[1] یِمْبٜ یَکُّوَ بْلَ کَࢽَ ثِدِ غَلِلٜىٰࢽْ لَرُسَ کٜدُو؞ یَ عِیسَیٜ ࢽَدْࢽْ مبٜجِ،
[2] کُورُو عِیسَىٰ ࢻُوُرَوَࢽْجُوَ یٜیَ لَرُسَدْرُو دُوجَࢽَ؞
[3] دِبٜࢽْ ثُوتُّو کٜرْࢽِّیَ، یَ عِیسَیٜ تِرُو: «دِبٜࢽْ بَوُو ثٜرْࢽَ،» یٜࢽُو؞
[4] أَمَّ عِیسَیٜ: «یَࢽِ، أَوِرُو ࢽَࢽِرُو کَدِمْ؟ سَࢽِ کُورُومَ ثْدْࢽِّ، دِیٜ!» یٜࢽُو؞
[5] یَࢽْجُیٜ وُولُودِیَدْرُو: «أَوِ یَیٜ ࢽَیِرُو وُلْࢽْجَغَیْدَ دٜوُو!» یٜࢽُو؞
[6] ࢽَدْࢽْ غْمْدُو کَوْیٜ أَرَکُّ غْࢽَادَ مبٜجِ؞ یَوْدِیَیٜ أَدَࢽْجَ تَیِرُّو وَلْدُیٜرُو ࢻَیْدَدَیْ، غْمْدُو ࢻِ یَیٜ أَلَمَ بُلٜ یِࢽْدِ بِ یَکُّ غَیْ ࢽغُوجِ؞
[7] دَجِ عِیسَیٜ وُولُودِیَدْرُو: «غْمْدُووَدَ إِࢽْغِلَࢽْ یِمْبْرُواْ!» ثْࢽٜ تَیِیَ ࢻٜرْ ࢻٜرُّو کٜسْمْبْرُو؞
[8] عِیسَیٜ تَیِرُو: «کْرْمَ کُرُمُّواْ، کْمَ ࢽغْمْرِیٜدْرُو یَدُواْ!» ثْࢽٜ کُرُمْجَࢽٜ کٜکِّیَدُو؞
[9] کْمَ ࢽغْمْرِیٜدْ إِࢽْغِ دِبٜࢽُّو وَلْجْࢽَدَ کِدَمْبْࢽِّیَ، ࢽدَرَࢽْ کٜوُدُومَرُو ࢽُوجْࢽِّ، أَمَّ وُولُودِیَ إِࢽْغِدَ کُرُمْجَࢽَدْ ࢽُوجَࢽَ؞ دَجِ مَیْ لَرُسَیٜدَ بُواْجٜ
[10] تِرُو: «وُࢽْدُ یَیٜ بُرْوُوࢽْ دِبٜࢽْ کْجِ ثُوࢽْ ثِ، سَغَرَࢽْدَیْیَ، دِبٜࢽْ بُرْوُویٜدَ ࢽَجْغْࢽِّ ثِ؞ أَمَّ ࢽِدْ حَرْ کْرْمَرُو دِبٜࢽْ کْجِ ثُوࢽْدَ غْࢽَیٜمْ!» یٜࢽُو؞
[11] أَدْمَ أَوُو عِیسَى بْلَ کَࢽَ ثِدِ غَلِلٜىٰلَࢽْ ثْدْࢽَدْ، تِمَ أَلَمَࢽْجُ أَجَبَّ بُرْوُویٜ وُو؞ أَدْغَیْࢽِࢽْ دَرَجَࢽْجُوَ ࢻْلٜجِیٜ ࢻُوُرَوَࢽْجُ تِیَ کَسَتْکٜرَ؞
[12] ࢽغَوُو أَدْیٜࢽْ تِیَ یَࢽْجُوَ یَࢽْجُغْࢽَسُووَ ࢻُوُرَوَࢽْجُوَ رُوکُّو بْرْࢽِ کَࢻَرْࢽَامبٜرُو لٜجَࢽٜ کَوُ غَࢽَرُو ࢽَدْࢽْ ࢽَࢻْکٜرَ؞
[13] سَلَ یَوْدِیَیٜ لَیَ ࢽجْکَّیِرَمْبٜ سَࢽْجُ کَرْࢽْغٜࢽِّیَ، عِیسَى جٜرُجَلٜمْبُو لٜىٰࢽُو؞
[14] ثُرُو ࢻَدُو اللَّهیٜࢽْ أَمْ دَلُو سُو، ࢽغْلَرُو سُو، تَتَّوَرْ سُو ثَلَدِ یٜ، ثَࢽْجِمَسُو ࢽَࢻْکَدَ یٜیَ ࢽَیٜىٰࢽُو؞
[15] دَجِ عِیسَى جٜلَࢽْ کِرْوُو ثَتّٜ تَیِ سَمَّا ࢽغْلَرُووَ دَلُووَࢽْ کُࢽْدٜࢽُّو ࢻَدُو اللَّهیٜدْࢽْ دُیٜࢽُو؞ کُورُو وُرِ ثَࢽْجِمَسُویٜدَ ثِدِرُو ࢻِجِیٜ تٜوُرْࢽْجَدَ تْمْبَلْجٜ
[16] تَتَّوَرْ لَدُومَسُودْرُو: «ࢽغُوࢽُواْ أَࢽِ ࢽغَا ࢽَ أَدْࢽْ تُلُوُواْ! بَرٜ ࢻَدُو بَوَࢽِیٜدَ کَسُوُرُو کَلَࢽْغُوِّ!» یٜࢽُو؞
[17] دَجِ ࢻُوُرَوَࢽْجُدْ أَوُو کِتَوُلَࢽْ رُوُوَدَ أَدَ تَکّٜرَ: «رَوُو ࢻَࢽّْمْبٜدْ کَࢽُّ غَیْ وُوَ سٜسِ؞»
[18] دَجِ یَوْدِیَدْیٜ تِرُو: «أَوُو أَࢽِیَ دِیُوࢽْمْدْ، أَلَمَ ࢻِ أَࢽْدِرُو ࢻْلٜسَغَمِ؟» ثَࢽٜ تِیَ کٜوُورُو؞
[19] عِیسَیٜ تَیِرُو: «ࢻَدُو اللَّهیٜ أَدَ وُرْࢽُواْ، وُ یٜ ثُرُو کَوُ یَکُّیٜࢽْ وَلْدْکّٜ تِیَ تَࢽْدْکِّ،» یٜࢽُو؞
[20] دَجِ یَوْدِیَدْیٜ تِرُو: «أَ! ࢻَدُو اللَّهیٜ أَدَ تَࢽْدُورُو کْرْوُ ࢻِدٜوُࢽْ أَرَکُّࢽْ ثَدُو دُوُوࢽْ، ࢽِ ثُرُو کَوُ یَکُّیٜࢽْ وَلْدْمٜ تَࢽْدْمِ؟» یٜرَ؞
[21] أَمَّ ࢻَدُو دُوُوࢽْ عِیسَى کْلَࢽْجُࢽْ مَࢽَ ثْدْࢽَدْ تِیࢽْجُ؞
[22] أَدْ ࢽَࢽْغَرُو عِیسَى وَلْدٜ کَرْمُولَࢽْ ثِجْࢽَیٜ ࢽغَوُوࢽْ، ࢻُوُرَوَࢽْجُ یٜ مَࢽَ أَدَ وُلْجْࢽَدَ تَکْثَࢽٜ أَوُو کِتَوُلَࢽْ رُوُوَدَدَ مَࢽَ عِیسَیٜدَا کَسَتْکٜرَ؞
[23] أَدْغَیْمَ عِیسَى سَلَ لَیَ ࢽجْکَّیِرَمْبٜرُو جٜرُجَلٜمْࢽِࢽْ دْغَࢽَ دُوُوࢽْ، أَمْ کَدَ أَلَمَ أَجَبَّ أَجَبَّ ثْدِدَ ثَرُࢽٜ تِیَ کَسَتْکٜرَ؞
[24] أَمَّ عِیسَى أَمْ سَمَّا جَوْرُو ࢽُوجْࢽَ ࢽَࢽْغَرُو، تَیِیَ مْرْسَجْࢽِّ؞
[25] کُورُو کْلَ کَمْبٜࢽْ شٜدَرُو وُࢽْدُمَا مَجْࢽِّ، تِ کْلَࢽْجُ أَوُو کَرْوُ کَمْبٜدَ ࢽُوجْࢽَ ࢽَࢽْغَرُو؞