[1] Yî-set-lie̍t-ngìn chai hiong-chhièn hàng, chhai Yok-tan-hò tûng-ngan ke Mô-ap phìn-ngièn, Yâ-li-kô ke tui-mien ôn-yàng.
[2] Sî-pat ke lai-é Mô-ap-vòng Pâ-le̍t khon-tó Yî-set-lie̍t-ngìn ngióng-pân tui-thai Â-mô-li-ngìn,
[3] yu tî kì-têu ngìn tô, kì lâu kì ke ngìn-mìn chhiu chhiòn-phu chhin kiâng Yî-set-lie̍t-ngìn.
[4] Só-yî Mô-ap-ngìn tui Mí-thien-ngìn ke liâng-chhiu kóng: “Liá-khiùn ngìn mò kí-kiú chhiu voi chiông ngài-têu chû-vì ke tûng-sî chhiòn-phu fí-me̍t thet, chhiong ngiù-è sṳ̍t-thet chhó-chhòng ke chhó khiung-yong.” Mô-ap-vòng Pâ-le̍t
[5] phai sṳ́-chá hi ham Pí-ngí ke lai-é Pâ-làn lòi; Pâ-làn he̍t chhai kì ke ku-hiông, Yu-fat-lâ-tí-hò fu-khiun ke Pí-tho̍t. Sṳ́-chá chiông Pâ-le̍t ke yi-sṳ lâu kì kóng: “Yû yit-chhu̍k ngìn tui Âi-khi̍p chhut-lòi, châ-mân thi-mien, he̍t chhai ngài ke sùn-thèu.
[6] Kì-têu ke ngìn-su pí ngài ke ngìn-mìn kha-tô, só-yî chhiáng ngì lòi, vi ngài chu-chú kì-têu. Án-ngiòng ngài chang yû khó-nèn tá-yàng kì-têu, chiông kì-têu kiuk-chhut ngài ke thú-thi. Ngài tî, ngì só chuk-fuk ke, chhiu voi tet-fuk; ngì só chu-chú ke, chhiu voi su chu-chú.”
[7] Só-yî, Mô-ap-ngìn lâu Mí-thien-ngìn ke liâng-chhiu tai-tén puk-koa ke lî-kîm to Pâ-làn ke-vi hi, chiông Pâ-le̍t ke yi-sṳ lâu kì kóng.
[8] Pâ-làn tui kì-têu kóng: “Ngì-têu chhai liá-vi ko-ya, thiên-kông-ngit ngài voi lâu ngì-têu kóng Song-chú tui ngài kóng má-ke.” Mô-ap ke-têu liâng-chhiu chhiu liù chhai Pâ-làn ke-vi ko-ya.
[9] Song-ti lìm-to Pâ-làn ke-vi, mun kì: “Lâu ngì khiung-ha ke liá-têu ngìn he má-ngìn?”
[10] Pâ-làn en Song-ti kóng: “Mô-ap-vòng Pâ-le̍t phai kì-têu lòi lâu ngài kóng:
[11] ‘Tui Âi-khi̍p chhut-lòi ke yit chhu̍k-ngìn, châ-mân thi-mien. Ngì oi lòi vi ngài chu-chú kì-têu, pûn ngài tá-yàng kì-têu, chiông kì-têu kiuk-chéu.’ ”
[12] Song-ti tui Pâ-làn kóng: “M̀-hó lâu liá-têu ngìn hi, ya cho-m̀-tet chu-chú Yî-set-lie̍t-ngìn, yîn-vi Ngài su-fuk pûn kì-têu.”
[13] Thi-ngi chêu-sṳ̀n, Pâ-làn hi kien Pâ-le̍t ke sṳ́-chá, kóng: “Ngì-têu chón-hi, Song-chú m̀ chún Ngài lâu ngì-têu hi.”
[14] Kì-têu chhiu chón-hi kien Pâ-le̍t, po-ko kì kóng: “Pâ-làn m̀-hén thèn ngài-têu khiung-ha lòi!”
[15] Só-yî Pâ-le̍t nang-ngoi phai pí song-pái kha-tô yu kha chhung-yeu ke sṳ́-chá hi.
[16] Kì-têu hi kien Pâ-làn, chiông Pâ-le̍t ke yi-sṳ lâu kì kóng: “Chhiáng m̀-hó su-tó má-ke chú-tóng m̀-hén lòi!
[17] Ngài voi thai-thai po-tap ngì, ngì mò-lun yêu-khiù má-ke, ngài yit-thin voi cheu án-ngiòng cho. Chhiáng ngì lòi vi ngài chu-chú liá-têu ngìn.”
[18] Chúng-he Pâ-làn en kì-têu kóng: “Chhiu-son Pâ-le̍t chiông kì vòng-kiûng tî-poi ke kîm-ngiùn chhiòn-phu pûn ngài, mò-lun thai-se sṳ, ngài chhiòn-phu m̀-kám vì-poi Song-chú — ngài Song-ti ke min-lin.
[19] Chúng-he chhiáng ngì-têu chhai liá-vi ko-ya, chhiong yî-chhièn ke-têu ngìn án-ngiòng, ngài oi tî Song-chú he m̀-he hàn-yû phe̍t ke fa oi lâu ngài kóng.”
[20] Ke am-pû, Song-ti lìm-to Pâ-làn ke-vi, tui kì kóng: “Na-he liá-têu ngìn he lòi khiù ngì thèn kì-têu hi, ngì chhiu chún-phi thèn kì-têu hi, chúng-he oi cheu Ngài ke fa hi-cho.”
[21] Thi-ngi chêu-sṳ̀n, Pâ-làn chiông mâ-ôn koa-hó chhai lì-è poi-táng, thèn Mô-ap ke-têu liâng-chhiu khiung-ha hi.
[22] Song-ti mò fôn-hí Pâ-làn thèn kì-têu hi. Pâ-làn khì lì-è, lióng-ke phu̍k-ngìn thèn kì hàng, chhai lu-song, Song-chú ke thiên-sṳ́ khî chhai lu tûng-ông tóng-tén.
[23] Lì-è khon-tó Song-chú ke thiên-sṳ́ nâ-tén kiam khî chhai ke-vi, chhiu lì-khôi lu, sám-to thièn-tú hi. Pâ-làn tá lì-è, oi kì chón-to lu-song.
[24] Heu-lòi Song-chú ke thiên-sṳ́ khî chhai lióng-ke phù-thò-yèn chûng-kiên ke ha̍p-lu song, lióng-phién chhiòn-phu he sa̍k-chhiòng.
[25] Lì-è khon-tó Song-chú ke thiên-sṳ́, chhiu pen-tó chhiòng, chiông Pâ-làn ke kiok kho-sông; Pâ-làn yu tá lì-è.
[26] Song-chú ke thiên-sṳ́ yu hi to thèu-chhièn, khî chhai yit-ke tông-ha̍p ke thi-fông, mò-phung hó thûng-ko.
[27] Liá-pái, lì-è khon-tó Song-chú ke thiên-sṳ́, chhiu phu̍k hâ-lòi. Pâ-làn fat-khién, yung koái-kun-é tá lì-è.
[28] Ke-sṳ̀, Song-chú sṳ́ lì-è kóng-fa, kì tui Pâ-làn kóng: “Ngài tui ngì cho má-ke sṳ, ngì liá sâm-pái tá ngài nè?”
[29] Pâ-làn tui lì-è kóng: “Yîn-vi ngì met-sa ngài! Na-he ngài sú-chûng yû tô, chhiu voi chiông ngì chhṳ̀-thet!”
[30] Lì-è tui Pâ-làn kóng: “Ngài m̀-he ngì chhiùng-se só-khì ke lì-è mâ? Ngài yî-chhièn sṳt án-ngiòng tui-thai ngì mâ?” Pâ-làn kóng: “M̀-sṳt!”
[31] Chiap-tén, Song-chú sṳ́ Pâ-làn khon-tó Kì ke thiên-sṳ́ nâ-tén kiam khî chhai ke-vi, Pâ-làn chhiu phu̍k chhai thi-song.
[32] Song-chú ke thiên-sṳ́ tui kì kóng: “Ngì cho-má-ke liá sâm-pái tá lì-è nè? Ngài lòi chú-tóng ngì ke lu, yîn-vi ngì m̀ yin-kôi hi.
[33] Ngì ke lì-è khon-tó Ngài, sâm-pái sám-khôi; na-he kì mò sám-khôi, Ngài chó chhiu chiông ngì chhṳ̀-thet, liù lì-è ke miang.”
[34] Pâ-làn tui Song-chú ke thiên-sṳ́ kóng: “Ngài yû-chhui lé; ngài m̀-tî Ngì khî chhai lu tûng-ông tóng ngài. Na-he Ngì ngin-vì ngài m̀ yin-kôi hi, ngài chhiu to-chón hi.”
[35] Song-chú ke thiên-sṳ́ tui Pâ-làn kóng: “Thèn liá-têu ngìn hi â! Chúng-he ngì yit-thin oi cheu Ngài ham ngì kóng ke fa hi-kóng.” Pâ-làn chhiu thèn Pâ-le̍t ke sṳ́-chá hi.
[36] Pâ-le̍t thâng-kóng Pâ-làn lòi lé, chhiu to Â-ngí-sàng hi ngiàng-chiap kì; liá-sàng chhai Mô-ap piên-kie Â-nun sân-lak ke sùn-thèu.
[37] Pâ-le̍t tui Pâ-làn kóng: “Ngài thi-yit pái án chit-khi̍t phai-ngìn hi chhiáng ngì ke sṳ̀, ngì ngióng-pân m̀-hén lòi nè? Ngì láu-tó ngài m̀-voi thai-thai po-tap ngì he-mò?”
[38] Pâ-làn kóng: “Ngài m̀-he yí-kîn lòi lé? Liá-ha, ngài cho-tet kóng má-ke nè? Ngài chṳ́-yû cho-tet kóng Song-ti oi ngài kóng ke fa.”
[39] Pâ-làn thèn Pâ-le̍t to Fù-só-sàng.
[40] Pâ-le̍t chhai ke-vi chhṳ̀ ngiù-yòng, chiông ngiuk sung-pûn Pâ-làn lâu thèn kì khiung-ha lòi ke-têu liâng-chhiu.
[41] Thi-ngi chêu-sṳ̀n, Pâ-le̍t tai Pâ-làn sông-to Pâ-mo̍k-Pâ-li̍t hi; tui ke-vi Pâ-làn khon-tó phu-fun ke Yî-set-lie̍t-ngìn.