[1] Song-chú chhai Yâ-li-kô tui-mien Yok-tan hò-sùn ke Mô-ap phìn-ngièn tui Mô-sî kóng:
[2] “Ngì oi fûn-fu Yî-set-lie̍t-ngìn, oi kì-têu tui só tet-tó ke sán-ngia̍p chûng, pûn-têu sàng-chṳ́n lâu chû-vì ke chhó-chhòng pûn Li-vi-ngìn.
[3] Liá-têu sàng-chṳ́n oi kûi Li-vi-ngìn só-yû, pûn kì-têu he̍t chhai ke-vi; chhó-chhòng he pûn kì-têu hiuk ngiù-khiùn lâu khì-thâ thèu-sâng yung ke.
[4] Chhó-chhòng oi tui sàng-chhiòng si-mien ke ngoi-vì hiong-ngoi chhûn-chán si-pak ńg-sṳ̍p kûng-chhak,
[5] ya chhiu-he yung sàng cho chûng-sîm, tak-piên kok-yû kiú-pak kûng-chhak ke yit-ke si-fông-hìn ke thi-fông.
[6] Ngì-têu oi pûn Li-vi-ngìn liuk-chho thò-sám-sàng, pûn yîn-vi ko-sṳt hoi-sí ngìn ke ngìn cho-tet thò-to ke-vi khiù pó-fu. Liá-têu yî-ngoi, oi pûn kì-têu si-sṳ̍p ngi-chho sàng.
[7] Sàng ke chû-vì oi yû chhó-chhòng, yit-khiung si-sṳ̍p pat-chho sàng.
[8] Ngì-têu oi tui Yî-set-lie̍t-ngìn ke sán-ngia̍p chûng, chiông sàng pûn-pûn Li-vi-ngìn, ngìn tô ke kî-chhu̍k oi tô pûn, ngìn séu ke chhiu séu pûn, tak kî-chhu̍k oi cheu só tet-tó ke sán-ngia̍p, chiông sàng pûn-pûn Li-vi-ngìn.”
[9] Song-chú min-lin Mô-sî
[10] tui Yî-set-lie̍t-ngìn kóng: “Ngì-têu ko Yok-tan-hò, chin-ngi̍p Kâ-nàm-thi yî-heu,
[11] yit-thin oi sién-chhut thò-sám-sàng, sṳ́ yîn-vi ko-sṳt hoi-sí ngìn ke ngìn cho-tet thò-to ke-vi,
[12] lòi sám-phit sí-chá po-sù ke chhîn-chhit. Chhai liá-vi, chhiu-son pûn-ngìn ko fam-tó chhṳ̀-ngìn chhui, mò kîn-ko kûng-khôi sṳ́m-phan, ya cho-m̀-tet chhú-sí.
[13] Ngì-têu oi sién liuk-chho sàng, lòi-cho thò-sám-sàng,
[14] sâm-chho chhai Yok-tan-hò tûng-phién, sâm-chho chhai Kâ-nàm-thi.
[15] Liá-têu sàng oi pûn Yî-set-lie̍t-ngìn, pin chhiam-sṳ̀ lâu yún-kiú he̍t ke ngoi-chhu̍k ngìn cho thò-sám-sàng, só-yû yîn-vi ko-sṳt hoi-sí ngìn ke cho-tet thò-to ke-vi hi.
[16] “Na-he yû-ngìn yung vú-hi chhṳ̀-ngìn, mò-lun kì he yung thiet-hi, sa̍k-thèu, ya-he kun-é, chhiu-he fam chhṳ̀-ngìn chhui, yit-thin oi chhú-sí.
[19] Po-hiet-sù ke chhîn-chhit oi chhîn-sú chhú-sí hiûng-sú; kì yit chhìm-tó hiûng-sú, chhiu-oi chhú-sí kì.
[20] “Na-he yû-ngìn yen-hen má-ngìn, chiông kì súng-vang, hoi kì tiet-sí, ya-he te̍p tûng-sî tá-sí kì,
[21] ya-he yung khièn-thèu tá-sí kì, ke-ngìn chhiu fam chhṳ̀-ngìn chhui, yit-thin oi chhú-sí. Po-hiet-sù ke chhîn-chhit oi chhîn-sú chhú-sí hiûng-sú; kì yit chhìm-tó hiûng-sú, chhiu-oi chhú-sí kì.
[22] “Chúng-he, na yû-ngìn m̀ tú-hó hoi-sí lâu kì chhiòn-mò yên-sù ke ngìn, mò-lun he kì chiông ngìn súng-vang, hàn-he te̍p tûng-sî tá-sí ngìn,
[23] ya-he mò khon-tó ke sṳ̀ te̍p yit-te sa̍k-thèu tá-sí kì mò sióng-oi sông-hoi ke ngìn, ke-ngìn lâu kì pin-mò yên-sù,
[24] chhai liá-chúng chhìn-hìn chṳ̂-ha, mìn-chung yin-kôi chhai ke m̀ tú-hó hoi-sí ngìn ke lâu ke po-hiet-sù ke chhîn-chhit chûng-kiên cheu fap-li̍t lòi sṳ́m-phan.
[25] Mìn-chung oi kiu ke m̀ tú-hó hoi-sí ngìn ke lì-khôi ke po-hiet-sù ke chhîn-chhit, chiông kì sung to-chón kì thò-to ke ke-chho thò-sám-sàng hi. Kì yit-thin oi he̍t chhai ke-vi, yit-chhṳ̍t to hien-ngim ke thai-chi-sṳ̂ ko-sṳ̂n.
[26] Chúng-he ke m̀ tú-hó hoi-sí ngìn ke na lì-khôi ke-chho thò-sám-sàng,
[27] ke po-hiet-sù ke chhîn-chhit chhìm-tó kì lòi chhú-sí kì, m̀-son yû-chhui.
[28] M̀ tú-hó hoi-sí ngìn ke yit-thin oi liù chhai thò-sám-sàng, tén thai-chi-sṳ̂ ko-sṳ̂n heu chang cho-tet chón-to vuk-hâ.
[29] Ngì-têu lâu ngì-têu ke heu-thoi mò-lun he̍t chhai nai-vi, chhiòn-phu oi chûn-sú liá thiàu-li.
[30] “Yû-ngìn pûn-ngìn ko fam-tó mèu-sat chhui, yit-thin oi-yû lióng-ke yî-song ke chṳn-ngìn cho-chṳn, chang cho-tet phan sí-hìn; chṳ́-yû yit-ke chṳn-ngìn hàn cho-m̀-tet sṳ̀n-li̍p chhṳ̀-ngìn-chhui.
[31] Chhṳ̀-sí ngìn ke yit-thin oi yung miang lòi-phòi, cho-m̀-tet pûn kì yung phòi-chhièn lòi su̍k-miang.
[32] Na-he yû-ngìn thò-to thò-sám-sàng, cho-m̀-tet tui kì sû su̍k-kîm, chún kì chhai thai-chi-sṳ̂ ko-sṳ̂n chhièn chón vuk-hâ.
[33] Na-he chún kì án-ngiòng, chhiu-he tá-lá-sap ngì-têu só-he̍t ke thú-thi. Chhṳ̀-ngìn chhiu-he tá-lá-sap thú-thi; chhù-fî ke chhṳ̀-ngìn ke yung chhṳ-kâ ke miang lòi-phòi, mò khì-thâ ke phan-fap lòi sṳ́ hiûng-sat-on ke thi-fông tet-tó chhiang-li.
[34] Ngì-têu cho-m̀-tet tá-lá-sap só-he̍t ke thú-thi, chhiu-he Ngài he̍t chhai khì-chûng ke thú-thi; yîn-vi Ngài — Song-chú he̍t chhai Yî-set-lie̍t-ngìn tông-chûng.”