[1] Pâ-làn tui Pâ-le̍t kóng: “Ngì oi chhai liá-vi vi ngài hí chhit-chho chi-thàn, yu vi ngài chún-phi chhit-chak ngiù-kú lâu chhit-chak yòng-kú.”
[2] Pâ-le̍t cheu kì fûn-fu hi-cho; kì lâu Pâ-làn chhai tak-chho chi-thàn hien yit-chak ngiù-kú lâu yit-chak yòng-kú.
[3] Pâ-làn tui Pâ-le̍t kóng: “Ngì khî chhai ngì ke sêu-fa-chi sùn-thèu; ngài hi khon Song-chú oi kien ngài mò. Kì khí-sṳ ngài má-ke, ngài yit-thin lâu ngì kóng.” Só-yî Pâ-làn tân-sà sông-to sân-táng.
[4] Song-ti hiong Pâ-làn hién-hien; Pâ-làn kóng: “Ngài yí-kîn hí chhit-chho chi-thàn, chhai tak-chho chi-thàn hien yit-chak ngiù-kú lâu yit-chak yòng-kú.”
[5] Song-chú lâu Pâ-làn kóng yin-kôi kóng ke fa, yèn-heu ham kì to-chón Pâ-le̍t ke-vi hi, chiông Song-chú ke fa lâu Pâ-le̍t kóng.
[6] Pâ-làn chón-hi, fat-hien Pâ-le̍t lâu só-yû Mô-ap ke liâng-chhiu hàn khî chhai sêu-fa-chi sùn-thèu.
[7] Pâ-làn chhiu kóng-chhut yî-ha ke yi-ngièn: “Mô-ap-vòng Pâ-le̍t tai ngài chhut Si-li-â, tai ngài chhut tûng-phién ke sân. Kì kóng: ‘Lòi â, vi ngài chu-chú Ngâ-kok; lòi â, vi ngài chu-ma Yî-set-lie̍t.’
[8] Song-ti mò chu-chú ke, ngài ngióng cho-tet chu-chú? Song-chú mò chu-ma ke, ngài ngióng cho-tet chu-ma?
[9] Ngài tui kô-sân táng khon kì-têu; ngài tui sân-kông táng kien kì-têu. Kì-têu he yit-ke lâu van-mìn mò khiung-yong ke koet-kâ; kì-têu pí phe̍t ke koet-kâ hàn-kha mùng-fuk.
[10] Ngâ-kok ke chṳ́-sûn chhiong nài-sâ án-ngiòng; Yî-set-lie̍t ke heu-thoi tô-to mò fap-thu kie-son. Pûn ngài chhiong Song-ti ke chṳ́-mìn án-ngiòng kiet-suk yit-sên; ngài ngien chhiong ngi-ngìn án-ngiòng phìn-ôn ko-sṳ̂n.”
[11] Pâ-le̍t tui Pâ-làn kóng: “Ngì tui ngài cho ke he má-ke? Ngài tai ngì to liá-vi lòi chu-chú ngài ke thi̍t-ngìn, ngì fán-chón sa chuk-fuk kì-têu!”
[12] Pâ-làn en-kóng: “Ngài tân-chhiang cho-tet kóng Song-chú oi ngài kóng ke fa!”
[13] Pâ-le̍t tui Pâ-làn kóng: “Ngì thèn ngài to nang-ngoi yit-ke thi-fông hi, tui ke-vi ngì chṳ́-yû khon tet-tó phu-fun ke Yî-set-lie̍t-ngìn. Ngì oi chhai ke-vi vi ngài chu-chú kì-têu!”
[14] Kì tai Pâ-làn to Pí-sṳ̂-kâ-sân táng-kô ke Só-fî-thièn, chhai ke-vi ya hí chhit-chho chi-thàn, chhai tak-chho chi-thàn hien yit-chak ngiù-kú lâu yit-chak yòng-kú.
[15] Pâ-làn tui Pâ-le̍t kóng: “Ngì khî chhai ngì ke sêu-fa-chi sùn-thèu, ngài to ke-phién hi kien Song-ti.”
[16] Song-chú hiong Pâ-làn hién-hien, lâu kì kóng yin-kôi kóng ke fa, yèn-heu ham kì to-chón Pâ-le̍t ke-vi hi, chiông Song-chú ke fa lâu Pâ-le̍t kóng.
[17] Pâ-làn chón-hi, fat-hien Pâ-le̍t lâu Mô-ap ke-têu liâng-chhiu hàn khî chhai sêu-fa-chi sùn-thèu. Pâ-le̍t mun kì Song-chú kóng má-ke fa,
[18] Pâ-làn chhiu kóng-chhut yî-ha ke yi-ngièn: “Lòi â, Sî-pat ke lai-é Pâ-le̍t; ngì lòi-thâng ngài oi kóng ke fa.
[19] Song-ti lâu ngìn mò khiung-yong, Kì m̀-kóng fâ-liâu; Kì m̀-chhiong phû-thûng ngìn, Kì m̀-voi kói-pien chú-yi. Kì tap-yin ke sṳ, yit-thin cho-to; Kì yit kóng-fa, sṳ chhiu vàn-sṳ̀n.
[20] Ngài fung Chú min-lin lòi chuk-fuk; Song-ti su ke ên-tién, ngài mò fap-thu sû chón-lòi.
[21] Ngài khon-chhut Ngâ-kok ke chiông-lòi, Yî-set-lie̍t mò châi-nan, ya-mò châi-fo. Song-chú — kì-têu ke Song-ti lâu kì-têu thùng-chhai; kì-têu fôn-hí khin-chuk Song-chú cho kì-têu ke vòng.
[22] Song-ti thu kì-têu chhut Âi-khi̍p; Kì tá-thui Âi-khi̍p, chhiu-chhiong yâ-ngiù án yû li̍t.
[23] Fap-su̍t mò fap-thu hoi Ngâ-kok; puk-koa ya mò phan-fap hoi Yî-set-lie̍t. Liá-ha, ngìn oi thàm-lun Ngâ-kok, chhiu-he thàm-lun Yî-set-lie̍t, kóng: ‘Khon nâ, Song-ti sṳ̀n-chhiu ví-thai ke sṳ!’
[24] Yî-set-lie̍t-ngìn chhiong mû-sṳ̂ khî hí-lòi, chhiu-chhiong kûng-sṳ̂ hong hí-lòi chhìm-sṳ̍t; kì na mò sṳ̍t-thet lia̍p-vu̍t ke ngiuk, mò lîm-tó lia̍p-vu̍t ke hiet, kì chhie̍t-tui m̀-hén thìn.”
[25] Pâ-le̍t tui Pâ-làn kóng: “Ngì m̀ chu-chú Yî-set-lie̍t-ngìn, chṳ-séu ya m̀ yin-kôi chuk-fuk kì-têu â!”
[26] Pâ-làn en-kóng: “Ngài m̀-he yû lâu ngì kóng-ko, ngài yit-thin oi cheu Song-chú só-kóng ke fa cho!”
[27] Pâ-le̍t tui Pâ-làn kóng: “Thèn ngài lòi! Ngài oi tai ngì to nang-ngoi yit-ke thi-fông; yû khó-nèn Song-ti voi pûn ngì chhai ke-vi vi ngài chu-chú kì-têu.”
[28] Pâ-le̍t chhiu tai Pâ-làn to ke yén-yén khon tet-tó khóng-yâ ke Phî-ngí-sân táng-kô.
[29] Pâ-làn tui Pâ-le̍t kóng: “Ngì oi chhai liá-vi vi ngài hí chhit-chho chi-thàn, yu vi ngài chún-phi chhit-chak ngiù-kú lâu chhit-chak yòng-kú.”
[30] Pâ-le̍t cheu Pâ-làn ke fa hi-cho, chhai tak-chho chi-thàn hien yit-chak ngiù-kú lâu yit-chak yòng-kú.