[1] ࢽغَوُو أَدْیٜࢽْ ࢽغْمْرِ یَوْدِیَیٜ لَا کِدْࢽِّیَ، عِیسَى جٜرُجَلٜمْبُو لٜىٰࢽُو؞
[2] جٜرُجَلٜمْلَࢽْ کَرْࢽْ ࢽغَوُورَمْ دِمِیَیٜدْࢽْ ࢻَلْوُ إِࢽْغِیٜ ࢽغُرْوُو أُوُوَ مبٜجِ، تْلَمْ یَوْدِیَوْدِࢽْ تِرُو بَیْتْسَتَ ثَࢽِ؞
[3] ࢽغُرْوُو أَࢽِࢽْ أَمْ دُوࢽْدِ کَدَ بُووَدَ مبٜجِ: کَمْبُوَ سُو، ࢽغُرْدِییَ سُو، أَمْ تِیࢽْجَ ࢽُࢽَ سُو؞ [إِࢽْغِدْیٜ بْلْجْمْدُࢽْجُ غُرٜجَیْ،
[4] دَلِلْࢽْجُدْ سَ لَا سَ لَاࢽْ مَلَیْیَ کْمَࢽْدٜىٰ جْࢻْثٜ إِࢽْغِدَ بْلْجْمْجِ ࢽَࢽْغَرُو؞ وُࢽْدُ دُوُوࢽْ إِࢽْغِ بْلْجْمْجْࢽَدْرُو بُرْوُوࢽْ ࢽغَاࢽَمَدْ، کْࢽْدُوࢽْدِ جِرِ ࢻِ تِلَࢽْ دْغَ یَیٜ، ࢽغَجِ؞]
[5] ࢽَدْࢽْ کَمْ لَا کْرْوُ ࢻِیَکُّࢽْ وُسْکُࢽُّو دُوࢽْدِ مبٜجِ؞
[6] عِیسَى کَمْدَ بُووَدَ کِرُࢽِّیَ، کُورُو ࢽَدْࢽْ جَوْرُو تُسّْࢽَرُو ࢽُوجْࢽَدْ، تِرُو: «ࢽغَدُ رَامَّ وَ؟» ثْࢽٜ کِوُورُو؞
[7] کَمْ دُوࢽْدِدْیٜ تِرُو: «کْمَ، سَ إِࢽْغِدْ بْلْجْمْجِیَ، کَمْ ࢽَࢽِࢽْ وُوَ إِࢽْغِدْرُو سَکِّ بَوُو؞ کُورُو لٜدُ دِکِّ دُوُوࢽْ، کَمْ غَدٜ وُوَ بُرْوُوسٜ ࢽغَیِ،» یٜࢽُو؞
[8] عِیسَیٜ تِرُو: «ثِࢽٜ بْࢽَرَمّْمْ ࢽغُوࢽٜ لٜࢽٜ!» یٜࢽُو؞
[9] سَدْمَࢽْ کَمْدْ ࢽغَجٜ بْࢽَرَمْࢽْجُ ࢽغُوجٜ لٜدُ بَدِیٜࢽُو؞ یِمْ أَدْ یِمْ تُسْتُیٜ؞
[10] أَدْ ࢽَࢽْغَرُو یَوْدِیَدْیٜ کَمْ ࢽغَجْࢽَدْرُو: «یِمْ تُسْتُیٜیَ بْࢽَرَمّْمْ ࢽغُودُ ࢽِرُو أَمَرْدْغْࢽِّ،» یٜرَ؞
[11] تَیِرُو: «کَمْ دُوُوࢽْ وُوَ إِسَࢽْغَسْغْࢽَدْ، تِمَ وُرُو: ‹بْࢽَرَمّْمْ ࢽغُوࢽٜ لٜࢽٜ!›» یٜࢽُو؞
[12] تَیِیٜ تِرُو: «وُࢽْدُ کَمْ دُوُوࢽْ ࢽِرُو بْࢽَرَمّْمْ ࢽغُوࢽٜ لٜࢽٜ ثْࢽَّدْ؟» ثَࢽٜ کٜوُورُو؞
[13] أَمَّ کَمْ ࢽغَجْࢽَدْ تِ وُࢽْدُمَرُو ࢽُوجْࢽِّ، عِیسَى ثُرُو جَمَدْیٜرُو کْلْدْغْࢽَ ࢽَࢽْغَرُو؞
[14] ࢽغَوُو أَدْیٜࢽْ عِیسَى کَمْدَ ࢻَدُو اللَّهیٜࢽْ ࢽَجِیٜ تِرُو: «أَکُّو ࢽغَࢽْمَّ! تُو، بِوُ دِیُو کُولّٜ، بَرٜ أَوُو لَا جَوْرُو دِوِ أَدَ کُوجْࢽَ ࢽِیَ ࢽجُوَࢽْدْࢽِّرُو،» یٜࢽُو؞
[15] دَجِ کَمْدْ لٜجٜ یَوْدِیَدْرُو عِیسَمَ تِیَ إِسَࢽْغَجُوُو یٜࢽُو؞
[16] عِیسَى أَوُو أَࢽِیَ یِمْ تُسْتُیٜیَ ثْدْࢽَ ࢽَࢽْغَرُو، یَوْدِیَدْ تِرُو ࢽِیَدِوِ ࢻْلٜدُوُ بَدِیٜرَ؞
[17] أَمَّ عِیسَیٜ تَیِرُو: «بَوَࢽِ کُ کُࢽْدٜࢽُّو کِدَ ثْدِ، وُ یٜ کِدَ دِکِّ،» یٜࢽُو؞
[18] أَدْ ࢽَࢽْغَرُو یَوْدِیَدْ ثَیٜمَا کُوجْࢽَرُو تِیَ رُورُو ࢽجٜجُورُو مَیٜرَ؞ یِمْ تُسْتُیٜیَ أَوُو دِیُورُو دَࢻْکَدَ رُࢽْجُ غْࢽِ ثْدُو، کُورُو اللَّهدْمَ بَوَࢽْجُ وُو ثْࢽٜ اللَّهَ غَسْکَیٜࢽُو؞
[19] دَجِ عِیسَیٜ یَوْدِیَدْرُو: «جِرٜمَرُو ࢽَیِرُو وُلْࢽْجَغَکِّ، تَدَدْ کْلَࢽْجُ أَوِمَ رَکْثٜ ثْدِوَوُو، سَیْ أَوُو بَوَدْ ثْدِ ثُرُࢽَدَ؞ کُورُو أَوِ یَیٜ بَوَدْ ثْدِدَ تَدَدْ یٜ ثْدِ؞
[20] أَوُووَ بَوَدْ تَدَدَ ثْرَاࢽَ أَوُو تِ کْلَࢽْجُ ثْدِ سَمَّا تِرُو ࢻْلٜجِیے؞ کُورُو کْࢽْدُو أَࢽِمَا کُوجْࢽَ تِرُو ࢻْلٜجِیے، ࢽَیِ یٜ جَوْرُو أَجَمُّواْرُو؞
[21] جِرِ بَوَدْ أَمْ سَࢽُࢽَا ثْسَࢽْغٜ تَیِرُو رُو ثِدْ غَیْ، تَدَدْ یٜ کَمْ ثْرَاࢽَرُو رُو ثِ؞
[22] بَوَدْ وُࢽْدُمَرُو شَرَ ثْدِّوَوُو، أَمَّ شَرَ سَمَّا مُکُّو تَدَدْیٜرُو ثَکّْࢽَ،
[23] أَمْ ࢽغَ تَدَدْرُو دَرَجَ ثَدُو، جِرِ بَوَدْرُو دَرَجَ ثَدِدْ غَیْ؞ کَمْ تَدَدْرُو دَرَجَ ثِوَوُومَدْ بَوَ تِیَ ثُࢽُودْࢽَدْرُو دَرَجَ ثِوَوُو؞
[24] جِرٜمَرُو ࢽَیِرُو وُلْࢽْجَغَکِّ، کَمْ مَࢽَࢽِ ࢻَࢽْجٜ تِ وُوَ سُࢽُودْࢽَدَ کَسَثّْࢽَمَدْ رُو سَوِسُویٜ ثُوَࢽْدْࢽَ؞ شَرَ تِیَ ثْدَیْوَوُو، أَمَّ کَرْمُورُو کَجٜ رُو ثُوَࢽْدْࢽَ؞
[25] «جِرٜمَرُو ࢽَیِرُو وُلْࢽْجَغَکِّ، سَدْ إِسِ حَرْ إِسْࢽَمَ، سَ دُوُوࢽْ أَمْ سَࢽُࢽَ کُواْ تَدَ اللَّهیٜدَ ࢻَࢽْجَیْ، کُورُو تَیِ ࢻَࢽْجَࢽَمَدْ رُووَ دَسَیِ؞
[26] جِرِ بَوَدْ ࢻْرْدُ رُویٜدْ غَیْ، ࢽغَیْمَ ثَکّٜ تَدَدْ یٜ ࢻْرْدُ رُویٜرُو وَلْجْࢽَ؞
[27] کُورُو کْࢽْدُوُو شَرَ کَمْدَیٜ تِرُو ثِࢽَ، دَلِلْࢽْجُدْ تِمَ تَدَ کَمْبٜدْ وُو ࢽَࢽْغَرُو؞
[28] بَرٜ أَدَ أَجَمُّوِّ، سَ إِسٜ أَمْ کَوْرِلَࢽْ سَمَّ کُواْࢽْجُ ࢻَࢽْجَࢽٜ
[29] ثَلُوِ؞ أَمْ دُوُوࢽْ أَوُو ࢽغْلَ ثَدْࢽَمَسُودْ رُووَرُو ثِجَیْ، أَمَّ أَمْ دُوُوࢽْ أَوُو دِوِ ثَدْࢽَمَسُودْ شَرَرُو ثِجَیْ؞
[30] «وُ رُࢽِ أَوِمَ رَࢽْغْکّٜ دِکِّوَوُو؞ جِرِ ࢻَکِّدْ غَیْ، شَرَ دِکِّ؞ کُورُو شَرَࢽِ یٜ جِرٜ، دَلِلْࢽْجُدْ أَوُو رَاکّْࢽَ غْࢽِ، أَوُو تِ وُوَ سُࢽُودْࢽَمَدْ ثْرَاࢽَا دِیُورُو مَکِّ ࢽَࢽْغَرُو؞
[31] «وُ کْلَࢽِࢽْ کْلَࢽِ شٜدَمَرُو وَلْیٜکُّووَ، شٜدَࢽِدْ جِرٜ غْࢽِ؞
[32] شٜدَمَࢽِ غَدٜ مبٜجِ، کُورُو شٜدَ کْلَࢽِࢽْ ثْدِدْ جِرٜرُو ࢽُوکّْࢽَ؞
[33] یَحْیـَرُو أَمْ یِکُّࢽُودُوَّ، تِ یٜ جِرٜدَ شٜدَجُو؞
[34] وُدْ کَمْبٜࢽْ غْࢽِ شٜدَ مَکِّ، أَمَّ ࢽجْکَّوُو ࢻَࢽْدُواْرُو أَوُو أَࢽِیَ وُلّْکِّ؞
[35] یَحْیـَدْ ࢻَتْلَ وَسْکَدَ ࢽُرْ ثِ؞ سَ غَࢽَرُو کَرْوُکْجِیَ ثُرُو ࢽُرْࢽْجُیٜࢽْ ࢽَمُّوَّ؞
[36] أَمَّ شٜدَࢽِ شٜدَ یَحْیـَیٜیَ ࢽَࢽْکُرَࢽْ کُوجْࢽَ، دَلِلْࢽْجُدْ کْࢽْدُو بَوَدْ وُرُو تُمُوغْکُّورُو سِࢽَدْ، وُوتّٜ کْࢽْدُو دِکِّدْمَ بَوَدْ وُوَ سُࢽُودْࢽَرُو کْلَࢽِࢽْ شٜدَسِ ࢽَࢽْغَرُو؞
[37] کُورُو بَوَ وُوَ سُࢽُودْࢽَدْ، تِمَ کْلَࢽِࢽْ شٜدَجُو؞ أَمَّ ࢽَیِدْ ࢽغَلْتٜمَ کُواْࢽْجُ ࢻَࢽُّوِّ، ࢻَسَلْࢽْجُ یٜ رُوِّ،
[38] کُورُو مَࢽَࢽْجُ یٜ کَرْوُࢽْدُوࢽْ ࢽَࢻْثْࢽِّ، دَلِلْࢽْجُدْ کَمْ ثُࢽُودْࢽَدَ کَسَدُّوِّ ࢽَࢽْغَرُو؞
[39] کِتَوُوَدَ کْلَ حَࢽْغَلَّیٜࢽْ کْرَࢽُوِ، تَیِلَࢽْ رُو سَوِسُویٜ ࢻَࢽْدُوِرُو تْمَࢽُوَّ ࢽَࢽْغَرُو، أَمَّ کِتَوُ أَࢽِمَ کْلَࢽِࢽْ شٜدَ ثَدُو!
[40] أَدْ یَیٜ ࢽَࢽِرُو إِسُوٜ رُو سَوِسُویٜ ࢻَࢽْدُورُو وَیٜوْ؞
[41] «أَمْبٜࢽْ غْࢽِ دَرَجَ مَکِّ؞
[42] أَمَّ ࢽَیِیَ ࢽُوࢽْجَکّْࢽَ، کْرَوُو اللَّهیٜ کَرْوُࢽْدُوࢽْ بَوُو؞
[43] ثُ بَوَࢽِیٜࢽْ کَدِکُّو، أَمَّ وُوَ مُواْرُو وَسٜوْ؞ کَمْ غَدٜ ثُ کْلَࢽْجُیٜࢽْ کَدِیُووَ، تِیَ مُووُوِ؞
[44] ࢽَیِ دَرَجَ کَتّٜࢽْدُوࢽْ مَࢽُوِ، أَمَّ دَرَجَ اللَّه رُࢽْجُیٜࢽْ إِسِدَ مَࢽُوَّوُودْ، ࢽدَیِلَࢽْ غْلٜ رَࢽْغُوٜ وُوَ سَسَرَوِ؟
[45] بَرٜ وُمَ ࢽَیِیَ ࢽَ بَوَدْیٜࢽْ ࢽغَدَرْࢽْجَکِّرُو تْمَࢽُوِّ؞ ࢽغَدَرْمَࢽْدُودْ تِمَ ࢽَوِ مُوسَى وُو، کَمْ دُوُوࢽْ تْمَࢽْدُو تِرُو یَکُّوَّدْ؞
[46] ثَ ࢽَوِ مُوسَىٰ جِرٜمَرُو یَسَرَوَّا، وُ یٜیَ سَسَرَوِ، کْلَࢽِࢽْ رُوُجْࢽَ ࢽَࢽْغَرُو؞
[47] أَمَّ أَوُو رُوُجْࢽَدَ یَسَرَوِّیَ، ࢽدَیِࢽْ غْلٜ مَࢽَࢽِ یَسَرَوِ؟» یٜࢽُو؞