[1] «جِرٜمَرُو ࢽَیِرُو وُلْࢽْجَغَکِّ، کَمْ دُوُوࢽْ بْرِ دِمِیَیٜرُو ثِࢽَّیٜࢽْ ࢽغَیِوَوُو ࢽَ غَدٜىٰࢽْ تَثّٜ ࢽغَیِمَدْ، تِ بَرْوُ یٜ، جَوَلْکُورْجِمَ یٜ؞
[2] أَمَّ کَمْ ثِࢽَّیٜࢽْ ࢽغَیِمَدْ، تِمَ سْࢽِ دِمِیَدْیٜدْ وُو؞
[3] ثِࢽَّ غُرٜدُمَدْ تِرُو کَجِیے، دِمِیَدْ یٜ کُواْࢽْجُ ࢻَࢽْجَیْ؞ دِمِیَ کَاࢽجُوَ ثُࢽْجَلَࢽْ بُواْجٜ ثُتُّلُوِ؞
[4] کَاࢽجُ سَمَّا ثُتُّلُوِیَ، ࢻُوُࢽْجَرُو کُوجٜ دِمِیَدْ تِیَ جَغَیْ، کُواْࢽْجُ ࢽُوجَࢽَ ࢽَࢽْغَرُو؞
[5] تْمَّرُو کُسُوتُّو جَغَیْوَوُو، تِࢽْ کُرُوُࢽُّو ࢽغْرْمْجَیْ، کُواْ کُسُوتُّووَیٜ ࢽُوجَࢽِّ ࢽَࢽْغَرُو،» یٜࢽُو؞
[6] عِیسَى تَیِرُو مِسَلْ أَدَ وُلْیٜىٰࢽُو، أَمَّ مَاࢽَࢽْجُدَ أَسُجَࢽِّ؞
[7] کُورُو عِیسَى وَلْدٜ: «جِرٜمَرُو ࢽَیِرُو وُلْࢽْجَغَکِّ، وُمَ ثِࢽَّ دِمِیَیٜدْ وُو؞
[8] أَمْ بُرْوُوسَࢽٜ إِسَࢽَدْ سَمَّ بَرْوُسُو یٜ، جَوَلْکُورْجِمَسُو یٜ، أَمَّ دِمِیَدْ تَیِیَ ࢻَࢽْجَࢽِّ؞
[9] وُدْ ثِࢽَّ؞ کَمْ وُیٜࢽْ ࢽغَیِیَ، ࢽجْکَّوُو ثُوَࢽْدِ؞ ࢽغَیٜ ثُلُوِ، سْࢽِرَمْ یٜ ثُوَࢽْدِ؞
[10] بَرْوُدْ ࢽدَلْدُ سُو، ࢽجٜجُو سُو، بَࢽَّدُ سُورُو غْࢽِیَ، أَوِمَ غَدٜ دِیُورُو إِسِوَوُو؞ أَمَّ وُدْ أَمْ رُو حَرْ تَیِلَࢽْ غَࢻْثْࢽَ ثَوَࢽْدُورُو کَدِکُّو؞
[11] «وُ سْࢽِ ࢽغْلَمَ؞ سْࢽِ ࢽغْلَمَدْ دِمِیَ ࢽَࢽْغَرُو رُوࢽْجُ ثِ؞
[12] کِدَمَدْ سْࢽِ غْࢽِ، دِمِیَدْ یٜ کَاࢽجُ غْࢽِ؞ بُلْدُ کْࢽْدٜ ثْدِ ثُرُیْیَ، دِمِیَدَ کُولْجٜ ثْغَسِ، دَجِ بُلْدُدْ إِسٜ تَیِیَ ثْدَࢽٜ تَتَرْجِ؞
[13] تِدْ کِدَمَ ࢽَࢽْغَرُو، دِمِیَدْرُو لَمْبُوࢽْجُ بَوُو؞
[14] «وُ سْࢽِ ࢽغْلَمَ؞ دِمِیَࢽِدَ ࢽُوکّْࢽَ، تَیِ یٜ وُوَ ࢽُوسَࢽَ،
[15] جِرِ بَوَ وُوَ ࢽُوسْࢽَ، وُ یٜ تِیَ ࢽُوکّْࢽَدْ غَیْ؞ دِمِیَدْ ࢽَࢽْغَرُو رُوࢽِ یِکِّ؞
[16] کُورُو دِمِیَ غَدٜ بْرِ أَدْیٜ غْࢽِ تَکّْࢽَ؞ تَیِ یٜیَ دُولٜ کُدْکِّ، کُورُو کُواْࢽِ ࢻَࢽْجَیْ؞ دَجِ بْرِ ࢻَلْ یٜ، سْࢽِ ࢻَلْ یٜرُو وَلْجَیْ؞
[17] بَوَدْ وُوَ سْرَاࢽَ، رُوࢽِ یِکِّیَ، وَلْدْکّٜ مُواْکِّ ࢽَࢽْغَرُو؞
[18] وُࢽْدُمَ رَکْثٜ رُوࢽِ ࢽغُوجِوَوُو، أَمَّ رَوُوࢽِࢽْ تِیَ یِکِّ؞ کْࢽْدُوُو ࢽَࢽِࢽْ تِیَ ࢽجُویٜ مبٜجِ، کُورُو کْࢽْدُوُو ࢽَࢽِࢽْ تِیَ مُواْیٜ مبٜجِ؞ أَدْمَ وَدَ بَوَࢽِیٜࢽْ ࢻَࢽْدْکّْࢽَدْ،» یٜࢽُو؞
[19] کْلَ مَࢽَ أَࢽِیٜࢽْ یَوْدِیَدْ ثَیٜ بَوُورُو کْوُ یِࢽْدِرُو یَکَّدَرَ؞
[20] ࢽغْوُࢽْجَیٜ: «کَیْ! تِ کَرُوَمَ، جُورِ! أَوِرُو تِیَ کْرْࢽُّوِ؟» ثَࢽِ؞
[21] أَمْ لَایٜ: «أَدْ مَࢽَ کَرُوَمَیٜ غْࢽِ؞ کَرُوَمَ رَکْثٜ کَمْبُیٜ سِمْ کَجِ وَ؟» ثَࢽِ؞
[22] بِࢽْمْ جٜرُجَلٜمْࢽِࢽْ ࢽغْمْرِ بَرْغَ دْࢻْتُوُیٜ ثَدِ دُوُوࢽْ،
[23] عِیسَى بَلْبَلَّ ࢻَدُو اللَّهیٜࢽْ تِرُو ࢽغُرْوُو ࢽَوِ مَیْ سُلَیْمَـٰࢽَیٜ ثَࢽِلَࢽْ دَدَجِ؞
[24] دَجِ یَوْدِیَدْ تِیَ دِرِجَࢽٜ کْلْجَࢽٜ تِرُو: «حَرْ سَوِرُو أَࢽْدِیَ ثُرُو دُوُیٜࢽْ کُولْسَمِ؟ ࢽِمَ أَلْمَسِیوُدْ وُووَ، ࢻٜدٜرُو وُلْسَغَࢽٜ!» یٜرَ؞
[25] عِیسَیٜ تَیِرُو: «ࢽَیِرُو وُلْࢽْجَغَکّْࢽَ، أَمَّ وُوَ کَسَࢽْسُوِّ؞ کْࢽْدُو ثُ بَوَࢽِیٜࢽْ دِکِّدْ وُوَ شٜدَسِ؞
[26] أَمَّ وُوَ کَسَࢽْسُوَّوُو، ࢽَیِ ثُرُو دِمِیَࢽِیٜࢽْ بَوُو ࢽَࢽْغَرُو؞
[27] دِمِیَࢽِدْ کُواْࢽِ ࢻَࢽْجَیْ؞ تَیِیَ ࢽُوکّْࢽَ، وُوَ سَغَیْ؞
[28] تَیِرُو رُو سَوِسُویٜ یِکِّ، کُورُو تْمَّرُو سَࢽُیْوَوُو؞ وُࢽْدُمَ تَیِیَ مُکُّوࢽِࢽْ ثْمُویِوَوُو؞
[29] بَوَࢽِ تَیِیَ وُرُو سِࢽَدْ أَوُو سَمَّا ࢽَࢽْکُرَࢽْ کُوجْࢽَ؞ وُࢽْدُمَ رَکْثٜ تَیِیَ مُکُّو بَوَدْیٜࢽْ ثْمُویِوَوُو؞
[30] وُوَ بَوَدَ تِلُو،» یٜࢽُو؞
[31] دَجِ یَوْدِیَدْ تِیَ رُورُو ࢽجٜجُورُو وَلْدَࢽٜ دُوࢽْغُرْ کَوْیٜ تِرُو غْغْࢻْتُوُرُو ࢽغُویٜرَ؞
[32] عِیسَیٜ تَیِرُو: «کْࢽْدُو ࢽغْلَ کَدَ بَوَࢽِیٜ ࢽَیِرُو ࢻْلٜࢽْجَغَکّْࢽَ؞ ࢻِࢽْجَ ࢽَࢽْغَرُو وُرُو دُوࢽْغُرْ کَوْیٜ غْغْمْسُوٜ سٜسُوِ؟» ثْࢽٜ کِوُورُو؞
[33] یَوْدِیَدْیٜ تِرُو: «کْلَ کْࢽْدُو ࢽغْلَیٜࢽْ غْࢽِ، کْلَ اللَّهَ غَسْکَدُࢽْمْبٜࢽْ ࢽجٜجِیٜ؞ ࢽِ کَمْ دُوُوࢽْ کْلَࢽْمْ اللَّهرُو ࢽغُوࢽْمِدْ!»
[34] عِیسَیٜ تَیِرُو: «کِتَوُࢽْدُوࢽْ ࢽغَیْ رُوُوَدَ، غْࢽَ؟ ‹وُیٜ: ࢽَیِ أَلَوَ!› ثْࢽَّ؞
[35] کِتَوُ اللَّهیٜدْ رَکْثٜ بَوُورُو تْدِوَوُو؞ اللَّه أَمْ دُوُوࢽْ تَیِرُو مَࢽَࢽْجُ ثِࢽَدْرُو أَلَوَ ثْࢽَّا،
[36] أَوِرُو وُ دُوُوࢽْ اللَّه کْرٜسٜ دُࢽِیَرُو سُࢽُودْࢽَدْرُو اللَّهَ غَسْکَࢽْکّْࢽَ ࢽُوِ، وُ تَدَ اللَّهیٜ ࢽْکّْࢽَدْرُو؟
[37] کْࢽْدُو بَوَࢽِیٜدَ دِکِّوَوُووَ، بَرٜ وُوَ کَسَࢽْسُوِّ؞
[38] أَمَّ تَیِیَ دِکِّیَ، کَسَࢽْسُوَّوُو یَیٜ، کْࢽْدُودَ کَسَدُّواْ، ࢽُوࢽُواْ أَسُࢽُواْ بَوَدْ وُلَࢽْ کْرْغَ، وُ یٜ بَوَدْࢽْ کْرْغَکُّورُو؞»
[39] کُورُو وَلْدَࢽٜ تِیَ تَرُو مَیٜرَ، أَمَّ مُکُّوࢽْجَࢽْ کِلُوُو؞
[40] کُورُو عِیسَى وَلْدٜ ࢽغَوُو بْرْمْ جُورْدَࢽِیٜࢽْ ࢽَ ࢽَوِ یَحْیـَى کَسَلَ تُوَیٜ ثْدْࢽَدْرُو لٜجٜ ࢽَࢻْکٜࢽُو؞
[41] دَجِ أَمْ کَدَ ࢽَࢽْجُرُو إِسَࢽٜ: «ࢽَوِ یَحْیـَى أَوُو أَجَبَّ ࢻَلْمَ ثْدْࢽِّ، أَمَّ أَوُو کْلَ کَمْ أَدْیٜࢽْ وُلْجْࢽَ سَمَّ جِرٜ!» یٜرَ؞
[42] أَدْغَیْمَ أَمْ کَدَ ࢽَدْࢽْ عِیسَىٰ کَسَتْکٜرَ؞