[1] Song-chú fûn-fu Mô-sî
[2] hiong Yî-set-lie̍t-ngìn siên-pu yî-ha ke thiàu-li. “Yû-ngìn hiong Song-chú vàn thi̍t-phe̍t hí ke ngien ke sṳ̀, oi cheu yî-ha ke kûi-thin lòi na̍p-chhièn.
[3] Cheu sṳn-só kûi-thin ke phêu-chún: Thai-ngìn, tui ngi-sṳ̍p se to liuk-sṳ̍p se: nàm-ngìn fu ńg-sṳ̍p chak ngiùn-pi,
[4] ńg-ngìn fu sâm-sṳ̍p chak ngiùn-pi.
[5] Heu-sâng ngìn, tui ńg-se to ngi-sṳ̍p se: se-lai-é fu ngi-sṳ̍p chak ngiùn-pi, se-moi-é fu sṳ̍p chak ngiùn-pi.
[6] Se-ngìn-è, tui yit-chak ngie̍t to ńg-se: se-â-kô-é fu ńg chak ngiùn-pi, se-â-moi-é fu sâm chak ngiùn-pi.
[7] Ló-ngìn-kâ, liuk-sṳ̍p se yî-song: nàm-ngìn fu sṳ̍p-ńg chak ngiùn-pi, ńg-ngìn fu sṳ̍p chak ngiùn-pi.
[8] “Vàn-ngien ke ngìn na-he yîn-vi khiùng-khú mò fap-thu cheu só-thin ke phêu-chún vàn-chhîn, chhiu-oi tai kì to chi-sṳ̂ ke-vi, chi-sṳ̂ oi cheu kì na̍p tet-hí ke nèn-li̍t nang-ngoi kûi-thin ka-chhièn.
[9] “Na-he só hí ke ngien he yû-koân hien-pûn Song-chú cho sên-ngì ke thèu-sâng, liá-chúng lî-vu̍t oi kûi Song-chú cho sṳn-vu̍t.
[10] Hí-ngien ke ngìn cho-m̀-tet yung khì-thâ thèu-sâng kâu-von, hó ke von fái ke ya-he fái ke von hó ke; na-he yû kâu-von ke, lióng-chak thèu-sâng chhiòn-phu oi kûi-pûn Song-chú.
[11] Na-he só hí ke ngien he yû-koân mò chhiang-li ke thung-vu̍t, chhiu-he ke cho-m̀-tet hien-pûn Song-chú cho sên-ngì ke, hí-ngien ke ngìn chhiu-oi chiông thèu-sâng khiên to chi-sṳ̂ ke-vi.
[12] Chi-sṳ̂ oi cheu thèu-sâng ke hó-fái kû-ka, kì kóng kí-tô chhiu kí-tô.
[13] Na-he kì oi chiông thèu-sâng su̍k chón-lòi, yit-thin oi cheu só-kû ke ka-chhièn, kâ ńg-fûn chṳ̂-yit.
[14] “Ngìn hien vuk-è pûn Song-chú ke sṳ̀, chi-sṳ̂ chhiu-oi cheu vuk-è ke hó-fái kû-ka, kì kóng kí-tô chhiu kí-tô.
[15] Fung-hien ke ngìn na-he oi chiông ke-kiên vuk-è su̍k chón-lòi, yit-thin oi fu-chhut ngièn-lòi ke ka-chhièn, kâ ńg-fûn chṳ̂-yit, vuk-è chang kûi-pûn kì.
[16] “Na-he yû-ngìn chiông só sṳ̀n-chiap ke yit phu-fun thú-thi hien-pûn Song-chú, chi-sṳ̂ chhiu-oi cheu ke thú-thi ve-chúng ke liong lòi kû-ka, cho-tet ve yit-pak kûng-kîn thai ma̍k-chúng ke thú-thi ka-chhṳ̍t he ńg-sṳ̍p chak ngiùn-pi.
[17] Kì na-he chhai Hí-ngièn fung-hien ke, chhiu-oi cheu ka-chhièn na̍p-chhîn.
[18] Kì na-he chhai Hí-ngièn yî-heu fung-hien ke, chi-sṳ̂ oi tui ke-sṳ̀ to ha yit-ke Hí-ngièn só-chhûn ke ngièn-su, só-kû ke ka-chhièn lòi kám-thet.
[19] Ke-ngìn na oi chiông thú-thi su̍k chón-lòi, yit-thin oi cheu só kû-ka ke su-muk kâ ńg-fûn chṳ̂-yit, thú-thi chang kûi-vàn kì.
[20] Na-he kì m̀ siên tui Song-chú chiông ke thú-thi su̍k chón-lòi, chhiu chiông thú-thi chón-mai pûn phe̍t-ngìn, kì chhiu sṳt-thet chiông ke thú-thi su̍k chón-lòi ke khièn-li.
[21] To ha yit-ke Hí-ngièn, ke thú-thi oi sàng-cho Song-chú yún-kiú ke sán-ngia̍p, kûi-su̍k chi-sṳ̂.
[22] “Na-he yû-ngìn chiông mâi-lòi ke thú-thi (m̀-he sṳ̀n-chiap ke thú-thi) hien-pûn Song-chú,
[23] chi-sṳ̂ chhiu-oi tui ke-sṳ̀ to ha yit-ke Hí-ngièn só-chhûn ke ngièn-su lòi kû-ka; ke-ngìn yit-thin oi tông-ngit chhiu chiông ka-chhièn na̍p pûn Song-chú.
[24] To Hí-ngièn, ke thú-thi oi vàn ngièn-chú ya-he kì ke heu-thoi.
[25] “Só-yû ke ka-chhièn chhiòn-phu oi cheu sṳn-só kûi-thin ke phêu-chún.
[26] “Thèu-thôi ke thèu-sâng, mò-lun he ngiù ya-he yòng, yí-kîn kûi-su̍k Song-chú, só-yî ngìn cho-m̀-tet chai nâ kì lòi-cho kâm-sîm ke chi-vu̍t lòi-hien, yîn-vi liá he Song-chú ke.
[27] Na-he ke thèu-thôi he mò chhiang-li ke, kì cho-tet cheu ngièn-lòi ke ka-chhièn kâ ńg-fûn chṳ̂-yit su̍k chón-lòi; na-he m̀ su̍k chón-lòi, cho-tet cheu kûi-thin ke ka-chhièn mai-pûn phe̍t-ngìn.
[28] “Ke yún-yén hien-pûn Song-chú ke, mò-lun he ngìn, thèu-sâng, ya-he sṳ̀n-chiap ke thú-thi, chhiòn-phu cho-m̀-tet mai-pûn phe̍t-ngìn, ya cho-m̀-tet su̍k chón-lòi, oi yún-yén kûi-su̍k Song-chú.
[29] Yin-tông me̍t-thet ke ngìn chhiòn-phu cho-m̀-tet su̍k chón-lòi, yit-thin oi chhú sí-hìn.
[30] “Thú-thi só chhut-sán ke, mò-lun he ńg-kuk ya-he kó-chṳ́, sṳ̍p-fûn chṳ̂-yit he Song-chú ke; oi fûn-phe̍t vì-sṳn kûi-pûn Song-chú.
[31] Na-he yû-ngìn sióng-oi chiông liá sṳ̍p-fûn chṳ̂-yit su̍k chón-lòi, yit-thin oi cheu kûi-thin ke ka-chhièn chai kâ-fu ńg-fûn chṳ̂-yit.
[32] Sṳ̍p-chak thèu-sâng, mò-lun he ngiù ya-he yòng, tui mu̍k-ngìn ke chhóng kîn-ko ke sṳ̀, thi-sṳ̍p chak he Song-chú ke. Tak-pái son-to thi-sṳ̍p chak, ke-chak chhiu-he Song-chú ke.
[33] Chú-ngìn cho-m̀-tet nâ phe̍t-chak lòi-von, chiông fái ke von chhut-lòi fung-hien, ya cho-m̀-tet yung phe̍t-chúng ke thèu-sâng lòi-von. Na-he kì yung nang-ngoi yit-chak lòi kâu-von, lióng-chak chhiòn-phu he Song-chú ke, cho-m̀-tet su̍k chón-lòi.”
[34] Liá-têu kie-min he Song-chú chhai Sî-nai-sân kâu-pûn Mô-sî hiong Yî-set-lie̍t-ngìn siên-pu ke.