[1] Yî-set-lie̍t-ngìn lì-khôi Âi-khi̍p heu ke thi-ngi ngièn ngi-ngie̍t chhû-yit, Song-chú chhai Sî-nai khóng-yâ, chhai Kì ke sṳn-chong-phùng tî-poi tui Mô-sî kóng:
[2] “Ngì lâu Â-lùn oi thiàu-chhà Yî-set-lie̍t chhiòn fi-chung ke ngìn-khiéu, oi yit chûng-chhu̍k yit chûng-chhu̍k, yit kâ-chhu̍k yit kâ-chhu̍k thiàu-chhà, chiông ngi-sṳ̍p se yî-song voi siông-chhṳ̀ ke nàm-ngìn yit-sà yit-sà, cheu kì-têu ke kiûn-chhui lie̍t-chhut miàng-tân lòi.
[4] Ngì-têu oi tui tak kî-chhu̍k chhìm yit-ke chhu̍k-chóng lòi pông-chhu ngì-têu.”
[5] Yî-ha he tak kî-chhu̍k vi liá-hong kûng-chok só-sién chhut-lòi ke liâng-chhiu: Lî-phien kî-chhu̍k — Sṳ-tiû-ngí ke lai-é Yî-li-siuk; Sî-mién kî-chhu̍k — Sû-li-sâ-thoi ke lai-é Sṳ-lu-me̍t; Yù-thai kî-chhu̍k — Â-mí-nâ-tha̍t ke lai-é Nâ-sun; Yî-sat-kâ kî-chhu̍k — Sû-ap ke lai-é Nâ-thán-ngia̍p; Sî-pu-lùn kî-chhu̍k — Hî-lùn ke lai-é Yî-li-ap; Yok-sit ke chṳ́-sûn lióng-ke kî-chhu̍k: Yî-fap-lièn kî-chhu̍k — Â-mí-fut ke lai-é Yî-li-sâ-mâ; Mâ-nâ-sî kî-chhu̍k — Pí-thai-siuk ke lai-é Kâ-mâ-lie̍t; Phien-ngâ-mén kî-chhu̍k — Kî-tô-nì ke lai-é Â-pí-tan; Tan kî-chhu̍k — Â-mí-sâ-thoi ke lai-é Â-hî-yî-chhia; Â-sat kî-chhu̍k — Ngò-làn ke lai-é Pha-kiet; Kâ-tet kî-chhu̍k — Tiû-ngí ke lai-é Yî-li-ngâ-sat; Nâ-fut-thâ-li kî-chhu̍k — Yî-nàm ke lai-é Â-hî-lâ. Yî-song ke ngìn he tui fi-chung sién chhut-lòi ke, tak-sà cho pún kî-chhu̍k ke chhu̍k-chóng, chhiòn-phu he Yî-set-lie̍t kiûn-chhui ke liâng-chhiu.
[17] Mô-sî lâu Â-lùn tet-tó liá sṳ̍p-ngi sà ke pông-chhu,
[18] chhiu chhai ngi-ngie̍t chhû-yit chhi-si̍p chhiòn fi-chung, cheu chûng-chhu̍k, kâ-chhu̍k ke sun-si tên-ki chhiòn-phu ngìn-mìn. Só-yû ngi-sṳ̍p se yî-song ke nàm-ngìn yit-sà yit-sà chhiòn-phu tên-ki hâ-lòi son ngìn-su,
[19] cheu Song-chú só min-lin ke. Án-ngiòng, Mô-sî chhai Sî-nai khóng-yâ tên-ki chhiòn-phu ngìn-mìn.
[20] Ngi-sṳ̍p se yî-song voi siông-chhṳ̀ ke nàm-ngìn, cheu chûng-chhu̍k, kâ-chhu̍k ke sun-si, yit-sà yit-sà chhiòn-phu tên-ki hâ-lòi son ngìn-su; Yî-set-lie̍t ke chóng-chṳ́ Lî-phien ke yit kî-chhu̍k phài thèu-chhièn. Tak kî-chhu̍k ke chúng ngìn-su ki chhai hâ-poi: Lî-phien kî-chhu̍k — si-van liuk-chhiên ńg-pak ngìn; Sî-mién kî-chhu̍k — ńg-van kiú-chhiên sâm-pak ngìn; Kâ-tet kî-chhu̍k — si-van ńg-chhiên liuk-pak ńg-sṳ̍p ngìn; Yù-thai kî-chhu̍k — chhit-van si-chhiên liuk-pak ngìn; Yî-sat-kâ kî-chhu̍k — ńg-van si-chhiên si-pak ngìn; Sî-pu-lùn kî-chhu̍k — ńg-van chhit-chhiên si-pak ngìn; Yok-sit ke chṳ́-sûn lióng-ke kî-chhu̍k: Yî-fap-lièn kî-chhu̍k — si-van làng ńg-pak ngìn; Mâ-nâ-sî kî-chhu̍k — sâm-van lióng-chhiên lióng-pak ngìn; Phien-ngâ-mén kî-chhu̍k — sâm-van ńg-chhiên si-pak ngìn; Tan kî-chhu̍k — liuk-van lióng-chhiên chhit-pak ngìn; Â-sat kî-chhu̍k — si-van yit-chhiên ńg-pak ngìn; Nâ-fut-thâ-li kî-chhu̍k — ńg-van sâm-chhiên si-pak ngìn.
[44] Yî-song ke nàm-ngìn chhiòn-phu he Mô-sî lâu Â-lùn pin thoi-péu Yî-set-lie̍t sṳ̍p-ngi kî-chhu̍k ke chhu̍k-chóng tên-ki hâ-lòi ke.
[45] Yî-set-lie̍t chhiòn fi-chung ngi-sṳ̍p se yî-song voi siông-chhṳ̀ ke nàm-ngìn, chhiòn-phu he cheu kâ-chhu̍k tên-ki hâ-lòi son ngìn-su ke.
[46] Chúng-khiung ngìn-su chhiu-he liuk-sṳ̍p van sâm-chhiên ńg-pak ńg-sṳ̍p ngìn.
[47] Li-vi-ngìn mò lâu khì-thâ kî-chhu̍k khiung-ha tên-ki,
[48] yîn-vi Song-chú sṳt tui Mô-sî kóng:
[49] “Ngì thiàu-chhà voi siông-chhṳ̀ ke ngìn-su ke sṳ̀, m̀-hó pâu-hàm Li-vi kî-chhu̍k.
[50] Ngì oi phai Li-vi-ngìn kón-lî yok-khui ke sṳn-chong-phùng lâu khì-chûng ke yung-phín; kì-têu oi pân yun liá-têu tûng-sî, chhai sṳn-chong-phùng tî-poi sṳ-fung. Kì-têu ke chong-phùng oi tap chhai sṳn-chong-phùng ke si chû-vì.
[51] Ngì-têu tak-pái sái-yàng ke sṳ̀, Li-vi-ngìn oi chhak-hâ sṳn-chong-phùng, chhai sîn ke yàng-thi chhùng-sîn tap hí-lòi. Só-yû khì-thâ ke ngìn na-he chiap-khiun sṳn-chong-phùng, yit-thin oi chhú sí-hìn.
[52] “Khì-thâ ke Yî-set-lie̍t-ngìn oi ôn-yàng, tak-sà chhai kì só-su̍k ke thai-khì hâ, cheu kiûn-chhui lòi ôn-phài.
[53] Chúng-he Li-vi-ngìn oi chhai yok-khui ke sṳn-chong-phùng ke si chû-vì ôn-yàng sú-ví, miên-tet yû-ngìn hàng-khiûn sṳn-chong-phùng, ngiâ Ngài chit-fa̍t Yî-set-lie̍t fi-chung.”
[54] Só-yû Song-chú min-lin Mô-sî ke fa, Yî-set-lie̍t-ngìn chhiu cheu án-ngiòng hi-cho.