوُدْࢽَیٜدْ، عِیسَدْ تِمَ أَلْمَسِیوُ تَدَ اللَّهیٜدْ وُورُو کَسَدُّواْ، کَسَدُّوِلَࢽْ رُو سَوِسُویٜ ثُࢽْجُلَࢽْ ࢻَࢽْدُواْ ࢽَࢽْغَرُو؞