[1] Song-chú min-lin Mô-sî
[2] oi chiông yî-ha ke chṳ́-sṳ lâu Yî-set-lie̍t-ngìn kóng. Mò-lun nàm-ńg, na-he hí-ngien oi-cho lì-siu̍k-ngìn, chiông chhṳ-kâ hien-pûn Song-chú,
[3] chhiu oi kim-chṳ́ lîm thâm-chiú ya-he ngiàm-chiú. Kì ya cho-m̀-tet lîm phù-thò cho ke yím-liau, cho-m̀-tet sṳ̍t phù-thò ya-he phù-thò-kôn.
[4] Cho lì-siu̍k-ngìn ke khì-kiên, cho-m̀-tet sṳ̍t phù-thò-su só-kiet ke tûng-sî, lièn phù-thò chṳ́, phù-thò phì ya cho-m̀-tet sṳ̍t.
[5] Chhai kì hí-ngien cho lì-siu̍k-ngìn ke khì-kiên, kì cho-m̀-tet thi-thèu. Kì hien-pûn Song-chú, fûn-phe̍t vì-sṳn ke khì-kiên, thèu-nà-mô yù-chhai kì chhòng.
[6] Kì ke thèu-nà-mô he fung-hien chhṳ-kâ pûn Song-ti ke ki-ho. Kì cho-m̀-tet hàng-khiûn sṳ̂-thí, sṳ́ chhṳ-kâ mò chhiang-li, chhiu-son he kì ke â-pâ, â-mê, hiûng-thi, ya-he chí-moi, kì ya cho-m̀-tet hàng-chhièn.
[8] Chhai kì cho lì-siu̍k-ngìn khì-kiên, kì he fûn-phe̍t vì-sṳn kûi-pûn Song-chú ke.
[9] Na-he lì-siu̍k-ngìn sṳ̂n-piên ke ngìn fut-yèn sí-thet, tá-lá-sap kì fûn-phe̍t vì-sṳn ke thèu-nà-mô, kì oi tén chhit-ngit, yèn-heu thi-thèu. Án-ngiòng, kì chhai lî-ngì song chhiu chhiang-li lé.
[10] Thi-pat ngit, kì oi tai lióng-chak ngie̍t-kap-è ya-he lióng-chak pân-kiêu, to sṳn-chong-phùng mùn-héu, kâu-pûn chi-sṳ̂.
[11] Chi-sṳ̂ oi-hien yit-chak cho su̍k-chhui-chi, yit-chak cho sêu-fa-chi, vi kì hàng su̍k-chhui-lî, yîn-vi kì pen-tó sṳ̂-thí. Ke-ngit, kì oi chhùng-sîn chiông thèu-nà-mô fûn-phe̍t vì-sṳn,
[12] chai yit-pái chiông chhṳ-kâ hien-pûn Song-chú, cho lì-siu̍k-ngìn; yî-chhièn ke-chham ngit-è chhiu mò-son, yîn-vi kì ke fûn-phe̍t vì-sṳn ke thèu-nà-mô pien-cho mò chhiang-li. Kì oi khiên yit-chak yit-se thai ke se-yòng-kú cho su̍k-ko-sṳt-chi.
[13] To lì-siu̍k-ngìn hí-ngien ke ngit-khì mân, oi hàng yî-ha ke lî-ngì. Kì oi to sṳn-chong-phùng mùn-héu,
[14] chiông mò khiet-tiám ke thèu-sâng hien-pûn Song-chú: yit-chak yit-se thai ke se-yòng-kú cho sêu-fa-chi, yit-chak yit-se thai ke yòng-chhṳ-é cho su̍k-chhui-chi, yit-chak mièn-yòng-kú cho phìn-ôn-chi.
[15] Kì ya oi hien yit-làm vù-kau-piáng: yû yu-mien-fún kiâu kám-lám-yù cho ke phûn-piáng lâu táng-kô kò kám-lám-yù ke pho̍k-piáng, yu oi-hien su-chi lâu chi-chiú.
[16] Chi-sṳ̂ oi chiông liá-têu tûng-sî fung-hien pûn Song-chú, vi ke-ngìn hien su̍k-chhui-chi lâu sêu-fa-chi.
[17] Kì oi chiông ke-chak mièn-yòng-kú cho phìn-ôn-chi hien-pûn Song-chú, thùng-sṳ̀ hien ke-làm vù-kau-piáng, ya oi hien su-chi lâu chi-chiú.
[18] Lì-siu̍k-ngìn oi chhai sṳn-chong-phùng mùn-héu thi thèu-nà-mô, chiông thèu-nà-mô piong chhai hien phìn-ôn-chi ke fó táng-kô sêu-thet.
[19] Yèn-heu, chi-sṳ̂ oi chiông chú-hó ke mièn-yòng-kú ke yit-kî chhièn-thúi lâu làm-è tú ke yit-te vù-kau phûn-piáng, yit-te vù-kau pho̍k-piáng piong chhai lì-siu̍k-ngìn ke sú-chûng.
[20] Chiap-tén, chi-sṳ̂ oi chiông liá-têu yèu kí-ha cho yèu-chi hien-pûn Song-chú; liá-têu he kûi-pûn chi-sṳ̂ ke sṳn-vu̍t. Fap-li̍t só kûi-thin ke hiûng-phù-ngiuk lâu heu-thúi ya he kûi-pûn chi-sṳ̂ ke. Liá yî-heu, lì-siu̍k-ngìn chhiu cho-tet lîm chiú.
[21] Yî-song he lì-siu̍k-ngìn yin-kôi chûn-sú ke thiàu-li. Na-he lì-siu̍k-ngìn chhai só-hí ke ngien yî-ngoi kóng-ko oi hien phe̍t ke chi pûn Song-chú, chhiu yit-thin oi cheu só kóng-ko ke hi-cho.
[22] Song-chú min-lin Mô-sî,
[23] oi fûn-fu Â-lùn lâu kì ke-têu lai-é yung yî-ha ke fa chuk-fuk Yî-set-lie̍t-ngìn:
[24] Ngien Song-chú su-fuk pûn ngì, pó-fu ngì;
[25] ngien Song-chú yung chhṳ̀-oi khoán-thai ngì, sṳ̂-ên pûn ngì;
[26] ngien Song-chú khon-ku ngì, sóng-su ngì phìn-ôn.
[27] Song-chú kóng: “Na-he kì-têu fung Ngài ke miàng chuk-fuk Yî-set-lie̍t-ngìn, Ngài chhiu su-fuk pûn kì-têu.”