[1] عِیسَى کُودُ ثْدِ دُوُوࢽْ، کَمْ لَا کَمْبُ تَمْبْࢽَا کِرُو؞
[2] ࢻُوُرَوَࢽْجُیٜ تِرُو: «سَیِࢽَّ، وُࢽْدُ بِوُ ثْدٜ کَمْ أَدْ کَمْبُ کَتَمْبُو؟ تِمَ رَ بَوَࢽْجُوَ یَࢽْجُوَ؟» ثَࢽٜ تِیَ کٜوُورُو؞
[3] عِیسَیٜ تَیِرُو: «بِوُࢽْجُ ࢽَࢽْغَرُو غْࢽِ بِ بِوُ بَوَࢽْجُیٜیَ یَࢽْجُیٜیَ ࢽَࢽْغَرُو غْࢽِ، اللَّه تِلَࢽْ کْࢽْدُوࢽْجُ ࢻْلٜجُورُو کَمْ أَدْ کَمْبُ کَتَمْبُو؞
[4] کَوْسُ دُوُوࢽْ، دُولٜ کِدَ تِ سُࢽُودْࢽَدْیٜدَ دِیُو! بُࢽٜجِیَ، وُࢽْدُمَ رَکْثٜ کِدَ ثْدِوَوُو؞
[5] وُ دُࢽِیَلَࢽْ دْغَکِّ دُوُوࢽْ، وُ ࢽُرْ دُࢽِیَیٜ،» یٜࢽُو؞
[6] أَوُو أَࢽِیَ وُلْیٜࢽِّیَ، کَࢽْدُرِ ثِدِرُو تْوَجِیٜ دِجٜ ࢽغُوجٜ سِمْ کَمْبُدْیٜرُو ثِࢽْغٜىٰࢽُو؞
[7] عِیسَیٜ تِرُو: «لٜࢽٜ، ࢻَلْوُ إِࢽْغِ سِلُووَمْبٜࢽْ لَمْدْࢽٜ!» یٜࢽُو؞ مَاࢽَ سِلُووَمْبٜدْ تُࢽُودْࢽَ؞ دَجِ کَمْبُدْ لٜجٜ لَمْغَدَࢽِّیَ، سِمْ ثُوَࢽْدٜ وَلَّدَࢽْ؞
[8] کْمَسْکِیَࢽْجُوَ أَمْ ثَلَࢽْ تِیَ لُواْ ثْدِ ثَرُࢽَادْیٜ: «تِمَ غْࢽَ کَمْ ࢽَࢻْکَدَ لُواْ ثْدِدْ؟» ثَࢽٜ کٜوُورُو؞
[9] لَایٜ: «تِمَ!» ثَࢽِ، لَا یٜ: «أَعَ، تِ غْࢽِ، ثَمُࢽُوࢽْجُ،» ثَࢽِ؞ أَمَّ کَمْدْیٜ: «وُمَ، دِیٜ!» ثْࢽِ؞
[10] أَدْ ࢽَࢽْغَرُو تِرُو: «ࢽدَیِࢽْ غْلٜ سِمْ کِوَࢽْدْمْ؟» ثَࢽٜ کٜوُورُو؞
[11] تَیِرُو: «کَمْ تِرُو عِیسَى ثَࢽِدْ ثِدِ دِجٜ سِمِّرُو ثِࢽْجِیٜ وُرُو: ‹لٜࢽٜ، سِلُووَمْلَࢽْ لَمْدْࢽٜ!› یٜࢽُو؞ دَجِ لٜکّٜ لَمْغَدَکّْࢽِیَ، سِمْ کِوَࢽْدْکُّو!» یٜࢽُو؞
[12] تِرُو: «کَمْ أَتّْ ࢽدَرَࢽْ؟» یٜرَࢽِّیَ، تَیِرُو: «ࢽُوکّْࢽِ،» یٜࢽُو؞
[13] دَجِ کَمْ ثَلَࢽْ کَمْبُدَ ࢽَ ࢻَرِسَوَیٜرُو کٜوُدُو؞
[14] یِمْ دُوُوࢽْ عِیسَى ثِدِدَ دِجٜ سِمْ کَمْبُدْیٜ کَجْࢽَدْ یِمْ تُسْتُیٜ؞
[15] کُورُو ࢻَرِسَوَدْ وَلْدَࢽٜ کَمْدَ جِرِ ࢻِࢽْ سِمْ کِوَࢽْدُورُو کٜوُورُو؞ تَیِرُو: «ثِدِ دِجٜ سِمِّرُو ثِࢽْجِیٜ لَمْغَدَکّْࢽِیَ، رُکِّ،» یٜࢽُو؞
[16] ࢻَرِسَوَدْیٜ لَاࢽجَیٜ: «کَمْ أَدْ اللَّهیٜࢽْ غْࢽِ کَدِیُو، یِمْ تُسْتُیٜرُو دَرَجَ ثِࢽِّ ࢽَࢽْغَرُو،» ثَࢽِ؞ أَمَّ لَاࢽجَیٜ: «أَوِیَوِࢽْ بِوُمَ رَکْثٜ أَلَمَسُو ࢽغَیْ ثْدِ؟» ثَࢽِ؞ دَجِ تَیِ کْوُ یِࢽْدِرُو یَکَّدَرَ؞
[17] کُورُو ࢻَرِسَوَدْ وَلْدَࢽٜ کَمْبُدْرُو: «أَوِ کْلَ کَمْ سِمّْمْ کَجْࢽَدْیٜࢽْ وُلّْمِ؟» ثَࢽٜ کٜوُورْࢽِّیَ، تِیٜ: «تِ ࢽَوِ،» یٜࢽُو؞
[18] أَمَّ یَوْدِیَدْ تِ کَمْبُ دُوُوࢽْ ثُرُیْرُو وَلْجْࢽَدَ ࢽجَسَرَیْرُو وَجَࢽٜ حَرْ بَوَࢽْجُوَ یَࢽْجُوَا بُواْیٜرَ؞
[19] تَیِرُو: «أَدْ تَدَࢽْدُو وَ؟ تِ کَمْبُ کَتَمْبُو ࢽُوِدْ؟ تُو، أَوِیَوِࢽْ کْرْمَ ثُرُیْرُو وَلْیٜࢽُو؟» ثَࢽٜ کٜوُورُو؞
[20] بَوَࢽْجُوَ یَࢽْجُوَیٜ: «تِ تَدَࢽْدٜ یٜ، کَمْبُ کَتَمْبُو یٜرُو ࢽُوࢽِیٜࢽَ؞
[21] أَمَّ جِرِ ࢻِࢽْ کْرْمَ ثُرُیْرُو بِ وُࢽْدُ سِمْࢽْجُ کَجُورُو ࢽُوࢽِیٜࢽْدٜ؞ تِ تَدَاࢽَ غْࢽِ، تِیَ کُورُواْ! ثِࢽْجُمَࢽْ وُلْجِ،» یٜرَ؞
[22] بَوَࢽْجُوَ یَࢽْجُوَ أَدَ وُلْدُࢽْجَدْ، یَوْدِیَدَ رِجَࢽَ ࢽَࢽْغَرُو؞ ثَمَࢽْ تَیِدْ وُࢽْدُ دُوُوࢽْ عِیسَى أَلْمَسِیوُرُو کَسَثِّدَ دَࢽْدَلَّࢽْ ثَتُّلُوِ ثَࢽَّ؞
[23] أَدْمَ ࢽَࢽْغَرُو بَوَࢽْجُوَ یَࢽْجُوَدْیٜ: «تِ تَدَاࢽَ غْࢽِ، تِیَ کُورُواْ!» یٜرَ؞
[24] کُورُو ثَیٜ بَوُورُو وَلْدَࢽٜ یَوْدِیَدْ کَمْ ثَلَࢽْ کَمْبُدَ بُواْجَࢽٜ تِرُو: «اللَّهرُو دَرَجَ یٜ! ࢽُوࢽِیٜࢽَ، کَمْ أَدْ بِوُمَ،» یٜرَ؞
[25] تَیِرُو: «تِ بِوُمَ بِ بِوُمَ غْࢽِرُو ࢽُوکّْࢽِ؞ أَوُو ࢻَلْ ࢽُوکّْࢽَ، وُ کَمْبُ دُوُوࢽْ کْرْمَ رُکِّ،» یٜࢽُو؞
[26] دَجِ تِرُو: «أَوِ ࢽِرُو ࢽجْدُّو؟ ࢽدَیِࢽْ سِمّْمْ کَیٜࢽُو؟» ثَࢽٜ کٜوُورْࢽِّیَ،
[27] تَیِرُو: «وُلْࢽْجَغَکّْࢽَمَ، ࢻَࢽُّوِّ؞ أَوِرُو غَدٜمِࢽُّو ࢻَࢽْدُ رَوُوْ؟ ࢽَیِ یٜ ࢻُوُرَوَࢽْجُرُو وَ وَلْدُ رَوُوْ؟» یٜࢽُو؞
[28] تِیَ رَرَجَࢽٜ تِرُو: «ࢽِمَ ࢻُوُرَࢽْجُ وُو، أَمَّ أَࢽْدِدْ ࢻُوُرَوَ ࢽَوِ مُوسَیٜ!
[29] اللَّه ࢽَوِ مُوسَرُو مَࢽَ ثْدّْࢽَرُو ࢽُوࢽِیٜࢽَ، أَمَّ تِ أَدْ ࢽدَرَࢽْ کَدِیُومَرُو ࢽُوࢽِیٜࢽْدٜ!» یٜرَ؞
[30] کَمْدْیٜ تَیِرُو: «سِمِّ کَجْࢽَمَ، ࢽدَرَࢽْ کَدِیُورُو ࢽُوࢽُوِّدْ جَوْرُو أَجَبَّ!
[31] اللَّه بِوُوُوَ کْرْࢽْجِوَوُورُو ࢽُوࢽِیٜࢽَ، أَمَّ وُࢽْدُ دُوُوࢽْ اللَّهرُو دَرَجَ ثٜ أَوُو ثْرَاࢽَا ثْدِمَدْ، اللَّه تِیَ کْرْࢽْجِ؞
[32] تْࢽْ دُࢽِیَ أَلَکْتْࢽَیٜمَࢽْ وُࢽْدُمَ کَمْ کَمْبُ تَمْبْࢽَیٜ سِمْ کَجْࢽَدَ ࢽغَلْتٜ ࢻَࢽْجْࢽِّ؞
[33] کَمْ أَدْ اللَّهیٜࢽْ غْࢽِ کَدِیُووَ، أَوِمَ رَکْثٜ ثْدِوَوُو!» یٜࢽُو؞
[34] تَیِیٜ تِرُو: «أَ! ࢽِ ثُرُو بِوُیٜࢽْ تَمْبْمَّ دُوُوࢽْ أَࢽْدِیَ أَلَمْسَمِ!» ثَࢽٜ تِیَ دٜیَرُو کٜتُّلُوُو؞
[35] عِیسَى کَمْدَ دَࢽْدَلْدْࢽْ ثَتُّلُوُࢽَرُو ࢻَࢽْغٜࢽُو؞ تِیَ کَتَّدْرَࢽِّیَ، تِرُو: «تَدَ کَمْبٜدَ کَسَدّْمَّ وَ؟» یٜࢽُو؞
[36] کَمْدْیٜ: «کْمَ، وُࢽْدُ تِ وُو دُوُوࢽْ تِیَ کَسَدّْکِّدْ؟» ثْࢽٜ کِوُورُو؞
[37] عِیسَیٜ تِرُو: «تِیَ رُمَّ، کُورُو تِمَ ࢽِرُو مَࢽَࢽْجِیدْ وُو!» یٜࢽِّیَ،
[38] دَجِ کَمْدْیٜ: «کْمَ، کَسَدّْکّْࢽَ،» ثْࢽٜ تِرُو أَمْبْتْکٜىٰࢽُو؞
[39] دَجِ عِیسَیٜ: «شَرَ کَمْدُرُو دُࢽِیَ أَدْرُو کَدِکُّو، أَمْ ثَرُیْوَوُومَدْ ثَرُورُو، کُورُو أَمْ ثَرُیْمَدْ کَمْبُرُو وَلْجَرُو!» یٜࢽُو؞
[40] ࢻَرِسَوَ ࢽَࢽْجُࢽْ دَسَاࢽَ لَا مَࢽَ أَدَ ࢻَࢽْغٜرَࢽِّیَ، تِرُو: «أَ! أَࢽْدِ یٜ کَمْبُ وَ؟» یٜرَ؞
[41] عِیسَیٜ تَیِرُو: «ثَ ࢽَیِ کَمْبُوَ، بِوُࢽْدُو بَوُو، أَمَّ کْرْمَ: ‹رُیْیٜ!› ࢽُوِ ࢽَࢽْغَرُو، بِوُࢽْدُووَ دْغَوِ،» یٜࢽُو؞