[1] Song-chú min-lin Mô-sî,
[2] oi chṳ́-sṳ Yî-set-lie̍t-ngìn chhai kûi-thin ke sṳ̀-kiên hiong Song-ti hien sṳ̍t-vu̍t, chhiu-he Kì fôn-hí ke chhîn-hiông fó-chi.
[3] Yî-ha he yit-thin oi hien-pûn Song-chú ke fó-chi: Tak-ngit ke sêu-fa-chi oi hien lióng-chak yit-se thai, mò khiet-tiám ke se-yòng-kú,
[4] chêu-sṳ̀n hien yit-chak, lìm-am-é hien yit-chak,
[5] tak-chak lâu yit kûng-kîn yu-mien-fún kiâu yit kûng-sṳ̂n sùn kám-lám-yù ke su-chi khiung-ha hien.
[6] Liá-chúng phìn-sòng oi-hien ke sêu-fa-chi thi-yit pái he chhai Sî-nai-sân hien ke. Só-hien ke he Song-chú só fôn-hí ke chhîn-hiông fó-chi.
[7] Ngì oi lâu thi-yit chak yòng khiung-ha hien chi-chiú pûn Song-chú, chhiu-he oi chiông yit kûng-sṳ̂n chiú hia chhai chi-thàn táng.
[8] Lìm-am-é hien thi-ngi chak yòng, ya lâu chêu-sṳ̀n hien ke fông-fap khiung-yong, oi lâu su-chi pin chi-chiú khiung-ha hien, cho chhîn-hiông ke fó-chi, sṳ́ Song-chú fôn-hí.
[9] Chhai ôn-sit-ngit, oi hien lióng-chak yit-se thai, mò khiet-tiám ke se-yòng-kú, lióng kûng-kîn yu-mien-fún kiâu kám-lám-yù ke su-chi, lâu chi-chiú.
[10] Chhù-liáu phìn-sòng oi hien ke sêu-fa-chi lâu chi-chiú yî-ngoi, tak-pái ôn-sit-ngit hàn oi hien ôn-sit-ngit ke sêu-fa-chi.
[11] Tak-chak ngie̍t ke chhû-yit oi hien sêu-fa-chi pûn Song-chú: Lióng-chak se ngiù-kú, yit-chak mièn-yòng-kú, chhit-chak yit-se thai ke se-yòng-kú, chhiòn-phu oi mò khiet-tiám ke.
[12] Oi yung su-chi lâu sêu-fa-chi khiung-ha hien: Tak-chak ngiù-kú oi phi sâm kûng-kîn kiâu kám-lám-yù ke yu-mien-fún; ke-chak mièn-yòng-kú phi lióng kûng-kîn kiâu kám-lám-yù ke yu-mien-fún;
[13] tak-chak se-yòng-kú phi yit kûng-kîn kiâu kám-lám-yù ke yu-mien-fún. Oi hien liá chhîn-hiông ke sêu-fa-chi, sṳ́ Song-chú fôn-hí.
[14] Ya oi yung chi-chiú lâu sêu-fa-chi khiung-ha hien: Tak-chak ngiù-kú phi lióng kûng-sṳ̂n chiú; ke-chak mièn-yòng-kú phi yit kûng-sṳ̂n pan chiú; tak-chak se-yòng-kú phi yit kûng-sṳ̂n chiú. Liá he tak-chak ngie̍t chhû-yit hien sêu-fa-chi ke thiàu-li, yit-ngièn sṳ̍p-ngi chak ngie̍t chhiòn-phu án-ngiòng.
[15] Chhù-liáu phìn-sòng oi hien ke sêu-fa-chi lâu chi-chiú yî-ngoi, hàn-oi hien yit-chak sân-yòng-kú cho su̍k-chhui-chi pûn Song-chú.
[16] Châng-ngie̍t sṳ̍p-si oi kí-hàng ki-ngiam Song-chú ke Phàn-ko-chiet.
[17] Tui sṳ̍p-ńg khôi-sṳ́, lièn-tén chhit-ngit oi yû kin-pai ke sṳn-fi; liá chhit-ngit tông-chûng, tân-chhiang cho-tet sṳ̍t vù-kau-piáng.
[18] Ngì-têu chhai sṳn-fi ke thi-yit ngit oi chhi-si̍p kin-pai, ngit-sòng yit-chhiet ke kûng-chok tû m̀-hó cho.
[19] Oi hien sêu-fa-chi cho chhîn-hiông ke fó-chi, sṳ́ Song-chú fôn-hí. Oi hien lióng-chak se ngiù-kú, yit-chak mièn-yòng-kú, chhit-chak yit-se thai ke se-yòng-kú, chhiòn-phu oi mò khiet-tiám ke.
[20] Ya oi hien yu-mien-fún kiâu kám-lám-yù ke su-chi: Tak-chak ngiù-kú phi sâm kûng-kîn yu-mien-fún; ke-chak mièn-yòng-kú phi lióng kûng-kîn yu-mien-fún;
[21] tak-chak se-yòng-kú phi yit kûng-kîn yu-mien-fún.
[22] Yu oi hien yit-chak sân-yòng-kú cho su̍k-chhui-chi, vi ngìn-mìn hàng kiet-chhiang-lî.
[23] Chhù-liáu chêu-sṳ̀n phìn-sòng oi hien ke sêu-fa-chi yî-ngoi, hàn-oi hien liá-têu chi.
[24] Khiung-yong, chhù-liáu phìn-sòng oi hien ke sêu-fa-chi lâu chi-chiú yî-ngoi, lièn-tén chhit-ngit, tak-ngit oi hien Song-chú só fôn-hí ke chhîn-hiông fó-chi.
[25] Thi-chhit ngit oi chhi-si̍p kin-pai, ngit-sòng yit-chhiet ke kûng-chok tû m̀-hó cho.
[26] Ngì-têu oi chhai Chhit-chhit Sû-kot-chiet ke thi-yit ngit, chiông sîn sû-sṳ̀n ke ńg-kuk cho su-chi hien-pûn Song-chú; ngì-têu oi chhi-si̍p kin-pai, ngit-sòng yit-chhiet ke kûng-chok tû m̀-hó cho.
[27] Ngì-têu oi hien chhîn-hiông ke sêu-fa-chi, sṳ́ Song-chú fôn-hí. Oi hien lióng-chak se ngiù-kú, yit-chak mièn-yòng-kú, chhit-chak yit-se thai ke se-yòng-kú, chhiòn-phu oi mò khiet-tiám ke.
[28] Ya oi hien yu-mien-fún kiâu kám-lám-yù ke su-chi: Tak-chak ngiù-kú oi phi sâm kûng-kîn yu-mien-fún; ke-chak mièn-yòng-kú phi lióng kûng-kîn yu-mien-fún;
[29] tak-chak se-yòng-kú phi yit kûng-kîn yu-mien-fún.
[30] Yu oi hien yit-chak sân-yòng-kú cho su̍k-chhui-chi, vi ngìn-mìn hàng kiet-chhiang-lî.
[31] Chhù-liáu liá-têu chi lâu chi-chiú yî-ngoi, phìn-sòng oi hien ke sêu-fa-chi lâu su-chi cheu-sòng oi hien; thèu-sâng chhiòn-phu oi mò khiet-tiám ke.