[1] Song-chú ki-siu̍k lâu Yok-pak kóng:
[2] Hau-au ke Yok-pak â, ngì oi lâu Chhiòn-nèn-chá lî-lun; ngì kám lâu Ngài phien-pok, liá-ha ngì cho-tet en Ngài â.
[3] Yok-pak fì-tap Song-chú kóng:
[4] Ngài son má-ke? Hàn oi ngióng-pân en Ngì nè? Ngài êm-tén choi, m̀-kám chai kóng lé.
[5] Kóng yit-pái chhiu la lé; ngài mò-oi kâ-kóng lé.
[6] Só-yî, Song-chú tui thai-fûng tông-chûng lâu Yok-pak kóng:
[7] Khî hí-lòi, chhiong yit-ke yúng-kám ke ngìn; Ngài mun ngì, ngì lòi chṳ́-kau Ngài.
[8] Ngì sióng-oi chṳn-mìn Ngài mò kûng-tong, thin Ngài yû-chhui, lòi hién-chhut chhṳ-kâ chang chho̍k he-mò?
[9] Ngì yû chhiong Ngài án-thai ke nèn-li̍t mò? Ngì voi fat-chhut tá lùi-kûng ke sâng mò?
[10] Ngì na-he voi, chhiu hi yung chûn-kui lâu chông-ngiàm lòi tá-pan, yung chûn-ngiàm lâu kông-yùng cho sâm-fu.
[11] Ngì khon ke-têu kiêu-ngau ke ngìn; ngì hi thai fat-khién, met-sôi kì-têu â!
[12] Ngì hi chiông ngì só khon-tó ke-têu kiêu-ngau ke ngìn lâi hâ-lòi; chiông cho fái-sṳ ke ngìn chien-tha̍p chhai kì-têu ke pún-thi.
[13] Hi chiông kì-têu chhiòn-phu mài-chong; chiông kì-têu khún chhai yîm-kiên â!
[14] Na-he án-ngiòng, Ngài chhiu voi chan-mî ngì, sṳ̀n-ngin ngì chhṳ-kâ yû nèn-li̍t tet-tó sṳn-li.
[15] Khon ke án-thai ke hò-mâ â; Ngài chho kì, ya chho ngì. Kì chhiong ngiù án-ngiòng sṳ̍t-chhó;
[16] kì ke hi-li̍t chhai tông-chap ke yêu-kiên! Kì ke nèn-li̍t chhai kiet-sṳ̍t ke tú-sṳ́!
[17] Kì ke mî khieu hí-lòi chhiong hiông-pak-su; kì thai kiok-pí ke ngiuk ngióng-pân yúng-khien!
[18] Kì ke kut-thèu chhiong thùng-kón; kì ke kiok chhiong thiet kun-é.
[19] Ngài só chhóng-chho ke pak-chhu chûng kì chhin thi̍t-phe̍t; chṳ́-yû kì ke Chhóng-chho-chá chang-nèn tá-yàng kì.
[20] Chhai yâ-chhu fa̍t-thung ke sân-lìm chûng, yû sâng tông-tô kì oi sṳ̍t ke chhó.
[21] Kì soi chhai lièn-fâ ya̍p hâ-poi, phu̍k chhai lù-chuk lâu nam-nài tú.
[22] Lièn-fâ ke ya̍p cho-tet lâu kì châ-liòng, hò-pa sùn ke liû-su ya vì-tén kì.
[23] Hò-pa cho thai-súi ke sṳ̀, kì m̀-voi kín-chông; Yok-tan-hò ke súi chong-to kì ke choi-sùn, kì ya ôn-yèn chhṳ-chhai.
[24] Má-ngìn nèn hi êm kì ke muk-chû chok kì? Má-ngìn nèn yung kiêu-é khien kì ke phi-khûng?