[1] Ngài chhin nâu chhṳ-kâ ke sâng-miang. Ngài oi kóng-chhut ngài ke ôi-yen; ngài oi chiông nui-sîm ke thung-khú chhiòn-phu piang chhut-lòi.
[2] Song-ti â, m̀-hó thin ngài yû-chhui; lâu ngài kóng, Ngì oi ko ngài má-ke?
[3] Chhîn-sú só chhóng-chho ke, Ngì ap-chṳ yu khon-khiâng, fái-ngìn só kie-mèu ke, Ngì seu mî-mî chan-sṳ̀n. Ngì án-ngiòng cho kám yû ha̍p-lî?
[4] Ngì ke khon-fap lâu ngìn ke khon-fap khiung-yong he-mò?
[5] Kám-kóng Ngì ke su-miang lâu ngìn ke su-miang phiàng-chhòng?
[6] Án-ngiòng, Ngì cho-má-ke chhà ngài ke chhui? Ngì cho-má-ke chhìm ngài ke ko-sṳt?
[7] Ngì mìn-mìn tî ngài mò-chhui; Ngì tî mò-ngìn nèn kiu ngài thot-lì Ngì ke sú.
[8] Ngì chhîn-sú chhóng-chho ngài, sṳ́ ngài yû ngìn-hìn; liá-ha chón ko-lòi, oi chhîn-sú fí-me̍t ngài.
[9] Khiù Ngì m̀-hó m̀ ki-tet Ngì he yung nài chho ngài; Ngì liá-ha yu oi sṳ́ ngài kûi-chón chhṳ̀n-thú he-mò?
[10] Ngì m̀-he chiông ngài chhiong nen tó chhut-lòi, sṳ́ ngài chhiong nen-lo̍k khièn-kiet sṳ̀n-thôi mâ?
[11] Ngì yung kîn-kut chiông ngài chhiòn-sṳ̂n lièn-kiet hí-lòi; Ngì yu yung ngiuk lâu phì pâu-tén ngài ke kîn-kut.
[12] Ngì su-pûn ngài sâng-miang lâu chhṳ̀-oi; Ngì khon-ku pó-chhiòn ngài ke sîm-lìn.
[13] Liá-ha ngài chang tî Ngì ke sîm-yi; Ngì chó chhiu tá-son oi sông-hoi ngài.
[14] Ngì chu-yi ngài he m̀-he yû fam-chhui; na-he yû-chhui, Ngì m̀-hén sa-miên ngài.
[15] Ngài yit-ha fam-chhui, ngiàm-sṳ̀ chhiu su chit-fa̍t, mò fam-chhui, thèu-nà ya m̀-kám khià hí-lòi; yîn-vi ngài mân-sîm kien-seu, sṳ̍t-chhin khú-nan.
[16] Ngài tông tet-yi, Ngì chhiu-chhiong sṳ̂-é oi chok ngài; Ngì sṳm-chṳ hàn-he yung sṳ̀n-chiak lòi sông-hoi ngài.
[17] Ngì chúng-he yû tá-kit ngài ke chṳn-kí; Ngì tui ngài ke su-hi yû kâ mò kám, chhiong phai kiûn-chhui lìn-tén lòi kûng-kit ngài.
[18] Song-ti â, Ngì cho-má-ke pûn ngài chhut mû-thôi nè? Ngìn màng khon-tó ngài yî-chhièn, ngióng m̀ pûn ngài thôn-hi?
[19] Ngài yit chhut mû-thôi chhiu pûn-ngìn sung-hi fùn-mu, chhiu-chhiong mò chhut-se, án-ngiòng kám m̀-voi kha-hó?
[20] Ngài ke yit-sên kám m̀-he oi kiet-suk lé? Piong ngài ko nâ! Khiù Ngì pûn ngài chhai chhûn-tó ke ngit-è yû yit-si̍t ôn-lo̍k.
[21] Ngài oi chéu lê, mò khó-nèn to-chón-lòi; ngài oi hi sí-yîm vû-am ke só-chhai.
[22] Ke-phién chṳ́-yû vû-am, sí-yîm, mò chṳt-si; chhai ke-vi, lièn kông ya hàn-he am sò-sò.