[1] «وُمَ یَ إِࢽَبّٜ جِرٜىٰدْ وُو، بَوَࢽِدْ تِمَ جْرْوُمَدْ وُو؞
[2] دْلَمْ وُلَࢽْ تَدَ ثَکِّوَوُو ࢻِ یَیٜیَ ثَلْجِ، کُورُو دْلَمْ تَدَ ثَکِّ ࢻِ یَیٜیَ تَدَ کَدَ ثَکُّورُو سْرَکْثِ؞
[3] ࢽَیِدْ مَࢽَ وُلْࢽْجَغَکّْࢽَدْ ࢽَࢽْغَرُو کْرْمَدْمَ تَیِرُّو وَلُّوَّ؞
[4] وُلَࢽْ دْغَیْوُو، وُ یٜ ࢽَیِلَࢽْ دْغَکِّ؞ جِرِ دْلَمْ رُࢽْجُ یَ إِࢽَبّٜرُو تَࢽْدْغْࢽِّࢽْ رَکْثٜ تَدَ ثَکِّوَوُودْ غَیْ، ࢽَیِ یٜ وُلَࢽْ دْغَوَّوُووَ، رَࢽْغُوٜ تَدَ یَکُّوَّوُو؞
[5] وُمَ یَ إِࢽَبّٜدْ وُو، ࢽَیِمَ دْلَمْبَدْ وُو؞ کَمْ وُلَࢽْ دْغَࢽَ کُورُو وُ یٜ تِلَࢽْ دْغَکّْࢽَمَدْ تَدَ کَدَ ثَکِّ، دَلِلْࢽْجُدْ وُلَࢽْ غْࢽِ کْرْغَوَّ، أَوِمَ رَࢽْغُوٜ دِوَّوُو ࢽَࢽْغَرُو؞
[6] کَمْ دُوُوࢽْ وُلَࢽْ دْغَࢽِّمَدْ، تِیَ دْلَمْ غَیْ دٜیَرُو غْࢻْثَغَࢽٜ ࢽغَمْجِ؞ دَجِ تَیِیَ ثَࢻْثَࢽٜ کَࢽُّرُو ࢻِجَغَࢽٜ وَرْجَیْ؞
[7] أَمَّ ࢽَیِ وُلَࢽْ دْغَوٜ مَࢽَࢽِ یٜ ࢽَیِلَࢽْ دْغَیْیَ، أَوُو رَاوَّا کُورُواْ، ࢻَࢽْدُوِ؞
[8] أَکُّو أَوُو بَوَࢽِرُو دَرَجَ ثِدْ: تَدَ کَدَ یَکُّوِیَ، أَدْغَیْࢽِࢽْ ࢽَیِ ࢻُوُرَوَࢽِ جِرٜىٰرُو وَلُّوِ؞
[9] جِرِ بَوَدْ وُوَ سْرَاࢽَدْ غَیْ، وُ یٜ ࢽجَرَاکّْࢽَ؞ ثُرُو کْرَوُوࢽِیٜࢽْ دْغَیْوُو!
[10] وَدَوَࢽِ غَوِیَ، ثُرُو کْرَوُوࢽِیٜࢽْ دْغَوِ، جِرِ وُ یٜ وَدَوَ بَوَࢽِیٜ غَکّٜ ثُرُو کْرَوُوࢽْجُیٜࢽْ دْغَکّْࢽَدْ غَیْ؞
[11] کَرْوُکْجِࢽِ ࢽَیِلَࢽْ دْغَ، کَرْوُکْجِࢽْدُو یٜ کَلْکَلُّو وَلْجُورُو أَدَ ࢽَیِرُو وُلْࢽْجَغَکّْࢽَ؞
[12] «أَکُّو وَدَࢽِدْ: أَمَࢽْدُووَ رَوُواْ، جِرِ وُ یٜ ࢽَیِیَ ࢽجَرَاکّْࢽَدْ غَیْ؞
[13] سَوَوَࢽْجُ ࢽَࢽْغَرُو رُوࢽْجُ ࢽجُودْ، کْرَوُو أَدَ ࢽَࢽْکُرَࢽْ کُوجْࢽَ بَوُو؞
[14] وَدَ ࢽَیِرُو ࢽجَدْکّْࢽَدَ غَوِیَ، ࢽَیِ سَوَوَࢽِ؞
[15] ࢽَیِیَ وُولُودِیَلَࢽْ غَدٜرُو بُواْࢽْجَکِّوَوُو، وُولُودِ أَوُو بَࢽْجُ ࢽغِمْبَ ثْدِدَ ࢽُوجْࢽِّ ࢽَࢽْغَرُو؞ أَمَّ ࢽَیِیَ سَوَوَلَࢽْ بُواْࢽْجَکِّ، أَوُو بَوَࢽِیٜࢽْ ࢻَکّْࢽَ سَمَّا إِسَࢽُوࢽْجَغَکّْࢽَ ࢽَࢽْغَرُو؞
[16] ࢽَیِ غْࢽِ وُوَ کْرٜسُوْ، وُمَ ࢽَیِیَ کْرٜࢽْجَکّٜ لٜࢽُواْ تَدَ یَکُّواْ تَدَࢽْدُو دْغَرُو غَلَࢽْغٜرَکُّو؞ دَجِ أَوِ یَیٜ ثُࢽِلَࢽْ بَوَدَ کُورُوِ ࢽغَا ࢽَیِرُو ࢽجَدِ؞
[17] أَکُّو وَدَ ࢽَیِرُو ࢽجَدْکّْࢽَدْ: أَمَࢽْدُووَ رَوُواْ!
[18] «دُࢽِیَدْ ࢽَیِیَ وَࢽْجَࢽَا، وُمَا ࢽَیِࢽْ بُرْوُوࢽُّو وَسُورُو ࢽُوࢽُواْ!
[19] ثَ ࢽَیِدْ دُࢽِیَیٜیَ، دُࢽِیَدْ کَاࢽجُدَ ثْرَیِ؞ أَمَّ ࢽَیِ دُࢽِیَیٜ غْࢽِ، ثُرُو دُࢽِیَیٜࢽْ ࢽَیِیَ کْرٜࢽْجَکّْࢽَ ࢽَࢽْغَرُو، دُࢽِیَدْ ࢽَیِیَ وَࢽْجَࢽَ؞
[20] مَࢽَ وُلْࢽْجَغَکّْࢽَدَ تَࢽْغُواْ: ‹وُولُودِ بَࢽْجُ ࢽغِمْبَا کُوجِوَوُو؞› وُوَ بَسَرْسَࢽَا، ࢽَیِ یٜیَ بَسَرْࢽْجَیْ؞ مَࢽَࢽِ جَاࢽَا، کَاࢽدُو یٜیَ جَغَیْ؞
[21] أَمَّ أَوُو أَࢽِ سَمَّا کْلَ ثُࢽِیٜࢽْ ࢽَیِرُو ࢽجَدِّ، تِ وُوَ سُࢽُودْࢽَدَ ࢽُوجَࢽِّ ࢽَࢽْغَرُو؞
[22] ثَ إِسْکّٜ مَࢽَ تَیِرُو یِدّْکّْࢽِیَ، بِوُࢽْجَ بَوُو؞ أَمَّ کْرْمَ دَلِلْ بِوُࢽْجَ بَوُو ثَࢽِیٜ بَوُو؞
[23] کَمْ وُوَ وَسْࢽَمَدْ بَوَࢽِ یٜیَ وَجْࢽَ؞
[24] ثَ کْࢽْدُو وُࢽْدُمَ غَدٜ ثْدْࢽِّ ثُرُوࢽْجَࢽْ دِکّْࢽِیَ، بِوُࢽْجَ بَوُو؞ أَمَّ کْرْمَ وُوَ بَوَࢽِیَا سَرُࢽَ یٜ، وَسَࢽَ یٜ،
[25] مَࢽَ وَدَࢽْجَلَࢽْ رُوُوَدَدْ وَکَّجُورُو: ‹دَلِلْ بَوُووَلَࢽْ وُوَ وَسٜرَ؞›
[26] «بَࢽَمَ ࢽَ بَوَدْیٜࢽْ ࢽَیِرُو ࢽجَکُّࢽُودْکِّدْ، تِمَ رُحُ جِرٜىٰ ࢽَ بَوَدْیٜࢽْ إِسِدْ وُو؞ إِسِیَ، کْلَ وُیٜࢽْ شٜدَ ثِ؞
[27] ࢽَیِ یٜ کْلَ وُیٜࢽْ شٜدَ یِوِ، دَلِلْࢽْجُدْ تْࢽْ بَدِدُرَمْࢽِࢽْ وُوَ رُوکُّو دْغَوَّ ࢽَࢽْغَرُو؞