[1] Yî-ha he Yî-set-lie̍t-ngìn cheu kiûn-chhui, chhai Mô-sî lâu Â-lùn tai-liâng chṳ̂-ha lì-khôi Âi-khi̍p yî-heu ôn-yàng ke thi-fông.
[2] Mô-sî chûn-cheu Song-chú ke min-lin chiông tak-pái ôn-yàng ke thi-miàng ki-liu̍k hâ-lòi.
[3] Yî-set-lie̍t-ngìn chhai châng-ngie̍t sṳ̍p-ńg, chhiu-he thi-yit ke Phàn-ko-chiet ke thi-ngi ngit, lì-khôi Âi-khi̍p. Kì-têu yîn-vi yû Song-chú ke pó-fu, chhai Âi-khi̍p chung-ngìn muk chṳm-chṳm chṳ̂-ha, yúng-kám mò-kiâng lì-khôi Làn-sai-sàng;
[4] ke-sṳ̀ Âi-khi̍p-ngìn tông chhai mài-chong kì ke-têu pûn Song-chú chhṳ̀-sí ke chóng-chṳ́. Song-chú cho liá-sṳ, hién-mìn Kì ke khièn-li̍t yàng-ko Âi-khi̍p ke sṳ̀n-mìn.
[5] Yî-set-lie̍t-ngìn lì-khôi Làn-sai, siên chhai Sû-kot ôn-yàng,
[6] yèn-heu chhai khóng-yâ sùn ke Yî-thóng ôn-yàng.
[7] Tui ke-vi kì-têu chón-to Pâ-li̍t-Sé-fûn tûng-phién ke Pí-Ha̍p-hî-liu̍k, chhai Me̍t-thot fu-khiun ôn-yàng.
[8] Kì-têu lì-khôi Pí-Ha̍p-hî-liu̍k yî-heu, kîn-ko Fùng-hói to khóng-yâ, yu chhai Yî-thóng khóng-yâ hàng sâm-ngit ke lu, yèn-heu chhai Mâ-lâ ôn-yàng.
[9] Kì-têu tui ke-vi to Yî-lìm ôn-yàng, yîn-vi Yî-lìm yû sṳ̍p-ngi héu chhièn-súi, chhit-sṳ̍p thèu chûng-su.
[10] Lì-khôi Yî-lìm yî-heu, kì-têu chhai Fùng-hói fu-khiun ôn-yàng.
[11] Chiap hâ-lòi kì-têu to Sun khóng-yâ,
[12] yèn-heu to Thot-kâ,
[13] hi-to Â-liu̍k.
[14] Chiap hâ-hi kì-têu hi-to Li-fî-tâng; chhai ke-vi kì-têu mò-súi hó-lîm.
[15] Tui Li-fî-tâng to Hò-ngí-sân, kì-têu siên-heu chhai yî-ha kok-thi ôn-yàng: Sî-nai khóng-yâ, Kî-pok-lò-Ha̍p-thâ-ngá (yi-sṳ he “Thâm-yu̍k ke Fùn-mu”), Ha̍p-sé-liu̍k, Li-thì-mâ, Lìm-mùn-Pha-lie̍t, Li̍p-nâ, Le̍t-sat, Kî-hî-lâ-thâ, Sâ-fî-sân, Ha̍p-lâ-thai, Mâ-kit-hî-liu̍k, Thâ-ha̍p, Thâ-lâ, Me̍t-kâ, Ha̍p-mô-nâ, Mô-sî-liu̍k, Pí-nì-Â-kôn, Hot-Ha̍p-khi̍p-kap, Yok-pâ-thâ, Â-pok-nâ, Yî-sùn-Kâ-phe̍t, Chhìm khóng-yâ (chhiu-he Kâ-tâi-sṳ̂), Hò-ngí-sân, Yî-tûng-thi ke piên-kie.
[38] Yî-set-lie̍t-ngìn lì-khôi Âi-khi̍p heu ke thi si-sṳ̍p ngièn ńg-ngie̍t chhû-yit, chi-sṳ̂ Â-lùn chûn-cheu Song-chú ke min-lin sông Hò-ngí-sân, chhiu sí chhai ke-vi. Â-lùn sí ke sṳ̀ he yit-pak ngi-sṳ̍p sâm-se.
[40] Kâ-nàm nàm-fông ke Â-lâ-tet-vòng thâng-kóng Yî-set-lie̍t-ngìn lòi lé.
[41] Tui Hò-ngí-sân to Mô-ap phìn-ngièn, Yî-set-lie̍t-ngìn siên-heu chhai yî-ha kok-thi ôn-yàng: Sat-mô-nâ, Phû-nun, Â-pak, Mô-ap kin-nui ke Â-pâ-lìm fông-thi, Tí-pún-Kâ-tet, Â-mùn-Tâi-pí-lâ-thai-yîm, Nì-pô-sân fu-khiun ke Â-pâ-lìm-sân, Yok-tan-hò sùn Yâ-li-kô tui-mien ke Mô-ap phìn-ngièn, Pak-Yâ-sṳ̂-ma̍t lâu Â-pak-Sṳ̍p-thìn chûng-kiên ke thi-fông.
[50] Chhai Yok-tan-hò sùn Yâ-li-kô tui-mien ke Mô-ap phìn-ngièn, Song-chú fûn-fu Mô-sî
[51] chiông yî-ha ke chṳ́-sṳ lâu Yî-set-lie̍t-ngìn kóng: “Ngì-têu ko Yok-tan-hò, chin-ngi̍p Kâ-nàm-thi yî-heu,
[52] yit-thin oi chiông tông-thi ke ngìn-mìn chhiòn-phu kiuk chhut-hi, chiông kì-têu só-yû tiâu-khiet ke ya-he chu-chho ke ngiéu-siong tá-sui, fí-fái só-yû kin-pai ke thi-fông.
[53] Ngì-têu oi cham-liâng ke-thi, chhai ke-vi he̍t, yîn-vi Ngài chiông ke-thi su-pûn ngì-têu cho sán-ngia̍p.
[54] Ngì-têu oi yung chhû-chhiâm ke fông-fap chiông thú-thi pûn-pûn kok kî-chhu̍k kok chûng-chhu̍k. Oi chiông thai-te ke thú-thi pûn-pûn ngìn kha-tô ke chûng-chhu̍k, se-te ke thú-thi pûn-pûn ngìn kha-séu ke chûng-chhu̍k.
[55] Na-he ngì-têu m̀ chiông tông-thi ke ngìn-mìn kiuk-chéu, ke-têu liù-hâ ke ngìn voi sàng-cho ngì-têu ke châi-nan, chhîn-chhiong ngì-têu muk-chû tú ke net, hia̍p-hâ ke net-teu; kì-têu fán-chón voi chhai ngì-têu só he̍t ke thú-thi sông-hoi ngì-têu.
[56] Na-he ngì-têu m̀ chiông kì-têu kiuk-chéu, Ngài oi sêu-me̍t ngì-têu, chhiong Ngài cheu kie-va̍k sêu-me̍t kì-têu yit-yong.”