[1] «بَرٜ تَلُّوِّرُو أَوُو أَࢽِیَ وُلْࢽْجَغَکّْࢽَ؞
[2] دَࢽْدَلَّࢽْ ࢽَیِیَ ࢽجَتُّلُوِ؞ أَیْ، سَ إِسٜ وُࢽْدُ دُوُوࢽْ ࢽَیِیَ رُورُو ࢽجٜىٰسِدْ کِدَ اللَّهیٜ ثْدُورُو تْمَجِ؞
[3] بَوَدَ ࢽُوجَࢽِّ بِ وُوَ ࢽُوسَࢽِّ ࢽَࢽْغَرُو ࢽغَیْ ثَدِ؞
[4] أَمَّ أَوُو أَࢽِیَ ࢽَیِرُو وُلْدُوُࢽِدْ، سَࢽْجَ ثْدِیَ، تَیِیَ وُلْࢽْجَغَکّْࢽَرُو تَࢽْغُواْ؞ «بَدِدُرَمْࢽِࢽْ أَوُو أَࢽِیَ ࢽَیِرُو وُلْࢽْجَغَکّْࢽِ، وُوَ ࢽَیِیَ رُوکُّو دْغَیْیٜ ࢽَࢽْغَرُو؞
[5] أَمَّ کْرْمَ ࢽَ تِ وُوَ سُࢽُودْࢽَدْیٜرُو وَلْدْکِّ، کُورُو وُࢽْدُࢽْدُومَ وُرُو: ‹ࢽدَرَرُو لٜࢽْمِ؟› ثْࢽٜ سُوُورْࢽِّ؞
[6] أَمَّ أَوُو أَࢽِیَ وُلْࢽْجَغَکّْࢽَ ࢽَࢽْغَرُو، کَرْوُࢽْدُو ࢽغَسُو کُتَّجْࢽَ؞
[7] أَدْ یَیٜ جِرٜ وُلْࢽْجَغَکِّ، وَلْدْکّْࢽَمَ ࢽَیِرُو ࢽغَلْوُو؞ وَلْدْکِّوَوُووَ، بَࢽَمَ ࢽَࢽْدُورُو إِسِوَوُو؞ أَمَّ وَلْدْکِّیَ، تِیَ ࢽَیِرُو جُوَࢽْجَغَکِّ؞
[8] إِسِیَ، دُࢽِیَدْرُو کْلَ بِوُوَ جِرٜیَ شَرَایٜࢽْ کْࢽْدُوࢽْجَ دِوِرُو تَبَّثِّیے؞
[9] کْلَ بِوُیٜࢽْ، وُوَ کَسَࢽْسَࢽِّ ࢽَࢽْغَرُو؞
[10] کْلَ جِرٜىٰࢽْ، ࢽَ بَوَدْیٜرُو وَلْدْکِّ، کُورُو غَدٜرُو سُرُوَّوُو ࢽَࢽْغَرُو؞
[11] کْلَ شَرَیٜࢽْ، مَیْ دُࢽِیَ أَدْیٜدْرُو شَرَ کَمْدْغْࢽَ ࢽَࢽْغَرُو؞
[12] «کُورُو یَیٜ أَوُو کَدَ ࢽَیِرُو وُلْدُوُیٜ تَکّْࢽَ، أَمَّ کْرْمَدْرُو رَࢽْغُوٜ تَیِیَ ࢽغُوࢽُوَّوُو؞
[13] رُحُ جِرٜىٰ إِسِیَ، ࢽَیِیَ جَوَلْ جِرٜىٰ سَمَّرُو سِمُوࢽْجَغَیْ؞ تِ ࢽغُمْࢽْجُࢽْ غْࢽِ مَࢽَجِ، أَوُو ࢻَࢽْجْࢽَ رُࢽْجُ مَࢽَجِ، کُورُو أَوُو ࢻُوُࢽْ وَکَّجِ یٜ ࢽَیِرُو وُلْࢽْجَغَیْ؞
[14] وُرُو دَرَجَ سِ، دَلِلْࢽْجُدْ أَوُو کَکّٜ ࢽغُوجٜ ࢽَیِرُو إِسَࢽُوࢽْجَغَیْ ࢽَࢽْغَرُو؞
[15] أَوُو بَوَیٜ سَمَّ کَکّٜ؞ أَدْمَ ࢽَࢽْغَرُو أَوُو کَکّٜ ࢽغُوجٜ ࢽَیِرُو إِسَࢽُوࢽْجَغَیْ یٜکُّو؞
[16] «غَࢽَ تُسِّیَ، غَدٜرُو وُوَ سُرُوَّوُو، کُورُو غَࢽَ تُسِّیَ، غَدٜمِࢽُّو وُوَ سُرُوِ،» یٜࢽُو؞
[17] دَجِ ࢻُوُرَوَࢽْجُیٜ لَاࢽجَ کَتّٜࢽْجَࢽْ: «أَوِ مَاࢽَ أَوُو وُلْسَغَیْیٜدْ وُو؟ ‹غَࢽَ تُسِّیَ، غَدٜرُو وُوَ سُرُوَّوُو، کُورُو غَࢽَ تُسِّیَ، غَدٜمِࢽُّو وُوَ سُرُوِ،› کُورُو ‹ࢽَ بَوَدْیٜرُو وَلْدْکِّ ࢽَࢽْغَرُو،›» یٜرَ؞
[18] دَجِ تَیِیٜ: «أَوِ مَاࢽَ أَوُو وُلْجِ أَدْیٜ وُو؟ ‹غَࢽَ تُسِّیَ،› کْلَ أَوِیٜࢽْ مَࢽَجِمَرُو ࢽُوࢽِیٜࢽْدٜ!» یٜرَ؞
[19] عِیسَى کْلَ أَدْیٜࢽْ تِیَ کُورُو ثَرَاࢽَرُو أَسُجٜ تَیِرُو: «کْلَ أَدْیٜمَࢽْ وَ أَمَࢽْدُووَ کُوکُورُوِ؟ ‹غَࢽَ تُسِّیَ، غَدٜرُو وُوَ سُرُوَّوُو، کُورُو غَࢽَ تُسِّیَ، غَدٜمِࢽُّو وُوَ سُرُوِ،›» یٜࢽُو؞
[20] «جِرٜمَرُو ࢽَیِرُو وُلْࢽْجَغَکِّ، یِرُوِ یٜ، ࢽجْمُّوِ یٜ، أَمَّ دُࢽِیَدْ کْجِ ࢻَࢽْجِ؞ کَرْوُࢽْدُو کُتَّجِ، أَمَّ کَرْوُکُتَّࢽْدُو کَرْوُکْجِرُو وَلْجِ؞
[21] کَمُ تَدَ ثَمْبِیَ، جَوْرُو لٜیْیَ ثَیْ، سَࢽْجُ ثْدْࢽَ ࢽَࢽْغَرُو؞ أَمَّ تَدَدَ ثَمْبِیَ، لٜیْیَ ثَࢽَدَ تَکْثِوَوُو، کَرْوُکْجِ تَدَ تَمْبْࢽَدْیٜ ࢽَࢽْغَرُو؞
[22] ࢽَیِ یٜ کْرْمَ کَرْوُࢽْدُو کُتَّجِ؞ أَمَّ غَدٜمِࢽُّو ࢽَیِیَ ࢽجَرُکِّیَ، کَرْوُࢽْدُو جَوْرُو کْجِجِ، کُورُو وُࢽْدُمَ کَرْوُکْجِࢽْدُو أَدَ ثُتُّلُوِوَوُو؞
[23] یِمْ أَدْࢽْ أَوِمَرُو وُوَ سُوُورُوَّوُو؞ جِرٜمَرُو ࢽَیِرُو وُلْࢽْجَغَکِّ، أَوِ یَیٜ بَوَدَ ثُࢽِلَࢽْ کُورُوَّدَ ࢽَیِرُو ࢽجَدِ؞
[24] کُورُومَ أَوِمَ ثُࢽِلَࢽْ کُورُوِّ؞ کُورُواْ ࢻَࢽْدُوِ، کَرْوُکْجِࢽْدُو کَلْکَلُّو وَلْجُو!
[25] «أَوُو أَࢽِیَ مِسَلْࢽِࢽْ وُلْࢽْجَغَکّْࢽَ؞ سَ إِسٜ ࢽَیِرُو مِسَلْࢽِࢽْ وُلْࢽْجَغَکِّوَوُو، أَمَّ ࢻٜدٜرُو کْلَ بَوَدْیٜࢽْ وُلْࢽْجَغَکِّ؞
[26] یِمْ أَدْࢽْ ثُࢽِلَࢽْ کُورُوِ، کُورُو ࢽَیِرُو بَوَدَ ࢽجَکُّورْکِّ ࢽْکِّوَوُو،
[27] أَوُووَ بَوَ کْلَࢽْجُ ࢽَیِیَ ࢽجَرَاࢽَ، دَلِلْࢽْجُدْ وُوَ سْرَاوَّ یٜ، وُ اللَّهیٜࢽْ کَدِکُّورُو کَسَدُّوَّ یٜ ࢽَࢽْغَرُو؞
[28] بَوَدْیٜࢽْ إِسْکّٜ دُࢽِیَرُو کَدِکُّو، کُورُو دُࢽِیَدَ کُولّْکّٜ ࢽَ بَوَدْیٜرُو وَلْدْکِّ،» یٜࢽُو؞
[29] دَجِ ࢻُوُرَوَࢽْجُیٜ تِرُو: «أَکُّو کْرْمَ مِسَلْࢽِࢽْ غْࢽِ، ࢻٜدٜرُو وُلّْمِ؞
[30] کْرْمَ أَوِسُووَ ࢽُوࢽْمَّ یٜ، کُورُو کَمْ ࢽِرُو کُورُو ࢽجْدُّورُو مْرَدُࢽْمْ بَوُو یٜرُو ࢽُوࢽِیٜࢽَ؞ أَدْمَرُو اللَّهیٜࢽْ کَدِمْبُو کَسَدِّیٜࢽَ،» یٜرَ؞
[31] عِیسَیٜ تَیِرُو: «کْرْمَ کَسَدُّوَّ وَ؟
[32] أَکُّو سَ إِسِ حَرْ إِسْࢽَمَ، سَ دُوُوࢽْ ࢽَیِیَ تَتَرْࢽْجَࢽٜ وُࢽْدُࢽْدُو یَیٜ ࢻَࢽّجُرُو لٜجٜ وُوَ رُࢽِ کُولْسِدْ؞ أَمَّ وُدْ رُࢽِ غْࢽِ، بَوَدْ رُوکُّوࢽِࢽْ ࢽَࢽْغَرُو؞
[33] أَوُو أَࢽِیَ ࢽَیِرُو وُلْࢽْجَغَکّْࢽَ، وُلَࢽْ ࢽَࢽْلٜوَ ࢻَࢽْدُواْرُو؞ دُࢽِیَلَࢽْ بُوࢽٜ یَوِ، أَمَّ کَرْوُࢽْدُو غٜرُواْ! کْلَ دُࢽِیَیٜࢽْ کْࢽَّسَرْ ࢻَࢽْدْکّْࢽَ،» یٜࢽُو؞