[1] Yok-pak en-kóng:
[2] Ngì-têu oi hoi ngài pî-sông to kí-sṳ̀? Yung fa-ngî lòi châu-tha̍p ngài to kí-kiú?
[3] Ngì-têu yit-pái yu yit-pái vú-yu̍k ngài; án-ngiòng khî-fu ngài me m̀-voi kien-seu.
[4] Chhiu-son ngài chṳn-kîn yû m̀-chho̍k, ngài ke m̀-chho̍k chhṳ-kâ sṳ̀n-tâm.
[5] Ngì-têu láu-tó chhṳ-kâ pí ngài kha liòng-san, chiông ngài ke thung-khú chún-cho ngài fam-chhui ke chṳn-kí.
[6] Oi tî he Song-ti sṳ́ ngài su-khú; he Kì phû lò-mióng lòi pâu-vì ngài.
[7] Ngài hêm yên-vóng, mò ngìn en ngài; ngài khiù kûng-chṳn, mò ngìn chhap ngài.
[8] Song-ti làn-tén ngài, m̀ pûn ngài ko; Kì sṳ́ vû-am châ-tén ngài ke lu.
[9] Kì chhióng ngài ke chûn-yùng, pho-fái ngài ke miàng-sâng.
[10] Kì tui si-mien pat-fông kûng-kit ngài, chiông ngài ke hî-mong lièn-kîn pâng-thet.
[11] Song-ti hiong ngài fat-khién, chiông ngài chún-cho sù-thi̍t.
[12] Kì phai kiûn-chhui kûi-chhṳn lòi kûng-kit ngài, chhai ngài chong-phùng sùn ôn-yàng vì-khun ngài.
[13] Song-ti sṳ́ ngài ke-têu hiûng-thi lì-khôi ngài; ngài su̍k-sṳ ke ngìn khon ngài cho ko-lu-hak.
[14] Ngài ke chhîn-ngìn chhiòn-phu lâu ngài mò lòi-vông, ngài ke phèn-yû lûng-chúng m̀ ki-tet ngài lé.
[15] He̍t-ko ngài vuk-hâ ke ngìn-hak khon ngài cho ngoi-ngìn; lièn ke-têu sṳ́-ńg ya chiông ngài khon-cho sâng-fun ngìn.
[16] Ngài ham phu̍k-ngìn, kì m̀ en ngài; khiù kì pông-chhu, ya m̀-tap ngài.
[17] Ngài théu-hi tông chhu, ngâ pû-ngiòng phi-to kiâng; ngài ke hiûng-thi ya m̀ ngien-yi hàng-kiâm ngài.
[18] Lièn se-ngìn-è ya chhiòn-phu khon-khiâng ngài; ngài yit hong hí-lòi, kì-têu chhiu seu ngài.
[19] Ngài chui siông-hó ke phèn-yû nâu ngài; chui-siak ke ngìn ya tui ngài pien-mien.
[20] Ngài kûi-sṳ̂n phì-pâu-kut, chhûn yit-héu hi thin-thin.
[21] Ngài ke phèn-yû â, khó-lièn ngài! Khó-lièn ngài! Yîn-vi Song-ti ke sú yí-kîn tá-vang ngài.
[22] Cho-má-ke ngì-têu oi chhiong Song-ti án-ngiòng hìn-fa̍t ngài? Ngì-têu kâ-pûn ngài ke thung-khú hàn m̀-la chhûng he-mò?
[23] Ngài sṳ̍p-fûn hî-mong yû-ngìn ki-liu̍k ngài kóng-ko ke fa, chiông ngài ke fa chhiòn-phu siá cho sû!
[24] Ya-he yung thiet tiâu-khiet, yung yèn chu-sṳ, siông chhai phàn-sa̍k táng, pó-chhùn to yún-yén.
[25] Chúng-he, ngài tî ngài ke Kiu-su̍k Chú hàn-chhôi; chui-heu, Kì voi lòi vi ngài sṳ̂n-yên.
[26] Chhiu-son ngài ke phì-ngiuk pûn phiang-thung phai-fái, thôn-hi yî-chhièn, ngài hàn-he voi khon-tó Song-ti.
[27] Ngài voi chhîn-muk khon-tó Kì, Kì tui ngài pin-mò sâng-fun. Ngài ke sîm-kôn hot-mu to fûn-thet!
[28] Ngì-têu ngióng kóng: “Ngài-têu oi ngióng-pân lòi châu-tha̍p kì? Kì tù-tó châi-fo ngièn-yîn hàn-he chhai kì chhṳ-kâ.”
[29] Ngài kín-ko ngì-têu: Oi kiâng tô-kiam; liá tô-kiam tai-lòi Song-ti tui chhui ke thai fat-khién. Ngì-têu oi tî yû yit-vi sṳ́m-phan ke Song-ti.