[1] Song-chú fûn-fu Mô-sî
[2] chiông yî-ha ke chṳ́-sṳ lâu Yî-set-lie̍t-ngìn kóng: “Ngì-têu chin-ngi̍p Ngài oi su-pûn ngì-têu ke Kâ-nàm-thi yî-heu, ngì-têu ke thi-kie he án-ngiòng:
[3] Nàm-phién tui Chhìm ke khóng-yâ thèn-tén Yî-tûng piên-kie yèn-chhòng hâ-hi, chhiu-he tui Sí-hói nàm-tôn ke tûng-phién khôi-sṳ́,
[4] chón-hiong nàm-fông ke Â-khiet-lâ-pîn ai-héu, kîn-ko Chhìm, yit-chhṳ̍t hiong-nàm to Kâ-tâi-sṳ̂-Pâ-nì-â, yèn-heu hiong-sî pet-fông to Ha̍p-sat-Â-tha̍t, chai to Ap-mùn,
[5] tui ke-vi chón-hiong Âi-khi̍p piên-kie ke sân-lak, to Thi-chûng-hói vì-chṳ́.
[6] “Sî-phién ke thi-kie he Thi-chûng-hói.
[7] “Pet-phién ke thi-kie tui Thi-chûng-hói to Hò-ngí-sân,
[8] chai to Ha̍p-mâ ai-héu, yu chhṳ̍t-to Sî-tha̍t-tha̍t lâu
[9] Sî-fî-lùn, to Ha̍p-sat-Yî-nàn vì-chṳ́.
[10] “Tûng-phién ke thi-kie tui Ha̍p-sat-Yî-nàn to Sṳ-fân,
[11] yèn-heu hiong-nàm to Â-yèn tûng-phién ke Li-pí-lâ, chai to Kâ-li-li-fù tûng-ngan ke sân-kông,
[12] yèn-heu thèn-tén Yok-tan-hò nàm hâ-to Sí-hói. “Liá chhiu-he ngì-têu thú-thi si-vì ke piên-kie.”
[13] Só-yî, Mô-sî fûn-fu Yî-set-lie̍t-ngìn kóng: “Liá chhiu-he ngì-têu oi chhû-chhiâm lòi-fûn ke thú-thi, he Song-chú fûn-phi pûn kiú-chak pan kî-chhu̍k cho sán-ngia̍p ke thú-thi.
[14] Lî-phien, Kâ-tet lióng kî-chhu̍k lâu Mâ-nâ-sî pan kî-chhu̍k yí-kîn tet-tó kì-têu ke sán-ngia̍p, cheu kì-têu ke kâ-chhu̍k fûn-phi,
[15] chhiu-he chhai Yok-tan-hò tûng-phién Yâ-li-kô tui-mien ke thú-thi.”
[16] Song-chú tui Mô-sî kóng:
[17] “Chi-sṳ̂ Yî-li-â-sat lâu Nun ke lai-é Yok-sû-â oi vi ngìn-mìn fûn-phi thú-thi cho sán-ngia̍p.
[18] Tak kî-chhu̍k oi phai yit-ke liâng-chhiu hia̍p-chhu kì-têu.”
[19] Yî-ha he Song-chú só-sién ke ngìn: Yù-thai kî-chhu̍k: Yâ-fù-nì ke lai-é Kâ-le̍t; Sî-mién kî-chhu̍k: Â-mí-fut ke lai-é Sṳ-mû-li; Phien-ngâ-mén kî-chhu̍k: Kî-sṳ̂-lùn ke lai-é Yî-li-tha̍t; Tan kî-chhu̍k: Yok-li ke lai-é Pu-kî; Yok-sit ke chṳ́-sûn Mâ-nâ-sî kî-chhu̍k: Yî-fut ke lai-é Hon-ngiap; Yî-fap-lièn kî-chhu̍k: Sṳ̍p-fut-tan ke lai-é Kî-mû-li; Sî-pu-lùn kî-chhu̍k: Pha-na̍p ke lai-é Yî-li-sat-fân; Yî-sat-kâ kî-chhu̍k: Â-san ke lai-é Pha-thiet; Â-sat kî-chhu̍k: Sṳ-lò-mí ke lai-é Â-hî-fut; Nâ-fut-thâ-li kî-chhu̍k: Â-mí-fut ke lai-é Pí-thai-het.
[29] Yî-song he Song-chú chṳ́-thin vi Yî-set-lie̍t-ngìn fûn-phi Kâ-nàm thú-thi ke ngìn.