[1] Pot-vûn thìn-thet yî-heu, Song-chú tui Mô-sî lâu chi-sṳ̂ Â-lùn ke lai-é Yî-li-â-sat kóng:
[2] “Ngì-têu oi thiàu-chhà Yî-set-lie̍t chhiòn fi-chung ke ngìn-khiéu, oi yit kâ-chhu̍k yit kâ-chhu̍k thiàu-chhà, chiông ngi-sṳ̍p se yî-song, voi siông-chhṳ̀ ke nàm-ngìn tên-ki hâ-lòi son ngìn-su.”
[3] Mô-sî lâu chi-sṳ̂ Yî-li-â-sat chhiu seu-si̍p só-yû ngi-sṳ̍p se yî-song ke nàm-ngìn. Kì-têu chhi-si̍p chhai Yâ-li-kô tui-ngan Yok-tan hò-pa sùn ke Mô-ap phìn-ngièn. Tui Âi-khi̍p chhut-lòi ke Yî-set-lie̍t-ngìn yû liá-têu:
[5] Lî-phien kî-chhu̍k (Lî-phien he Yî-set-lie̍t ke chóng-chṳ́): pâu-hàm Ha̍p-nok, Fap-lu,
[6] Hî-sṳ̂-lùn, Kâ-mí tén chûng-chhu̍k;
[7] tên-ki ke ngìn-su yit-khiung yû si-van sâm-chhiên chhit-pak sâm-sṳ̍p ngìn.
[8] Fap-lu ke heu-thoi yû Yî-li-ap,
[9] lâu Yî-li-ap ke lai-é Nì-mû-li, Thai-thân, Â-pí-làn. (Thai-thân lâu Â-pí-làn he fi-chung sién chhut-lòi ke; kì-têu fán-khong Mô-sî lâu Â-lùn, kâ-ngi̍p Khó-lâ yit-tóng, phoi-ngia̍k Song-chú.
[10] Thi lie̍t-khôi thûn-thet kì-têu. Tông fó sêu-me̍t lióng-pak ńg-sṳ̍p ngìn ke sṳ̀, kì-têu lâu Khó-lâ khiung-tóng ke ngìn khiung-ha sí-thet, sàng-cho mìn-chung ke kín-kie.
[11] Chúng-he Khó-lâ ke-têu lai-é mò sí.)
[12] Sî-mién kî-chhu̍k: pâu-hàm Nì-mû-li, Ngâ-mén, Ngâ-kîn,
[13] Chhia-lâ, Seu-lò tén chûng-chhu̍k;
[14] tên-ki ke ngìn-su yit-khiung yû lióng-van lióng-chhiên lióng-pak ngìn.
[15] Kâ-tet kî-chhu̍k: pâu-hàm Sé-fûn, Ha̍p-kî, Sû-nì,
[16] Â-sṳ̂-nì, Yî-li,
[17] Â-li̍t, Â-lie̍t-li tén chûng-chhu̍k;
[18] tên-ki ke ngìn-su yit-khiung yû si-van làng ńg-pak ngìn.
[19] Yù-thai kî-chhu̍k: pâu-hàm Sṳ-lâ, Fap-le̍t-sṳ̂, Chhia-lâ, Hî-sṳ̂-lùn, Ha̍p-mû-le̍t tén chûng-chhu̍k. (Yù-thai ke lióng-ke lai-é Ngí lâu Ngò-nàm yí-kîn sí chhai Kâ-nàm-thi.)
[22] Liá-têu chûng-chhu̍k tên-ki ke ngìn-su yit-khiung yû chhit-van liuk-chhiên ńg-pak ngìn.
[23] Yî-sat-kâ kî-chhu̍k: pâu-hàm Thò-lâ, Phú-ngá,
[24] Ngâ-sut, Sṳ̂n-lùn tén chûng-chhu̍k;
[25] tên-ki ke ngìn-su yit-khiung yû liuk-van si-chhiên sâm-pak ngìn.
[26] Sî-pu-lùn kî-chhu̍k: pâu-hàm Sî-lie̍t, Yî-lùn, Ngâ-li tén chûng-chhu̍k;
[27] tên-ki ke ngìn-su yit-khiung yû liuk-van làng ńg-pak ngìn.
[28] Yok-sit yû lióng-ke lai-é — Mâ-nâ-sî lâu Yî-fap-lièn — só-yî fûn-cho lióng-chak kî-chhu̍k.
[29] Mâ-nâ-sî kî-chhu̍k: Mâ-nâ-sî kiung Mâ-kit, Mâ-kit kiung Kî-lie̍t.
[30] Kî-lie̍t he Yî-yî-chhia, Hî-le̍t,
[31] Â-sṳ̂-lie̍t, Sṳ-kiam,
[32] Sṳ-mí-thai, Hî-fut kok chûng-chhu̍k ke chú-siên.
[33] Hî-fut ke lai-é Sî-lò-fî-ha̍p mò lai-é, chṳ́-yû moi-é; kì-têu ke miàng ôn-to Mâ-lâ, Nò-â, Hot-lâ, Me̍t-kâ lâu Tet-sat.
[34] Liá-têu chûng-chhu̍k tên-ki ke ngìn-su yit-khiung yû ńg-van lióng-chhiên chhit-pak ngìn.
[35] Yî-fap-lièn kî-chhu̍k: pâu-hàm Sû-thì-lâ, Pí-kiet, Thâ-hón tén chûng-chhu̍k,
[36] hàn-yû Sû-thì-lâ ke heu-thoi Yî-làn chûng-chhu̍k.
[37] Liá-têu chûng-chhu̍k tên-ki ke ngìn-su yit-khiung yû sâm-van lióng-chhiên ńg-pak ngìn. Yî-song liá-têu chûng-chhu̍k he Yok-sit ke heu-thoi.
[38] Phien-ngâ-mén kî-chhu̍k: pâu-hàm Pí-lâ, Â-sṳ̍t-phe̍t, Â-hî-làn,
[39] Sû-fán, Fu-fán tén chûng-chhu̍k,
[40] hàn-yû Pí-lâ ke heu-thoi Â-le̍t lâu Nâi-man lióng chûng-chhu̍k.
[41] Liá-têu chûng-chhu̍k tên-ki ke ngìn-su yit-khiung yû si-van ńg-chhiên liuk-pak ngìn.
[42] Tan kî-chhu̍k: yû Sû-hàm chûng-chhu̍k;
[43] tên-ki ke ngìn-su yit-khiung yû liuk-van si-chhiên si-pak ngìn.
[44] Â-sat kî-chhu̍k: pâu-hàm Yîm-nâ, Yit-sṳ̂-ví, Pí-li-â tén chûng-chhu̍k;
[45] hàn-yû Pí-li-â ke heu-thoi Hî-phe̍t lâu Mâ-kiet lióng chûng-chhu̍k.
[46] Â-sat yû yit-ke moi-é ôn-to Sî-lâ.
[47] Liá-têu chûng-chhu̍k tên-ki ke ngìn-su yit-khiung yû ńg-van sâm-chhiên si-pak ngìn.
[48] Nâ-fut-thâ-li kî-chhu̍k: pâu-hàm Ngâ-siet, Kû-nì,
[49] Yâ-set, Sṳ-lâng tén chûng-chhu̍k;
[50] tên-ki ke ngìn-su yit-khiung yû si-van ńg-chhiên si-pak ngìn.
[51] Yî-set-lie̍t-ngìn tên-ki ke ngìn-su chúng-khiung yû liuk-sṳ̍p van yit-chhiên chhit-pak sâm-sṳ̍p ngìn.
[52] Song-chú tui Mô-sî kóng:
[53] “Ngì oi cheu kok kî-chhu̍k ke ngìn-su fûn-phi thú-thi,
[54] yung chhû-chhiâm ke fông-sṳt chiông fat ke thú-thi pûn ngìn-su tô ke kî-chhu̍k, ha̍p ke thú-thi pûn ngìn-su séu ke kî-chhu̍k. Oi cheu chú-siên kok kî-chhu̍k ke miàng fûn-phi thú-thi.”
[57] Li-vi kî-chhu̍k yû Kiet-sun, Kô-hot, Mí-lâ-li sâm chûng-chhu̍k.
[58] Kì-têu ke heu-thoi yû Li̍p-nì, Hî-pak-lùn, Mâ-li, Mû-sṳ, Khó-lâ tén chûng-chhu̍k. Kô-hot kiung Am-làn.
[59] Am-làn thó chhut-se chhai Âi-khi̍p ke Li-vi ke moi-é Yok-kî-phe̍t. Kì lâu Am-làn kiung lióng-ke lai-é — Â-lùn lâu Mô-sî, pin kì-têu ke â-chí Mî-li-ôn.
[60] Â-lùn yû si-ke lai-é — Nâ-tap, Â-pí-fu, Yî-li-â-sat, Yî-thâ-mâ.
[61] Nâ-tap lâu Â-pí-fu chhai hien mò ha̍p-fap ke fó pûn Song-chú ke sṳ̀ sí-thet.
[62] Chhut-se yit-chak ngie̍t yî-song ke nàm-ngìn, Li-vi kî-chhu̍k yit-khiung yû lióng-van sâm-chhiên ngìn. Kì-têu lâu khì-thâ ke Yî-set-lie̍t-ngìn fûn-khôi tên-ki, yîn-vi kì-têu chhai Yî-set-lie̍t chûng mò fûn-tó sán-ngia̍p.
[63] Yî-set-lie̍t-ngìn chhai Yâ-li-kô tui-ngan Yok-tan hò-sùn ke Mô-ap phìn-ngièn ke sṳ̀, Mô-sî lâu chi-sṳ̂ Yî-li-â-sat vàn-sṳ̀n ngìn-khiéu thiàu-chhà. Yî-song kok chûng-chhu̍k ke ngìn-khiéu chhiu-he kì-têu só tên-ki ke,
[64] tî-poi mò yit-ke he yî-chhièn Mô-sî lâu chi-sṳ̂ Â-lùn chhai Sî-nai khóng-yâ thi-yit pái ngìn-khiéu thiàu-chhà ke sṳ̀ só tên-ki ke Yî-set-lie̍t-ngìn.
[65] Song-chú sṳt kóng-ko, kì-têu chhiòn-phu voi sí chhai khóng-yâ; chhù-liáu Yâ-fù-nì ke lai-é Kâ-le̍t lâu Nun ke lai-é Yok-sû-â yî-ngoi, khì-thâ ke yit-ke tû mò-chhûn.