[1] Ngìn chhai sṳ-kiên, chhiu chhiong cho-pîn pà chhûng-tâm, ngit-ngit ko chhiong kûng-ngìn lò-khú ke sên-fa̍t,
[2] chhiong nù-chhòi hot-mu ngit-thèu lo̍k-sân, chhiong chhiáng ke kûng-ngìn tén fat kûng-chhièn.
[3] Ngài chu-thin ko khun-khú ke ngit-ngie̍t; tak am-pû chṳ́-yû yù-sèu thung-khú.
[4] Ngài vang lo̍k-hi soi-muk, kám-kok am-pû-sṳ̀ ngióng-voi án-chhòng, fân ko-lòi fân ko-hi, yit-chhṳ̍t to thiên-kông soi m̀-lo̍k kau.
[5] Ngài kûi-sṳ̂n sâng-chhùng, kung-nùng; phì-ngiuk sû-héu yu lan-thet.
[6] Ngài ke ngit-è pí sô kha-kiak, chhiòn-phu chhai sṳt-mong chûng ko-thet.
[7] Song-ti â, khiù Ngì ki-tet, ngài ke sâng-miang chhiu chhûn-tó yit-héu hi; ngài m̀-voi chai khon-tó hen-fuk ke ngit-è.
[8] Ngì liá-ha khon-tén ngài, mò kí-kiú voi khon ngài m̀-tó; na-he sióng-oi chhìm ngài, ke-sṳ̀ ngài yí-kîn mò-chhôi lé.
[9] Chhiong yùn san-thet yit-yong, ngìn yit sí chhiu m̀-voi to-chón-lòi;
[10] kì m̀-voi chai chón-to kiâ vuk-hâ, ku-hiông ke ngìn ya m̀ ki-tet kì.
[11] Yîn-vi án-ngiòng, ngài mò-oi chai tiâm-tiâm! Ngài oi kóng-chhut ngài sîm-lìn ke yù-sèu; ngài oi tho-than ngài nui-sîm ke thung-khú.
[12] Song-ti â, Ngì cho-má-ke kam-sṳ ngài? Kám-kóng Ngì chiông ngài chún-cho hói-koai mâ?
[13] Ngài sông mìn-chhòng sióng hiet-khun yit-ha, hî-mong voi kám-khiâng ngài ke thung-khú;
[14] Ngì sa yung ok-mung lòi sṳ́ ngài chho̍k-kiâng, yung tet-ngìn-kiâng ke yi-siong lòi-hak ngài.
[15] Só-yî, ngài kâm-ngien káng-sí, kha-yàng liù-tén yit-sṳ̂n kut-thèu.
[16] Ngài tông sióng-oi sí, ngài ke sâng-miang mò pan-tiám sên-chhi; khiù Ngì mo̍k chhap ngài, ngài ke ngìn-sên vàn-chhiòn mò yi-ngi.
[17] Ngìn son má-ke, Ngì án khon-chhûng kì? Ngì ngióng voi chiông kì piong chhai sîm-song?
[18] Ngì tak chêu-sṳ̀n kam-chhat kì, sṳ̀-sṳ̀ khiet-khiet kháu-ngiam kì.
[19] Ngì oi to kí-sṳ̀ chang hén piong-ko ngài, pûn ngài thûn yit-ha héu-lân hó-mò?
[20] Kam-chhat ngìn ke Chú â, kám-kóng ngài ke chhui ngoi-tó Ngì he-mò? Cho-má-ke chiông ngài chún chien-pá lòi sa? Ngài sàng-cho Ngì án-thai ke chhûng-tâm mâ?
[21] Ngì ngióng m̀ sa-miên ngài ke ko-sṳt? Ngì ngióng m̀ chhù-thet ngài ke chhui-ok? Ngài mò kí-kiú chhiu voi ngi̍p fùn-mu; Ngì chhìm ngài, ngài yí-kîn mò-chhôi lé.