[1] کْوُ ࢻَرِسَوَیٜࢽْ کَمْ لَا کُرَ یَوْدِیَیٜ مبٜجِ، ثُࢽْجُ ࢽِکُودِمُسْ؞
[2] ثُرُو بُࢽٜىٰࢽْ ࢽَ عِیسَیٜرُو إِسٜ تِرُو: «سَیِࢽَّ، ࢽِدْ مَلْمْ ࢽَ اللَّهیٜࢽْ کَدِمْبُو ࢽُوࢽِیٜࢽَ، دَلِلْࢽْجُدْ وُࢽْدُمَ اللَّهَ رُوکُّو غْࢽِیَ، رَکْثٜ أَلَمَ دِمِ أَࢽِیَ ثْدِوَوُو،» یٜࢽُو؞
[3] عِیسَیٜ: «جِرٜمَرُو ࢽِرُو وُلْࢽْجْغْکِّ، کَمْ دُوُوࢽْ بْرِࢽُّو تَمْبْࢽِّدْ، رَکْثٜ ࢽُودُو بَرْغَا اللَّهیٜدَ ثُرُیْوَوُو،» یٜࢽُو؞
[4] ࢽِکُودِمُسّٜ: «ࢽدَیِࢽْ غْلٜ کَمْ کِیَرِجْࢽَدَ رَکْثَࢽٜ ثَسَمْبِ؟ ثُرُو یَࢽْجُیٜرُو وَ وَلْدٜ یِࢽْدِیٜرُو ࢽغَیٜ تِیَ ثَمْبِ؟» یٜࢽُو؞
[5] عِیسَیٜ: «جِرٜمَرُو ࢽِرُو وُلْࢽْجْغْکِّ، کَمْ دُوُوࢽْ إِࢽْغِیَ رُحُ اللَّهیٜیَلَࢽْ تَمْبْࢽِّدْ، رَکْثٜ ࢽُودُو بَرْغَا اللَّهیٜدْرُو ࢽغَیِوَوُو؞
[6] أَوُو کَمْبٜࢽْ تَمْبْࢽَمَدْ کَمْدْمَ، أَمَّ أَوُو رُحُ اللَّهیٜࢽْ تَمْبْࢽَمَدْ رُحُدْمَ؞
[7] بَرٜ أَجَمّْمِّ کْلَ ‹سَیْ بْرِࢽُّو تَمْبُوِیَ،› وُلْࢽْجْغْکّْࢽَ أَدْیٜࢽْ؞
[8] کَرُوَ ثِجِیَ، ࢽَ ثْرَاࢽَرُو ࢻُجِ؞ کُواْࢽْجُ ࢻَࢽّْمِ، أَمَّ ࢽَ ثُلُوُࢽَا ࢽَ لٜجِیَدَ ࢽُوࢽْمِّ؞ أَدْغَیْمَ کَمْ دُوُوࢽْ رُحُ اللَّهیٜࢽْ تَمْبْࢽَمَدْ یٜ؞»
[9] ࢽِکُودِمُسّٜ تِرُو: «جِرِ ࢻِلَࢽْ أَتّْ یُوجِ؟» ثْࢽٜ کِوُورُو؞
[10] عِیسَیٜ تِرُو: «ࢽِ مَلْمْ ࢽُووَدَ إِسْرَاءِیلَوُیٜ دُوُوࢽْ أَوُو أَࢽِیَ ࢽُوࢽْمِّ؟
[11] جِرٜمَرُو ࢽِرُو وُلْࢽْجْغْکِّ، أَࢽْدِ أَوُو ࢽُوࢽِیٜࢽَ مَࢽَࢽِیٜ، کُورُو أَوُو رُیْیٜࢽَ شٜدَࢽِیٜ، أَمَّ ࢽَیِ کُوَ یَیٜ شٜدَࢽْدٜدَ کَسَتُّرُو وَࢽُوَّ؞
[12] ࢽَیِرُو أَوُووَ دُࢽِیَیٜسُو وُلْࢽْجَغَکّْࢽَ کَسَدُّوِّ دُوُوࢽْ، سَمٜىٰسُودَ وُلْࢽْجَغَکِّیَ، ࢽدَیِلَࢽْ غْلٜ کَسَدُّوِ؟
[13] وُࢽْدُمَ سَمٜرُو لٜجْࢽِّ، تَدَ کَمْبٜ سَمٜلَࢽْ جْࢻْثْࢽَدْ غْࢽِیَ؞
[14] جِرِ ࢽَوِ مُوسَى کَرَاࢽْ کَدِ رُوجْغْࢽَدْ غَیْ، سَیْ ࢽغَیْرُو تَدَ کَمْبٜدْ یٜیَ رُوجَغَیْیَ،
[15] کْلَ أَدْیٜࢽْ وُࢽْدُ دُوُوࢽْ تِیَ کَسَثّْࢽَمَدْ رُو سَوِسُویٜ ثُوَࢽْدِ؞
[16] «أَوُووَ اللَّه دُࢽِیَدَ جَوْمَرُو ثْرَیٜ تَدَࢽْجُ تِلُو لُوکْ کَیْࢽُو، وُࢽْدُ دُوُوࢽْ تِیَ کَسَثّْࢽَمَدْ بَرٜ ࢻَثّْغْࢽِّ، أَمَّ رُو سَوِسُویٜ ثُوَࢽْدُو ࢽَࢽْغَرُو؞
[17] اللَّه دُࢽِیَرُو شَرَ ࢽجْدُّورُو غْࢽِ تَدَࢽْجُدَ کِࢽُودُو، أَمَّ تِیٜࢽْ دُࢽِیَدَ ثْکَّوُورُو؞
[18] وُࢽْدُ دُوُوࢽْ تِیَ کَسَثّْࢽَمَدْ، تِیَ شَرَ ثْدَیْوَوُو، أَمَّ وُࢽْدُ دُوُوࢽْ تِیَ کَسَثّْࢽِّمَدْ، ثَمَࢽْ تِیَ شَرَ ثْدَࢽَ، دَلِلْࢽْجُدْ ثُ تَدَ تِلُو لُوکْ اللَّهیٜدَ کَسَثّْࢽِّ ࢽَࢽْغَرُو؞
[19] أَدْمَ شَرَدْ وُو: ࢽُرْدْ دُࢽِیَرُو إِسْࢽَ، أَمَّ أَمْ ࢽُرْدَ وَجَࢽٜ دُوُدَ کٜرَوُو، کْࢽْدُوࢽْجَسُو دِوِ ࢽَࢽْغَرُو؞
[20] دِوِ دِیُومَ ࢻِ یَیٜ ࢽُرْدَ وَجٜ ࢽَ ࢽُرْدْیٜرُو إِسِوَوُو، بَرٜ کْࢽْدُوࢽْجُ دِوِدَ أَمْ ࢻٜدٜرُو ثَرُࢽِّرُو؞
[21] أَمَّ جِرٜ دِیُومَدْ ࢽَ ࢽُرْدْیٜرُو إِسِ، کْࢽْدُوࢽْجُدْ اللَّهیٜࢽْ تْدُورُو ࢻْلٜدِ ࢽَࢽْغَرُو؞»
[22] ࢽغَوُو أَدْیٜࢽْ عِیسَىٰ ࢻُوُرَوَࢽْجُوَ ثِدِ یَحُدِیَیٜرُو لٜجَࢽٜ کَوُ غَࢽَرُو تَیِیَ رُوکُّو ࢽَࢻْثٜ أَمْبُو کَسَلَ کِدُّو؞
[23] ࢽَوِ یَحْیـَى یٜ ࢽَ أَیْࢽُوࢽْ ثَࢽِ کَرْࢽْ بْلَ سَلِمْبٜࢽْ أَمْبُو کَسَلَ ثْدِّ، ࢽَدْࢽْ إِࢽْغِ ࢽغْوُ مبٜجِ ࢽَࢽْغَرُو؞ أَمْ ࢽَࢽْجُرُو إِسَࢽٜ تَیِرُو کَسَلَ ثْدِّ؞
[24] سَدْࢽْ یَحْیـَىٰ کُوسُورُو ثَسَکّْࢽِّ دُوُوࢽْ؞
[25] دَجِ ࢻُوُرَوَ یَحْیـَیٜ لَآ یَوْدِ لَآ کْلَ تَیِرُّو وَلْدُیٜࢽْ کَمْبِوُ بَدِیٜرَ؞
[26] ࢽَ یَحْیـَیٜرُو إِسَࢽٜ تِرُو: «سَیِࢽَّ، کَمْ ࢽِیَ رُوکُّو ثِ بْرْمْ جُورْدَࢽِیٜ تُودْیٜࢽْ، کُورُو کْلَࢽْجُࢽْ شٜدَࢽْمَّدْ، أَکُّوࢽْجُ أَمْبُو کَسَلَ ثْدِّ، کُورُو أَمْ سَمَّ ࢽَࢽْجُرُو لٜجَیْ،» یٜرَ؞
[27] یَحْیـَیٜ تَیِرُو: «کَمْ رَکْثٜ أَوِمَ ثُوَࢽْدِوَوُو، أَوُو سَمٜلَࢽْ تِرُو تِࢽَدْ غْࢽِیَ؞
[28] ࢽَیِ کْلَࢽْدُومَ وُ أَدَ وُلّْکّْࢽَرُو شٜدَسُوِ: ‹وُ غْࢽِ أَلْمَسِیوُدْ وُو، أَمَّ وُ کَمْ اللَّه تِࢽْ ࢻُوُࢽُّو ثُࢽُودْࢽَدْ؞›
[29] کَمْ ࢽجُدُوَمَدْ تِمَ مَیْ لَرُسَیٜدْ وُو؞ کُورُو سَوَ غْرٜࢽْجُࢽْ دَادَ تِیَ کْرْࢽْجِمَدْ کُواْ سَوَࢽْجُیٜ ࢻَࢽْجِیَ، کَرْوُࢽْجُ جَوْرُو کْجِجِ؞ أَدْ ࢽَࢽْغَرُو کَرْوُکْجِࢽِ أَدْ کَلْکَلُّو وَلْجْࢽَ؞
[30] سَیْ تِدْ کُرَجٜ، وُ یٜ تْࢽْغْرِࢽْکِّیَ؞
[31] «کَمْ دُوُوࢽْ سَمٜلَࢽْ إِسْࢽَمَدْ سَمَّا کُوجْࢽَ؞ کَمْ دُوُوࢽْ ثِدِلَࢽْ دْغَࢽَمَدْ ثِدِیٜدْمَ، کُورُو أَوُو ثِدِیٜدْمَا مَࢽَجِ؞ کَمْ دُوُوࢽْ سَمٜلَࢽْ إِسْࢽَمَدْ سَمَّا کُوجْࢽَ؞
[32] أَوُو ثُرُࢽَا ࢻَࢽْجْࢽَآ شٜدَجِ، أَمَّ وُࢽْدُمَ شٜدَࢽْجُ کَسَثِّوَوُو؞
[33] کَمْ دُوُوࢽْ شٜدَࢽْجُ کَسَثّْࢽَمَدْ اللَّهَ جِرٜمَرُو تَبَّثّْغْࢽَ؞
[34] أَوُووَ کَمْ اللَّه ثُࢽُودْࢽَمَدْ مَࢽَ اللَّهیٜ مَࢽَجِ، اللَّه تِرُو رُحُࢽْجُ دَدُ بَوُووَرُو ثِࢽَ ࢽَࢽْغَرُو؞
[35] بَوَدْ تَدَدَ ثْرَاࢽَ، کُورُو أَوُو سَمَّا مُکُّوࢽْجُرُو ثَکّْࢽَ؞
[36] کَمْ تَدَدَ کَسَثّْࢽَمَدْ رُو سَوِسُویٜ ثُوَࢽْدْࢽَ؞ أَمَّ کَمْ تَدَدَ کَسَتُّ وَجْࢽَمَدْ رُو ثُوَࢽْدِوَوُو، غْرْغَدُ اللَّهیٜ تِلَࢽْ دْغَیْ،» یٜࢽُو؞