[1] Song-chú tui Mô-sî kóng:
[2] “Ngì oi yîn Mí-thien-ngìn khî-phien Yî-set-lie̍t-ngìn lòi hìn-fa̍t kì-têu; ngì cho liá-sṳ yî-heu chhiu voi chón-to ngiâ chú-chûng ke-vi.”
[3] Só-yî Mô-sî tui ngìn-mìn kóng: “Ngì-têu oi yi-phi siông-chhṳ̀, hi kûng-tá Mí-thien-ngìn, vi Song-chú po-sù.
[4] Yî-set-lie̍t tak kî-chhu̍k oi phai-chhut yit-chhiên ngìn chhâm-kâ chan-chên.”
[5] Só-yî, tak kî-chhu̍k sién-chhut yit-chhiên ngìn, chhâm-kâ chan-chên ke ngìn-su chúng-khiung yit-van lióng-chhiên ngìn.
[6] Mô-sî chhiu phai tak kî-chhu̍k ke yit-chhiên ngìn hi siông-chhṳ̀, yu phai chi-sṳ̂ Yî-li-â-sat ke lai-é Fî-nì-ha̍p cho kì-têu ke ngièn-soi; Fî-nì-ha̍p tai-tén sṳn-só ke yung-phín lâu phùn chan-chên kín-po ke la̍p-pá.
[7] Kì-têu chûn-cheu Song-chú pûn Mô-sî ke min-lin kûng-tá Mí-thien-ngìn, chhṳ̀-thet kì-têu só-yû ke chong-tên,
[8] pâu-hàm Mí-thien ke ńg-ke vòng — Yî-vi, Li-kîm, Sû-ngí, Fu-ngí, Li-pâ. Kì-têu ya chhṳ̀-sí Pí-ngí ke lai-é Pâ-làn.
[9] Yî-set-lie̍t-ngìn chok Mí-thien-ngìn ke fu-ngìn-kâ lâu se-ngìn-è, chhióng kì-têu ke ngiù-yòng lâu kì-têu só-yû ke chhòi-pó,
[10] sêu-thet kì-têu só he̍t ke sàng lâu só-yû ke yàng-thi.
[11] Kì-têu chiông chhióng-lòi ke chan-li-phín, lièn ngìn lâu thèu-sâng chhiòn-phu tai-chéu,
[12] tai-to kì-têu chhai Yâ-li-kô tui-ngan Yok-tan hò-sùn Mô-ap phìn-ngièn ke yàng-thi, kâu-pûn Mô-sî, chi-sṳ̂ Yî-li-â-sat, lâu Yî-set-lie̍t chhiòn fi-chung.
[13] Mô-sî, chi-sṳ̂ Yî-li-â-sat, lâu só-yû khì-thâ liâng-chhiu chhiòn-phu chhut-yàng hi ngiàng-chiap kiûn-chhui.
[14] Mô-sî tui ke-têu chan-chhòng chón-lòi ke kiûn-kôn lâu chṳ́-fî-kôn fat-khién,
[15] mun kì-têu kóng: “Ngì-têu cho-má-ke liù liá-têu fu-ngìn-kâ ke miang?
[16] Oi tî, chhiu-he liá-têu fu-ngìn-kâ thâng Pâ-làn ke fa, chhai Phî-ngí yín-yu Yî-set-lie̍t-ngìn phoi-ngia̍k Song-chú, hoi Song-chú ke chṳ́-mìn pot-vûn.
[17] Liá-ha, ngì-têu oi chhṳ̀-thet só-yû ke se-â-kô-é, yî-khi̍p sṳt lâu nàm-ngìn yû sin koân-he ke fu-ngìn-kâ,
[18] chúng-he cho-tet vi ngì-têu chhṳ-kâ liù-hâ só-yû ke se-â-moi-é lâu ngìn-kâ-ńg.
[19] Ngì-têu tông-chûng yû chhṳ̀-sí ngìn ke, ya-he pen-tó sṳ̂-thí ke, oi liù chhai yàng-ngoi chhit-ngit. Chhai thi-sâm ngit lâu thi-chhit ngit, ngì-têu oi kiet-chhiang chhṳ-kâ lâu ngì-têu chok-lòi ke ngìn,
[20] ya oi kiet-chhiang só-yû pu-é, phì-è, sân-yòng mô lâu su-é cho ke tûng-sî.”
[21] Chi-sṳ̂ Yî-li-â-sat tui ke-têu siông-chhṳ̀ chón-lòi ke ngìn kóng: “Song-chú pûn Mô-sî ke thiàu-li he án-ngiòng:
[22] Só-yû sêu m̀-fái ke tûng-sî, chhiong kîm, ngiùn, thùng, thiet, siak, yèn, oi yung fó sêu chhiang-li, nang-ngoi ya oi yung súi kiet-chhiang; khì-thâ voi sêu-fái ke tûng-sî, oi yung súi sé-chhiang.
[24] Thi-chhit ngit, ngì-têu yit-thin oi kiet-chhiang chhṳ-kâ ke sâm-fu, án-ngiòng ngì-têu chhiu-son chhiang-li, cho-tet chin-ngi̍p yàng-chong.”
[25] Song-chú tui Mô-sî kóng:
[26] “Ngì lâu chi-sṳ̂ Yî-li-â-sat, pin fi-chung ke kok chhu̍k-chóng oi chiông chhióng-lòi ke chan-li-phín, lièn ngìn tai thèu-sâng chhiòn-phu tiám-son yit-ha,
[27] yèn-heu phìn-kiûn fûn-cho lióng-pan, yit-pan pûn kiûn-chhui, nang-ngoi yit-pan pûn khì-thâ ke fi-chung.
[28] Pûn-pûn kiûn-chhui ke yit-pan chûng oi liù-hâ ńg-pak fûn chṳ̂-yit cho hien-pûn Song-chú ke kiûng-vu̍t, chhiu-he tak ńg-pak ke chok-tó ke ngìn-chûng liù-hâ yit-sà; ngiù, lì, mièn-yòng, sân-yòng ya chhiòn-phu án-ngiòng.
[29] Chiông liá-têu kâu-pûn chi-sṳ̂ Yî-li-â-sat cho hien-pûn Song-chú thi̍t-phe̍t ke kiûng-vu̍t.
[30] Pûn-pûn ngìn-mìn ke yit-pan chûng, mò-lun he chok-tó ke ngìn, ngiù, lì, mièn-yòng, sân-yòng, kok-yong thèu-sâng, oi nâ-chhut ńg-sṳ̍p fûn chṳ̂-yit pûn kón-lî Song-chú sṳn-chong-phùng ke Li-vi-ngìn.”
[31] Mô-sî lâu chi-sṳ̂ Yî-li-â-sat chhiu cheu Song-chú ke min-lin hi-cho.
[32] Chhù-liáu sṳ-pîn chhṳ-kâ liù-hâ ke chhòi-vu̍t, kì-têu chhióng ko-lòi ke chan-li-phín yû: yòng liuk-sṳ̍p chhit-van ńg-chhiên chak,
[33] ngiù chhit-van lióng-chhiên chak,
[34] lì liuk-van yit-chhiên chak,
[35] ngìn-kâ-ńg sâm-van lióng-chhiên ngìn.
[36] Siông-chhṳ̀ ke kiûn-chhui tet-tó ke yit-pan yû: yòng sâm-sṳ̍p sâm-van chhit-chhiên ńg-pak chak,
[37] khì-chûng liuk-pak chhit-sṳ̍p ńg-chak he hien-pûn Song-chú ke kiûng-vu̍t;
[38] ngiù sâm-van liuk-chhiên chak, khì-chûng chhit-sṳ̍p ngi-chak he hien-pûn Song-chú ke kiûng-vu̍t;
[39] lì sâm-van làng ńg-pak chak, khì-chûng liuk-sṳ̍p yit-chak he hien-pûn Song-chú ke kiûng-vu̍t;
[40] ngìn-kâ-ńg yit-van liuk-chhiên ngìn, khì-chûng sâm-sṳ̍p ngi-ngìn kûi-pûn Song-chú.
[41] Mô-sî chûn-cheu Song-chú ke min-lin chiông chan-li-phín kâu-pûn chi-sṳ̂ Yî-li-â-sat cho hien-pûn Song-chú thi̍t-phe̍t ke kiûng-vu̍t.
[42] Fi-chung tet-tó ke yit-pan lâu kiûn-chhui tet-tó ke khiung-yong:
[43] yòng sâm-sṳ̍p sâm-van chhit-chhiên ńg-pak chak,
[44] ngiù sâm-van liuk-chhiên chak,
[45] lì sâm-van làng ńg-pak chak,
[46] ngìn-kâ-ńg yit-van liuk-chhiên ngìn.
[47] Mô-sî tui fi-chung ke yit-pan chûng, lièn ngìn tai thèu-sâng, nâ-chhut ńg-sṳ̍p fûn chṳ̂-yit lòi, cheu Song-chú ke min-lin kâu-pûn kón-lî Song-chú sṳn-chong-phùng ke Li-vi-ngìn.
[48] Ke-têu tai-liâng kiûn-chhui ke kiûn-kôn lâu chṳ́-fî-kôn hi-kien Mô-sî,
[49] tui kì kóng: “Ngài-têu he ngì ke phu̍k-ngìn, ngài-têu yí-kîn tiám-son su̍k-hâ ke sṳ-pîn, yit-ke chhiu mò séu.
[50] Só-yî ngài-têu chiông tak-sà chhióng-lòi ke kîm-hi, sú-ak, sú-pí-ak, kim-chṳ́, ngí-vàn, pha̍t-lien, tai-lòi hien-pûn Song-chú, cho ngài-têu sâng-miang ke su̍k-ka, hî-mong Song-chú pó-yu ngài-têu.”
[51] Mô-sî lâu chi-sṳ̂ Yî-li-â-sat chiap-su liá-têu kîm-é, chhiòn-phu he sú-kûng tông-yu ke kîm-hi.
[52] Ke-têu kiûn-kôn lâu chṳ́-fî-kôn hien-pûn Song-chú ke kîm-é thai-yok yû lióng-pak kûng-kîn.
[53] Yit-pân ke sṳ-pîn lûng-chúng chiông chhióng-lòi ke chan-li-phín liù-pûn chhṳ-kâ.
[54] Mô-sî lâu chi-sṳ̂ Yî-li-â-sat chiap-su kiûn-kôn lâu chṳ́-fî-kôn ke kîm-é yî-heu, chhiu tai-to sṳn-chong-phùng, khì-khiù Song-chú pó-yu Yî-set-lie̍t-ngìn.