[1] ࢽغَوُو أَدْیٜࢽْ عِیسَى بْرْمْ غَلِلٜىٰ تِیَ بْرْمْ تِبٜرِیَسّٜلَࢽْ بُواْجَیْدْیٜ ثِࢽْجُ تُودْرُو کُویٜࢽُو؞
[2] جَمَ کَدَ یٜ تِیَ غٜیَ، أَلَمَ أَجَبَّ أَجَبَّ کْلَ أَمْ دُوࢽْدِیٜࢽْ ثْدِ ثَرُࢽَ ࢽَࢽْغَرُو؞
[3] دَجِ عِیسَى کْلَ کَوْ کُرُوُ لَایٜرُو جُوَࢽٜ ࢻُوُرَوَࢽْجُوَ رُوکُّو ࢽَࢻْکٜرَ؞
[4] أَکُّو سَلَ لَیَ ࢽجْکَّیِرَمْبٜ سَلَ یَوْدِیَیٜدْ کَرْࢽْجْࢽَ؞
[5] عِیسَى کْلَ سَࢻْثٜ جَمَ کَدَ ࢽَࢽْجُرُو إِسَیْرُو کِرُࢽِّیَ، ࢻِلِبُسُّو: «ࢽدَرَࢽْ بُرُودِ یُوِیٜ أَمْ أَࢽِ جَغَرُورُو؟» ثْࢽٜ کِوُورُو؞
[6] أَدَ وُلْدُࢽْجُدْ، ࢻِلِبُسَّ رِجَࢻْتُرُو، دَلِلْࢽْجُدْ عِیسَى کْلَࢽْجُمَ أَوُو ثْدِدَ ࢽُوجْࢽَ ࢽَࢽْغَرُو؞
[7] دَجِ ࢻِلِبُسّٜ تِرُو: «وُࢽْدُࢽْجَ یَیٜ بُرُودِ غَࢽَ لَا ثُوَࢽْدُورُو دِࢽَرِیُسْ یٜرْ یِࢽْدِمَ ثْدِوَوُو!»
[8] ࢻُوُرَوَدْیٜ ࢻَلْࢽْجَ أَࢽْدَرَوُسْ یَاࢽَ سِمَࢽْ بِتُرُسّٜ تِرُو:
[9] «أَکُّو ࢽَ أَدْࢽْ تَدَاࢽَ لَا بُرُودِ سَیِرّٜ أُوُوَ بُࢽِ یِࢽْدِیَ ثْدَࢽَ مبٜجِ، أَمَّ أَمْ ࢽغْوُ أَࢽِرُو أَوِ ثْدِّ؟» یٜࢽُو؞
[10] عِیسَیٜ تَیِرُو: «جَمَدَ یَکُّواْ ࢽَࢻْثَ،» یٜࢽُو؞ ࢽَدْࢽْ کَجِمْ کْرِ تْࢽَسْ مبٜجِ ࢽَࢽْغَرُو، أَمْدْ ࢽَࢻْکٜرَ؞ تَیِ کُوࢽغوَدْ أَلَمَ دْوُ أُوُ غَیْ؞
[11] دَجِ بُرُودِدَ ࢽغُوجٜ اللَّهرُو أَرْدِیٜࢽِّیَ، أَمْ ࢽَࢻْکَدَدْرُو دَغَرْیٜىٰࢽُو؞ بُࢽِدْ یٜࢽْ ࢽغَیْ ثْدٜ، حَرْ مْرَدُࢽْجَ غَلْیٜࢽُو؞
[12] جَوُࢽٜ کُلْیٜرَࢽِّیَ، عِیسَیٜ ࢻُوُرَوَࢽْجُرُو: «ࢽجُوࢽْغُووَ غَࢻْثَࢽَدَ ثَمُّواْ، بَرٜ أَوِمَ ࢻَثّْغْࢽِّ،» یٜࢽُو؞
[13] أَدْغَیْمَ ࢽجُوࢽْغُو بُرُودِ أُوُ سَیِرّٜ أَمْ جَوُࢽٜ کُولْجَࢽَیٜدَ ثَࢻْثَࢽٜ جُواْ مٜوُࢽْ یِࢽْدِࢽْ کٜسْمْبْرُو؞
[14] جَمَدْ أَلَمَ أَجَبَّ عِیسَى ثْدْࢽَدَ کٜرُࢽِّیَ، تَیِیٜ: «جِرٜمَرُو کَمْ أَدْ تِمَ ࢽَوِ دُࢽِیَرُو إِسِمَدْ وُو!» ثَࢽِ؞
[15] أَدْ ࢽَࢽْغَرُو إِسَࢽٜ تِیَ دُࢽُودُࢽُوࢽْ ثَدَࢽٜ مَیْرُو ثَدِرُو أَسُیٜࢽِّیَ، عِیسَى تَیِیَ کُولْجٜ رُࢽْجُ تُوکْ کْلَ کَوْدْیٜرُو وَلْدٜ غِوَ؞
[16] دُࢽِیَ کَجِرِیٜࢽِّیَ، ࢻُوُرَوَ عِیسَیٜدْ ثِ بْرْمْبٜرُو جْࢻْثَغَࢽٜ
[17] مَارَرُو ࢽغَسَیٜ کَࢽْجِ بْرْࢽِ کَࢻَرْࢽَامبٜرُو ࢻَلْجَࢽٜ کُودُ بَدِیٜرَ؞ دُࢽِیَ لْمْجْࢽَ، عِیسَى یٜ کُورُومَ تَیِیَ ࢽَجْغْࢽِّ؞
[18] کَرُوَ دُࢽُووَ ثِجٜ ࢻُجٜ، حَرْ بْرْمْدْ جَوْرُو ثَمْبَلَّدَࢽْ؞
[19] کِلُومٜتْرْ أُوُ بِ أَرَکُّ غَیْرُو لٜدُ کٜدْࢽِّیَ، عِیسَى کْلَ إِࢽْغِیٜࢽْ سِلَࢽْ لٜجٜ مَارَدَ کَرْࢽْجِ کٜرُو؞ کٜرُࢽِّیَ، جَوْرُو رِیٜرَ؞
[20] أَمَّ عِیسَیٜ تَیِرُو: «وُمَ، بَرٜ رِࢽُوِّ!» یٜࢽُو؞
[21] دَجِ ࢻُوُرَوَدْ کَرْوُ کْجِیَرُو ثُرُو مَارَدْیٜࢽْ تِیَ ثَمُویٜ کْرْغَاࢽِّیَمَ، مَارَدْ ࢽَ لٜجَیْدْرُو کَدِیُو؞
[22] وَجْࢽَࢽْجُوَ جَمَ ثِ بْرْمْبٜ تُودْࢽْ ࢽَࢻْثَࢽَدْ مَارَ ࢻَلْمَ ࢽَدْࢽْ دْغَرُو أَسُیٜرَ؞ کُورُو عِیسَى مَارَدْرُو ࢻُوُرَوَࢽْجُوَ رُوکُّو ࢽغَاࢽِّ، أَمَّ رُࢽْجَ لٜىٰرَرُو ࢽُوجَࢽَ؞
[23] دَجِ مَارَوَ غَدٜ بْلَ تِبٜرِیَسّٜلَࢽْ کَرْࢽْ ࢽَ کْمَ عِیسَى اللَّهرُو أَرْدِجٜ بُرُودِ جَغْرْࢽَدْیٜرُو کَدِرَ؞
[24] جَمَدْ عِیسَى یٜ بَوُو، ࢻُوُرَوَࢽْجُ یٜ بَوُورُو کٜرُࢽِّیَ، دَجِ مَارَوَدْرُو ࢽغَسَیٜ بْرْࢽِ کَࢻَرْࢽَامبٜرُو تِیَ مَدُرُو لٜىٰرَ؞
[25] جَمَدْ ثِ بْرْمْبٜ تُودْࢽْ عِیسَىٰ کٜوَࢽْدْࢽِّیَ، تِرُو: «سَیِࢽَّ، سَوِ ࢽَ أَدْرُو کَدِمْ؟» ثَࢽٜ کٜوُورُو؞
[26] عِیسَیٜ: «جِرٜمَرُو ࢽَیِرُو وُلْࢽْجَغَکِّ، أَلَمَ أَجَبَّ أَجَبَّ رُوَّ ࢽَࢽْغَرُو غْࢽِ، بُرُودِ ࢽغْرُوٜ کُلُّوَّ ࢽَࢽْغَرُو وُوَ مَسُوِ؞
[27] بَرٜ کْمْبُو ࢽجْࢻْثِ أَدْرُو کِدَ دِوِّ، أَمَّ کْمْبُو رُو سَوِسُویٜرُو کِدَ دٜوُو، کْمْبُو دُوُوࢽْ تَدَ کَمْبٜدْ ࢽَیِرُو ࢽجَدِدْ، أَوُووَ اللَّه بَوَدْ تَوَ کْࢽْدُوُوࢽْجُیٜدَ تَدَ کَمْبٜدْرُو غْࢽَجْغْࢽَ؞»
[28] دَجِ تِرُو: «کِدَ اللَّهیٜدَ دِیُورُو أَوِ غْلٜ دِیٜ؟» ثَࢽٜ کٜوُورُو؞
[29] عِیسَیٜ تَیِرُو: «کِدَ اللَّهیٜدْ تِمَ کَمْ ثُࢽُودْࢽَدَ کَسَدُّواْ!» یٜࢽُو؞
[30] تِرُو: «أَلَمَ أَجَبَّ جِرِ ࢻِ دِمٜ رُیْیٜ ࢽِیَ کَسَࢽّجِیٜ؟ أَوِ غْلٜ دِمِ؟
[31] کَارِیَࢽْدٜ کْمْبُو تِرُو مَࢽْ ثَࢽِدَ کَرَالَࢽْ جَوُࢽَ، کِتَوُلَࢽْ رُوُوَدَدْ غَیْ: ‹تَیِرُو کْمْبُو سَمٜلَࢽْ إِسْࢽَدَ جَوُورُو کَیْࢽُو؞›»
[32] عِیسَیٜ: «جِرٜمَرُو ࢽَیِرُو وُلْࢽْجَغَکِّ، ࢽَوِ مُوسَى غْࢽِ کْمْبُو سَمٜلَࢽْ إِسْࢽَدَ ࢽجَدُو، أَمَّ بَوَࢽِمَ ࢽَیِرُو کْمْبُو جِرٜىٰ سَمٜىٰدَ ࢽجَدِ؞
[33] أَوُووَ کْمْبُو اللَّهیٜدْ، تِمَ کَمْ سَمٜلَࢽْ جْࢻْثٜ دُࢽِیَرُو رُو سَوِسُویٜ ثِمَدْ وُو!»
[34] دَجِ تِرُو: «کْمَ، سَوِسُورُو کْمْبُو أَدَ أَࢽْدِرُو سَدْࢽٜ!» یٜرَ؞
[35] عِیسَیٜ تَیِرُو: «وُمَ کْمْبُو رُو ࢻَࢽْدُویٜدْ وُو! کَمْ ࢽَࢽِرُو إِسْࢽَمَدْ تْمَّرُو کْࢽَ ࢻَࢽْجِوَوُو، کُورُو کَمْ وُوَ مْرْسَسْࢽَمَدْ یٜ تْمَّرُو ࢽغُدُ ࢻَࢽْجِوَوُو؞
[36] أَمَّ ࢽَیِرُو وُلْࢽْجَغَکّْࢽَ، وُوَ سُرُوَّ دُوُوࢽْ، ࢽجَسَرَیْرُو وَیٜوْ؞
[37] أَمْ دُوُوࢽْ بَوَدْ وُرُو سِࢽَ سَمَّ ࢽَࢽِرُو إِسَیْ، کُورُو کَمْ ࢽَࢽِرُو إِسْࢽَدَ تْمَّرُو وَکِّوَوُو؞
[38] أَوُو کَرْوُࢽِ ثْرَاࢽَ غْࢽِ، أَوُو تِ وُوَ سُࢽُودْࢽَدْ ثْرَاࢽَ دِیُورُو سَمٜلَࢽْ جْࢻْکٜکُّو؞
[39] أَوُو تِ وُوَ سُࢽُودْࢽَدْ ثْرَاࢽَدْ تِمَ أَمْ وُرُو سِࢽَدْیٜ ࢻَلْمَا ࢻُدّْکِّوَوُو، أَمَّ یِمْ دَرْیٜىٰیَ تَیِیَ کَرْمُولَࢽْ سَࢽْغْکِّ؞
[40] أَکُّو أَوُو بَوَࢽِ ثْرَاࢽَدْ، وُࢽْدُ دُوُوࢽْ تَدَدَ ثُرٜ کَسَثّْࢽَدْ رُو سَوِسُویٜ ثُوَࢽْدِ، کُورُو یِمْ دَرْیٜىٰیَ وُ یٜ تِیَ کَرْمُولَࢽْ سَࢽْغْکِّ،» یٜࢽُو؞
[41] تِمَ کْمْبُو سَمٜلَࢽْ إِسْࢽَدْ وُو ثْࢽَّ ࢽَࢽْغَرُو، یَوْدِیَدْ کَرْوُࢽْجَ وَجٜ:
[42] «تِ أَدْ عِیسَى تَدَ یُوسُࢻُیٜ، غْࢽَ؟ بَوَࢽْجُوَ یَࢽْجُوَا ࢽُوࢽِیٜࢽَ، غْࢽَ؟ ࢽدَیِࢽْ غْلٜ سَمٜلَࢽْ کَدِکُّو ثْࢽِ؟» یٜرَ؞
[43] عِیسَیٜ تَیِرُو: «بَرٜ کَرْوُࢽْدُو وَجْࢽِّ!
[44] وُࢽْدُمَ رَکْثٜ ࢽَࢽِرُو إِسِوَوُو، سَیْ بَوَ وُوَ سُࢽُودْࢽَمَدْ تِیَ غْرْجِییَ؞ وُ یٜ یِمْ دَرْیٜىٰیَ تِیَ کَرْمُولَࢽْ سَࢽْغْکِّ؞
[45] أَکُّو أَوُو ثُرُو کِتَوُوَ ࢽَوِیَیٜࢽْ رُوُوَدَدْ: ‹تَیِ سَمَّا اللَّه أَلَمْجِ؞› وُࢽْدُ دُوُوࢽْ بَوَدَ ࢻَࢽْجٜ أَسُجْࢽَمَدْ ࢽَࢽِرُو إِسِ؞
[46] تِ اللَّهیٜࢽْ إِسْࢽَدْرُو کَجِیَ، وُࢽْدُمَ بَوَدَ ثُرُࢽِّ؞ تِدْ بَوَدَ ثُرُࢽَ؞
[47] جِرٜمَرُو ࢽَیِرُو وُلْࢽْجَغَکِّ، کَمْ وُوَ مْرْسَسْࢽَمَدْ رُو سَوِسُویٜ ثُوَࢽْدِ؞
[48] «وُمَ کْمْبُو رُو ࢻَࢽْدُویٜدْ وُو!
[49] کَارِیَࢽْدُو کْمْبُو تِرُو مَࢽْ ثَࢽِدَ کَرَاࢽْ جَوُࢽَ، کُورُو سَࢽُࢽَ؞
[50] أَمَّ کَمْ دُوُوࢽْ کْمْبُو سَمٜلَࢽْ إِسِدَ جُوُیْدْ، ࢽُیْوَوُو؞
[51] وُمَ کْمْبُو رُو ࢻَࢽْدُویٜ سَمٜلَࢽْ إِسْࢽَدْ وُو؞ کَمْ کْمْبُو أَدَ جُوُیْیَ، سَوِسُورُو دْغَیْ؞ کْمْبُو دُوُوࢽْ دُࢽِیَرُو رُو سَوِسُویٜ ثَوَࢽْدُورُو یِکِّدْ، تِمَ دَ تِیࢽِیٜ وُو؞»
[52] أَدْ ࢽَࢽْغَرُو یَوْدِیَ کَتّٜࢽْجَࢽْ کَمْبِوُ ثَدٜ: «ࢽدَیِࢽْ غْلٜ رَکْثٜ دَ تِیࢽْجُیٜ سَدٜ ࢽغْرِیُو؟» ثَࢽِ؞
[53] عِیسَیٜ: «جِرٜمَرُو ࢽَیِرُو وُلْࢽْجَغَکِّ، دَ تِیے تَدَ کَمْبٜدَ ࢽغْرُوَّوُووَ، بُࢽْجُ یٜ یَوَّوُووَ، ࢽَیِلَࢽْ رُو بَوُو؞
[54] کَمْ دُوُوࢽْ دَࢽِ جْغْرٜ بُࢽِ ثَیْمَدْ رُو سَوِسُویٜ ثُوَࢽْدْࢽَ، کُورُو وُ یٜ یِمْ دَرْیٜىٰیَ تِیَ کَرْمُولَࢽْ سَࢽْغْکِّ؞
[55] دَࢽِ یٜ کْمْبُو جِرٜىٰ، بُࢽِ یٜ کْࢽْجَ جِرٜىٰ؞
[56] کَمْ دَࢽِ جْغْرٜ بُࢽِ ثَیْمَدْ وُلَࢽْ دْغَیْ، وُ یٜ تِلَࢽْ دْغَکِّ؞
[57] جِرِ بَوَ کْࢽْدْغَیْمَ وُوَ سُࢽُودٜ تِ ࢽَࢽْغَرُو وُ یٜ رُووَ دْغَکِّدْ غَیْ، کَمْ دُوُوࢽْ وُ کْمْبُوࢽْجُ وُومَدْ، وُ ࢽَࢽْغَرُو تِ یٜ رُووَ دْغَیْ؞
[58] أَدْمَ کْمْبُو جِرٜىٰ سَمٜلَࢽْ إِسْࢽَدْ وُو، جِرِ کَارِیَࢽْدُوسُو جَوُࢽٜ سَࢽُࢽَدْ غَیْ غْࢽِ؞ کَمْ کْمْبُو أَدَ جُوُࢽَمَدْ سَوِسُورُو دْغَیْ،» یٜࢽُو؞
[59] ثُرُو دَࢽْدَلْ بْرْࢽِ کَࢻَرْࢽَامبٜࢽْ جَمَدَ أَلَمْجِ دُوُوࢽْ، عِیسَى أَوُو أَࢽِیَ وُلْیٜىٰࢽُو؞
[60] ࢻُوُرَوَ عِیسَیٜ ࢽغْوُࢽْجَ أَدَ ࢻَࢽْغٜرَࢽِّیَ، تَیِیٜ: «أَ! مَࢽَ أَدْ جَوْرُو جَوْ! وُࢽْدُ غْلٜ رَکْثٜ تِیَ ࢻَࢽْجِ؟» یٜرَ؞
[61] عِیسَى کَرْوُࢽْجَ مَࢽَ أَدَ وَجِرُو أَسُیٜࢽِّیَ، تَیِرُو: «أَدْ ثَکّٜ تَلُّوِ وَ؟
[62] تُو، تَدَ کَمْبٜدْ ࢽَࢽْجُ ثَیٜ دْغَࢽَدْرُو وَلْدٜ لٜجِ رُوِیَ، ࢽدَ؟
[63] رُحُ اللَّهیٜ تِمَ رُو ࢽجُومَدْ وُو، کْࢽْدُوُو کَمْبٜدْ أَوِمَرُو ࢻَیْدَجِوَوُو؞ مَࢽَ ࢽَیِرُو وُلْࢽْجَغَکّْࢽَدْ رُحُ یٜ، رُو یٜ؞
[64] أَمَّ ثُرُوࢽْدُوࢽْ أَمْ لَا کَسَثَّࢽِّ مبٜجِ،» یٜࢽُو؞ تْࢽْ بَدِدُرَمْࢽِࢽْ عِیسَى أَمْ تِیَ کَسَثَّࢽِّدَ کَمْ تِیَ سْرْثِّیدَا ࢽُوجْࢽَ؞
[65] دَجِ عِیسَیٜ: «أَدْمَ ࢽَࢽْغَرُو ࢽَیِرُو وُلْࢽْغٜىٰرَکُّو، وُࢽْدُمَ رَکْثٜ ࢽَࢽِرُو إِسِوَوُو، سَیْ بَوَدْ تِرُو أَمَرْجِییَ دُوُوࢽْ،» یٜࢽُو؞
[66] کْلَ أَدْیٜࢽْ ࢻُوُرَوَ عِیسَیٜ ࢽغْوُࢽْجَ تِیَ غَ کُولْجَࢽٜ ࢽغَوُورُو وَلَّدَرَ؞
[67] دَجِ عِیسَیٜ مٜوُࢽْ یِࢽْدِࢽْدْرُو: «ࢽَیِ یٜ وُوَ کُولْسُوِیَ، رَاوَّ وَ؟» ثْࢽٜ تَیِیَ کِوُورُو؞
[68] سِمَࢽْ بِتُرُسّٜ تِرُو: «کْمَ، ࢽَ وُࢽْدُیٜرُو غْلٜ لٜࢽِیٜ؟ ࢽِمَ مَࢽَ رُو سَوِسُویٜیَ وُو!
[69] یَسَرَیْیٜࢽَ یٜ، ࢽُوࢽِیٜࢽَ یٜ، ࢽِمَ تَیِرْ اللَّهیٜدْ وُو!» یٜࢽُو؞
[70] عِیسَیٜ تَیِرُو: «وُ غْࢽَ ࢽَیِ مٜوُࢽْ یِࢽْدِࢽْدَ کْرٜࢽْجَکُّو؟ أَمَّ کَمْࢽْدُو ࢻَلْ سٜدَࢽْ!» یٜࢽُو؞
[71] أَدَ کْلَ یَحُسَ تَدَ سِمَࢽْ إِسْکَرِیُوتّٜࢽْ وُلْیٜࢽُو، دَلِلْࢽْجُدْ تِمَ مٜوُࢽْ یِࢽْدِࢽْدْیٜ ࢻَلْࢽْجَ مُکُّو کْلَدُووَیٜرُو عِیسَىٰ سْرْثِّیدْ وُو؞