[1] Mô-sî chiông yî-ha ke chṳ́-sṳ kâu-pûn Yî-set-lie̍t tak kî-chhu̍k ke liâng-chhiu. Song-chú só min-lin ke chhiu-he án-ngiòng:
[2] Yû ngìn hiong Song-chú hí-ngien, ya-he fat-sṳ lòi yok-suk chhṳ-kâ, lûng-chúng cho-m̀-tet sṳt-sin, yit-thin oi cheu kì só kóng ke hi-cho.
[3] Se-moi-é hàn chhai â-pâ vuk-hâ ke sṳ̀, na-he hiong Song-chú hí-ngien, ya-he fat-sṳ lòi yok-suk chhṳ-kâ,
[4] chhù-fî kiâ-pâ thâng-tó ke sṳ̀ fán-tui, kì chhiu yit-thin oi cheu só-hí ke ngien hi-cho, ya-he cheu só fat ke sṳ lòi yok-suk chhṳ-kâ.
[5] Na-he kiâ-pâ thâng-tó ke sṳ̀ m̀ chún kì vàn-ngien ya-he yok-suk chhṳ-kâ, kì chhiu m̀-sṳ́ chûn-sú. Song-chú voi ngièn-liong kì, yîn-vi kiâ-pâ m̀ chún kì chûn-sú.
[6] Na-he màng kiet-fûn ke se-moi-é hí-ngien, ya-he lon fat-sṳ lòi yok-suk chhṳ-kâ, kiet-fûn yî-heu,
[7] chhù-fî kiâ ló-kûng thâng-tó ke sṳ̀ fán-tui, kì chhiu yit-thin oi cheu só-hí ke ngien hi-cho, ya-he cheu só fat ke sṳ lòi yok-suk chhṳ-kâ.
[8] Na-he kiâ ló-kûng thâng-tó ke sṳ̀ m̀ chún kì vàn-ngien ya-he yok-suk chhṳ-kâ, kì chhiu m̀-sṳ́ chûn-sú. Song-chú voi ngièn-liong kì.
[9] Koá-fu ya-he lì-fûn ke fu-ngìn-kâ só-hí ke ngien, ya-he fat-sṳ oi yok-suk chhṳ-kâ ke fa, chhiòn-phu oi chûn-sú.
[10] Na-he yí-kîn kiet-fûn ke fu-ngìn-kâ hí-ngien, ya-he fat-sṳ oi yok-suk chhṳ-kâ,
[11] chhù-fî kiâ ló-kûng thâng-tó ke sṳ̀ fán-tui, kì chhiu yit-thin oi cheu só-hí ke ngien hi-cho, ya-he cheu só fat ke sṳ lòi yok-suk chhṳ-kâ.
[12] Na-he kiâ ló-kûng thâng-tó ke sṳ̀ m̀ chún kì vàn-ngien ya-he yok-suk chhṳ-kâ, kì chhiu m̀-sṳ́ chûn-sú. Song-chú voi ngièn-liong kì, yîn-vi kiâ ló-kûng m̀ chún kì chûn-sú.
[13] Kiâ ló-kûng yû-khièn khok-ngin ya-he chhí-sêu kì só-hí ke ngien lâu só fat ke sṳ.
[14] Chúng-he, kiâ ló-kûng thâng-tó kì hí-ngien, yit-ngit ko yit-ngit tiâm-tiâm mò fán-tui, kì chhiu yit-thin oi cheu só-hí ke ngien hi-cho, ya-he cheu só fat ke sṳ lòi yok-suk chhṳ-kâ. Kiâ ló-kûng chhai thâng-tó kì hí-ngien ke-ngit mò fán-tui, chhiu-he khok-ngin kì só-hí ke ngien.
[15] Heu-lòi, na-he kiâ ló-kûng chhí-sêu kì só-hí ke ngien ya-he só fat ke sṳ, ló-kûng chhiu oi tâm-tông kiâ pû-ngiòng ke chhui-ngiak.
[16] Liá he Song-chú kâu-pûn Mô-sî yû-koân he̍t chhai â-pâ vuk-hâ màng kiet-fûn ke se-moi-é ya-he yí-kîn kiet-fûn ke fu-ngìn-kâ hí-ngien lâu fat-sṳ ke thiàu-li.