[1] Sî-lò-fî-ha̍p ke-têu moi-é he Mâ-lâ, Nò-â, Hot-lâ, Me̍t-kâ lâu Tet-sat. Sî-lò-fî-ha̍p ke â-pâ he Hî-fut; Hî-fut ke â-pâ he Kî-lie̍t; Kî-lie̍t ke â-pâ he Mâ-kit; Mâ-kit ke â-pâ he Mâ-nâ-sî; Mâ-nâ-sî ke â-pâ he Yok-sit.
[2] Sî-lò-fî-ha̍p ke ńg-ke moi-é to Song-chú ke sṳn-chong-phùng mùn-héu, khî chhai Mô-sî lâu chi-sṳ̂ Yî-li-â-sat, hàn-yû kok liâng-chhiu lâu chhiòn fi-chung mien-chhièn, tui kì-têu kóng:
[3] “Ngài-têu ke â-pâ sí chhai khóng-yâ, mò lai-é. Kì mò lâu phoi-ngia̍k Song-chú ke Khó-lâ khiung-tóng. Kì he yîn-vi chhṳ-kâ ke chhui sí ke.
[4] Kám-kóng yîn-vi ngài-têu ke â-pâ mò lai-é, chhiu-oi tui Yî-set-lie̍t chûng chiông kì ke miàng chhù-thet, he-mò? Khiù ngì-têu pûn ngài-têu chhai â-pâ ke chhîn-su̍k chûng yû hó pûn sán-ngia̍p.”
[5] Mô-sî hiong Song-chú kóng kì-têu ke on-khien.
[6] Song-chú tui kì kóng:
[7] “Sî-lò-fî-ha̍p ke-têu moi-é só yêu-khiù ke he chho̍k ke. Ngì yit-thin oi tui kì-têu â-pâ ke chhîn-su̍k chûng chiông sán-ngia̍p pûn-pûn kì-têu, pûn kì-têu sṳ̀n-chiap â-pâ ke sán-ngia̍p.
[8] Ngì oi lâu Yî-set-lie̍t-ngìn kóng, na-he yû ngìn sí-thet, chúng-he mò lai-é, chhiu-oi chiông kì ke sán-ngia̍p pûn kì ke moi-é sṳ̀n-chiap.
[9] Na-he kì mò moi-é, chhiu pûn kì ke hiûng-thi sṳ̀n-chiap;
[10] na-he kì mò hiûng-thi, chhiu pûn â-pak, â-suk sṳ̀n-chiap.
[11] Na-he kì lièn â-pak, â-suk ya mò, chhiu-oi pûn kì chhîn-chhu̍k chûng chui-chhîn ke chhîn-ngìn, lòi sṳ̀n-chiap kì ke sán-ngia̍p. Liá oi sàng-cho Yî-set-lie̍t-ngìn ke fap-li̍t. Ngài he Song-chú; Ngài án-ngiòng fûn-fu ngì.”
[12] Song-chú tui Mô-sî kóng: “Ngì oi sông liá Â-pâ-lìm-sân, yén-yén khon Ngài su-pûn Yî-set-lie̍t-ngìn ke thú-thi.
[13] Ngì khon-ko yî-heu, chhiu voi chón-to ngiâ chú-chûng ke-vi, chhiong ngiâ-kô Â-lùn khiung-yong.
[14] Yîn-vi ngì lióng-sà chhai Chhìm ke khóng-yâ vì-poi Ngài ke min-lin. Tông chhiòn fi-chung chhai Mí-li-pâ koai-yen Ngài ke sṳ̀, ngì mò chhai kì-têu mien-chhièn chûn Ngài vì-sṳn.” (Mí-li-pâ he Chhìm ke khóng-yâ Kâ-tâi-sṳ̂ ke chhièn-súi.)
[15] Mô-sî khì-tó kóng:
[16] “Chú Song-ti â, Ngì he só-yû sâng-miang ke ngièn-thèu. Khiù Ngì chṳ́-phai yit-sà cho chhiòn fi-chung ke liâng-chhiu,
[17] nèn chhai kì-têu mien-chhièn lòi chhut-ngi̍p, ya voi tai-liâng kì-têu siông-chhṳ̀, sṳ́ Ngì ke chṳ́-mìn m̀-voi chhiong mò mu̍k-ngìn ke yòng-khiùn.”
[18] Song-chú tui Mô-sî kóng: “Nun ke lai-é Yok-sû-â he yû Sṳn-lìn ke ngìn; ngì oi on-sú chhai kì thèu-nà táng.
[19] Ngì oi ham kì khî chhai chi-sṳ̂ Yî-li-â-sat lâu chhiòn fi-chung thèu-chhièn siên-ko kì he ngì ke ki-sṳ̀n-ngìn.
[20] Ngì oi chiông ngì ke khièn-li̍t pûn-pûn kì, sṳ́ Yî-set-lie̍t chhiòn fi-chung sun-fu̍k kì.
[21] Kì oi khî chhai chi-sṳ̂ Yî-li-â-sat ke mien-chhièn; Yî-li-â-sat oi yung vû-lìn lòi phan-ton Ngài ke chṳ́-yi. Án-ngiòng, Yok-sû-â lâu Yî-set-lie̍t chhiòn fi-chung oi chûn-sú Yî-li-â-sat ke min-lin lòi chhut-ngi̍p.”
[22] Mô-sî chhiu chûn-cheu Song-chú ke min-lin hi-cho. Kì ham Yok-sû-â khî chhai chi-sṳ̂ Yî-li-â-sat lâu chhiòn fi-chung mien-chhièn,
[23] cheu Song-chú ke min-lin, on-sú chhai Yok-sû-â thèu-nà táng, siên-ko kì he chhṳ-kâ ke ki-sṳ̀n-ngìn.