[1] Mô-sî sṳt thó yit-ke Kú-sṳ̍t ke se-moi-é cho pû-ngiòng; Mî-li-ôn lâu Â-lùn vi liá-khien sṳ phî-phìn Mô-sî.
[2] Kì-têu kóng: “Kám kóng Song-chú tân-tân thûng-ko Mô-sî kóng-fa? Kám m̀-he ya thûng-ko ngài-têu kóng-fa?” Liá-fa Song-chú thâng-tó lé.
[3] Mô-sî he yit-ke khiâm-pî ke ngìn; kì pí sṳ-kiên só-yû ke ngìn hàn-kha khiâm-pî.
[4] Song-chú fut-yèn tui Mô-sî, Â-lùn lâu Mî-li-ôn kóng: “Ngì sâm-sà to Ngài sṳn-chong-phùng liá-vi lòi.” Kì sâm-sà chhiu hi lé.
[5] Song-chú chhai yùn-chhû chûng kong-lìm, khî chhai sṳn-chong-phùng mùn-héu, ham-kóng: “Â-lùn! Mî-li-ôn!” Kì lióng-sà chhiu khî chhut-lòi.
[6] Song-chú kóng: “Ngì-têu thâng Ngài kóng! Ngì-têu tông-chûng yû siên-tî ke sṳ̀, Ngài — Song-chú chhai yi-siong chûng hiong kì khí-sṳ Ngài chhṳ-kâ, chhai mung-chûng tui kì kóng-fa.
[7] Chúng-he Ngài ke phu̍k-ngìn Mô-sî m̀-he án-ngiòng; Ngài phai kì kón-lî Ngài só-yû ke chṳ́-mìn.
[8] Só-yî Ngài lâu kì mien-tui-mien kóng-fa, chhîn-chhîn chhú-chhú, m̀-sṳ́ yung liang-é. Kì sṳm-chṳ khon Ngài — Song-chú ke hìn-siong! Ngì-têu ngióng-pân án thai-tám phî-phìn Ngài ke phu̍k-ngìn Mô-sî nè?”
[9] Song-chú hiong kì-têu fat-khién, chhiu lì-khôi kì-têu.
[10] Yùn tui sṳn-chong-phùng táng-kô sái-khôi ke sṳ̀, Mî-li-ôn ke phì-fû fut-yèn pot thái-kô chhiong siet án-pha̍k. Â-lùn khon-tó Mî-li-ôn pot thái-kô,
[11] chhiu tui Mô-sî kóng: “Thai-ngìn â, khiù ngì m̀-hó pûn ngài-têu yîn-vi ngong-tong fam-chhui lòi su-tó liá-ke chit-fa̍t.
[12] M̀-hó pûn Mî-li-ôn chhiong yit chhut mû-thôi chhiu mièn-thet yit-pan ke sí-thôi.”
[13] Mô-sî chhiu hiong Song-chú khì-khiù kóng: “Song-ti â, khiù Ngì yî-chhṳ kì!”
[14] Song-chú en Mô-sî kóng: “Na-he kiâ-pâ phi héu-lân chhai kì ke mien, kì ya yin-kôi ngiûn-su chhit-ngit ke kien-seu. Liá-ha, oi chiông kì koân chhai yàng-ngoi chhit-ngit, yèn-heu chang cho-tet tai kì chón-lòi.”
[15] Só-yî, Mî-li-ôn pûn-ngìn koân chhai yàng-ngoi chhit-ngit; ngìn-mìn tén kì chón-lòi heu chang sái-yàng.
[16] Kì-têu lì-khôi Ha̍p-sé-liu̍k, lòi-to Pâ-làn khóng-yâ ôn-yàng.