[1] کَوُ سَلَ لَیَ ࢽجْکَّیِرَمْبٜدْرُو، عِیسَى سَࢽْجُ دُࢽِیَ أَدَ کُولّْمٜ ࢽَ بَوَࢽْجُیٜرُو لٜدُیٜ ثْدْࢽَرُو ࢽُوجْࢽَ دُوُوࢽْ، جَمَࢽْجُ دُࢽِیَ أَدْیٜیَ ثْرَاࢽَ ࢽَࢽْغَرُو، تَیِرُو کْرَوُوࢽْجُ ثُوتُّو ࢻْلٜیٜىٰࢽُو؞
[2] إِوُلِیسْ ثَلَࢽْ ࢽِیَ عِیسَىٰ سْرْتُّوُیٜ ثُرُو کَرْوُ یَحُسَ إِسْکَرِیُوتْ تَدَ سِمَࢽّٜرُو ثَکّْࢽَ؞ بْرِ لٜسَیٜلَࢽْ،
[3] عِیسَى بَوَدْ أَوُو سَمَّا مُکُّوࢽْجُرُو ثَکّْࢽَ یٜ، ࢽَ اللَّهیٜࢽْ کَدِیُو ࢽَ اللَّهیٜرُو وَلْدِ یٜرُو ࢽُوجْࢽَ دُوُوࢽْ،
[4] دَجِ ثِجٜ کَجْمُࢽْجُ غْࢽَجٜ بَتَّ لَا ࢽغُوجٜ ثَࢽْجَࢽْجُرُو کِکّٜرُو؞
[5] ࢽغَوُو أَدْیٜࢽْ إِࢽْغِ تَسَرُو ࢻِجِیٜ سِ ࢻُوُرَوَࢽْجُیٜدَ تُلْدُ بَدِجٜ بَتَّ ثَࢽْجَࢽْجُرُو ثِکّٜرْࢽَدْࢽْ ثِࢽْجِ ࢽغَیْ دُوُوࢽْ،
[6] ࢽَ سِمَࢽْ بِتُرُسّٜرُو کَدِࢽِّیَ، بِتُرُسّٜ تِرُو: «کْمَ، ࢽِمَ وَ سِࢽِ تُلّْمِ؟» یٜࢽُو؞
[7] عِیسَیٜ تِرُو: «أَوُو دِکِّدَ کْرْمَ أَسُࢽْمْبَوُو، أَمَّ ࢻُوُࢽْ أَسُࢽْمِ،» یٜࢽُو؞
[8] بِتُرُسّٜ تِرُو: «أَعَ، تْمَّرُو سِࢽِ تُلّْمْبَوُو!» یٜࢽِّیَ، عِیسَیٜ: «تُلْࢽْجْکّْࢽِیَ، ࢽَࢽِلَࢽْ ࢽُوَࢽْمْ بَوُو،» یٜࢽُو؞
[9] سِمَࢽْ بِتُرُسّٜ: «کْمَ، سِࢽِ رُࢽْجُ غْࢽِ، مُکُّوࢽِیَ کْلَࢽِیَ یٜیَ تُلّٜ!» یٜࢽُو؞
[10] عِیسَیٜ تِرُو: «کَمْ کَسَلْدْࢽَدْ، سِࢽْجُ تُلْدَ غْࢽِیَ، کَدَوُ تِلَࢽْ بَوُو؞ ࢽَیِ تَیِرْ، أَمَّ ࢽَیِ سَمَّ غْࢽِ،» یٜࢽُو؞
[11] عِیسَى سْرْتُّوُمَࢽْجُدَ ࢽُوجْࢽَ، أَدْمَ ࢽَࢽْغَرُو تِیٜ: «ࢽَیِ سَمَّ غْࢽِ تَیِرْ وُو،» یٜࢽُو؞
[12] سِࢽْجَ تُلْجٜ کٜرْࢽِّیَ، عِیسَى کَجْمُࢽْجُ ࢽغُوجٜ لُجٜ وَلْدٜ ࢽَࢻْثٜ تَیِرُو: «أَوُو ࢽجَدّْکّْࢽَدَ أَسُࢽُوَّ وَ؟
[13] وُوَ سَیِࢽَّا کْمَالَࢽْ بُواْسُوِ، جِرٜࢽْدُووَ، وُمَ تِ وُو ࢽَࢽْغَرُو؞
[14] دَجِ وُ کْمَࢽْدُو یٜ، سَیِࢽَّࢽْدُو یٜ دُوُوࢽْ سِࢽْدُو تُلّْکّْࢽَدْ، سِ أَمَࢽْدُویٜ تُلْدَ ࢽَیِ یٜرُو وَجِمْࢽْجَاࢽَ؞
[15] ࢽَیِرُو مِسَلْ ࢽغٜدّْکُّو، ࢽَیِ یٜ جِرِ ࢽجَدّْکّْࢽَدْ غَیْ أَمَࢽْدُورُو یِدُّواْ!
[16] جِرٜمَرُو ࢽَیِرُو وُلْࢽْجَغَکِّ، وُولُودِ بَࢽْجُ ࢽغِمْبَا کُوجِوَوُو، کُورُو کَدُࢽُومَ یٜ کَمْ دُوُوࢽْ تِیَ ثُࢽُودْࢽَدَ کُوجِوَوُو؞
[17] أَوُو أَࢽِیَ ࢽُوࢽُوَّدْ، تَیِیَ دِوِیَ، بَرْغَࢽْدُو؞
[18] کْلَ ࢽَیِ سَمَّیٜࢽْ غْࢽِ مَࢽَࢽْکِّ، أَمْ کْرٜࢽْکّْࢽَدَ ࢽُوکّْࢽَ؞ أَمَّ دُولٜ سَیْ أَوُو کِتَوُلَࢽْ رُوُوَدَدْ وَکَّجِیَ: ‹کَمْ وُوَ رُوکُّو مَسْࢽَ دِیٜدْ کْلَدُوࢽِرُو وَلْجْࢽَ؞›
[19] کْرْمَ کَوُ وَکَّجِرُو ࢽَیِرُو وُلْࢽْجَغَکِّ، سَ وَکَّجِیَ، وُمَ تِ وُورُو کَسَدُّواْرُو؞
[20] جِرٜمَرُو ࢽَیِرُو وُلْࢽْجَغَکِّ، وُࢽْدُ دُوُوࢽْ کَمْ ࢽُودْکّْࢽَدَ ثْمُواْࢽَدْ وُمَا سْمُواْ؞ کُورُو وُࢽْدُ دُوُوࢽْ وُوَ سْمُواْࢽَدْ تِ وُوَ سُࢽُودْࢽَمَا ثْمُواْ،» یٜࢽُو؞
[21] أَوُو أَࢽِیَ وُلْجٜ کٜرْࢽِّیَ، عِیسَى حَࢽْغَلْࢽْجُ جَوْرُو ثِجٜ: «جِرٜمَرُو ࢽَیِرُو وُلْࢽْجَغَکِّ، کَمْࢽْدُو لَا وُوَ مُکُّو کْلَدُووَࢽِیٜرُو سْرْࢽْسِیے،» یٜࢽُو؞
[22] ࢻُوُرَوَدْ کَتّٜࢽْجَࢽْ ࢽِࢽِدَࢽٜ کْلَ وُࢽْدُیٜࢽْ مَࢽَجِمَرُو ࢽُوجَࢽِّ؞
[23] ࢻَلْࢽْجَ تِ دُوُوࢽْ عِیسَى جَوْرُو ثْرَاࢽَدْ غْرٜ عِیسَیٜࢽْ غِرِسْکَدَ مبٜجِ؞
[24] دَجِ سِمَࢽْ بِتُرُسْ کْلَ وُࢽْدُیٜࢽْ مَࢽَجِرُو تِیَ ثُوُورُورُو بْلَاࢽَ کَمْ غِرِسْکَدَدْرُو کِدُّو؞
[25] دَجِ عِیسَىٰ کَرْࢽْجٜ تِرُو: «کْمَ، وُࢽْدُ؟» ثْࢽٜ کِوُورُو؞
[26] عِیسَیٜ: «کَمْ دُوُوࢽْ تِرُو بُرُودِ أَدَ یِغَࢻْکْکّٜ یِکِّمَدْ، تِمَ!» یٜࢽُو؞ بُرُودِدَ کِغَࢻْکٜࢽِّیَ، یَحُسَ تَدَ سِمَࢽْ إِسْکَرِیُوتّٜرُو کَیْࢽُو؞
[27] ࢽجَࢽْغُودَ کِمُواْࢽِّیَ، إِوُلِیسْ کَرْوُࢽْجُرُو کْرْغَوُو؞ عِیسَیٜ تِرُو: «أَوُو دِمِدَ دُوَࢽْ دٜ!» یٜࢽُو؞
[28] أَمَّ ثُرُو أَمْ مَسْࢽَرُو ࢽَࢻْثَࢽَیٜࢽْ ࢻَلْࢽْجَمَ أَوِرُو أَدَ تِرُو وُلْیٜىٰࢽُورُو أَسُجْࢽِّ؞
[29] یَحُسَ أَرِتَّدْ مُکُّوࢽْجُࢽْ ࢽَࢽْغَرُو، لَاࢽجَ عِیسَیٜ تِرُو لٜجُو کَرٜ ࢽغْمْرِیٜدَ ثُوُو بِ أَوُو لَا تَلَاوَرُو ثُو وُلْجُورُو تْمَیٜرَ؞
[30] یَحُسَ ࢽجَࢽْغُودَ کِمُواْࢽِّیَمَ، کِلُوُو؞ سَدْ بُࢽٜ؞
[31] یَحُسَ کِلُوُࢽِّیَ، عِیسَیٜ: «کْرْمَ دُوُوࢽْ تَدَ کَمْبٜدْ دَرَجَ ثُوَࢽْدِ، کُورُو اللَّه یٜ تِیٜࢽْ دَرَجَ ثُوَࢽْدِ؞
[32] تِیٜࢽْ اللَّه دَرَجَ ثُوَࢽْدِیَ، اللَّه کْلَࢽْجُ یٜ تِرُو دَرَجَ ثِ، کُورُو سَدْمَࢽْ تِرُو دَرَجَ ثِ؞
[33] تَدَوَࢽِ سَࢽَࢽَ، سَ غَࢽَ لَارُو ثُرُوࢽْدُوࢽْ دْغَکِّ؞ وُوَ مَسُوِ، کُورُو یَوْدِیَرُو وُلْغْکّْࢽَدْ غَیْ ࢽَیِ یٜرُو کْرْمَ وُلْࢽْجَغَکِّ، ࢽَ لٜکِّدْرُو رَࢽْغُوٜ لٜࢽُوَّوُو؞
[34] ࢽَیِرُو وَدَ بْرِࢽْ ࢽجَدْکِّ: أَمَࢽْدُووَ رَوُواْ! جِرِ ࢽَیِیَ ࢽجَرَاکّْࢽَدْ غَیْ، ࢽَیِ یٜ أَمَࢽْدُووَ رَوُواْ!
[35] أَمَࢽْدُووَ رَاوَّا، أَدْغَیْࢽِࢽْ أَمْ سَمَّ ࢽَیِ ࢻُوُرَوَࢽِرُو ࢽُوجَیْ،» یٜࢽُو؞
[36] سِمَࢽْ بِتُرُسّٜ تِرُو: «کْمَ، ࢽدَرَرُو لٜࢽْمِ؟» ثْࢽٜ کِوُورْࢽِّیَ، عِیسَیٜ تِرُو: «ࢽَ لٜکِّدْرُو رَࢽْغْمٜ کْرْمَ وُوَ سْغَمْبَوُو، أَمَّ ࢻُوُࢽْ سْغَمِ،» یٜࢽُو؞
[37] بِتُرُسّٜ تِرُو: «کْمَ، أَوِرُو کْرْمَ رَࢽْغْکّٜ ࢽجْغَکِّوَوُودْ؟ ࢽِ ࢽَࢽْغَرُو رُوࢽِ یِکِّ،» یٜࢽُو؞
[38] عِیسَیٜ تِرُو: «وُ ࢽَࢽْغَرُو رُوࢽْمْ یِمِ؟ جِرٜمَرُو ࢽِرُو وُلْࢽْجْغْکِّ، کُ کَوُ غُدُواْمْ کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» یٜࢽُو؞