[1] Song-chú tui Mô-sî kóng:
[2] “Ngì oi lâu Â-lùn kóng, kì ôn chhit-chán tên chhai tên-thòi táng ke sṳ̀, oi chiông tên-kông hiong thèu-chhièn cheu.”
[3] Â-lùn chhiu cheu án-ngiòng phan-lî, chiông tên hiong tên-thòi thèu-chhièn ke fông-hiong lòi ôn, he cheu Song-chú só fûn-fu Mô-sî ke.
[4] Liá-ke tên-thòi, tui táng-kô to tái-hâ, chhiòn-phu he yung kîm-é tá chhut-lòi ke, he cheu Song-chú chṳ́-sṳ Mô-sî ke yong-sṳt tá-chho ke.
[5] Song-chú tui Mô-sî kóng:
[6] “Ngì oi chiông Li-vi-ngìn lâu khì-thâ ke Yî-set-lie̍t-ngìn fûn-khôi,
[7] yung yî-ha ke fông-fap kiet-chhiang kì-têu: Yung chhiang-li ke súi fin chhai kì-têu ke sṳ̂n-song, ham kì-têu chiông chhiòn-sṳ̂n yung thi-thèu-tô thi-chhiang, chiông sâm-fu sé-chhiang; án-ngiòng, kì-têu chhai lî-ngì song chhiu-son chhiang-li lé.
[8] Kì-têu oi khiên yit-chak se ngiù-kú lâu yit-thin oi-hien ke su-chi, chhiu-he kiâu kám-lám-yù ke yu-mien-fún; ngì hàn-oi khiên nang-ngoi yit-chak se ngiù-kú, lòi-cho su̍k-chhui-chi.
[9] Yèn-heu ngì oi seu-si̍p Yî-set-lie̍t chhiòn fi-chung, ham Li-vi-ngìn khî chhai sṳn-chong-phùng thèu-chhièn, Ngài — Song-chú ke mien-chhièn.
[10] Yî-set-lie̍t-ngìn oi chiông kì-têu ke sú piong chhai Li-vi-ngìn ke thèu-nà táng;
[11] Â-lùn oi chiông Li-vi-ngìn hien-pûn Ngài tông-cho yèu-chi, he Yî-set-lie̍t-ngìn thi̍t-phe̍t ke lî-vu̍t. Án-ngiòng, kì-têu chang cho-tet phan-lî Ngài ke sṳ.
[12] Li-vi-ngìn oi on-sú chhai ke lióng-chak ngiù-kú ke thèu-nà táng; yit-chak cho su̍k-chhui-chi, yit-chak cho sêu-fa-chi, hien-pûn Ngài, vi Li-vi-ngìn su̍k-chhui.
[13] “Ngì oi chiông Li-vi-ngìn cho thi̍t-phe̍t ke lî-vu̍t hien-pûn Ngài, yu oi-ham Â-lùn lâu kì ke-têu lai-é kón-lî kì-têu.
[14] Ngì oi án-ngiòng chiông Li-vi-ngìn lâu khì-thâ ke Yî-set-lie̍t-ngìn fûn-khôi, sṳ́ kì-têu kûi-su̍k Ngài.
[15] Ngì chiông Li-vi-ngìn kiet-chhiang pin fung-hien yî-heu, kì-têu chhiu cho-tet chhai sṳn-chong-phùng tî-poi kûng-chok.
[16] Ngài yí-kîn siên-pu, kì-têu oi thoi Yî-set-lie̍t chóng-chṳ́ ke thi-vi; kì-têu oi vàn-chhiòn kûi-su̍k Ngài.
[17] Ngài chhai Âi-khi̍p tá-sí só-yû ke thèu-thôi ke-ngit, yí-kîn chiông Yî-set-lie̍t-ngìn tak-kâ ke chóng-chṳ́ lâu tak-chak thèu-sâng ke thèu-thôi fûn-phe̍t vì-sṳn, kûi-su̍k Ngài.
[18] Ngài liá-ha oi chiông Li-vi-ngìn thoi só-yû Yî-set-lie̍t-ngìn ke chóng-chṳ́.
[19] Ngài tui Yî-set-lie̍t-ngìn tông-chûng chiông Li-vi-ngìn tông-cho lî-vu̍t su-pûn Â-lùn lâu kì ke-têu lai-é, chhai sṳn-chong-phùng tî-poi vi Yî-set-lie̍t-ngìn kûng-chok yu vi kì-têu hàng su̍k-chhui-lî, miên-tet Yî-set-lie̍t-ngìn hàng-to sṳn-só mien-chhièn tù-tó châi-nan.”
[20] Mô-sî, Â-lùn, lâu Yî-set-lie̍t chhiòn fi-chung chhiu chûn-cheu Song-chú min-lin Mô-sî ke fa, chiông Li-vi-ngìn fung-hien.
[21] Li-vi-ngìn kiet-chhiang chhṳ-kâ, sé-chhiang kì-têu ke sâm-fu; Â-lùn chiông kì-têu tông-cho yèu-chi he thi̍t-phe̍t ke lî-vu̍t hien-pûn Song-chú, ya vi kì-têu hàng su̍k-chhui-lî lòi kiet-chhiang kì-têu.
[22] Yû-koân Li-vi-ngìn ke sṳ, ngìn-mìn chhiòn-phu chûn-cheu Song-chú min-lin Mô-sî ke fa lòi hàng. Án-ngiòng, Li-vi-ngìn chhiu chhai Â-lùn lâu kì ke-têu lai-é ke chṳ́-fî ha, chṳp-hàng sṳn-chong-phùng tî-poi ke ngim-vu.
[23] Song-chú tui Mô-sî kóng:
[24] “Tak-ke ngi-sṳ̍p ńg-se yî-song ke Li-vi-ngìn oi chhai sṳn-chong-phùng sṳ-fung,
[25] chúng-he to ńg-sṳ̍p se ke sṳ̀ oi thui-hiû.
[26] Yî-heu kì cho-tet chhai sṳn-chong-phùng pông-chhu thùng-sṳ, chúng-he cho-m̀-tet chhṳ-kâ tân-thu̍k phan-sṳ. Ngì oi án-ngiòng fûn-phi Li-vi-ngìn ke kûng-chok.”