[1] Song-chú tui Mô-sî kóng:
[2] “Ngì oi fûn-fu Yî-set-lie̍t-ngìn pûn ngì sṳ̍p-ngi kî koái-kun-é, tui tak kî-chhu̍k ke liâng-chhiu nâ-chhut yit-kî, táng-kô oi siá kì chhṳ-kâ ke miàng.
[3] Oi chiông Â-lùn ke miàng siá chhai thoi-péu Li-vi ke koái-kun-é táng, yîn-vi tak kî-chhu̍k ke liâng-chhiu oi yû yit-kî koái-kun-é.
[4] Ngì oi chiông liá sṳ̍p-ngi kî koái-kun-é tai-to sṳn-chong-phùng, piong chhai yok-khui thèu-chhièn, chhiu-he Ngài lâu ngì-têu siông-fi ke só-chhai.
[5] Ngài só kién-sién ke-ngìn ke koái-kun-é voi sâng-ngà. Án-ngiòng, Ngài voi sṳ́ Yî-set-lie̍t-ngìn mài-yen ngì-têu ke fa sêu-thet, mò pûn Ngài chai thâng-tó.”
[6] Só-yî, Mô-sî fûn-fu Yî-set-lie̍t-ngìn tak kî-chhu̍k ke liâng-chhiu pûn kì yit-kî koái-kun-é, chúng-khiung sṳ̍p-ngi kî; Â-lùn ke koái-kun-é lâu khì-thâ ngìn ke koái-kun-é chhiòn-phu piong khiung-ha.
[7] Mô-sî chiông só-yû ke koái-kun-é piong-ngi̍p sṳn-chong-phùng, chhai yok-khui ke thèu-chhièn, Song-chú ke mien-chhièn.
[8] Thi-ngi ngit, Mô-sî to yok-khui ke sṳn-chong-phùng tî-poi hi, khon-tó ke thoi-péu Li-vi kî-chhu̍k Â-lùn ke koái-kun-é yí-kîn sâng-ngà, sâng fâ-pâu, yu khôi-fâ, kiet-chhut ke hen-yìn yí-kîn siuk lé!
[9] Mô-sî chhiu chiông só-yû ke koái-kun-é tui Song-chú mien-chhièn nâ chhut-lòi, pûn Yî-set-lie̍t-ngìn khon; kì-têu chhiòn-phu yû khon-tó. Kok liâng-chhiu chiông chhṳ-kâ ke koái-kun-é nâ chón-hi.
[10] Song-chú tui Mô-sî kóng: “Chiông Â-lùn ke koái-kun-é piong-chón yok-khui thèu-chhièn, oi pó-chhùn liá-kî koái-kun-é, lòi kín-ko phoi-ngia̍k ke ngìn, sṳ́ kì-têu m̀-kám ki-siu̍k mài-yen Ngài, miên-tet kì-têu sí-thet.”
[11] Mô-sî chhiu cheu Song-chú ke min-lin hi-cho.
[12] Yî-set-lie̍t-ngìn tui Mô-sî kóng: “Ngài-têu kôi-sí lé, ngài-têu chhám lé!
[13] Má-ngìn chiap-khiun Song-chú ke sṳn-chong-phùng, má-ngìn chhiu voi sí. Án-ngiòng, ngài-têu thin-chho̍k voi sí chhiang-chhiang lé!”