[1] Pâ-làn yí-kîn khon-chhut Song-chú oi kì chuk-fuk Yî-set-lie̍t-ngìn, só-yî kì liá-pái mò-chhiong yî-chhièn án-ngiòng hi khiù seu-thèu. Kì ke mien chón-hiong khóng-yâ,
[2] khon-tó Yî-set-lie̍t-ngìn tak kî-chhu̍k ôn-yàng chhai ke-vi. Song-ti ke Lìn lìm-to kì,
[3] kì chhiu kóng-chhut yî-ha ke yi-ngièn: “Pí-ngí ke lai-é Pâ-làn ke yi-ngièn, ke khon chhin chhîn-chhú ke ngìn kóng:
[4] Ngài thâng-tó Song-ti só kóng ke fa, ngài khon-tó ke tui Chhiòn-nèn-chá lòi ke yi-siong, ngài chhiu phu̍k hâ-hi, muk-chû tá-khôi.
[5] Ngâ-kok â, ngì ke chong-phùng chhin chiâng! Yî-set-lie̍t â, ngì ke yàng-chong ya tông hó khon!
[6] Kì-têu chhiong yit-phài yit-phài ke chûng-su, chhiong hò-pa sùn ke fâ-yèn, chhiong Song-chú chhîn-sú chung ke chhṳ̀m-hiông su, ya chhiong súi-sùn ke hiông-pak-su.
[7] Súi voi tui kì-têu ke thúng liù chhut-lòi; kì-têu ke chúng-chṳ́ voi ve chhai sṳt-yun ke thièn-tú. Kì-têu ke vòng voi pí Â-kap ví-thai; kì ke koet voi hiong si-fông fat-chán.
[8] Song-ti thu kì-têu chhut Âi-khi̍p, Kì tá-thui Âi-khi̍p, chhiu-chhiong yâ-ngiù án yû li̍t. Kì-têu voi thûn-me̍t sù-thi̍t, chak-sui kì-têu ke kut-thèu, áu-thôn kì-têu ke chien.
[9] Liá-ke koet-kâ chhiong kûng-sṳ̂ phu̍k-tén; chhiong mû-sṳ̂ soi-tén, mò ngìn kám chhàu-tó kì. Chuk-fuk Yî-set-lie̍t ke, yit-thin yû fuk-hi; chu-chú Yî-set-lie̍t ke, yit-thin yû châi-nan.”
[10] Pâ-le̍t thai fat-khién kha̍k-tén khièn-thèu, tui Pâ-làn kóng: “Ngài ham ngì lòi chu-chú ngài ke sù-thi̍t, ngì tiên-to sâm-pái chuk-fuk kì-têu.
[11] Ngì chón-hi! Ngài sióng-oi thai-thai tap-chhia ngì, chúng-he Song-chú m̀ pûn ngì tet-tó.”
[12] Pâ-làn en-kóng: “Ngài kám m̀-he tui ngì phai-lòi ke sṳ́-chá kóng:
[13] ‘Chhiu-son Pâ-le̍t chiông vòng-kiûng só-yû ke kîm-ngiùn pûn ngài, ngài ya cho-m̀-tet cheu chhṳ-kâ ke yi-sṳ lòi vì-poi Song-chú ke min-lin. Ngài tân-chhiang cho-tet kóng Song-chú oi ngài kóng ke fa.’ ”
[14] Pâ-làn tui Pâ-le̍t kóng: “Ngài liá-ha oi chón-to ngài thùng-pâu ke-vi hi. Lì-khôi yî-chhièn, ngài oi kín-ko ngì, pûn ngì tî chiông-lòi Yî-set-lie̍t-ngìn oi ngióng-pân tui-thai ngì ke ngìn-mìn.”
[15] Só-yî Pâ-làn kóng-chhut yî-ha ke yi-ngièn: “Pí-ngí ke lai-é Pâ-làn ke yi-ngièn, ke khon chhin chhîn-chhú ke ngìn kóng:
[16] Ngài thâng-tó Song-ti só kóng ke fa, tet-tó tui Chṳ-kô-chá lòi ke tî sṳt; ngài khon-tó ke tui Chhiòn-nèn-chá lòi ke yi-siong, ngài chhiu phu̍k hâ-hi, muk-chû tá-khôi.
[17] Ngài khon yén-yén ke chiông-lòi; ngài khon-tó yit-sà ngìn. Yû yit-lia̍p sên-é oi tui Ngâ-kok chhut-lòi; yû yit-ke kiûn-vòng oi tui Yî-set-lie̍t hîn-hí. Kì oi tá-sui Mô-ap ke liâng-chhiu, fí-me̍t só-yû ke Sî-ngí-ngìn.
[18] Kì oi chṳ̂n-fu̍k Yî-tûng, cham-liâng Sî-ngí, liá sù-thi̍t ke thú-thi. Yî-set-lie̍t voi sòng-sòng tet-sṳn.
[19] Yû yit-sà oi tui Ngâ-kok chhut-lòi chóng-khièn, chiông sàng-tú chhûn-tó ke ngìn chhù chhiang-chhiang.”
[20] Heu-lòi, Pâ-làn chhai yi-siong chûng khon-tó Â-mâ-li̍t-ngìn, chhiu kóng-chhut yî-ha ke yi-ngièn: “Â-mâ-li̍t pún-he chui khiòng-thai ke koet-kâ, chúng-he chui-heu yit-thin voi me̍t-mòng.”
[21] Pâ-làn chhai yi-siong chûng khon-tó Kî-nì-ngìn, chhiu kóng-chhut yî-ha ke yi-ngièn: “Ngì he̍t ke só-chhai pún-lòi he ôn-chhiòn, chhiong cho chhai ngàm-sa̍k piak-táng ke teu.
[22] Chúng-he ngì-têu Kî-nì-ngìn voi sêu-me̍t; Â-sut-ngìn voi chiông ngì-têu chok-chéu.”
[23] Pâ-làn yu kóng yi-ngièn: “Ôi! Song-ti hàng liá-têu sṳ, má-ngìn voi sâng hâ-hi nè?
[24] Tui Kî-thì yû chhîm-lio̍k-chá chhô-sòn lòi; kì-têu voi chṳ̂n-fu̍k Â-sut lâu Hî-pak, chúng-he kì-têu ya yit-thin voi sêu-me̍t.”
[25] Yèn-heu, Pâ-làn chhiu chón vuk-hâ, Pâ-le̍t ya chón-hi.