[1] Yî-set-lie̍t chhiòn fi-chung theu-ya chhin-chhàu, khôi-sâng thai-kieu.
[2] Kì-têu mài-yen Mô-sî lâu Â-lùn kóng: “Ngài-têu sí chhai Âi-khi̍p ya-he sí chhai liá khóng-yâ hàn-kha yàng!
[3] Song-chú cho-má-ke oi thu ngài-têu to ke thi-fông hi? Ngài-têu yit-thin voi pûn-ngìn chhṳ̀-sí, ngài-têu ke pû-ngiòng chṳ́-ńg yit-thin voi pûn-ngìn chok-chéu. Ngài-têu to-chón Âi-khi̍p hi kám m̀-he kha-hó?”
[4] Kì-têu pí-chhṳ́ kóng: “Ngài-têu lòi-sién yit-ke liâng-chhiu tai ngài-têu chón-hi Âi-khi̍p!”
[5] Mô-sî lâu Â-lùn chhiu phu̍k chhai Yî-set-lie̍t chhiòn fi-chung mien-chhièn;
[6] Nun ke lai-é Yok-sû-â lâu Yâ-fù-nì ke lai-é Kâ-le̍t liá lióng-ke tham-é pî-sông to chhá-lan sâm-fu,
[7] tui ngìn-mìn kóng: “Ngài-têu só tá-tham ke ke-te thú-thi he fî-sòng phì ke thú-thi.
[8] Na-he Song-chú fôn-hí ngài-têu, Kì voi thu ngài-têu to ke-vi, chiông ke-te liù-nen-lâu-me̍t, chhin-phì ke thú-thi su-pûn ngài-têu.
[9] Ngì-têu m̀-hó phoi-ngia̍k Song-chú, ya m̀-sṳ́ kiâng ke thi-fông ke ngìn-mìn. Ngài-têu voi chhin yùng-yi chṳ̂n-fu̍k kì-têu. Song-chú lâu ngài-têu thùng-chhai; Kì yí-kîn tá-yàng ke-têu pó-fu kì-têu ke sṳ̀n-mìn, só-yî ngì-têu m̀-sṳ́ kiâng!”
[10] Chúng-he chhiòn fi-chung vî-hia̍p kì-têu, oi yung sa̍k-thèu tá-sí kì lióng-sà. Fut-yèn, Yî-set-lie̍t-ngìn chhiòn-phu khon-tó Song-chú ke yùng-kông chhut-hien chhai sṳn-chong-phùng táng-kô.
[11] Song-chú tui Mô-sî kóng: “Liá-têu ngìn méu-sṳ Ngài oi to kí-sṳ̀ nè? Kì-têu m̀ siông-sin Ngài oi to kí-sṳ̀ nè? Sûi-yèn Ngài chhai kì-têu tông-chûng hàng án-tô sṳ̀n-chiak, kì-têu hàn-he m̀-sin Ngài.
[12] Ngài oi sṳ́ kì-têu pot-vûn lòi fí-me̍t kì-têu, chúng-he Ngài oi sṳ́ ngì lâu ngì ke chṳ́-sûn sàng-cho thai-koet, pí kì-têu kha khiòng-thai!”
[13] Chúng-he, Mô-sî tui Song-chú kóng: “Ngì yung Ngì ke thai-nèn thu liá-têu ngìn lì-khôi Âi-khi̍p. Âi-khi̍p-ngìn thâng-tó Ngì tui Ngì ke chṳ́-mìn só-cho ke sṳ yî-heu,
[14] kì-têu voi lâu liá thi-fông ke ngìn kóng. Liá thi-fông ke ngìn yí-kîn thâng-kóng Ngì — Song-chú lâu ngài-têu thùng-chhai ke sêu-sit. Ngì ke yùn thìn chhai ngài-têu táng-kô ke sṳ̀, Ngì chhai ngài-têu mien-chhièn hién-hien. Ngit-sṳ̀-thèu, Ngì chhai yùn-chhû tú thu ngài-têu; am-pû-sṳ̀, Ngì chhai fó-chhû tú thu ngài-têu.
[15] Liá-ha, na-he Ngì chiông Ngì ke chṳ́-mìn chhṳ̀ chhiang-chhiang, ke-têu thâng-ko Ngì miàng-sâng ke koet-kâ voi kóng:
[16] ‘Song-chú chhai khóng-yâ chhṳ̀-thet Kì ke chṳ́-mìn, yîn-vi Kì mò fap-thu thu kì-têu chin-ngi̍p Kì só yin-hí su-pûn kì-têu ke thú-thi hi.’
[17] Só-yî, Chú â, ngài liá-ha khiù Ngì hién-chhut Ngì ke thai-nèn, sṳ̍t-hien Ngì ke yin-hí. Ngì sṳt kóng-ko:
[18] ‘Ngài he Song-chú; Ngài m̀-voi sùi-phien fat-khién. Ngài yû fûng-sṳn ke chhṳ̀-oi; Ngài sa-miên chhui-ok lâu ko-fam. Chúng-he, Ngài m̀-voi chiông yû-chhui ke chún-cho mò-chhui, Ngài yit-thin voi yîn-vi yà-ôi ke chhui lòi chit-fa̍t kì-têu ke chṳ́-ńg, chhṳ̍t-to sâm-si thoi.’
[19] Song-chú â, khiù Ngì cheu Ngì ví-thai put-pien ke chhṳ̀-oi sa-miên liá-têu ngìn ke chhui, chhiu-chhiong kì-têu tui lì-khôi Âi-khi̍p yî-lòi Ngì yit-chhṳ̍t sa-miên kì-têu án-ngiòng.”
[20] Song-chú en-kóng: “Ngài cheu ngì só khiù ke sa-miên kì-têu.
[21] Chúng-he, Ngài chṳ́-tén Ngài ke yún-sên fat-sṳ: Chhiu-chhiong Ngài ke yùng-kông chhûng-mân chhiòn-thi án khok-sṳ̍t,
[22] liá-têu ngìn lièn yit-sà m̀-voi ngi̍p-hi ke thú-thi. Kì-têu khon-ko Ngài ke yùng-kông, khon-ko Ngài chhai Âi-khi̍p lâu khóng-yâ só hàng ke sṳ̀n-chiak, hàn-he lièn-lièn sṳ-tham Ngài, m̀ thâng-chhiùng Ngài.
[23] Kì-têu yit-thin cho-m̀-tet chin-ngi̍p Ngài só yin-hí pûn kì-têu chú-siên ke thú-thi; méu-sṳ Ngài ke ngìn, mò yit-sà cho-tet ngi̍p-hi.
[24] Chúng-he Ngài ke phu̍k-ngìn Kâ-le̍t mò lâu kì-têu khiung-yong; kì yit-chhṳ̍t tui Ngài chûng-sîm, só-yî, Ngài voi thu kì to ke-te kì tá-tham ko ke thú-thi; kì ke heu-thoi ya voi tet-tó ke-thi cho sán-ngia̍p.
[25] Â-mâ-li̍t-ngìn lâu Kâ-nàm-ngìn liá-ha he̍t chhai sân-lak, só-yî, thiên-kông-ngit ngì-têu oi to-chón hi, hiong Fùng-hói lu-song ke khóng-yâ hàng.”
[26] Song-chú tui Mô-sî lâu Â-lùn kóng:
[27] “Liá-têu sià-ok ke ngìn-mìn mài-yen Ngài oi to kí-sṳ̀ nè? Kì-têu ke koai-yen Ngài chhiòn-phu thâng-tó lé!
[28] Ngì-têu hi lâu kì-têu kóng: ‘Ngài chṳ́-tén Ngài ke yún-sên fat-sṳ: Ngài voi cheu ngì-têu só khiù ke tui-fu ngì-têu. Ngài he Song-chú; Ngài án-ngiòng siên-pu lé.
[29] Ngì-têu chhiòn-phu voi sí; ngì-têu ke sṳ̂-thí voi vang-to liá khóng-yâ. Yîn-vi ngì-têu koai-yen Ngài, ngì-têu tông-chûng ngi-sṳ̍p se yî-song ke ngìn, mò yit-sà cho-tet chin-ngi̍p ke-thi.
[30] Ngài sṳt tap-yin pûn ngì-têu he̍t chhai ke-vi; chúng-he chhù-liáu Yâ-fù-nì ke lai-é Kâ-le̍t lâu Nun ke lai-é Yok-sû-â, mò yit-sà cho-tet ngi̍p-hi.
[31] Ngì-têu láu-tó ngì-têu ke chṳ́-ńg voi pûn-ngìn chok-hi, chúng-he Ngài voi thu kì-têu chin-ngi̍p ngì-têu só hi-chhie̍t ke thú-thi; ke-thi voi sàng-cho kì-têu ke kâ-hiông.
[32] Lun-tó ngì-têu, ngì-têu ke sṳ̂-thí voi vang chhai liá khóng-yâ.
[33] Ngì-têu ke chṳ́-ńg voi vi ngì-têu ke m̀-sin su chit-fa̍t, chhai liá khóng-yâ liù-long si-sṳ̍p ngièn, chhṳ̍t-to ngì-têu chhiòn-phu sí chhiang-chhiang.
[34] Ngì-têu voi tâm-tông chhṳ-kâ ke chhui, yit-ngit son yit-ngièn, ngì-têu tá-tham ke-thi si-sṳ̍p ngit, chhiu voi su si-sṳ̍p ngièn ke thung-khú. Án-ngiòng, ngì-têu chhiu tî Ngài lâu ngì-têu ye̍t-lòi ye̍t m̀-chhîn lé.
[35] Ngài fat-sṳ oi án-ngiòng tui-fu ngì liá-têu chhi-si̍p hí-lòi phoi-ngia̍k Ngài ke sià-ok ngìn-mìn. Ngì-têu mî-yit sà chhiòn-phu voi sí chhai liá khóng-yâ. Ngài he Song-chú; Ngài án-ngiòng siên-pu lé.’ ”
[36] Mô-sî phai-hi tá-tham ke-thi ke tham-é chón-lòi, chhòn-chhut yû-koân ke-thi mò khok-sṳ̍t ke po-ko, hoi chhiòn fi-chung koai-yen Song-chú. Só-yî Song-chú sṳ́ liá-têu ngìn pot-vûn, kì-têu chhiu sí-thet.
[38] Sṳ̍p-ngi ke tham-é chṳ́-yû Nun ke lai-é Yok-sû-â lâu Yâ-fù-nì ke lai-é Kâ-le̍t mò sí.
[39] Mô-sî chiông Song-chú ke fa lâu Yî-set-lie̍t-ngìn kóng, kì-têu chhiu chhin pî-ôi.
[40] Thi-ngi ngit tá-chó, kì-têu chhut-fat chin-kûng sân-khî. Kì-têu kóng: “Ngài-têu khok-sṳ̍t yû fam-chhui; ngài-têu liá-ha oi sông-hi Song-chú yin-hí ngài-têu ke thi-fông.”
[41] Chúng-he Mô-sî kóng: “Ngì-têu liá-ha cho-má-ke m̀ thâng-chhiùng Song-chú ke fa nè? Ngì-têu yit-thin m̀-voi sṳ̀n-kûng!
[42] M̀-hó sông-hi! Song-chú m̀ lâu ngì-têu thùng-chhai, ngì-têu voi pûn sù-thi̍t tá-phai.
[43] Ngì-têu tù-tó Â-mâ-li̍t-ngìn lâu Kâ-nàm-ngìn, yit-thin voi pûn kì-têu chhṳ̀-sí. Song-chú m̀ lâu ngì-têu thùng-chhai, yîn-vi ngì-têu lì-khôi Kì, m̀ thèn Kì.”
[44] Sûi-yèn Song-chú ke yok-khui lâu Mô-sî mò lì-khôi yàng-thi, kì-têu hàn-he khiòng-khiòng sông-sân hi.
[45] Só-yî, he̍t chhai ke sân-khî ke Â-mâ-li̍t-ngìn lâu Kâ-nàm-ngìn hâ-lòi kûng-tá kì-têu, tá-phai kì-têu, yit-chhṳ̍t chiông kì-têu kiuk-to Hò-ngí-mâ.