[1] Song-chú tui Mô-sî kóng:
[2] “Ngì oi min-lin Yî-set-lie̍t-ngìn, chiông ke-têu mò chhiang-li ke ngìn — pot thái-kô ke, pot yì-leu-chṳn ke, miâ-tó sṳ̂-thí ke ngìn, chhiòn-phu kiuk-chhut yàng-thi.
[3] Mò-lun nàm-ńg, oi chiông só-yû chhai lî-ngì song mò chhiang-li ke ngìn kiuk chhut-hi, kì-têu chhiu m̀-voi tá-lá-sap yàng-thi, chhiu-he Ngài só-he̍t ke thi-fông.”
[4] Yî-set-lie̍t-ngìn chûn-cheu min-lin, chiông án-ngiòng ke ngìn chhiòn-phu kiuk-to yàng-ngoi hi. Song-chú ngióng-pân fûn-fu Mô-sî, Yî-set-lie̍t-ngìn chhiu án-ngiòng cho.
[5] Song-chú lâu Mô-sî kóng,
[6] oi Yî-set-lie̍t-ngìn chûn-hàng yî-ha ke chṳ́-sṳ: Mò-lun nàm-ńg, na-he yû-ngìn vì-poi Song-chú, cho fái-sṳ lòi tet-chhui phe̍t-ngìn, kì chhiu yû-chhui;
[7] kì yit-thin oi sṳ̀n-ngin chhṳ-kâ ke m̀-chho̍k, chiông só khûi-khiam ke chhiòn-su vàn-pûn kì só tet-chhui ke ngìn, nang-ngoi chai kâ ńg-fûn chṳ̂-yit.
[8] Na-he ke-ngìn yí-kîn sí-thet, yu mò chhîn-chhit hó chiap-su phòi-sóng, chhiu-oi chiông chhièn hien-pûn Song-chú, pûn chi-sṳ̂ sṳ́-yung. Liá he lî-ngì só kûi-thin su̍k-chhui-chi ke yòng-kú yî-ngoi chai-kâ ke yit-hong phòi-sóng.
[9] Tak-ke Yî-set-lie̍t-ngìn pûn Song-chú ke thi̍t-phe̍t fung-hien chhiòn-phu oi kûi-pûn vi kì-têu kí-hàng fung-hien-lî ke chi-sṳ̂.
[10] Tai-to chi-sṳ̂ mien-chhièn ke thi̍t-phe̍t lî-vu̍t chhiòn-phu oi kûi-pûn chi-sṳ̂.
[11] Song-chú min-lin Mô-sî,
[12] oi chiông yî-ha ke chṳ́-sṳ lâu Yî-set-lie̍t-ngìn kóng. Yû-ngìn fài-ngì chhṳ-kâ ke pû-ngiòng mò sú chṳ̂n-chiet, lâu phe̍t ke nàm-ngìn yû sin koân-he, siû-yu̍k tó kì.
[13] Chúng-he liá ló-kûng mò phan-fap khok-thin liá-khien sṳ, yîn-vi kiâ pû-ngiòng m̀ sṳ̀n-ngin, yu mò chṳn-ngìn, ya mò tông-chhòng chok-tó.
[14] Nang-ngoi khó-nèn pû-ngiòng kîn-pún mò tui-m̀-hí ló-kûng, he ló-kûng sîm-kôn chhit-tu, thet-voi fài-ngì kì.
[15] Mò-lun he nai-chúng chhìn-hìn, liá-ngìn yit-thin oi chiông pû-ngiòng tai-to chi-sṳ̂ mien-chhièn. Kì thùng-sṳ̀ oi tai vi pû-ngiòng hien ke chi-vu̍t, chhiu-he yit kûng-kîn ke thai ma̍k-fún. Kì cho-m̀-tet chhai táng-kô kiâu kám-lám-yù ya-he kâ nen-hiông; yîn-vi liá he ngì-sîm ke ló-kûng só-hien ke su-chi, he oi-pûn chṳ̂n-siong hién-mìn ke su-chi.
[16] Chi-sṳ̂ oi thu ke fu-ngìn-kâ hàng chhièn-lòi, khî chhai Song-chú ke mien-chhièn.
[17] Chi-sṳ̂ oi tó yit-si̍t-é sṳn-súi chhai vón-tú, chiông sṳn-chong-phùng thi-song ke nài-fún ve têu-é chhai súi tî-poi,
[18] yèn-heu chiông ke fu-ngìn-kâ ke thèu-nà-mô sûng-khôi, chiông oi hien ke su-chi (chhiu-he sṳ̂-ngiam ke su-chi, fài-ngì ke su-chi) piong chhai kì sú-chûng. Chi-sṳ̂ ke sú oi têu-tén chu-chú ke fú-súi.
[19] Chiap-tén, chi-sṳ̂ oi-ham ke fu-ngìn-kâ fat-sṳ, thùng-yi chi-sṳ̂ só-kóng yî-ha ke fa: “Na-he ngì mò lâu ngìn thûng-kiên, mò vì-poi ló-kûng cho vû-ve ke sṳ, ngì chhiu m̀-voi su-tó liá fú-súi só tai-lòi ke chu-chú.
[20] Na-he ngì sṳt lâu ngìn thûng-kiên, vì-poi ló-kûng cho vû-ve ke sṳ,
[21] ngien Song-chú sṳ́ ngì ke thùng-pâu chu-chú ngì; ngien Kì sṳ́ ngì ke tú-sṳ́ chong hí-lòi, chṳ́-kiûng kiû-thet.
[22] Ngien liá-súi chin-ngi̍p ngì ke tú-sṳ́, sṳ́ ngì ke tú-sṳ́ chong hí-lòi, ngì ke chṳ́-kiûng kiû-thet.” Ke fu-ngìn-kâ oi en-kóng: “Ngài thùng-yi. Ngien Song-chú ke chṳ́-yi sṳ̍t-hien.”
[23] Yèn-heu, chi-sṳ̂ oi chiông liá chu-chú siá hâ-lòi, chiông siá-hâ ke sṳ piong chhai fú-súi vón-tú sé-thet.
[24] Chhai chi-sṳ̂ hàn-màng ham ke fu-ngìn-kâ lîm liá fú-súi yî-chhièn, (liá fú-súi khó-nèn voi sṳ́ kì fî-sòng thung-khú,)
[25] chi-sṳ̂ oi chiông fu-ngìn-kâ sú-chûng ke fài-ngì ke su-chi nâ ko-lòi, chhai Song-chú mien-chhièn yèu kí-ha, nâ to chi-thàn ke thèu-chhièn,
[26] yèn-heu yá yit-kha̍k mien-fún cho liá-sṳ ke ki-ngiam, chhai chi-thàn táng sêu-thet. Chui-heu, chi-sṳ̂ oi chiông liá-súi ham ke fu-ngìn-kâ lîm lo̍k-hi.
[27] Na-he kì khok-sṳ̍t lâu ngìn thûng-kiên, vì-poi ló-kûng cho vû-ve ke sṳ, liá tai-lòi chu-chú ke súi voi sṳ́ kì thai thung-khú, tú-sṳ́ voi chong hí-lòi, chṳ́-kiûng kiû-thet. Kì voi pûn thùng-pâu chu-chú.
[28] Na-he ke fu-ngìn-kâ mò-chhui, son-he chhiang-li ke, kì chhiu m̀-voi su-tó sông-hoi, hàn-he voi sên-yuk.
[29] Liá fài-ngì ke fap-li̍t he yû-koân fu-ngìn-kâ vì-poi ló-kûng cho vû-ve ke sṳ,
[30] ya-he ló-kûng chhit-tu, fài-ngì pû-ngiòng mò sú chṳ̂n-chiet. Ke fu-ngìn-kâ oi khî chhai Song-chú ke mien-chhièn, chi-sṳ̂ oi chṳp-hàng liá ngì-sṳt.
[31] Ló-kûng chhiu mò-chhui. Na-he ke fu-ngìn-kâ yû-chhui, kì yit-thin oi chhṳ-kâ tâm-tông.