[1] سَلَ لَیَ ࢽجْکَّیِرَمْبٜرُو کَوُ أَرَکُّ غَࢻْثُووَ، عِیسَى بْلَ بَیْتَࢽِیٜ ࢽَ لَجَرُسْ کَمْ دُوُوࢽْ کَرْمُولَࢽْ ثْسَࢽْغْࢽَدْ دْغَࢽَدْرُو لٜىٰࢽُو؞
[2] ࢽَدْࢽْ عِیسَرُو مَسْࢽَ دَبَّرْیٜىٰرَ؞ مَرْتَ مَسْࢽَدَ دَغَرْجِ، لَجَرُسْ یٜ أَمْ عِیسَىٰ رُوکُّو مَسْࢽَ بُورُو ࢽَࢻْثَࢽَدْیٜ ࢻَلْࢽْجَ؞
[3] دَجِ مَرْیَمْ سْࢽْدَلْ ثُرُوࢽْجُࢽْ کَوُدِ جَوْرُو تَمَࢽَّ ثُࢽْجُ ࢽَرْدِ ࢽغُوجٜ سِ عِیسَیٜرُو ࢻِجِیٜ کَࢽْدُرِ کْلَࢽْجُیٜࢽْ ثِࢽْجٜ، حَرْ بُوُتُّ کَوُدِدْیٜدْ ࢻَدُو ࢽغَا کِمُواْ؞
[4] ࢻُوُرَوَࢽْجُیٜ ࢻَلْࢽْجَ یَحُسَ إِسْکَرِیُوتْ ثَࢽِ کَمْ دُوُوࢽْ تِیَ ࢻُوُࢽْ کْلَدُووَࢽْجُرُو سْرْثِّیدْیٜ:
[5] «أَوِرُو کَوُدِ أَدَ دِࢽَرِیُسْ یٜرْ یَکُّرُو ثَلَدٜ وُرِدَ تَلَاوَرُو ثَدْࢽِّدْ؟» یٜࢽُو؞
[6] أَدَ وُلْدُࢽْجُدْ، تَلَاوَرُو کِسّْغْࢽَ غْࢽِ، تِ بَرْوُ، کُورُو أَرِتَّࢽْجَ یٜ مُکُّوࢽْجُࢽْ أَوُو ثُرُودْرُو ثَسَکِّدَ ࢽدَلْجِ ࢽَࢽْغَرُو؞
[7] عِیسَیٜ تِرُو: «تِیَ کُولّٜ! کَوُدِ أَدَ غْࢽَدُࢽْجُدْ، یِمْ سِتّْرَࢽِیٜرُو وُوَ دَبَّرْدُوُرُو أَدَ کِدُو؞
[8] تَلَاوَسُودْ سَوِسُورُو ثُرُوࢽْدُوࢽْ مبٜجِ، أَمَّ وُدْ سَوِسُورُو غْࢽِ ثُرُوࢽْدُوࢽْ دْغَکِّ،» یٜࢽُو؞
[9] جَمَ یَوْدِیَ کَدَ کَدَمِ عِیسَى ࢽَدْࢽْ مبٜجِرُو ࢻَࢽْغٜرَࢽِّیَ، ثِجَࢽٜ تِ رُࢽْجُوَ غْࢽِ، لَجَرُسْ کَمْ کَرْمُولَࢽْ ثْسَࢽْغْࢽَدْ یٜیَ کُرُورُو کَدِرَ؞
[10] دَجِ وُرَوَ رِمَࢽَّیٜ ࢽِیَ لَجَرُسْ یٜیَ رُورُو ࢽجٜجُویٜ ࢽغُویٜرَ،
[11] دَلِلْࢽْجُدْ یَوْدِیَ کَدَ کْلَ تِیٜࢽْ تَیِیَ کُولْجَࢽٜ عِیسَىٰ کَسَثَّࢽَ ࢽَࢽْغَرُو؞
[12] وَجْࢽَࢽْجُوَ جَمَ کَدَ ࢽغْمْرِدْرُو إِسَࢽَدْ عِیسَى جٜرُجَلٜمْبُو إِسِرُو ࢻَࢽْغٜرَࢽِّیَ،
[13] ࢽغْلَیْ دِوِࢽُویٜ ࢽغُوجَࢽٜ تِیَ کَࢻْتُوُرُو کٜلُوُو؞ کُواْ سَࢻْثَࢽٜ: «حُوسَࢽَّ! بَرْغَا تِ ثُ کْمَࢽْدٜىٰࢽْ إِسِمَدْ! بَرْغَا مَیْ إِسْرَاءِیلَیٜدْ!» ثَࢽِ؞
[14] دَجِ عِیسَى کُتَّ کُورُویٜ ثُوَࢽْدٜ جُوَࢽٜ کْلَࢽْجُࢽْ ࢽَࢻْکٜࢽُو، کِتَوُلَࢽْ رُوُوَدَدْ غَیْ:
[15] «ࢻٜرُو سِیُوࢽّٜ، بَرٜ رِࢽْمِّ! أَکُّو مَیْࢽْمْ کْلَ کُتَّ کُورُویٜࢽْ ࢽَࢻْکَدَ کْࢽْدٜ ثْدِ؞»
[16] ࢻُوُرَوَࢽْجُ أَوُو أَࢽِیَ أَوِمَرُو بُرْوُوࢽْ أَسُجَࢽِّ، أَمَّ اللَّه عِیسَرُو دَرَجَ کٜࢽِّیَ، دَجِ أَوُو أَࢽِ کْلَࢽْجُࢽْ کِتَوُلَࢽْ رُوُدْࢽَ یٜ، تِرُو ثَدّْࢽَ یٜیَ تَکّٜرَ؞
[17] جَمَ دُوُوࢽْ عِیسَىٰ رُوکُّو سَ لَجَرُسَّ ثُرُو کَوْرِیٜࢽْ بُواْجٜ کَرْمُولَࢽْ ثْسَࢽْغْࢽَدْࢽْ دَسَاࢽَدْ شٜدَ ثَدِ؞
[18] دَلِلْ جَمَ کَدَ تِیَ کَࢻْتُوُرُو ثَلُوُࢽَیٜدْ أَلَمَ أَدَ ثْدْࢽَ ࢻَࢽْجَࢽَ ࢽَࢽْغَرُو؞
[19] دَجِ ࢻَرِسَوَیٜ کَتّٜࢽْجَࢽْ: «رُوِ وَ؟ أَوِمَ رَࢽْغُوٜ دِوَّوُو؞ أَکُّو دُࢽِیَ ࢽغَ ࢽغَوُوࢽْجُ جَاࢽَ!» یٜرَ؞
[20] ثُرُو أَمْ اللَّهرُو أَمْبْتُّوُرُو سَ ࢽغْمْرِیٜ جٜرُجَلٜمْبُو إِسَࢽَدْیٜࢽْ أَمْ لَرْدُ غْرٜسّٜ لَا یٜ مبٜجِ؞
[21] ࢽَ ࢻِلِبُسْ کَمْ بَیْتْسَیْدَ ثِدِ غَلِلٜىٰرُو إِسَࢽٜ تِرُو: «مَلْمْ، عِیسَىٰ کُرُورُو مَࢽِیٜ،» یٜرَ؞
[22] ࢻِلِبُسْ لٜجٜ أَࢽْدَرَوُسُّو وُلْجِیٜ، أَࢽْدَرَوُسَّ ࢻِلِبُسَّ یٜ ࢽَ عِیسَیٜرُو لٜجَࢽٜ تِرُو وُلْیٜىٰرَ؞
[23] عِیسَیٜ تَیِرُو: «سَ ثْدْࢽَ، سَ دُوُوࢽْ تَدَ کَمْبٜ دَرَجَ ثُوَࢽْدِدْ؞
[24] جِرٜمَرُو ࢽَیِرُو وُلْࢽْجَغَکِّ، کَسُࢽِ أَلْغَمَیٜ ثِدِرُو ثُرٜ ࢽُیْوَوُووَ، رُࢽْجُ ࢽَࢻْثِ؞ أَمَّ ࢽُیْیَ، ࢽٜمَ کَدَ ثَکِّ؞
[25] کَمْ دُوُوࢽْ رُوࢽْجُ ثْرَاࢽَمَدْ رُوࢽْجُدَ ثُوَتْکِ، کُورُو کَمْ دُوُوࢽْ دُࢽِیَ أَدْࢽْ رُوࢽْجُوَ وَجْࢽَمَدْ تِیَ حَرْ رُو سَوِسُویٜرُو ثْرِوِ؞
[26] کَمْ لَا ࢽَࢽْوُولُودِ وُرُو سْدِّیَ، وُوَ سْغَ! کُورُو ࢽَ دْغَکّْࢽَدْࢽْ وُولُودِࢽِ یٜ دْغَیْ؞ کَمْ لَا ࢽَࢽْوُولُودِ وُرُو سْدِّیَ، بَوَدْ دَرَجَ تِرُو ثِ؞
[27] «کْرْمَ کَرْوُࢽِ کُتُّ؞ أَوِ غْلٜ وُلّْکِّ؟ بَوَ، سَ أَدْرُو وُوَ سْکَّیٜ؟ أَعَ، أَدْمَ ࢽَࢽْغَرُو سَ أَدْرُو کَدِکُّو؞
[28] بَوَ، ثُࢽْمْبُو دَرَجَ یٜ!» یٜࢽُو؞ دَجِ کُواْ سَمٜلَࢽْ ࢽُکْثٜ: «تِرُو دَرَجَ یِکّْࢽَ، کُورُو یَیٜ دَرَجَ یِکِّ،» یٜࢽُو؞
[29] جَمَ ࢽَدْࢽْ دَادَدْ کُواْدَ ࢻَࢽْغٜرَࢽِّیَ، غْرْدُ کٜىٰرَیٜ ثَࢽِ، لَایٜ: «مَلَیْیَ لَا تِرُو مَࢽَ ثْدُّو،» ثَࢽِ؞
[30] عِیسَیٜ تَیِرُو: «کُواْ أَدْ وُ ࢽَࢽْغَرُو غْࢽِ، ࢽَیِ ࢽَࢽْغَرُو ࢽُکّٜࢽُو؞
[31] کْرْمَمَ دُࢽِیَ أَدْرُو شَرَ کَمْدِیے، کْرْمَ مَیْ دُࢽِیَ أَدْیٜدَ دُجَࢽٜ ثُلُوِ؞
[32] وُدْ، وُوَ رُوسْغْوِیَ، أَمْ سَمَّا ࢽَࢽِرُو غْرْغْکِّ،» یٜࢽُو؞
[33] أَدَ وُلْدُࢽْجُدْ، کَرْمُو جِرِ ࢻِࢽْ ࢻُوُࢽْ ࢽُیْدَ ࢻْلٜىٰࢽُو؞
[34] دَجِ جَمَدْیٜ تِرُو: «ثُرُو أَتَّوْرَیٜࢽْ أَلْمَسِیوُدْ سَوِسُورُو دْغَیْرُو ࢻَࢽِّیٜࢽَ؞ ࢽدَیِࢽْ غْلٜ تَدَ کَمْبٜدَ کْسْکَرُو رُوجَغَیْ ࢽْمِ؟ وُࢽْدُ تَدَ کَمْبٜ أَدْ؟» یٜرَ؞
[35] دَجِ عِیسَیٜ تَیِرُو: «ࢽُرْدْ کُورُو یَیٜ دَوُࢽْدُوࢽْ سَ غَࢽَرُو مبٜجِ؞ ࢽُرْ تَوَّ دُوُوࢽْ، دَدَࢽُواْ، بَرٜ دُوُ ࢽَیِیَ ࢽجَوَࢽْدْࢽِّرُو؞ کَمْ دُوُوࢽْ ثُرُو دُوُیٜࢽْ لٜجِمَدْ ࢽَ لٜجِ ࢽُوجْࢽِّ؞
[36] ࢽُرْدَ تَوَّ دُوُوࢽْ، ࢽُرْدَ کَسَدُّواْ، تَدَوَ ࢽُرّٜرُو وَلُّواْرُو،» یٜࢽُو؞ عِیسَى أَوُو أَࢽِیَ وُلْیٜࢽِّیَ، ࢽَدَ کُولْجٜ تَیِلَࢽْ غْرَادَࢽْ؞
[37] عِیسَى ࢻُوُ جَمَیٜࢽْ أَلَمَ أَجَبَّ أَجَبَّ کَدَ ثْدْࢽَ یَیٜ، تِیَ کَسَثَّࢽِّ؞
[38] أَدْغَیْمَ أَوُو ࢽَوِ إِشَیَ کِتَوُلَࢽْ وُلْجْࢽَدْ وَکَّیٜࢽُو؞ تِیٜ: «کْمَࢽْدٜ، وُࢽْدُ کَوُرِࢽْدٜ کَسَثُّو؟ کُورُو وُࢽْدُرُو کْمَࢽْدٜ مُکُّوࢽْجُ کْࢽْدُوُووَ ࢻْلٜجُوُو؟» ثْࢽَّ؞
[39] أَدْمَ ࢽَࢽْغَرُو رَکْثَࢽٜ کَسَثَّیْوَوُو؞ کُورُو یَیٜ ࢽَوِ إِشَیَیٜ:
[40] «اللَّه سِمْࢽْجَ جَکْثٜ کْلَࢽْجَ کِبَّجْغْࢽَ، بَرٜ سِمْࢽْجَࢽْ ثَرُࢽِّ، کُورُو کَرْوُࢽْجَࢽْ أَسُجَࢽِّرُو؞ ࢽغَیْ غْࢽِیَ، ࢽَࢽِرُو وَلْدَࢽٜ تُوَ ثَدٜ، تَیِیَ إِسَࢽْغَغْکِّ،» ثْࢽَّ؞
[41] ࢽَوِ إِشَیَ دَرَجَ عِیسَیٜ ثُرُࢽَ یٜ، کْلَࢽْجُࢽْ مَࢽَجْࢽَ یٜ ࢽَࢽْغَرُو، أَوُو أَࢽِیَ وُلْیٜࢽُو؞
[42] أَدْ یَیٜ ثُرُو وُرَوَ یَوْدِیَدْیٜࢽْ ࢽغْوُ عِیسَىٰ کَسَثَّࢽَ؞ أَمَّ ࢻَرِسَوَ ࢽَࢽْغَرُو ࢻٜدٜرُو وُلْجَیْوَوُو، بَرٜ ࢻَرِسَوَدْ تَیِیَ دَࢽْدَلَّࢽْ ثَتُّلُوُࢽِّرُو،
[43] أَوُووَ دَرَجَ کَمْبٜدَ اللَّهیٜمَا کُوجْࢽَرُو ثَرَاࢽَ؞
[44] دَجِ عِیسَیٜ کُواْ سَࢻْثٜ: «کَمْ وُوَ کَسَࢽْسْࢽَمَدْ، وُوَ غْࢽِ، تِ وُوَ سُࢽُودْࢽَدَ کَسَثُّو!
[45] کُورُو کَمْ وُوَ سُرُیْمَدْ تِ وُوَ سُࢽُودْࢽَدَ ثُرُیْ؞
[46] وُ دُࢽِیَرُو ࢽُرْ غَیْ کَدِکُّو، وُࢽْدُ دُوُوࢽْ وُوَ کَسَࢽْسْࢽَمَدْ، بَرٜ ثُرُو دُوُیٜࢽْ دْغَࢽِّرُو؞
[47] کَمْ دُوُوࢽْ مَࢽَࢽِ ࢻَࢽْجٜ ࢽغُودُرُو وَجْࢽَمَدْ، وُ غْࢽِ شَرَ تِرُو یِدّْکِّ، دَلِلْࢽْجُدْ أَمْ دُࢽِیَیٜرُو شَرَ ࢽجْدُّورُو غْࢽِ، دُࢽِیَدَ ࢽجْکَّوُورُو کَدِکُّو ࢽَࢽْغَرُو؞
[48] کَمْ دُوُوࢽْ وُوَ وَسٜ مَࢽَࢽِ ࢽغُودُرُو وَجْࢽَمَدْ شَرَمَࢽْجُ مبٜجِ؞ مَࢽَ وُلّْکّْࢽَدْ یِمْ دَرْیٜىٰیَ تِیَ شَرَجِ؞
[49] کْلَࢽِࢽْ غْࢽِ مَࢽَ کِدْکُّو، أَمَّ بَوَ وُوَ سُࢽُودْࢽَدْ أَوُو وُلّْکِّدَ جِرِ تِیَ وُلّْکِّدَیٜ وَدَ وُرُو سِࢽَ؞
[50] کُورُو وَدَࢽْجُدْ رُو سَوِسُویٜرُو ࢽُوکّْࢽَ؞ أَدْمَ ࢽَࢽْغَرُو أَوُو وُلّْکِّدْ، جِرِ بَوَ وُلْسْغْࢽَدْ غَیْرُو وُلّْکِّ،» یٜࢽُو؞